شعور آشنا

 یوم پیدائش 12 فروری 1967

تھی جیسی آرزو ہمیں ویسا نہیں ملا

ایسا نہیں کہ چاہنے والا نہیں ملا

شامل ہے اپنا خون چمن کی بہار میں

شاید ایسی لئے ہمیں حصہ نہیں ملا

فرقہ پرست سوچ ملی ہم جدھر گئے

مر مٹنے والا ملک میں جذبہ نہیں ملا

حیوانیت نے شہر میں خیمے لگا لئے

انسانیت نواز قبیلہ نہیں ملا

بے چہرہ وادیوں میں بھٹکنے کے جرم میں

اب تک مری حیات کو رستہ نہیں ملا

الفاظ بد حواس تھے معنیٰ کی پیاس سے

صحرا نورد ذہن کو دریا نہیں ملا

کھلتی نہیں کلی کہیں اخلاق کی شعور 

اب کوئی پھول بھی ہمیں ہنستا نہیں ملا

شعور آشنا

مرید عباس خاور

 یوم پیدائش 12 فروری 1963

ضو فشاں ہے میری قسمت کا نشاں 

ساتھ میرے ہے صف چارہ گراں 

 آتش وآب کا اسرار ہے یہ 

 چشم ودل میں تو نہیں ربط عیاں

  

 وہ کثافت ہے ہوس کی اب تو 

 عشق پر بھی ہے برائی کا گماں 

  

 ایک جیسا ہے رویہ سب کا 

 ایک جیسے ہیں عدو و یاراں

  

 حرص کی آگ میں جلتا تھا بہت

 اب ہے سور ج میرا لیکن ایماں

  

 کتنا محکم ہے زمیں پر شر ہی 

 خیر آئی نہیں مدت سے یہاں 

 

 خاور اس امن کے عرصے کی کہو 

 جو ہے چوپال کا رسمی عنواں 

 

