خادم رزمی

 یوم پیدائش 02 فروری 1932

آن پہنچے ہیں یہ کہاں ہم لوگ

اب زمیں ہیں نہ آسماں ہم لوگ

کل یقیں بانٹتے تھے اوروں میں

اب ہیں خود سے بھی بد گماں ہم لوگ

کن ہواؤں کی زد میں آئے ہیں

ہو گئے ہیں دھواں دھواں ہم لوگ

چپ تو پہلے بھی جھیلتے تھے مگر

اس قدر کب تھے بے زباں ہم لوگ

کب میسر کوئی کنارہ ہو

کب سمیٹیں گے بادباں ہم لوگ

بن گئے راکھ اب نجانے کیوں

تھے کبھی شعلۂ تپاں ہم لوگ

ہم کو جانا تھا کس طرف رزمیؔ

اور کس سمت ہیں رواں ہم لوگ

خادم رزمی

فیاض وردک

 یوم پیدائش02 فروری 1970

سلسلہ در سلسلہ ہے درد کی زنجیر کا

کس سے پوچھوں کیا ہے منشا کاتبِ تقدیر کا

بے نوا ہونے لگے الفاظ میرے شہر میں

مٹ رہا ہے رفتہ رفتہ نقش ہر تحریر کا

لوگ کچھ معصوم سے مارے گئے اس شہر میں

کرنا ہوگا قاتلوں کو سامنا تعزیر کا

زندگی برباد ہو کر موت کا ساماں ہوئی

جانے کب ٹوٹے گا حلقہ درد کی زنجیر کا

میں نے اپنے دل کا خوں فیاض کرڈالا مگر

ختم ہوتا ہی نہیں ہے کھیل یہ تقدیر کا

فیاض وردک

زمن

 یوم پیدائش 02 فروری 1986

وفا کی روشنی ہے اور چاہت کا اجالا ہے

ہمارا دل یہ جان من محبت کا شیوالا ہے

تمہارا حسن شیشے سا یہاں سب لوگ پتھر کے

میرے پہلو میں آ جاؤ یہ گلشن پھولوں والا ہے

کسی سے درد کا شکوہ گلہ بھی کر نہیں سکتے

بڑے ہی ناز سے خود ہم نے ہی یہ روگ پالا ہے

جمال و حسن پر اپنے کبھی مغرور مت ہونا

یہ رنگت اڑنے والی ہے یہ بادل چھٹنے والا ہے

یقیں مانوں اندھیرے کی طرف ہی بڑھ رہا ہے وہ

جو دعویٰ کر رہا ہے یہ اسی کا بس اُجالا ہے

میرے غم کی تو یوں شدت بیانی ہو نہیں سکتی

میرے غم کے لیے یہ شاعری کچھ کم حوالہ ہے

تمہارے شہر میں چاہت بہت بدنام ہے جاناں

ہمارے گاؤں میں تو عشق اب بھی قیس والا ہے

زمن

اختر علیم سید

 یوم پیدائش 02 فروری 1952

کمالِ شوق یہی ہے تو با کمال ہیں ہم

ملے بغیر بھی آسودہءِ وصال ہیں ہم

رعایتیں ہمیں حاصل تھیں پیش دستی کی

اسے یقین تھا شائشتہِ جمال ہیں ہم

ہمیں نے ظلمتِ شب سے سحر تراشی ہے

ہمیں مثال بناؤ کہ بے مثال ہیں ہم

وہ جانتے ہیں جو علمِ شناخت رکھتے ہیں

ہمارے جیسے ہزاروں ہیں خال خال ہیں ہم

ستم تو یہ ہے کہ اپنی کبھی سنی ہی نہیں

خود آپ اپنے لئے جان کا وبال ہیں ہم

کچھ اس طرح ہمیں سلجھا رہا ہے وہ اختر

کہ جیسے الجھا ہوا سا کوئی سوال ہیں ہم

اختر علیم سید

ہاشم نعمانی

 یوم پیدائش 02 فروری 1964

آنکھوں کو جب دریا ہونا پڑتا ہے

سورج کو بھی ٹھنڈا ہونا پڑتا ہے

مر کر بھی تو چین کی نیند نصیب نہیں

قبر کے اندر زندہ ہونا پڑتا ہے 

تمہارے ذکر سے جنبش ہوئی ان آنکھوں کو 

میں وہ مریض ہوں جسکو غزل سنائی گئی 

ہاشم نعمانی

اسلم عارفی

