ندیم اعجاز

 چھوڑ دونوں جہان رہنے دے

لامکاں لا مکان رہنے دے

دید مطلوب ہے اگر صاحب

فاصلہ درمیان رہنے دے

کب زمیں کا کوئی تقاضہ مرا

سر پہ کچھ آسمان رہنے دے

پردہ داروں کے نام آئیں گا

عشق کی داستان رہنے دے

کون کاٹے گا عمرِ خضر یہاں

یہ دعا میری جان رہنے دے

کون سنتا ہے دل کا درد ندیم

درد کا یہ بیان رہنے دے

ندیم اعجاز

شاعر علی راحل

 ہمارا نام وہ بھی ان کے لَب سے نکلا ہے

سنا ہے ہم نے بڑے ہی اَدَب سے نکلا ہے

ہر ایک آنکھ اسے تَک رہی ہے حسرت سے

کچھ ایسے حسنِ مجسّم وہ ڈَھب سے نکلا ہے

کوٸی مَلال نہیں گر بچھڑنے کا تجھ کو

یہ اشک آنکھ سے پھر کس سَبَب سے نکلا ہے

وہ معتبر ہوا دونوں جہان میں یکساں 

مرے حضور کے جو لفظ لَب سے نکلا ہے

کبھی خدا سے تجھے مانگا ہی نہیں میں نے

کہاں وگرنہ تو دستِ طَلَب سے نکلا ہے

ہے ایک بار بھی آیا نہیں مجھے ملنے

دیار چھوڑ کے ظالم وہ جَب سے نکلا ہے

سیاہ رات سے گھبرانے والے دیکھ ذرا

یہ آفتاب جو نکلا ہے شَب سے نکلا ہے

پتہ بتا رہی ہیں تیری لرزشیں رَاحِلؔ

خمیر تیرا بھی آدم نَسَب سے نکلا ہے

شاعر علی رَاحِلؔ

عطا یار علوی

 یوم پیدائش 01 جون 1981

مِرے آقاﷺ کا نگاہوں میں حَسیں در ہوتا

سبز گنبد کے مقابل جو مِرا گھر ہوتا

پڑ گیا نقشِ کفِ پائے محمدﷺ جس پر 

کاش مَیں' مَیں نہیں ہوتا وہی پتھر ہوتا

خطبہ دیتے تھے کھڑے ہوکے شہِ دیں جس پر

چومتا ان کے قدم گر میں وہ منبر ہوتا

اُڑ کے پھر چرخ سے طیبہ کا نظارہ کرتا

میں جو دربارِ محمدﷺ کا کبوتر ہوتا

آبِ زم زم سے نہاتا تو گنہ دُھل جاتے

صاف ستھرا مِرے اعمال کا دفتر ہوتا

ہائے افسوس! مدینے سے بہت دور ہوں میں

قابلِ رشک وہاں میرا مقدر ہوتا

اے عطا سرورِ عالمﷺ کی عطا ہے تجھ پر

وہ نہ کرتے جو کرم تُو نہ سخنور ہوتا

 عطا یار علوی

احقر محمد قیصر رضا

 یوم پیدائش 01 جون 1975

مرے محبوب آجاؤ خدا کا واسطہ تم کو

مرے دل میں سما جاؤ خدا کا واسطہ تم کو

تڑپتا ہوں میں فرقت میں تمہاری ہر گھڑی وللہ

مجھے جلوہ دکھا جاؤ خدا کا واسطہ تم کو

محبت کی مرے دل میں لگی ہے آگ مدت سے

ذرا آکر بجھا جاؤ خدا کا واسطہ تم کو

تصور میں تخیل میں تمہی تم ہو ہر اک لمحہ

حقیقت میں بھی آجاؤ خدا کا واسطہ تم کو

لگا کر اپنے سینے سے کسی دن مجھ کو جان جاں

مری قسمت جگا جاؤ خدا کا واسطہ تم کو

چلے آؤ چلے آؤ قدم رکھ کر مرے دل پر

مری دینا سجا جاؤ خدا کا واسطہ تم کو

ہے دستور محبت کیا مرے محسن مرے ہمدم

یہ قیصر کو سکھا جاؤ خدا کا واسطہ تم کو

احقر محمد قیصر رضا

رہنما گیاؤی

 یوم پیدائش 03 جون 1988

خوشی محسوس ہوتی ہے مجھے بھی اب منانے میں

مزا ان کو بھی اب آنے لگا ہے روٹھ جانے میں

ابھی پردیش سے بیٹا میرا گھر کو نہیں پہنچا

کرو اتنی بھی نہ جلدی مری میت اٹھانے میں

کھلی آنکھوں سے تجھ کو دیکھ پاتا کاش میں لیکن

تو میرے گھر کے آنگن میں لگادی دیر آنے میں

ادب کے پھول آنگن میں بڑی کثرت سے کھلتے ہیں

نئی تہذیب میں خوبی کہاں جو تھی پرانے میں

امیر شہر کی بیٹی سے اظہارِ محبت کر

نہیں کوئی قباحت اپنی قسمت آزمانے میں

نہ سایہ ہے نہ ثانی ہے کہ آنکھیں ارغوانی ہیں

ہوا ہے اور نہ ہوگا کوئی ماتم سا زمانے میں

نہ بھاگو رہنما تم خواب کی تعبیر کے پیچھے

