واقف آروی

یوم پیدائش 18 مارچ 1916

اچھی نہیں ہمیشہ حقیقت کی بات چیت

کرتے ہیں لوگ اس سے شرارت کی بات چیت

مومن ہلاک لذت افطار ہو گیا

لیکن زباں پہ اس کی ہے جنت کی بات چیت

وہ آئے جب تو بحث کا نقشہ بدل گیا

کل سے چھڑی ہوئی تھی حماقت کی بات چیت

ہر روزہ دار مفتی اسلام ہوگیا

ہر مسئلہ میں کرتا ہے جنت کی بات چیت

روزہ میں کھل کے ہوتی ہے دو مفتیوں میں جنگ

اور اس کے بعد صاف جہالت کی بات چیت

 کرتے ہیں ضبط غصہ کو دونوں بجبر وقہر

رہ جاتی ہے ادھوری شجاعت کی بات چیت

مغرب کے بعد چھڑتی ہے پھر ٹھنڈی ٹھنڈی جنگ

ہوتی ہے سرد سرد امامت کی بات چیت

ایسے بھی خال خال ہیں جن سے اگر ملو

کرتے ہیں کچھ شگفتہ طبیعت کی بات چیت

رکھتے ہیں وہ بلندئ گفتار فطرتاً

شکوے کا شائبہ نہ شکایت کی بات چیت

دشمن کے نام کو بھی وہ لیتے ہیں اس طرح

اڑ جاتی ہے ہوا میں عداوت کی بات چیت

اور ایسے روزہ دار بھی ملتے ہیں صبح وشام

ہوتی ہے جن کے انس میں وحشت کی بات چیت

ذکر عذاب قبر زباں پر ہے رات دن

ملتے ہی چھیڑتے ہیں قیامت کی بات چیت

واقف آروی

 

مجذوب چشتی

یوم پیدائش 16 مارچ 1938

غبارِ کرب سے چہرہ گلاب کون کرے

تلاش رات کے وقت آفتاب کون کرے

مجذوب چشتی

 

میر غلام علی نازکی

یوم پیدائش 16 مارچ 1910

ضبط فغاں نہیں ہے مرے دسترس کی بات

جی بھر کے رولوں یہ بھی نہیں میرے بس کی بات

آدم بوصف خاک نژادی ہے رو بہ عرش

ثابت ہوئی ہے آج یہ صدہا برس کی بات

سنتا ہے کون اہلِ نظر سے حدیث دل

اہل ہوس کو بھاتی ہے اہل ہوس کی بات

وہ انہماک تھا کہ میں کچھ بھی نہ سن سکا

صحن چمن کا حال نہ کنج قفس کی بات

دل نے کبھی خرد کی امامت نہ کی قبول

غنچے کو نا پسند ہوئی خار و خس کی بات

اس دور کا مذاق ہی بگڑا ہوا سا ہے

گویا کوئی دلیل ہے ہر بوالہوس کی بات

مایوسیوں میں تیر تبسّم تھا دلنواز

جیسے کسی طبیب مسیحا نفس کی بات

میر غلام علی نازکی

 

فرہاد احمد فگار

یوم پیدائش 16 مارچ 1982

دیکھ تو کیا کمال رکھتی ہیں 

تیری آنکھیں سوال رکھتی ہیں 

چلی آتی ہیں میری خلوت میں 

یادیں کتنا خیال رکھتی ہیں 

سامنے جس قدر بھی مشکل ہو 

سب دعائیں سنبھال رکھتی ہیں 

عشق میں ہیں صعوبتیں ایسی 

مجھ کو ہر پل نڈھال رکھتی ہیں 

شوخ چنچل ادائیں بھی تیری 

آپ اپنی مثال رکھتی ہیں 

تجھ سے یہ دوریاں فگارؔ اکثر 

میرا جینا محال رکھتی ہیں 

فرہاد احمد فگار

 

سید اظہار مہدی بخاری

یوم پیدائش 15 مارچ 1973

خطہ ء پاک کے ہر گوشے سے آئے ہوئے لوگ

امن و تعلیم کی محفل ہیں سجائے ہوئے لوگ

زیورِ صبر و تحمل سے ہیں آراستہ سب

جذبہ ء امن و مروّت سے بنائے ہوئے لوگ

دستِ قاتل نظر آتا ہے کہیں باہر سے

جس نے سازش سے اُٹھائے ہیں کِرائے ہوئے لوگ

آج ہم لوٹ کے جائیں گے اسی عزم کے ساتھ 

قُرب محسوس کریں ہم سے ہٹائے ہوئے لوگ

ایسا کردار کرو پیش کہ سب لوگ کہیں 

امن و تعلیم کی ترویج سکھائے ہوئے لوگ

آپ کی ذات سے امیدِ امن رکھتے ہیں

دہشت و قتل و تعصب سے ستائے ہوئے لوگ

اشک شوئی کے لیے دیکھتی ہے چشم اُن کی

نام مذہب پہ تشدد سے رُلائے ہوئے لوگ

اپنا اظہار کرو ایسا کہ سب کھِل اُٹھیں

بادِ نفرت سے شب و روز بجھائے ہوئے لوگ

سید اظہار مہدی بخاری

 

