سہیل ارشد

یوم پیدائش 15 جنوری 1966

کپکپی کیسی ہے یہ رہ رہ کے میرے جسم میں

لمس کا اس کے اثر یا چھپکلی ہے جسم پر

سہیل ارشد

زاہد مختار

یوم پیدائش 15 جنوری 1956

اب تو ہر گھر کا ایک ہی منظر

بند کمرہ، حصار، خاموشی

زاہد مختار

اظہر نیر

یوم پیدائش 15 جنوری 1945

سچ بولنا چاہیں بھی تو بولا نہیں جاتا 

جھوٹوں کے لئے شہر بھی چھوڑا نہیں جاتا 

تم کتنا ہی عہدوں سے نوازو ہمیں لیکن 

نفرت کا شجر ہم سے تو بویا نہیں جاتا 

سوچو تو جوانی کبھی واپس نہیں آتی 

دیکھو تو کبھی آ کے بڑھاپا نہیں جاتا 

دل پر تو بہت زخم زمانے کے لگے ہیں 

خود داری سے لیکن کبھی رویا نہیں جاتا 

دنیا بھی سکوں سے کبھی رہنے نہیں دیتی 

نوحہ بھی کبھی اپنوں کا لکھا نہیں جاتا 

پہرے مرے ہونٹوں پہ لگا رکھے ہیں اس نے 

چاہوں میں گلا کرنا تو بولا نہیں جاتا 

تنکے بھی نہیں چھوڑے ہیں نیرؔ کسی گھر کے 

سیلاب وہ آیا ہے کہ دیکھا نہیں جاتا

اظہر نیر

ناشاد اورنگ آبادی

یوم پیدائش 15 جنوری 1935

بھیجتا ہوں آپ کو اپنی پسندیدہ غزل 

تازہ تازہ ناشنیدہ اور نادیدہ غزل 

داستان حسن بھی ہے یہ سراپا حسن بھی 

سنگ مرمر سے مثال بت تراشیدہ غزل 

میرؔ غالبؔ ذوقؔ و مومنؔ پر بھی تھی جاں سے نثار 

تھی بہادر شاہ کی ہر چند گرویدہ غزل 

شہرۂ آفاق ہے اس کا جمال فکر و فن 

ساری اصناف سخن میں ہے جہاں دیدہ غزل 

پارہ پارہ ہو نہ جائے ماہ پارہ دیکھیے 

ہے ہوس ناکوں کے ہاتھوں آج رنجیدہ غزل 

شعر کی آمد نہیں ہوتی ہے کیا ناشادؔ اب 

شاعران‌ عصر تو کہتے ہیں پیچیدہ غزل

ناشاد اورنگ آبادی

حبیب احمد صدیقی

یوم پیدائش 15 جنوری 1908

خزاں نصیب کی حسرت بروئے کار نہ ہو 

بہار شعبدۂ چشم انتظار نہ ہو 

فریب خوردۂ الفت سے پوچھئے کیا ہے 

وہ ایک عہد محبت کہ استوار نہ ہو 

نظر کو تاب نظارہ نہ دل کو جرأت دید 

جمال یار سے یوں کوئی شرمسار نہ ہو 

قبا دریدہ و دامان و آستیں خونیں 

گلوں کے بھیس میں یہ کوئی دل فگار نہ ہو 

نہ ہو سکے گا وہ رمز آشنائے کیف حیات 

جو قلب چشم تغافل کا رازدار نہ ہو 

طریق عشق پہ ہنستی تو ہے خرد لیکن 

یہ گمرہی کہیں منزل سے ہمکنار نہ ہو 

نہ طعنہ زن ہو کوئی اہل ہوش مستوں پر 

کہ زعم ہوش بھی اک عالم خمار نہ ہو 

وہ کیا بتائے کہ کیا شے امید ہوتی ہے 

جسے نصیب کبھی شام انتظار نہ ہو 

یہ چشم لطف مبارک مگر دل ناداں 

پیام عشوۂ رنگیں صلائے دار نہ ہو 

کسی کے لب پہ جو آئے نوید زیست بنے 

وہی حدیث وفا جس پہ اعتبار نہ ہو 

جو دو جہان بھی مانگے تو میں نے کیا مانگا 

وہ کیا طلب جو بقدر عطائے یار نہ ہو

حبیب احمد صدیقی

 

نذیر قیصر

یوم پیدائش 15 جنوری 1945

میری آنکھوں کو مری شکل دکھا دے کوئی 

کاش مجھ کو مرا احساس دلا دے کوئی 

غرض اس سے نہیں وہ کون ہے کس بھیس میں ہے 

میں کہاں پر ہوں مجھے میرا پتا دے کوئی 

ڈھونڈھتا پھرتا ہوں یوں اپنے ہی قدموں کے نشاں 

جیسے مجھ کو مری نظروں سے چھپا دے کوئی 

دل کی تختی سر بازار لیے پھرتا ہوں 

کاش اس پر تری تصویر بنا دے کوئی 

یوں تجھے دیکھ کے چونک اٹھتی ہیں سوئی یادیں 

جیسے سناٹے میں آواز لگا دے کوئی 

دوسری سمت ہیں خوشبو کے افق کی صبحیں 

رنگ کے کہر کی دیوار گرا دے کوئی 

سانس روکے ہوئے بیٹھے ہیں مکانوں میں مکیں 

جانے کب اور کسے آ کے صدا دے کوئی

نذیر قیصر

 