 یوم پیدائش 02 فروری 1978

مرنے کے بعد تو کوئی نام و نشان ہو

پھرتا ہوں اس خیال سے کتبہ اُٹھا کے میں

اسلم عارفی

خلیق الزماں نصرت

 یوم پیدائش 02 فروری 1952

سرخیاں پڑھ کے ان اخباروں کی ڈر لگتا ہے

سارا عالم کسی بارود کا گھر لگتا ہے

بیٹھ جائیں گی یہ دیواریں کسی بھی لمحہ

اپنے گھر میں بھی تو رہتے ہوئے ڈر لگتا ہے

اپنے ہمسائے کے حالات ہیں اپنے جیسے

اپنے ہی گھر کی طرح ان کا بھی گھر لگتا ہے

آج بھی ہاتھ کی ریکھا کو مقدر سمجھیں

بلیاں کاٹ لیں رستے کو تو ڈر لگتا ہے

بول کے سچ ہی عدالت میں ہوئی رسوائی

اب تو سچ یہ ہے ہمیں سچ سے بھی ڈر لگتا ہے

خلیق الزماں نصرت

ڈاکٹر یونس خیال

 یوم پیدائش 02 فروری

دھوپ سے رشتہ ہے لیکن سائبانوں کی طرح

ہم زمیں پر بھی رہے تو آسمانوں کی طرح

تب سے اس کی دشمنی پر اعتبار آنے لگا

مشورے دیتا ہے جب سے مہربانوں کی طرح

رات بھر عرض تمنا، صبح کو فکر معاش

ہر گھڑی گزری ہے مجھ پر امتحانوں کی طرح

مے کدہ، ساقی ، صراحی اور ساغر آج بھی

یاد آتے ہیں مگر گزرے زمانوں کی طرح

موت صحرا میں چمکتے پانیوں کا سلسلہ

زندگی برسات میں کچے مکانوں کی طرح

ڈاکٹر یونس خیال

لطف الرحمن

 یوم پیدائش 02 فروری 1941

میں دور ہو کے بھی اس سے کبھی جدا نہ ہوا

کہ اس کے بعد کسی کا بھی آشنا نہ ہوا

تمام عمر مرا مجھ سے اختلاف رہا

گلہ نہ کر جو کبھی تیرا ہم نوا نہ ہوا

وہ جاتے جاتے دلاسے بھی دے گیا کیا کیا

یہ اور بات کہ پھر اس سے رابطہ نہ ہوا

ہزار شکر سلامت ہے میرا سر اب بھی

ہزار دشمن جاں سے بھی دوستانہ ہوا

ذرا سی چوٹ پہ جھنکار گونج اٹھتی ہے

کہ ساز ٹوٹ گیا پھر بھی بے صدا نہ ہوا

کچھ اتنا سہل نہیں تھا ضمیر کا سودا

بلا سے میں کبھی اہل قبا ہوا نہ ہوا

عجب ہے یادوں کی بہتی ہوئی یہ خشک ندی

لہو کو آنکھ سے ٹپکے ہوئے زمانہ ہوا

لطف الرحمن

اقبال متین

 یوم پیدائش 02 فروری 1929

برق ملتی ہے نہ تنکوں کو شرر ملتا ہے

دل کو برسات میں بے برگ شجر ملتا ہے

اس کی گرمئ سخن راس نہ آئی اس کو

اب وہ ملتا ہے تو کیا خاک بسر ملتا ہے

صرف جینے کی ہوس ساتھ رہے تو شاید

عمر کے ساتھ ہر اک گام پہ در ملتا ہے

چار دیواری سے شاید نہیں کچھ اس کو مفر

گھر کے باہر وہ بہ انداز دگر ملتا ہے

میں اسے بھول کے زندہ رہوں ممکن ہے مگر

مجھ کو ہر موڑ پہ اس شخص کا گھر ملتا ہے

جس کے کاسے میں انا ہے کوئی تخلیق نہیں

اس کو ہر لفظ میں اک کاسۂ سر ملتا ہے

درد کے ساتھ جڑا ہوتا ہے تخلیق کا کرب

کچھ سوا مجھ کو بہ ہنگام ہنر ملتا ہے

اب شہادت سر منبر ہی سہی عام ہوئی

اب دعاؤں کو کہاں باب اثر ملتا ہے

کل جہاں لاش پڑی تھی کوئی اقبال متینؔ

آج بھی کون وہاں خون میں تر ملتا ہے

اقبال متین