ہری چند اختر

 یوم پیدائش 15 اپریل 1900

ملے گی شیخ کو جنت، ہمیں دوزخ عطا ہوگا

بس اتنی بات ہے جس کے لیے محشر بپا ہوگا

رہے دو دو فرشتے ساتھ اب انصاف کیا ہوگا

کسی نے کچھ لکھا ہوگا کسی نے کچھ لکھا ہوگا

بروز حشر حاکم قادر مطلق خدا ہوگا

فرشتوں کے لکھے اور شیخ کی باتوں سے کیا ہوگا

تری دنیا میں صبر و شکر سے ہم نے بسر کر لی

تری دنیا سے بڑھ کر بھی ترے دوزخ میں کیا ہوگا

سکون مستقل دل بے تمنا شیخ کی صحبت

یہ جنت ہے تو اس جنت سے دوزخ کیا برا ہوگا

مرے اشعار پر خاموش ہے جز بز نہیں ہوتا

یہ واعظ واعظوں میں کچھ حقیقت آشنا ہوگا

بھروسہ کس قدر ہے تجھ کو اخترؔ اس کی رحمت پر

اگر وہ شیخ صاحب کا خدا نکلا تو کیا ہوگا

ہری چند اختر

نشور واحدی

 یوم پیدائش 15 اپریل 1912

وقت کا قافلہ آتا ہے گزر جاتا ہے

آدمی اپنی ہی منزل میں ٹھہر جاتا ہے

ایک بگڑی ہوئی قسمت پہ نہ ہنسنا اے دوست

جانے کس وقت یہ انسان سنور جاتا ہے

اس طرف عیش کی شمعیں تو ادھر دل کے چراغ

دیکھنا یہ ہے کہ پروانہ کدھر جاتا ہے

جام و صہبا کی مجھے فکر نہیں اے غم دل

میرا پیمانہ تو اشکوں ہی سے بھر جاتا ہے

ایک رشتہ بھی محبت کا اگر ٹوٹ گیا

دیکھتے دیکھتے شیرازہ بکھر جاتا ہے

حال میرے لیے ہے لمحۂ آئندہ نشورؔ

وقت شاعر کے لیے پہلے گزر جاتا ہے

نشور واحدی

حسرت جے پوری

 یوم پیدائش 15 اپریل 1922

شعلہ ہی سہی آگ لگانے کے لیے آ

پھر نور کے منظر کو دکھانے کے لیے آ

یہ کس نے کہا ہے مری تقدیر بنا دے

آ اپنے ہی ہاتھوں سے مٹانے کے لیے آ

اے دوست مجھے گردش حالات نے گھیرا

تو زلف کی کملی میں چھپانے کے لیے آ

دیوار ہے دنیا اسے راہوں سے ہٹا دے

ہر رسم محبت کو مٹانے کے لیے آ

مطلب تری آمد سے ہے درماں سے نہیں ہے

حسرتؔ کی قسم دل ہی دکھانے کے لئے آ

حسرتؔ جے پوری

شاہین کاظمی

 آرزو کے سراب 

اُسی نیم شب کے سکوت میں

وہی چاپ تھی وہی آہٹیں

وہ رُکی رُکی سی ہوائےشب

وہ تھمی تھمی سی تھیں دھڑکنیں

وہی عشقِ پیچاں کی بیل تھی 

مری کھڑکیوں پہ جھکی ہوئی

وہی بام و در وہی راستے 

وہی موڑ تھا وہی بے بسی

وہی ڈھلتے چاند کی چاندنی

وہی دُکھتے سانس کے روگ تھے

وہی خواہشیں وہی زندگی

وہی سارے غم وہی سوگ تھے

وہی آنکھ تھی وہی رتجگے

وہی راکھ راکھ سے خواب تھے

وہی فاصلوں کی رداء رہی

وہی آبلوں کے عذاب تھے

وہی طاقچوں میں دھری ہوئی 

مری آس تھی مرے خواب تھے

وہی عشقِ پیچاں کی بیل ہے

وہی اَدھ جلے سے گلاب ہیں

انھیں طاقچوں میں دھری ہوئی

مری آس ہے مرے خواب ہیں

وہی دھوپ ہے وہی دشتِ جاں 

وہی آرزو کے سراب ہیں

شاھین کاظمی

ارشد عبد الحمید

 یوم پیدائش 13 اپریل 1958

سخن کے چاک میں پنہاں تمہاری چاہت ہے

وگرنہ کوزہ گری کی کسے ضرورت ہے

زمیں کے پاس کسی درد کا علاج نہیں

زمین ہے کہ مرے عہد کی سیاست ہے

یہ انتظار نہیں شمع ہے رفاقت کی