 مرید عباس خاور

صابرہ خاتون حنا

 یوم پیدائش 12 فروری 1974

جب تری یاد ساتھ چلتی ہے

زندگی راہ میں بہلتی ہے

کاش تم ہوتے میرے پہلو میں

ہجر کی رات آنکھ ملتی ہے

تجھ کو احساس تو ہوا آخر

میرے سائے میں زیست پلتی ہے

تجھ سے مل کر سکوں نہیں ملتا

دکھ کی پرچھائیں ساتھ چلتی ہے

پھر تجھے اپنے پاس میں دیکھوں

اس تمنا میں رات ڈھلتی ہے

رات تک تھا جہاں مرا مسکن

صبح دیکھا تو آگ جلتی ہے

اے حناؔ تیری میٹھی باتوں سے

”نغمگی سی فضا میں ڈھلتی ہے“

صابرہ خاتون حنا

سر فراز سید

 یوم پیدائش 12 فروری

مال و متاع کوچہ و بازار بک گئے 

عہد ہوس میں سب در و دیوار بک گئے 

قصر شہی میں جبہ و دستار بک گئے 

نیلام گھر میں قافلہ سالار بک گئے 

جنس وفا کے چاؤ میں آئے تھے صبح دم 

بولی لگی تو خود بھی خریدار بک گئے 

شب بھر رہی فضا میں وفاداریوں کی گونج 

سورج چڑھا تو سارے وفادار بک گئے 

وہ زور تھا گرانیٔ جنس ہنر کا آج 

میں خود بھی بک گیا مرے افکار بک گئے 

ہوش و حواس قلب و نظر سجدہ و قیام 

اے عشق تیرے سارے ہی غم خوار بک گئے

سرفراز سید

حکیم محمد اجمل خاں شیدا

 یوم پیدائش 12 فروری 1868

درد کو رہنے بھی دے دل میں دوا ہو جائے گی

موت آئے گی تو اے ہمدم شفا ہو جائے گی

ہوگی جب نالوں کی اپنے زیر گردوں بازگشت

میرے درد دل کی شہرت جا بجا ہو جائے گی

کوئے جاناں میں اسے ہے سجدہ ریزی کا جو شوق

میری پیشانی رہین نقش پا ہو جائے گی

کاکل پیچاں ہٹا کر رخ سے آؤ سامنے

پردہ دار حسن محفل میں ضیا ہو جائے گی

جب یہ سمجھوں گا کہ میری زیست ہے ممنون مرگ

موت میری زندگی کا آسرا ہو جائے گی 

انتظار وصل کرنا عمر بھر ممکن تو ہے

گو نہیں معلوم حالت کیا سے کیا ہو جائے گی

محتسب اور ہم ہیں دونوں متفق اس باب میں

برملا جو مے کشی ہو بے ریا ہو جائے گی

میں ابھی سے جان دے دوں گا جو راہ عشق میں

انتہا مجنوں کی میری ابتدا ہو جائے گی

فاش راز دل نہیں کرتا مگر یہ ڈر تو ہے

بے خودی میں آہ لب سے آشنا ہو جائے گی

باریاب خواب گاہ ناز ہونے دو اسے

ان کی زلفوں میں پریشاں خود صبا ہو جائے گی

مقصد الفت کو کر لو پہلے شیداؔ دل نشیں

ورنہ ہر آہ و فغاں بے مدعا ہو جائے گی

حکیم محمد اجمل خاں شیدا

اعجاز رحمانی

 یوم پیدائش 12 فروری 1936

اب کرب کے طوفاں سے گزرنا ہی پڑے گا

سورج کو سمندر میں اترنا ہی پڑے گا

فطرت کے تقاضے کبھی بدلے نہیں جاتے

خوشبو ہے اگر وہ تو بکھرنا ہی پڑے گا

پڑتی ہے تو پڑ جائے شکن اس کی جبیں پر

سچائی کا اظہار تو کرنا ہی پڑے گا

ہر شخص کو آئیں گے نظر رنگ سحر کے

خورشید کی کرنوں کو بکھرنا ہی پڑے گا

میں سوچ رہا ہوں یہ سر شہر نگاراں

یہ اس کی گلی ہے تو ٹھہرنا ہی پڑے گا

اب شانۂ تدبیر ہے ہاتھوں میں ہمارے

حالات کی زلفوں کو سنورنا ہی پڑے گا

اک عمر سے بے نور ہے یہ محفل ہستی

اعجازؔ کوئی رنگ تو بھرنا ہی پڑے گا

اعجاز رحمانی

انور ضیاء مشتاق

 یوم پیدائش 11 فروری

کیا اسے کرنا تھا جانے اور یہ کیا کر گئی

زندگی ہی زندگی کو کتنا تنہا کر گئی

دھوپ اوڑھے چل رہا تھا اور سفر دشوار تھا

دفعتاً اک یاد مجھ پہ اپنا سایہ کر گئی

کیا مسیحائی تھی تیری اے مسیحا دیکھ لے

زخم جو گہرا تھا اس کو اور گہرا کر گئی

کیا کسی سے ہو شکایت کیا کسی سے ہو گلہ

وہ مری قسمت تھی جو مجھ کو اکیلا کر گئی

انور ضیاء مشتاق

عبد الغفور نساخ

 یوم پیدائش 11 فروری 1834

ظاہراً موت ہے قضا ہے عشق

پر حقیقت میں جاں فزا ہے عشق 

دیتا ہے لاکھ طرح سے تسکین 

مرض ہجر میں دوا ہے عشق 

تا دم مرگ ساتھ دیتا ہے 

ایک محبوب با وفا ہے عشق 

دیکھ نساخؔ گر نہ ہوتا کفر 

کہتے بے شبہ ہم خدا ہے عشق

عبد الغفور نساخ

مسرور تمنا

 یوم پیدائش 10 فروری 1981

میری نظروں کو لبھاتا ہے نظارا کیا کیا

جذبۂ عشق دکھاتا ہے تماشا کیا کیا

دیکھتے ہیں ابھی ہم اُن کے حسیں چہرے کو

اور دکھلائے گا اُن کا رخِ زیبا کیا کیا

میں نے بس ایک نظر اُن کی طرف ڈالی تھی

اور دنیا نے بنا ڈالا فسانہ کیا کیا

اتنی فرصت ہے کسے دھیان جو دے اُس کی طرف

روز ہوتا ہے مرے شہر میں چرچا کیا کیا

کیا سے کیا ہوگیا قسمت کے خفا ہونے سے

سوچتی میں رہی مسرور تمنا کیا کیا

مسرور تمنا

قیصر امام قیصر

 یوم پیدائش 10 فروری 1962

وہ جفا کرتے رہے اور میں وفا کرتا رہا

وار اُن کا اس لیے اکثر خطا کرتا رہا

مانگتا تھا رات دن رب سے دعا جس کے لیے

وہ ہمیشہ میرے حق میں بدعا کرتا رہا

آندھیوں کی زد میں آکر ہوگیا ظالم فنا

بھائی سے جو بھائی کو ہردم جدا کرتا رہا

دن میں جو سجدے کیا کرتا تھا رب کے سامنے

شب کی تنہائی میں لیکن وہ خطا کرتا رہا

اُس کو جنت کی بشارت خود بخود مل جائے گی

زندگی بھر باپ ماں سے جو وفا کرتا رہا

پیشِ حق دینا پڑے گا ان گناہوں کا حساب

چھپ کے قیصر جن گناہوں کو سدا کرتا رہا

قیصر امام قیصر