شکیل احمد شکیل

یوم پیدائش 16 سپتمبر 1954

ہے دل میں نور وفا کے چراغ کے جیسا

چلے بھی آؤ بیاباں ہے باغ کے جیسا

قدم قدم پہ نگاہوں کی جستجو ہے وہی

کسی کا نام ملا ہے سراغ کے جیسا

شراب لطف و کرم اس کی آنکھ سے چھلکی

سرور پھر نے نہ ملا اس ایاغ کے جیسا

شکیل صبر سے لے کام عجلتیں کیسی

وہ محو گشت چمن ہے فراغ کے جیسا

شکیل احمد شکیل

عمر قریشی

یوم پیدائش 16 سپتمبر 1924

یہ مرے جذب محبت کی پذیرائی ہے

وہ بھی کہنے لگے دیوانہ ہے سودائی ہے

ہر طرف تو ہے تری یاد ہے آہٹ تیری

تیری محفل سے تو اچھی مری تنہائی ہے

اس سے بہتر ہے کہ تجدید محبت کر لے

بے وفا بن کے بھی رہنا تری رسوائی ہے

شیشہ‌ٔ جسم ہوا جاتا ہے ٹکڑے ٹکڑے

یہ قیامت ہے کہ ظالم تری انگڑائی ہے

ایسا بدلا ہے زمانہ کہ الٰہی توبہ

جو تماشا تھا وہی آج تماشائی ہے

مطمئن ہوں میں عمرؔ شیشے کے گھر میں رہ کر

پتھروں سے مری صدیوں کی شناسائی ہے

عمر قریشی

محمد اجمل نیازی

یوم پیدائش 16 سپتمبر 1946

بکھرتی خاک میں کوئی خزانہ ڈھونڈھتی ہے 

تھکی ہاری زمیں اپنا زمانہ ڈھونڈھتی ہے 

شجر کٹتے چلے جاتے ہیں دل کی بستیوں میں 

تری یادوں کی چڑیا آشیانہ ڈھونڈھتی ہے 

یقیں کی سر زمیں ظاہر ہوئی اجڑے لہو میں 

یہ ارض بے وطن اپنا ترانہ ڈھونڈھتی ہے 

بھٹکتی ہے تجھے ملنے کی خواہش محفلوں میں 

یہ خواہش خواہشوں میں آستانہ ڈھونڈھتی ہے 

ترے غم کا خمار اترا ادھوری کیفیت میں 

یہ کیفیت کوئی موسم پرانا ڈھونڈھتی ہے 

بکھرتا ہوں جدائی کی اکیلی وسعتوں میں 

یہ ویرانی مرے گھر میں ٹھکانہ ڈھونڈھتی ہے 

مری مٹی سجائی جا رہی ہے آنگنوں میں 

یہ رستوں پر تڑپنے کا بہانہ ڈھونڈھتی ہے 

محمد اجمل نیازی

سحر عشق آبادی

یوم پیدائش 16 سپتمبر 1903

تکمیل عشق جب ہو کہ صحرا بھی چھوڑ دے

مجنوں خیال محمل لیلا بھی چھوڑ دے

کچھ اقتضائے دل سے نہیں عقل بے نیاز

تنہا یہ رہ سکے تو وہ تنہا بھی چھوڑ دے

یا دیکھ زاہد اس کو پس پردۂ مجاز

یا اعتبار دیدۂ بینا بھی چھوڑ دے

کچھ لطف دیکھنا ہے تو سودائے عشق میں

اے سرفروش سر کی تمنا بھی چھوڑ دے

وہ درد ہے کہ درد سراپا بنا دیا

میں وہ مریض ہوں جسے عیسیٰ بھی چھوڑ دے

آنکھیں نہیں جو قابل نظارۂ جمال

طالب سے کہہ دو ذوق تماشا بھی چھوڑ دے

ہے برق پاشیوں کا گلہ سحرؔ کو عبث

کیا اس کے واسطے کوئی ہنسنا بھی چھوڑ دے

سحر عشق آبادی

عرفان حیدر

یوم پیدائش 15 سپتمبر 

ذکرِ حسن ؓ حسین ؓسخن در سخن رہے

زندہ غمِ حسین ؓ کی یہ انجمن رہے

 یارب مری زبان کو میثم شناس کر

سولی پہ چڑھ کے ذکرِ علی ؓ میں مگن رہے

الحاد، شر، نفاق، ولایت کی دشمنی 

پاکیزہ ہر مرض سے ہمارا وطن رہے

جاری فراتِ چشم ہو پیاسوں کی یاد میں 

اک بے نوا کی یاد میں زخمی بدن رہے 

کرتے نہیں شکست کے ماروں کا تذکرہ 

جاری لبوں پہ قصۂِ فتحِ حسن ؓ رہے 

مجھ کو علی ؓ کے عشق میں دیوانہ کہتے ہیں 

میں چاہتا ہوں یہ میرا دیوانہ پن رہے

حبدار کو نہ غم ہو سوائے غمِ حسین ؓ 

یارب ہرا بھرا یہ عزائی چمن رہے