حقیقت کی طرف آؤ رکھا کیا ہے فسانے میں

رہنما گیاؤی

اسد جعفری

 یوم پیدائش 03 جون 1935

خیال یار مجھے جب لہو رلانے لگا

تو زخم زخم مرے دل کا مسکرانے لگا

مجھے خود اپنی وفا پر بھی اعتماد نہیں

میں کیوں تمہاری محبت کو آزمانے لگا

کیا ہے یاد مجھے میرے بعد دنیا نے

ہوا جو غرق تو ساحل قریب آنے لگا

نہ چھین مجھ سے سرور شب فراق نہ چھین

قرار دل کو نہ دستک کے تازیانے لگا

مثال اپنی تو ہے اس درخت کی کہ جسے

لگا جو سنگ تو بدلے میں پھل گرانے لگا

ہر ایک سمت ریا کی تمازتیں ہیں اسدؔ

جو ہو سکے تو محبت کے شامیانے لگا

اسد جعفری

شبلی نعمانی

 یوم پیدائش 03 جون 1857

پوچھتے کیا ہو جو حال شب تنہائی تھا

رخصت صبر تھی یا ترک شکیبائی تھا

شب فرقت میں دل غمزدہ بھی پاس نہ تھا

وہ بھی کیا رات تھی کیا عالم تنہائی تھا

میں تھا یا دیدۂ خوننابہ فشانی شب ہجر

ان کو واں مشغلۂ انجمن آرائی تھا

پارہ ہائے دل خونیں کی طلب تھی پیہم

شب جو آنکھوں میں مری ذوق خود آرائی تھا

رحم تو ایک طرف پایہ شناسی دیکھو

قیس کو کہتے ہیں مجنون تھا صحرائی تھا

آنکھیں قاتل سہی پر زندہ جو کرنا ہوتا

لب پہ اے جان تو اعجاز مسیحائی تھا

خون رو رو دیے بس دو ہی قدم میں چھالے

یاں وہی حوصلۂ بادیہ پیمائی تھا

دشمن جاں تھے ادھر ہجر میں درد و غم و رنج

اور ادھر ایک اکیلا ترا شیدائی تھا

انگلیاں اٹھتی تھیں مژگاں کی اسی رخ پیہم

جس طرف بزم میں وہ کافر ترسائی تھا

کون اس راہ سے گزرا ہے کہ ہر نقش قدم

چشم عاشق کی طرح اس کا تماشائی تھا

خوب وقت آئے نکیرین جزا دے گا خدا

لحد تیرہ میں بھی کیا عالم تنہائی تھا

ہم نے بھی حضرت شبلیؔ کی زیارت کی تھی

یوں تو ظاہر میں مقدس تھا پہ شیدائی تھا

شبلی نعمانی

ریاض خازم

 پیٹھ پیچھے سے وار کرتے ہیں

ایسا کیوں میرے یار کرتے ہیں 

کیسے دن آ گئے مرے پیارے

مجھ سے ملنے سے عار کرتے ہیں

دشمنوں کا تو نام فرضی ہے

جو بھی اپنے ہیں خوار کرتے ہیں

گرچہ نفرت مرا مقدر ہے

آؤ ہم سب سے پیار کرتے ہیں

بیٹھ کر قیس کی گلی میں ہم

عشق کو بے قرار کرتے ہیں

شعر ایسے ہی میرے ہوتے ہیں

سب کو ہی سوگوار کرتے ہیں

عشق میں ہار کے یہ بچے کیوں

موت خود پر سوار کرتے ہیں

آپ کیوں چھیڑتے ہیں ماضی کو

کیوں مجھے تار تار کرتے ہیں

ریاض حازم

طاہر خیال

 یوم پیدائش 01 جون 1974

میں رو کر جو مانگوں دعا رو پڑے گی

مرے ساتھ خلق خدا رو پڑے گی

خزاں میں پریشاں پرندوں کو پاکر

چمن رو پڑے گا صبا رو پڑے گی

مرے جسم کی سلوٹیں دیکھتے ہی

مجھے لینے آئی قضا رو پڑے گی

اگر داغ دل کے عیاں کر دیے تو

لپٹ کر کسی سے وفا رو پڑے گی

سنو آدمیت کی غفلت سے ظاہر

عطا رو پڑے گی انا رو پڑے گی

طاہر خیال

شفیق محسن

 یوم پیدائش 01 جون 1964

ترے دل نے جہاں دھوکا دہی کی

وہیں آنکھوں نے تیری مخبری کی

کوئی مخلص بھی ہو قائد ہمارا

ضرورت ہے مناسب رہبری کی

سنبھالو قوم کے بچوں کو دیکھو

دکانیں کھل چکی ہیں گمرہی کی

جہاں انصاف سولی پر چڑھے گا

وہاں حالت رہے گی ابتری کی

زمانے کی زرا رفتار دیکھو

چلی ہے اسکے آگے کب کسی کی

کسی کے حال پر او ہنسنے والے

چکانی پڑتی ہے قیمت ہنسی کی

قدم نقار خانے میں جو رکھا ہے

کھلی محسن حقیقت خامسی کی

شفیق محسن