بدر شمسی

یوم پیدائش 15 مارچ 1930

یوں بچھڑ جاؤں گا تجھ سے میں نے یہ سوچا نہ تھا

قربتوں میں فاصلوں کا کوئی اندازہ نہ تھا

جانے پہچانے ہوئے چہرے بھی سب تھے اجنبی

کتنا تنہا تھا وہاں بھی میں جہاں تنہا نہ تھا

اپنے دل کا زہرِغم آنکھوں سے جو چھلا گیا

وہ سمندر تھا مگر میری طرح گہرا نہ تھا

زندگی ہم بھی تری قدروں کے وارث تھے مگر

اپنی قسمت میں فقط دیوار تھی سایا نہ تھا

روٹھنے والے مری چاہت کا اندازہ تو کر

اس قدر تو میں نے خود کو بھی کبھی چاہا نہ تھا

زخم بھی جس نے دیئے ہیں مجھ کو غیروں کی طرح

وہ مرا اپنا تھا لیکن مجھ کو پہچانا نہ تھا

پیار آخر کیوں نہ آتا اپنے قاتل پر مجھے

میرے اس کے درمیاں کیا خون کا رشتا نہ تھا

بے وفائی کی شکایت تھی مجھے اس سے مگر

اس کی مجبوری کو جب تک بدر میں سمجھا نہ تھا

بدر شمسی

 

انوری بیگم

یوم پیدائش 15 مارچ 1959

جانے کیوں کر اس قدر سہما ہوا ہے آئینہ 

آئینے کو دیکھ کر بھی ڈر رہا ہے آئینہ 

کیا کوئی معصوم سی صورت نظر میں آ گئی 

کیوں سوالوں میں الجھ کر رہ گیا ہے آئینہ 

آپ اپنے آپ کو اس سے چھپا سکتے نہیں 

آپ کی اک اک ادا سے آشنا ہے آئینہ 

خواہشوں کے جال میں الجھا ہوا ہے ہر بشر 

کون کتنا بے غرض ہے جانتا ہے آئینہ 

آشیاں میرا جلایا نوچ ڈالے پر مرے 

آپ کو اس حال میں بھی دیکھتا ہے آئینہ 

اس لئے سب نے نگاہوں سے گرایا ہے اسے 

جس کی جیسی شکل ہے وہ بولتا ہے آئینہ 

ہاتھ میں پتھر لئے کیوں بڑھ رہے ہو اس طرف 

چوٹ کھا کر خود بھی پتھر بن چکا ہے آئینہ 

ظلم کی تلوار کے سائے میں بھی ہوں سجدہ ریز 

انوریؔ ہر حال میں پہچانتا ہے آئینہ 

انوری بیگم

 

اولاد رسول قدسی

یوم پیدائش 15 مارچ 1963

کس قدر ہے تو بے وفا سورج 

شام ہوتے ہی بجھ گیا سورج 

سخت حدت میں گھر گیا عالم 

دے گیا دھوپ کو ہوا سورج 

خود کرن مانگتی ہے تجھ سے پناہ 

اوڑھ لے ابر کی ردا سورج

اب تو بربادیاں ہیں سر پہ ترے 

وقت اپنا نہ تو گنوا سورج 

بار غم ڈال کر زمانے پر 

خوب لیتا رہا مزا سورج 

جان دے کر بھی راہ سے اپنی 

سرگراں سنگ کو ہٹا سورج 

خود مری ذات مجھ سے روٹھ گئی 

کم سے کم تو گلے لگا سورج 

ہم بھی مہماں ہوں ترے گھر کے 

پاس اپنے کبھی بلا سورج 

قدسیؔ اکتا گیا ہے چھاؤں سے 

سوزشوں میں اسے جلا سورج

اولاد رسول قدسی

 

بشر مہتاب

یوم پیدائش 15 مارچ 1994

مانا اس کو گلہ نہیں مجھ سے 

کچھ تو ہے جو کہا نہیں مجھ سے

 

حق نہیں دوستی کا ایسا کوئی 

جو کہ اس کو ملا نہیں مجھ سے 

دل ہی دل میں وہ بغض رکھتا ہے 

جو بظاہر خفا نہیں مجھ سے 

کچھ تو ہوگا ضرور اس کا سبب 

وہ جو اب تک لڑا نہیں مجھ سے 

لاکھ پیچھا چھڑانا چاہا مگر 

غم ہوا ہی جدا نہیں مجھ سے 

کیسے رہ پائے گا وہ میرے بغیر 

جو الگ ہی رہا نہیں مجھ سے 

جو بظاہر خفا ہے اے مہتابؔ 

وہ بہ باطن خفا نہیں مجھ سے

بشر مہتاب

 

شفقت حیات شفق ٹیکسلا

یوم پیدائش 15 مارچ

مثلِ گل کھل کے بکھرتے تو محبت کرتے

تم کسی دکھ سے گزرتے تو محبت کرتے

جن کو رغبت رہی بستی کے گلی کوچوں سے

دشت کی رہ سے گزرتے تو محبت کرتے

عشق میں ہوتی نہیں کوئی انا نام کی چیز

سر کو دہلیز پہ دھرتے تو محبت کرتے

تم کو ہر آن زمانے کی پڑی رہتی ہے

تم زمانے سے نہ ڈرتے تو محبت کرتے 

تم کو دنیا کے بکھیڑوں نے اجازت ہی نہ دی

اک نظر مجھ پہ جو کرتے تو محبت کرتے

خواب تو دیکھ لیا کچی بہاروں میں مگر

خواب کے رنگ نکھرتے تو محبت کرتے

تم نے تو اپنی الگ دنیا بسا رکھی ہے

گر کسی شخص پہ مرتے تو محبت کرتے 

اپنی ہی ذات میں سمٹے ہوئے رہتے ہو صدا

تم مری رہ میں بکھرتے تو محبت کرتے

آۂینہ ٹوٹ گیا جذبۂ دل کا شفقت

ہم اگر اس میں سنورتے تو محبت کرتے.

شفقت حیات شفق ٹیکسلا