ڈاکٹر نریش

 دل سی نایاب چیز کھو بیٹھے

کیسی دولت سے ہاتھ دھو بیٹھے

عہد ماضی کا ذکر کیا ہمدم

عہد ماضی کو کب کے رو بیٹھے

ہم کو اب غم نہیں جدائی کا

اشک غم جام میں سمو بیٹھے

وعظ کرنے کو آئے تھے واعظ

مے سے دامن مگر بھگو بیٹھے

کیا سبب ہے نریشؔ جی آخر

کیوں جدا آج سب سے ہو بیٹھے

ڈاکٹر نریش

خواجہ عزیز الحسن مجذوب

 یوم پیدائش 12 جون 1884

ہر چیز میں عکس رخ زیبا نظر آیا

عالم مجھے سب جلوہ ہی جلوہ نظر آیا

تو کب کسی طالب کو سراپا نظر آیا

دیکھا تجھے اتنا جسے جتنا نظر آیا

کیں بند جب آنکھیں تو مری کھل گئیں آنکھیں

کیا تم سے کہوں پھر مجھے کیا کیا نظر آیا

جب مہر نمایاں ہوا سب چھپ گئے تارے

تو مجھ کو بھری بزم میں تنہا نظر آیا

گردوں کو بھی اب دیکھ کے ہوتی ہے تسلی

غربت میں یہی ایک شناسا نظر آیا

سب دولت کونین جو دی عشق کے بدلے

اس بھاؤ یہ سودا مجھے سستا نظر آیا

ناکام ہی تا عمر رہا طالب دیدار

ہر جلوہ ترا بعد کو پردا نظر آیا

جو دور نگاہوں سے سر عرش بریں ہے

وہ نور سر گنبد خضرا نظر آیا

مجذوبؔ کبھی سوز کبھی ساز ہے تجھ میں

تو میرؔ کبھی اور کبھی سوداؔ نظر آیا

مجذوبؔ کے جذبے کی جو سمجھے نہ حقیقت

ان عقل کے اندھوں کو یہ سودا نظر آیا

خواجہ عزیز الحسن مجذوب

سمیع احمد ثمر

 انسان کو انسان سے ہی پیار نہیں ہے

اس قوم میں کوئی بھی وفادار نہیں ہے

یہ حسن کا بازار ہے چلتا ہے یہاں زر

دل کا یہاں کوئی بھی خریدار نہیں ہے

واقف ہے طبیعت سے مری سارا زمانہ 

دنیا میں کسی سے مری تکرار نہیں ہے

مظلوم پہ کرتا ہے ستم جو بھی ستم گر

چلتی سدا اس کی کبھی سرکار نہیں ہے

دنیا میں مرا ساتھ نہیں دیتا ہے کوئی

اللہ کے سوا کوئی مددگار نہیں ہے

الفت کی بھلا ابتدا ہو پائے گی کیسے

ہونٹوں پہ ترے پیار کا اقرار نہیں ہے

یہ زہر جدائی کا گوارا نہیں مجھ کو

عاشق ہوں ترا عشق سے انکار نہیں ہے

سمیع احمد ثمر ؔ

شاہد عباس ملک

 درد ہونا قرار پایا ہے 

یعنی رونا قرار پایا ہے 

میری قسمت میں رتجگے آئے  

ان کا سونا قرار پایا ہے

فکر ہونے لگی ہے کانٹوں کی 

یہ بچھونا قرار پایا ہے

آ ندامت گلے لگا مجھ کو 

داغ دھونا قرار پایا ہے

 جس کی مرضی ہے کھیل سکتا ہے 

دل کھلونا قرار پایا ہے

دشت شاہد بلا رہا ہے مجھے 

پھر سے کھونا قرار پایا ہے

شاہد عبا

س ملک

ندیم ناجد

 تکیے سے پھوٹی نظم

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

ترے تکیے کے نیچے

میں رکھےاس خواب جیسا ہوں

جسے فرصت میں دیکھوں گی