یونس آرزو

یوم پیدائش 15 جنوری 1954

نفرت کے چراغوں کو حکمت سے بجھا دیں گے

ہم شمع محبت کی ہر دل میں جلا دیں گے

ہر رنگ کے پھولوں سے گل دان سجا دیں گے

ہر سمت نئی دنیا الفت کی بسا دیں گے

دعویٰ تو نہیں کرتے کوشش ہے مگر جاری

ماحول گلستاں کا پُرامن بنا دیں گے

ہر سمت فضاؤں میں الفت کی حکومت ہو

ہم سوچ میں انساں کی یہ بات بٹھا دیں گے

ہر شخص ہمیں اپنی مجلس میں بلائے گا

جب اپنے خیالوں کو پاکیزہ بنا دیں گے

ہر وقت فضاؤں میں خوشبو ہو محبت کی

ہم امن کے وہ پھول زمانے میں کھلا دیں گے

ہر فرد کی آنکھوں سے ہم پونچھ کے اشکِ غم

اک آرزوؔ جینے کی ہر دل میں جگا دیں گے

یونس آرزو

فیاض کاوش

یوم پیدائش 15 جنوری 1937

رباعی 

اب دل میں محبت کا شرارا بھی نہیں

کچھ آپ کی نظروں کا اشارا بھی نہیں

کس درجہ ہوئی تیرہ و تاریک حیات

پلکوں پہ لرزتا ہوا تارا بھی نہیں

رباعی 

بجلی کا گھٹاؤں میں سفر ہوتا ہے

تاروں میں تجلی کا گذر ہوتا ہے

اے روشنی_قلب کے منکر سن لے

پتھر کے بھی سینے میں شرر ہوتا ہے

رباعی 

آغوش_قمر میں جو مچل جاتی ہے

پھولوں کے جو پہلو سے نکل جاتی ہے

وہ مہکی ہوئی چاندنی کیسے ساقی

ہر صبح مرے جام میں ڈھل جاتی ہے

فیاض کاوش

عمانوئیل نذیر مانؔی

یوم پیدائش 14 جنوری 1972

لوٹ کر آئے نہیں شہر سے جانے والے 

جانے کس دیس میں جاتے ہیں نہ آنے والے

 

ہم نے ہر بار وفاؤں کی سزا پائی ہے 

ہم نے دھوکے یہاں کھائے ہیں نہ کھانے والے 

ہم نے اِس کارِ محبت میں قدم رکھا تھا 

ہم وہ عاشق ہیں میاں دشت بسانے والے 

اُس کو دیکھا تو مری آنکھ سے چھلکے آنسو 

کُچھ تو ہوتے ہی نہیں زخم چُھپانے والے 

اِن درختوں پہ بھی آسیب کا سایہ ہے کوئی 

سانپ بیٹھے ہیں پرندوں کو ستانے والے 

اب کے دشمن کے لئے مَیں نے دعا مانگی ہے 

دوست مِلتے ہیں مجھے خون بہانے والے 

میرے خوابوں کی یوں تعمیر کہاں ممکن ہے 

دل میں رہتے ہیں مری نیند چُرانے والے 

اُن کی یادوں سے نِکلتا ہی نہیں دِل مانی 

مر کے بھی ساتھ نبھاتے ہیں نبھانے والے 

عمانوئیل نذیر مانؔی

بھویش دلشاد

یوم پیدائش 14 جنوری 1981

نہ قریب آ نہ تو دور جا یہ جو فاصلہ ہے یہ ٹھیک ہے 

نہ گزر حدوں سے نہ حد بتا یہی دائرہ ہے یہ ٹھیک ہے 

نہ تو آشنا نہ ہی اجنبی نہ کوئی بدن ہے نہ روح ہی 

یہی زندگی کا ہے فلسفہ یہ جو فلسفہ ہے یہ ٹھیک ہے 

یہ ضرورتوں کا ہی رشتہ ہے یہ ضروری رشتہ تو ہے نہیں 

یہ ضرورتیں ہی ضروری ہیں یہ جو واسطہ ہے یہ ٹھیک ہے 

میری مشکلوں سے تجھے ہے کیا تیری الجھنوں سے مجھے ہے کیا 

یہ تکلفات سے ملنے کا جو بھی سلسلہ ہے یہ ٹھیک ہے 

ہم الگ الگ ہوئے ہیں مگر ابھی کنپکنپاتی ہے یہ نظر 

ابھی اپنے بیچ ہے کافی کچھ جو بھی رہ گیا ہے یہ ٹھیک ہے 

مری فطرتوں میں ہی کفر ہے مری عادتوں میں ہی عذر ہے 

بنا سوچے میں کہوں کس طرح جو لکھا ہوا ہے یہ ٹھیک ہے

بھویش دلشاد