گوہر سیما

یوم پیدائش 14 مارچ 1968

چلو دنیا میں مہکائیں محبت 

بشر کو آؤ سکھلائیں محبت

 

کریں مسمار دیواریں انا کی 

زمیں پر مل کے پھیلائیں محبت 

ہوئی ہے گم کہیں یہ وحشتوں میں 

چلو اب ڈھونڈ کر لائیں محبت 

خزاں سی چھا گئی نفرت کی ہر سو 

چمن میں پھر سے بکھرائیں محبت 

بہت مشکل سفر ہے عشق یارو 

کہاں تک سب کو سمجھائیں محبت

گوہر سیما

واقف القادری نانپاروی

یوم پیدائش 13 مارچ 1917

تا حشر رہے دل کو یارب آزار مدینے والے کا

سنتے ہیں مسیحا ہوتا ہے بیمار مدینے والے کا

اے زائر طیبہ فکر ہے کیوں تم نے تو مدینہ دیکھا ہے

 پروانۂ جنت ہوتا ہے دیدار مدینے والے کا

 

خود فاقے کئے غیروں کو دیا اور پیٹ سے یتھر کو باندھا

اے صَلِّ علےٰ سبحان اللہ ایثار مدینے والے کا

کیا ذکر ترے میخانے کا کوثر کو بھی ٹھکرا دیتا ہے

ساقی ہے دو عالم سے برہم میخوار مدینے والے کا

بیواؤں یتیموں کا حامی ہر بے کس و مضطر کا والی

مخلوق پہ تھا اللہ و غنی یہ پیار مدینے والے کا

بیکار ہے یہ فرد عصیاں بے سود ہیں شعلے دوزخ کے

بخشش کیلئے بس کافی ہے اقرار مدینے والے کا

تا حشر ر ہے گی اے واقف گلہائے عقیدت کی خوشبو

شاداب رہے گا عالم میں گلزار مدینے والے کا

واقف القادری نانپاروی

 

تنویر دانش

یوم پیدائش 13 مارچ 1977

یہ جو دو گھونٹ کی اداسی ہے

تم نے بھی دیکھ لی اداسی ہے

میری تصویر الٹ کر دیکھو

دوسری سمت بھی اداسی ہے 

دیکھ تو نے بھی خوب دان کیا

مجھ کو درکار بھی اداسی ہے

رکھ دیا ہے چراغ سرحد پر

دیکھ اس پار بھی اداسی ہے

بات جوں چل رہی تھی دانش سے

اس نے کہنا تھا پی اداسی ہے

تنویر دانش

 

