ناز بٹ

 یوم پیدائش 15 اکتوبر

بے خبر ہوتے ہوئے بھی با خبر لگتے ہو تم 

دور رہ کر بھی مجھے نزدیک تر لگتے ہو تم 

کیوں نہ آؤں سج سنور کر میں تمہارے سامنے 

خوش ادا لگتے ہو مجھ کو خوش نظر لگتے ہو تم 

تم نے لمس معتبر سے بخش دی وہ روشنی 

مجھ کو میری آرزوؤں کی سحر لگتے ہو تم 

جس کے سائے میں اماں ملتی ہے میری زیست کو 

مجھ کو جلتی دھوپ میں ایسا شجر لگتے ہو تم 

کیوں تمہارے ساتھ چلنے پر نہ آمادہ ہو دل 

خوشبوئے احساس میرے ہم سفر لگتے ہو تم 

نازؔ تم پر ناز کرتی ہے محبت کی قسم 

زندگی بھر کی دعاؤں کا اثر لگتے ہو تم

ناز بٹ

قمر بدرپوری

 یوم پیدائش 15 اکتوبر 1955

سورج غروب ہونے کا مطلب ہے یہ"قمر"

تاریکیوں کے بعد نئی صبح آئے گی

قمر بدرپوری

نیلما ناہید درانی

 یوم پیدائش 15 اکتوبر 1955

جس گھڑی ان سے بات ہوتی ہے

رقص میں کائنات ہوتی ہے

ان کے آنے سے دن نکلتا ہے

ان کے جانے سے رات ہوتی ہے

لفظ یوں پھول بن کے جھڑتے ہیں

گویا ہر سو برات ہوتی ہے

ان سے ملنے کو معجزہ کہیے

حسن کی یہ زکوٰۃ ہوتی ہے

روگ ایسا لگا ہے الفت کا

اس سے کیسے نجات ہوتی ہے

ظالموں سے وہ ڈر نہیں سکتا

جس کے دل میں فرات ہوتی ہے

نیلما ناہید درانی

ضیاء رشیدی

 حبیبِ خدا ہیں وہ خیر البشربھی 

 گئے رات اسراء وہ معراج پر بھی

 نبیِ مکرم شفیعِ معظم 

ابو بکر ساتھی ہیں ان کے عمر بھی

کیا ظلمتوں کا صفایا یقینا 

گئے آپؐ کے پاء اقدس جدھر بھی 

وہ پہنچا دئے دین کو ہے مکمل  

دیا تھا خدا نے انہیں جس قدر بھی 

 پڑھا ہے انہیں دیکھ کلمہ خدا کا 

بشر تو بشر راستے کے حجر بھی 

 

