خواجہ مظفر مینائی

 یوم پیدائش 01 مئی 1973

کسی دربار میں نہیں ملتا 

عشق بازار میں نہیں ملتا

کچھ ہیں مندر میں کچھ ہیں قبروں پر

پھول گلزار میں نہیں ملتا

کون سمجھائے شان والوں کو

سایہ دستار میں نہیں ملتا

ڈھونڈتا ہوں جسے وہ اے دنیا

تیرے سنگار میں نہیں ملتا

دکھ تو ہوتا ہے جب بھی تیرا نام

دل کی جھنکار میں نہیں ملتا

اے مظفر مجھے غزل کی قسم

بغض فنکار میں نہیں ملتا 

خواجہ مظفر مینائی

ساگر ثنااللہ

 یوم پیدائش 01 مئی 2001

ہم غریبوں کی جمع پونجی میں

یہ   محبت    بڑا   خزانہ  ہے

ساگر ثنااللہ

رخسانہ جبیں

 یوم پیدائش 01 مئی 1955

یہ ہماری زمیں وہ تمہاری زمیں 

سرحدیں کھا گئی ہیں یہ ساری زمیں 

تیری خاطر ہی کٹوائے سر بے شمار 

قیمت ایسی چکا دی ہے بھاری زمیں 

آنکھ اٹھی بھی نہ تھی تیری جانب ابھی 

ضرب سینوں پہ لگوا دی کاری زمیں 

غیر کوئی قدم رکھ نہ پائے یہاں 

ندیاں خون کی کر دیں جاری زمیں 

آسماں کا گماں سب کو ہونے لگا 

چاند تاروں سے ہم نے سنواری زمیں 

روز اگتا ہے سورج اسی کوکھ سے 

اور ہر شام روئی کنواری زمیں

رخسانہ جبیں

شہاب الدین شاہ قنوجی

 یوم پیدائش 01 مئی 1974

خود کو سلگا کے مروت کے اجالے رکھنا

کتنا مشکل ہے محبت کو سنبھالے رکھنا

تم سے امید نہیں مہرے وفا کی لیکن

عشق کا کام ہے امید کو پالے رکھنا

قید ہوتا نہیں اے شاہ کوئی نور افق 

کام ہے نور کا بس راہ نکالے رکھنا

شہاب الدین شاہ قنوجی

خالد ندیم شانی​

 یوم پیدائش 01 مئی 1975

خط کے چھوٹے سے تراشے میں نہیں آئیں گے

غم زیادہ ہیں لفافے میں نہیں آئیں گے

ہم نہ مجنوں ہیں، نہ فرہاد کے کچھ لگتے ہیں

ہم کسی دشت تماشے میں نہیں آئیں گے

مختصر وقت میں یہ بات نہیں ہو سکتی

درد اتنے ہیں خلاصے میں نہیں آئیں گے

اُس کی کچھ خیر خبر ہو تو بتاؤ یارو

ہم کسی اور دلاسے میں نہیں آئیں گے

جس طرح آپ نے بیمار سے رخصت لی ہے

صاف لگتا ہے جنازے میں نہیں آئیں گے

خالد ندیم شانی​

 یوم پیدائش 28 اپریل 1968

چاہت کو زندگی کی ضرورت سمجھ لیا 

اب غم کو ہم نے تیری عنایت سمجھ لیا 

کھاتے رہے ہیں زیست میں کیا کیا مغالطے 

قامت کو اس حسیں کی قیامت سمجھ لیا 

کردار کیا رہا ہے کبھی یہ بھی سوچتے 

سجدے کیے تو ان کو عبادت سمجھ لیا 

ریشم سے نرم لہجے کے پیچھے مفاد تھا 

اس تاجری کو ہم نے شرافت سمجھ لیا 

اب ہے کوئی حسین نہ لشکر حسین کا 

سر کٹ گئے تو ہم نے شہادت سمجھ لیا 

اس طرح عمر چین سے کاٹی شکیلؔ نے 

دکھ اس سے جو ملا اسے راحت سمجھ لیا

اطہر شکیل 

اشرف گل

 یوم پیدائش 30 اپریل 1940

میں با وفا ہی رہا رہ کے بے وفاؤں میں 

گل بہار کی صورت کھلا خزاؤں میں

 

