شفقت منظور امبر

 یوم پیدائش کی مبارکباد

03 فروری 1988

خیالوں میں وہ چہرہ جب بناؤ ں گا

گھٹا زلفیں گلابی لب بناؤ ں گا 

ستاروں کے علاوہ گر بنایا کچھ

خیالوں کی ردا پر شب بناؤ ں گا

رواں جھرنے ھوا شبنم گلابی پھول

خیالوں کی میں دنیا سب بناؤ ں گا

چنابی نقش تو مجھ کو بنانے دو

گھڑا تم نے کہا تو تب بناؤ ں گا

شفقت منظور امبر

قمر اقبال

 یوم پیدائش 02 فروری 1944

 

یوں قید ہم ہوئے کہ ہوا کو ترس گئے

اپنے ہی کان اپنی صدا کو ترس گئے 

تھے کیا عجیب لوگ کہ جینے کے شوق میں

آب حیات پی کے ہوا کو ترس گئے 

کچھ روز کے لیے جو کیا ہم نے ترک شہر

باشندگان شہر جفا کو ترس گئے 

مردہ ادب کو دی ہے نئی زندگی مگر

بیمار خود پڑے تو دوا کو ترس گئے 

خالی جو اپنا جسم لہو سے ہوا قمرؔ

کتنے ہی ہاتھ رنگ حنا کو ترس گئے

 

قمر اقبال

کشور ناہید

 یوم پیدائش 03 فروری 1940

ترے قریب پہنچنے کے ڈھنگ آتے تھے

یہ خود فریب مگر راہ بھول جاتے تھے

ہمیں عزیز ہیں ان بستیوں کی دیواریں

کہ جن کے سائے بھی دیوار بنتے جاتے تھے

ستیز نقش وفا تھا تعلق یاراں

وہ زخمۂ رگ جاں چھیڑ چھیڑ جاتے تھے

وہ اور کون ترے قرب کو ترستا تھا

فریب خوردہ ہی تیرا فریب کھاتے تھے

چھپا کے رکھ دیا پھر آگہی کے شیشے کو

اس آئینے میں تو چہرے بگڑتے جاتے تھے

اب ایک عمر سے دکھ بھی کوئی نہیں دیتا

وہ لوگ کیا تھے جو آٹھوں پہر رلاتے تھے

وہ لوگ کیا ہوئے جو اونگھتی ہوئی شب میں

در فراق کی زنجیر سی ہلاتے تھے

کشور ناہید

قلیل جھانسوی

 یوم پیدائش 03 فروری 1951

جب وہ جھگڑے مٹا چکے ہوں گے

خون کتنا بہا چکے ہوں گے 

چاند کا زخم دیکھنے والے

شمعیں کتنی بجھا چکے ہوں گے 

کل کے سپنوں کو پالنے والو

کل تو سپنے رلا چکے ہوں گے 

ان کے تم دوست ہو کہ دشمن ہو

وہ جو مقتل میں جا چکے ہوں گے 

بس قلیلؔ ان کی یاد باقی ہے

دشمنی جو نبھا چکے ہوں گے

 