مظہر محی الدین

یوم وفات 12 مارچ 2021

غم حیات کہاں تک تجھے مناؤں میں

نشاط وکیف کے ساماں کہاں سے لاؤں میں

بس اک صدا کہ دلِ مضطرب سے اٹھتی ہے

نہ تم کو یاد رکھوں اب نہ بھول پاؤں میں

تمام عمر رفیقوں کے درمیاں گزری

کچھ ایسا ہو کہ کبھی خود سے مل بھی پاؤں میں

بہت اُٹھائے ترے ناز زندگی اب تو

متاع درد بتا اور کیا کماؤں میں

زمانہ اپنے فتور نظر پہ شاداں ہے

بس ایک فکر ہر اک پل ، اسے جگاؤں میں

مظہر محی الدین 

عبد الطیف عارف

یوم پیدائش 12 مارچ 1947

غم عیش کے پردے میں نہاں دیکھ رہا ہوں

محرومیِ قسمت کو جواں دیکھ رہا ہوں

شید دلِ مضطر میں کہیں آگ لگی ہے

نزدیک گریباں کے دھواں دیکھ رہا ہوں

ہوتا ہے جہاں ذکر غم و رنج و الم کا

اے قلبِ حزیں تجھ کو وہاں دیکھ رہا ہوں

بس یاد ہی تیری ہے شبِ غم کا سہارا

رہ رہ کے اسے راحتِ جاں دیکھ رہا ہوں

عارفؔ کے خیالاتِ مزیّن کی نزاکت

ہرشعر کے پردے میں نہاں دیکھ رہا ہوں 

عبد الطیف عارف

اکرم کُنجاہی

یوم پیدائش 12 مارچ

ہیں بد نما جو تھے کبھی شہکا ر یا رسولؐ

خود دیکھ لیں یہ زیست کے رخسار یا رسولؐ

ہیں شاخ شاخ سوختہ وہ نخل بد نصیب

شاداب تھے کبھی مرے اشجار یارسولؐ

اِس بار ہیں شکستہ مرے بال و پر حضورؐ

 اِس بار حادثے ہیں دل ا فگار یا رسولؐ

آشوب زندگی کا ہے اِس بار خو ف ناک 

اب ساتھ سر کے جائے گی دستار یا رسولؐ

سب کر ر ہے ہیں زند گی کو روز خار زار

یہ زندگی کے دکھ سبھی آزار یا رسولؐ

کچھ بھی نہیں ہے تاز گی اور کچھ نہیں مٹھاس

بھولے ہیں اپنے ذائقے اشجار یا رسولؐ

ہر سانس ناؤ کیجیے در پیش ہے سفر 

 دریا کی موج موج میں منجدھار یا رسول ؐ

کرتے ہیں ہم تلاش سکوں بھی کہاں کہاں 

  قرآن اور حدیث مدد گار یا رسولؐ

ہر گز نہ منکشف ہوئے وہ رازِ کائنات

جو آپؐ ہی پہ وا ہو ئے اسرار یارسولؐ

آقاؐ ہیں عاصیوں کے بس اک آپؐ چارہ گر

کس سے کریں گے عرض گنہگار یا رسولؐ

ہو جائے اِس سماج میں بھی زیست خوش نما

میرے کریں نصیب کو بیدار یا رسولؐ

اکرم کُنجاہی

 

مطرب بلیاوی

یوم پیدائش 12 مارچ 1929

بڑی لطیف کشش تھی حسیں پناہ میں تھا 

کھلی جو آنکھ تو میں اپنی خواب گاہ میں تھا 

حدیث عہد مسرت مری نگاہ میں تھی 

کہ ایک پیکر رعنا دل تباہ میں تھا 

تلا ہوا تھا کبھی جان لینے دینے پر 

عجیب رنگ وفا اس کے انتباہ میں تھا 

مری حیات ہی قاتل سہی مگر مطربؔ 

بڑے سکون سے میں اپنی قتل گاہ میں تھا

مطرب بلیاوی

 

ہستی مل ہستی

یوم پیدائش 11 مارچ 1947

پیار کا پہلا خط لکھنے میں وقت تو لگتا ہے 

نئے پرندوں کو اڑنے میں وقت تو لگتا ہے 

جسم کی بات نہیں تھی ان کے دل تک جانا تھا 

لمبی دوری طے کرنے میں وقت تو لگتا ہے 

گانٹھ اگر لگ جائے تو پھر رشتے ہوں یا ڈوری 

لاکھ کریں کوشش کھلنے میں وقت تو لگتا ہے 

ہم نے علاج زخم دل تو ڈھونڈ لیا لیکن 

گہرے زخموں کو بھرنے میں وقت تو لگتا ہے

ہستی مل ہستی

نفیس الحسینی نفیس

یوم پیدائش 11 مارچ 1933

جس تصوف میں خود نمائی ہے

وہ عبادت نہیں خدائی ہے

وہ سزاوارِ پارسائی ہے

جس کی فطرت میں بے ریائی ہے

کچھ جو میری سمجھ میں آتی ہے

زندگی موت کی دہائی ہے

قید ہستی سے جو رہائی ہے

خیر مقدم کو مرگ آئی ہے

روزِ اوّل سے جانتا ہوں اُنھیں

ان سے دیر ینہ آشنائی ہے

اللہ اللہ ، خالق و مخلوق

صفر سے نسبتِ اکائی ہے

ہمیں تیرا نشاں ملے نہ ملے

آرزوئے شکستہ پائی ہے

سدرۃ المنتہی سے بھی گزرے (صلی اللہ علیہ وسلم)

اللہ اللہ کیا رسائی ہے

غم وہ تحریر ہے محبت کی

خونِ دل جس کی روشنائی ہے

ہائے اس بے نیاز کی دُنیا

جس میں نمرود کی خدائی ہے

تنگ اسلاف ہوں ، معاذ اللہ

توبہ توبہ یہ بے وفائی ہے

جو برائی ہے میری اپنی ہے

اُن کا صدقہ ہے جو بھلائی ہے

دل کے ساغر سے پی رہا ہوں نفیس

 وہ جو پثرب سے کھنچ آئی ہے

نفیس الحسینی نفیس

احمد کمال پروازی

یوم پیدائش 11 مارچ 1944

تجھ سے بچھڑوں تو تری ذات کا حصہ ہو جاؤں

جس سے مرتا ہوں اسی زہر سے اچھا ہو جاؤں

تم مرے ساتھ ہو یہ سچ تو نہیں ہے لیکن

میں اگر جھوٹ نہ بولوں تو اکیلا ہو جاؤں

میں تری قید کو تسلیم تو کرتا ہوں مگر

یہ مرے بس میں نہیں ہے کہ پرندہ ہو جاؤں

آدمی بن کے بھٹکنے میں مزا آتا ہے

میں نے سوچا ہی نہیں تھا کہ فرشتہ ہو جاؤں

وہ تو اندر کی اداسی نے بچایا ورنہ

ان کی مرضی تو یہی تھی کہ شگفتہ ہو جاؤں

احمد کمال پروازی