بھری بہار میں دیکھے جو پھول جلتے ہوئے 

رکے نہ اشکوں کے دریا مری گھٹاؤں میں 

ہمارے ہاتھوں سے جب وقت کی گرہ نہ کھلی 

تو لوگ سمجھے کہ ہم خوش ہیں ابتلاؤں میں

 

ترے حضور رہی قہقہوں پہ پابندی 

رہا ہے خوف بھی رقصاں مری صداؤں میں

 

کرو نہ ساری مکدر فضا جہاں والو 

مرے بھی حصے کی سانسیں ہیں ان ہواؤں میں 

خلوص کی نہ چلی ایک بھی یہاں اشرفؔ 

گنوایا وقت عبث ہم نے التجاؤں میں

اشرف گل

نظرعلی

 یوم پیدائش 30 اپریل 1962

جدھر دیکھو ادھر دہشت کھڑی ہے

 خدارا خير ہو مشکل بڑی ہے

 

خموشی اس قدر چھائی ہے ہر سو

نگر کی ہر گلی سونی پڑی ہے

پرندے ناتواں ہیں آشیاں میں

نگاه باز ہر جاں پر  گڑی ہے 

 جہاں پر بھائی چارے کی ضیا تھی

 وہاں اب تیرگی پھیلی پڑی ہے

 

محبت آئے تو آئے کدھر سے

عداوت راستہ روکے کھڑی ہے

بنایا کارواں کا جن کو رہبر

شرارت ان کے تاجوں میں جڑی ہے

حکومت ہے جہاں میں نفرتوں کی

نظر یہ بھی سیاست کی کڑی ہے

نظرعلی

اسلم انصاری

 یوم پیدائش 30 اپریل 1939

ہر شخص اس ہجوم میں تنہا دکھائی دے

دنیا بھی اک عجیب تماشا دکھائی دے

اک عمر قطع وادیٔ شب میں گزر گئی

اب تو کہیں سحر کا اجالا دکھائی دے

اے موجۂ سراب تمنا ستم نہ کر

صحرا ہی سامنے ہے تو صحرا دکھائی دے

میں بھی چلا تو پیاس بجھانے کو تھا مگر

ساحل کو دیکھتا ہوں کہ پیاسا دکھائی دے

الفاظ ختم ہوں تو ملے رشتۂ خیال

یہ گرد بیٹھ جائے تو رستہ دکھائی دے

کون اپنا عکس دیکھ کے حیراں پلٹ گیا

چہرہ یہ موج موج میں کس کا دکھائی دے

تو منکر وفا ہے تجھے کیا دکھاؤں دل

غم شعلہ نہاں ہے بھلا کیا دکھائی دے

ہر شب در خیال پہ ٹھہرے وہ ایک چاپ

ہر شب فصیل دل پہ وہ چہرہ دکھائی دے

لب‌ بستگی سے اور کھلے غنچۂ صدا

وہ چپ رہے تو اور بھی گویا دکھائی دے

اسلمؔ غریب‌ شہر سخن ہے کبھی ملیں

کہتے ہیں آدمی تو بھلا سا دکھائی دے

اسلم انصاری

کامران حامد

 یوم پیدائش 30 اپریل 1996

دل کے نئے مکاں میں ہر چیز اب نئی ہے

تصویر اک پرانی بس آپ کی رکھی ہے

کیسے صدائے فرحت آؤں میں تیری جانب

کمبخت یہ اداسی در پر کھڑی ہوئی ہے

بدلا ہے گھر کا نقشہ بدلا ہے رنگ و روغن

لیکن مکیں وہی ہے دیوار و در وہی ہے

میں کب سے منتظر ہوں ، کچھ تو کہے گی مجھ سے

یہ چاندنی جو میری چھت پر ٹہل رہی ہے

کتنا عجیب ہوں میں رہتا ہوں خوش ہمیشہ

اور یاد بھی نہیں ہے، کس بات کی خوشی ہے

تم بھی محبتوں سے اب پیش آ رہے ہو

کیا ہوگیا ہے تم کو، کیا بات ہو گئی ہے؟

اک شخص تھا جو بیٹھا ساحل پہ ہنس رہا تھا

اک چیخ تھی جو شاید دریا میں جا گری ہے

وہ بات جس کا کوئی سر ہے نہ پیر حامد

 وہ بات جانے کیسے دل پر مرے لگی ہے

کامران حامد