قلیل جھانسوی

شوکت تھانوی

 یوم پیدائش 03 فروری 1904

ہو راہزن کی ہدایت کہ راہبر کے فریب

مری نگاہ نے کھائے نظر نظر کے فریب 

یہ بت کدہ یہ کلیسا یہ مسجدیں یہ حرم

یہ سب فریب ہیں اور ایک سنگ در کے فریب 

سمجھ رہے تھے کہ اشکوں سے ہوگا دل ہلکا

نہ جانتے تھے کہ ہیں یہ بھی چشم تر کے فریب 

پتہ چلا کہ ہر اک گام میں تھی اک منزل

کھلے ہیں منزل مقصود پر سفر کے فریب 

انہیں کا نام محبت انہیں کا نام جنوں

مری نگاہ کے دھوکے تری نظر کے فریب

شوکت تھانوی

پریم کمار نظر

 یوم پیدائش 03 فروری 1934

پاگل ہوا کے دوش پہ جنس گراں نہ رکھ

اس شہر بے لحاظ میں اپنی دکاں نہ رکھ 

اس کا دیا ہوا ہے جسم اس کے سپرد کر

رکھنے کی اس ہوس میں تو دونوں جہاں نہ رکھ 

اس کا زوال دیکھ کے وہ سلطنت نہ چھوڑ 

اس زندگی میں لمحۂ سود و زیاں نہ رکھ 

وہ فصل پک چکی تھی اب اس کا بھی کیا قصور

تجھ سے کہا تھا جیب میں چنگاریاں نہ رکھ 

وہ جسم ہے تو اس کو فقط جسم ہی سمجھ

پردا کسی فریب کا پھر درمیاں نہ رکھ

آئے گی ہر طرف سے ہوا دستکیں لیے

اونچا مکاں بنا کے بہت کھڑکیاں نہ رکھ

وہ جسم کھل رہا ہے گرہ در گرہ نظرؔ

یہ تیر چوک جائے گا ڈھیلی کماں نہ رکھ

پریم کمار نظر

کیف احمد کیفی

 یوم پیدائش کی مبارک باد

 02 فروری 1959

پہلے خود کو ٹٹول کر دیکھو

تب زباں اپنی کھول کر دیکھو

یہ ہوائیں کہاں سے آتی ہیں

ان دریچوں کو کھول کر دیکھو

عزم والو اسی اندھیرے میں

راستے کو ٹٹول کر دیکھو

اب زمانہ بدل گیا کتنا

ہوں جو آنکھیں تو کھول کر دیکھو

زندگی کی تہوں کو اے کیفی 

میری مانو تو کھول کر دیکھو

کیف احمد کیفی

قاضی انور

یوم پیدائش 02 فروری 1975

اگر آزار زندہ ہیں

تو سمجھو یار زندہ ہیں

وہاں تہذیب روشن ہے 

جہاں کردار زندہ ہیں

کڑی ہے دھوپ سورج کی

پس دیوار زندہ ہیں

زمانے میں محبت کے 

ابھی آثار زندہ ہیں

تری چاہت کا جادو ہے 

مرے اشعار زندہ ہیں

بدن مفلوج ہے انور

مگر افکار زندہ ہیں 

قاضی انور

ضیا جالندھری

 یوم پیدائش 02 فروری 1923

گماں تھا یا تری خوشبو یقین اب بھی نہیں

نہیں ہوا پہ بھروسہ تو کچھ عجب بھی نہیں 

کھلیں تو کیسے کھلیں پھول اجاڑ صحرا میں

سحاب خواب نہیں گریۂ طلب بھی نہیں 

ہنسی میں چھپ نہ سکی آنسوؤں سے دھل نہ سکی

عجب اداسی ہے جس کا کوئی سبب بھی نہیں 

ٹھہر گیا ہے مرے دل میں اک زمانے سے

وہ وقت جس کی سحر بھی نہیں ہے شب بھی نہیں 

تمام عمر ترے التفات کو ترسا

وہ شخص جو ہدف ناوک غضب بھی نہیں 

گلا کرو تو وہ کہتے ہیں یوں رہو جیسے

تمہارے چہروں پہ آنکھیں نہیں ہیں لب بھی نہیں 

مفاہمت نہ کر ارزاں نہ ہو بھرم نہ گنوا

ہر اک نفس ہو اگر اک صلیب تب بھی نہیں 

برا نہ مان ضیاؔ اس کی صاف گوئی کا

جو درد مند بھی ہے اور بے ادب بھی نہیں

ضیا جالندھری

ارشد محمود ارشد

 یوم پیدائش01 فروری 1975

مریضِ عشق تھےجیتے رہے دوا کے بغیر

بھنور میں ڈال دی ناؤ بھی ناخدا کے بغیر 

بجھا رہی ہے اگر وہ تو پھر بتاؤ مجھے 

کبھی چراغ بھی جلتا ہے کیا ہَوا کے بغیر 

بدن تو ٹوٹ رہا تھا مگر انا تھی ابھی

تمہارے در سے پلٹ آئے ہم صدا کے بغیر 

وہ مثلِ خواب تھا آنکھیں کھلیں تو چھوڑ گیا 

کہاں سے ڈھونڈ کے لاتا میں نقشِ پاکے بغیر

بچھڑ کے مجھ سے اُسے کوئی دیوتا نہ ملا

جوانی کاٹ دی میں نے بھی اپسرا کے بغیر 

گلہ میں کس سے کروں اب جو تُو ملا ہی نہیں

اُٹھائے ہاتھ تھے میں نے مگر دعا کے بغیر 

گناہ گار ہے ارشد یہ مانتا ہے مگر

پرندہ پَر کہاں مارے تری رضا کے بغیر 

ارشد محمود ارشد