اس انتظار سے تنہائی خوبصورت ہے

میں کیسے وار دوں تجھ پر مرے ستارۂ شام

یہ حرف خواب تو اک چاند کی امانت ہے

میں خاک خواب پلک سے جھٹکنے والا تھا

پتا چلا کہ یہی حاصل مسافت ہے

یہ مستطیل سا خاکہ کہ جس کو گھر کہیے

اسی کے دائرہ و در میں میری جنت ہے

یہ خوشہ چینی خوان انیسؔ ہے ارشدؔ

نمک نمط جو مرے شعر میں فصاحت ہے

ارشد عبد الحمید

فضل حیات حیات

 یوم پیدائش 13اپریل 1970

خداؤں سے بغاوت کر رہا ہوں 

میں اپنی جان غارت کر رہا ہوں 

فقط اللہ ہے سجدے کے لائق 

سبھی کو یہ نصیحت کر رہا ہوں

گریباں سے پکڑنا ہے سبھی کو 

دلیری کی جسارت کر رہا ہوں

 اندھیرے بھی پلٹ جائیں گے آخر

 میں قرآں کی تلاوت کر رہا ہوں

ہمیشہ خواب یہ دیکھا ہے آقا

ترے در کی زیارت کر رہا ہوں

فضل حیات حیات

طلعت منیر

 ترک دنیا کو بھی اک کار خطا رکھا ہے

عشق مخلص کو بھی دنیا میں پھنسا رکھا ہے

ہجر کی آگ میں جلتا رہا بے لوث جنوں

وصل پر جسم کا چلمن سا گرا رکھا ہے

تیری قربت ہو میسر تو الگ ہے ورنہ

تیری حوروں تری جنت ہی میں کیا رکھا ہے

ان خطاؤں کی سزا میری محبت کو نہ دے

جن کو خود تو نے جبلت میں اٹھا رکھا یے

اپنے ہونے کا سبب پوچھتے پھرتے ہیں یہ سب

جن سے عالم کو تو نے اپنے سجا رکھا ہے 

طلعت منیر

زاہد ساویز

 یوم پیدائش 12 اپریل 1967

وہم وحشت خوف دھڑکا کیا بچالے گا تجھے

تیرے اندر کا یہ ڈر ہی مار ڈالے گا تجھے

ہر کسی کو مت سنایا کر تو اپنی داستاں

ہر کوئی پھر چسکے لے لے کے اچھالے گا تجھے

کچھ نہ کہہ پائے گا تو جذبات کو قابو میں رکھ

وہ ہمیشہ کی طرح اب بھی دبا لے گا تجھے

تو سمجھتا ہے بہت ہشیار خود کو پر وہ شخص

دیکھنا پھر اپنے چنگل میں پھسا لے گا تجھے

جاتو تو ایسے رہا ہےاس سے ملنے کے لئے

جیسے اٹھ کر وہ گلے سے ہی لگا لے گا تجھے

وقت اور حالات پہلے سے موافق اب نہیں

کون اب ساویز ایسے میں سنبھالے گا تجھے

زاہد ساویز

طاہر گل

 یوم پیدائش 12 اپریل 1968

اے دوست دل حیات سے محوِ نبرد ہے

مت یہ گمان کر کہ مرا خون سرد ہے

میں ہوں تلاشِ منزلِ ہستی کو گامزن

چہرے پہ میرے دیکھ لے صدیوں کی گرد ہے

اس کو بھی میری حالتِ دل کی ہے کچھ خبر

معمول سے زیادہ خزاں اب کے زرد ہے

تو نے بس اک غبار کو منزل سمجھ لیا

اک دشتِ بے کراں پسِ دیوارِ گرد ہے

گزرے ہیں جس کے قیس اور فرہاد نامور

طاہر اسی قبیلہء وحشی کا فرد ہے

طاہرگل

سید انصر

 یوم پیدائش 10 اپریل 

کبھی کبھار ملاقات کا بہانہ بنے

پھر اس کے بعد بلا سے کوئی فسانہ بنے

عجب نہیں ہے کہ اس بار دو اناوں کی جنگ

جہان بھر کی تباہی کا شاخسانہ بنے

وہ سب جہان کا ہے سب جہان اس کا ہے

بس ایک میرے لئے اس کے دل میں جا نہ بنے

ہزار شکر کہ ہم پر گلوں کی بارش ہے

مگر وہ لوگ جو بارود کا نشانہ بنے

حسینیت کی کرامات کا ظہور کہاں 

کہ جب تلک کوئی جنگاہ کربلا نہ بنے

  سید انصر