معطر ہیں رہتیں یقینا وہ گلیاں 

مہک جاتے ان کے ہر اک رہ گزر بھی

ضیاء تم گزارو شب وروز ایسے 

ہو جنت کی خواہش جہنم سے ڈر بھی

ضیاء رشیدی

محسن احسان

 یوم پیدائش 15 اکتوبر 1933

مرے وجود کے دوزخ کو سرد کر دے گا

اگر وہ ابر کرم ہے تو کھل کے برسے گا

گلہ نہ کر کہ ہے آغاز شب ابھی پیارے

ڈھلے گی رات تو یہ درد اور چمکے گا

قدح کی خیر سناؤ کہ اب کے بارش سنگ

اگر ہوئی تو طرب زار شب بھی ڈوبے گا

یہ شہر کم نظراں ہے ادھر نہ کر آنکھیں

یہاں اشارۂ‌ مژگاں کوئی نہ سمجھے گا

میں اس بدن میں اتر جاؤں گا نشے کی طرح

وہ ایک بار اگر پھر پلٹ کے دیکھے گا

رواں تو ہوں سوئے افلاک آرزو لیکن

یہ زور موج ہوا بازوؤں کو توڑے گا

اگر ہے شوق اسیری تو موند لے آنکھیں

تو عمر بھر در و دیوار بھی نہ دیکھے گا

تلاش قافلۂ زندگی ہے اب بے سود

یہ رہگذار نفس پر کہیں نہ ٹھہرے گا

نہ آنکھ میں کوئی جنبش نہ پاؤں پر کوئی گرد

جہاں سے اتنا بھی محتاط کون گزرے گا

رہے گی دل میں نہ جب کوئی بھی خلش محسنؔ

بھلا چکا ہے جسے تو اسے پکارے گا

محسن احسان

جاوید آغا

 یوم پیدائش 15 اکتوبر

اٹھا کے سر کو چلے خوبرو جوانی ہو

پھر اس کے ہاتھ میں اسلاف کی نشانی ہو

امیرِ شہر مری آخری وصیّت ہے

مجھے جو قتل کرے شخص خاندانی ہو

جہاں پہ فاختہ بے خوف گھونسلے سے اڑے

ترے جہان میں ایسی بھی راجدھانی ہو

ہے شاعری کا اگر شوق تو ضروری ہے

سلیس لہجہ ہو اشعار میں روانی ہو

یہ سانپ بھی مرے لاٹھی بھی اپنی بچ جائے

بتاؤ راستہ ایسا جو درمیانی ہو

 

حضور آپ کی آنکھوں نے بات چھیڑی تھی

یہ بات ختم بھی پھر آپ کی زبانی ہو

تمھارے جانے پہ کچھ اس طرح لگاہے مجھے

کہ جیسے گھر میں کوئی مرگِ ناگہانی ہو

یہی ہے پیار کہ ہو دل میں بات پوشیدہ

ملو تو آنکھوں سے پھر اس کی ترجمانی ہو

مری غزل پہ ہو گر تبصرہ تو یاد رہے

نہ خوش گمانی ہو آغا. نہ. بدگمانی ہو

جاویدآغا

ہما علی

 بہار رنگ مرے چار سو ابھی تک ہے 

دوام حسن ہے وہ ماہ رو ابھی تک ہے 

سنا تھا فرقتیں حلیہ بگاڑ دیتی ہیں ؟

کہاں کا ہجر کہ وہ خوبرو ابھی تک ہے 

ہو رنج کیا اسے محرومیءِ تمنا کا 

انا کے باب میں وہ سر خرو ابھی تک ہے

زمانے والے اسے مجھ سے دور لے جائیں 

وگرنہ خواب میں تو گفتگو ابھی تک ہے

وہ صفحہ ڈائری کا اب بھی ہے مہکتا سا

کہ خشک پھول میں بھی رنگ و بو ابھی تک ہے

یہ کالی شال میں ہر پل جو اوڑھے رکھتی ہوں 

یہ پہلے عشق کی تھی آبرو ابھی تک ہے

ہما علی

شہروز خاور

 یوم پیدائش 14 اکتوبر

خاک ہونے کا نہیں ، موجوں کا مارا ہوا میں

خشکی و تر کی کشاکش میں کنارا ہوا میں

جنگ آمادہ ہُوں دنیا سے بس اک تیرے لیے

خود سے ہاری ہوئی پرچھائیں سے ہارا ہوا میں

لوگ بڑھ بڑھ کے بغل گیر ہوا چاہتے ہیں

چند روزہ ترے کوچے میں گذارا ہوا میں

تو نے دیکھا ہے سدا دیکھنے والوں کی طرح

کب تری چشم تمنا کو گوارا ہوا میں

ہجر کاٹیں گی کہاں تک مری حوریں شہروز

عرش کا فرش پہ مدت سے اتارا ہوا میں

شہروز خاور

قاسم محمد قاسم کلیانوی

 خاک رکھا ہے ان نظاروں میں 

چاند گھل مل گیا ہے تاروں میں 

سرِ محفل نظر ملی ان سے 

بات ہوتی رہی اشاروں میں

ایک مدت ہوئی ملے تم سے

اب کے آجاؤ نا بہاروں میں

وقت آئے تو جان بھی دیں گے

نام لکھ لو ہمارا یاروں میں

تیری یادوں میں سو نہ پائے ہم 

 خواب بیٹھے رہے قطاروں میں

کون پوچھے گا حال دل ہم سے 

کون اپنا پرایا یاروں میں

نام آتا ہے اپنا اے قاسم 

سرِ فہرست غم گساروں میں

 قاسم محمد قاسم کلیانوی

جام اکبر نواز کھور

 آنکھوں میں کچھ دیپ جلانے آ جاؤ

یا پھر اپنی یاد بھلانے آ جاؤ

ہم نے درد کا صحرا آنکھ میں رکھا ہے

صحرا میں کوئی پھول کھلانے آ جاؤ

جام اکبر نواز کھور