عرفان یہ دعا ہے خدا وند سے مری

میرے لہو میں عشقِ علی ؓ کی لگن رہے

عرفان حیدر

محبوب اکبر

یوم پیدائش 15 سپتمبر 1969

فرش پر جیسے شکستہ بتِ پندار گرے

اس طرح رات کو سورج کے پرستار گرے

جس کو کشکولِ تمنا میں سجا رکھا تھا

وہ نگینے مری پلکوں سے کئی بار گرے

ایک کہرام سا مچ جاتا ہے گھر کے اندر

روح کے سامنے جب جسم کی دیوا رگرے

خود نمائی سے بچو یہ ہے خودی کی دشمن

جس کی تقلید سے انسان کا کردار گرے

باغباں ہی نہیں پنچھی کو بھی ہوتا ہے ملال

پیڑ جب کوئی گلستاں کا ثمردار گرے

بخش دیتا ہے گناہوں کو یقیناً اس کے

ہو کے شرمندہ جو سجدے میں گنہہ گار گرے

دیکھ کر میرے تخیل کی بلندی اکثر

کچھ کبوتر گرے ، شاہیں گرے ، تغدار گرے

اس طرح سے گرے محبوب مرے دل کا مکاں

جیسے آندھی میں کوئی رات کی دیوار گرے

محبوب اکبر

حسن اثر

یوم پیدائش 15 سپتمبر 1942

ہنسنے لگی ہے رات ، چمکنے لگا ہے شہر

بڑھنے لگی ہیں اپنے بھی گھر کی اداسیاں

حسن اثر

 

خمار بارہ بنکوی

یوم پیدائش 15 سپتمبر 1919

نہ ہارا ہے عشق اور نہ دنیا تھکی ہے

دیا جل رہا ہے ہوا چل رہی ہے

سکوں ہی سکوں ہے خوشی ہی خوشی ہے

ترا غم سلامت مجھے کیا کمی ہے

کھٹک گدگدی کا مزا دے رہی ہے

جسے عشق کہتے ہیں شاید یہی ہے

وہ موجود ہیں اور ان کی کمی ہے

محبت بھی تنہائی دائمی ہے

چراغوں کے بدلے مکاں جل رہے ہیں

نیا ہے زمانہ نئی روشنی ہے

ارے او جفاؤں پہ چپ رہنے والو

خموشی جفاؤں کی تائید بھی ہے

مرے راہبر مجھ کو گمراہ کر دے

سنا ہے کہ منزل قریب آ گئی ہے

خمارؔ بلا نوش تو اور توبہ

تجھے زاہدوں کی نظر لگ گئی ہے

خمار بارہ بنکوی

عرفان الحق صائم

یوم پیدائش 14 سپتمبر 1951

دیوار میں امکان کا اک در کوئی کھولے

اوجھل ہے جو آنکھوں سے وہ منظر کوئی کھولے

اب شہر کے اندر بھی تو ہر روز ہے ہجرت

کیا ایسے میں باندھا ہوا بستر کوئی کھولے

رقصاں ہو تو پھر نیند سے اٹھنے نہیں دیتی

اس بادِ صبا کی ذرا جھانجھر کوئی کھولے

جب ان سنی ہر بات کے ہونے کا یقیں ہو

کیوں اپنی شکایات کا دفتر کوئی کھولے

آسیب کے آجانے سے کچھ پہلے عزیزو

ممکن ہو تو اس دل کا ہر اک گھر کوئی کھولے

اب شہر کے ہر شخص کی خواہش ہے یہ صائمؔ

جو باندھ کے رکھا ہے سمندر کوئی کھولے

عرفان الحق صائم

 

شوکت پردیسی

یوم وفات 14 سپتمبر 1995

میرے محبوب مرے دل کو جلایا نہ کرو 

ساز چھیڑا نہ کرو گیت سنایا نہ کرو 

جاؤ آباد کرو اپنی تمناؤں کو 

مجھ کو محفل کا تماشائی بنایا نہ کرو 

میری راہوں میں جو کانٹے ہیں تو کیوں پھول ملیں 

میرے دامن کو الجھنے دو چھڑایا نہ کرو 

تم نے اچھا ہی کیا ساتھ ہمارا نہ دیا 

بجھ چکے ہیں جو دیے ان کو جلایا نہ کرو 

میرے جیسا کوئی پاگل نہ کہیں مل جائے 

تم کسی موڑ پہ تنہا کبھی جایا نہ کرو 

یہ تو دنیا ہے سبھی قسم کے ہیں لوگ یہاں 

ہر کسی کے لیے تم آنکھ بچھایا نہ کرو 

زہر غم پی کے بھی کچھ لوگ جیا کرتے ہیں 

ان کو چھیڑا نہ کرو ان کو ستایا نہ کرو

شوکت پردیسی