یہ کہہ کر رکھ دیا تھا

تمہاری کروٹوں سے۔ آنسوں سے

اور خوابوں سے نمی پا کر

تمہارے عشق میں گوندھی

میں اب اس نظم کی صورت مہکتا ہوں

بوقتِ فجر جس کو

اب پرندے گنگُناتے ہیں

جسے سُنتے ہی

گہری نیند میں سوئی ہوئی خلقت

نمازِ عشق پڑھنے کے لیے

بیدار ہوتی ہے

تمہارے عشق میں گوندھی

میں اب اُس نظم کی صورت مہکتا ہوں

تمہیں فُرصت ملے تو؟؟؟؟؟؟؟؟

ندیم ناجد

یاسین باوزیر

 اک شخص دل میں رہ کہ بھی دلبر نہ بن سکا

مٸے جس میں پیار کی ہو وہ ساغر نہ بن سکا

پھر یوں ہوا کہ عشق کی بازی پلٹ گئی

جب میں مرے رقیب سے بہتر نہ بن سکا

پیوست ہو جگر میں جو مثلِ نگاہِ یار

ایسا تو آج تک کوئی خنجر نہ بن سکا 

ڈگری تو تھی مگر اُنھیں رشوت نہ دے سکا

مزدور بن گیا ہوں میں ٗ افسر نہ بن سکا 

بہتر وہ دوسروں سے بنے بھی تو کس طرح

جو شخص اپنے آپ سے بہتر نہ بن سکا

کیکر یہ چاہتا ہیکہ بن جاے وہ گلاب

شکوہ گلاب کو ہے وہ کیکر نہ بن سکا

یاسین شاعری کے لئے چاہئے ہنر 

ہر عشق کرنے والا سخنور نہ بن سکا

یاسین باوزیر

اقبال شاہ

 جب نکلتا ہے ترے شہر سے رستہ کوئی

سامنے دشت نظر آتا ہے پیاسا کوئی

اتنی شدت ہے مرے ضبط کی برسات میں دیکھ

میرے اندر سے امڈ آیا ہے دریا کوئی

لوگ ملتے ہیں نئے چہرے بدل کر مجھ سے

روز ہوتا ہے مرے ساتھ تماشہ کوئی

جب بھی ملتی ہے گلابوں کے کٹوروں سے صبا

تیرے لہجے میں لگے جیسے ہے ہنستا کوئی 

تم مرے سانسوں کی ڈوری سے بندھے رہتے ہو 

کیسیے کہہ دوں مرا تم سے نہیں رشتہ کوئی

میں اسے کیوں بھلا منسوب صنوبر سے کروں 

تیری قامت سا دکھائے جو نہ نقشہ کوئی 

اقبال شاہ

عالم فیضی

 موت کی اب ہر طرف یلغار ہے

اس وبا سے اب جہاں بیزار ہے

بھول بیٹھے تھے جو رب کو ایک دم

ان پہ رب کی دیکھ لو پھٹکار ہے

سب ہی ڈوبے ہیں گنہ میں اب یہاں

اس لیے ہم پر وبا کی مار ہے 

خوف و دہشت کا ہے سایہ ہر طرف

جس کو دیکھو اب وہی بیمار ہے

کیسی حالت ہوگئی سب کی یہاں

دل سے دل ملنا ہی اب دشوار ہے

کتنے ہیرے کھو دئے کووڈ میں ہم

ان کی فرقت سے یہ دل افگار ہے

ہیں سبھی عالم یہاں بے بس بہت

پھر بھی بدلا ان کا کیا کردار ہے؟

عالم فیضی

گوپال متل

 یوم پیدائش 11 جون 1901

رنگینی ہوس کا وفا نام رکھ دیا

خودداری وفا کا جفا نام رکھ دیا

انسان کی جو بات سمجھ میں نہ آ سکی

انساں نے اس کا حق کی رضا نام رکھ دیا

خود غرضیوں کے سائے میں پاتی ہے پرورش

الفت کو جس کا صدق و صفا نام رکھ دیا

بے مہری حبیب کا مشکل تھا اعتراف

یاروں نے اس کا ناز و ادا نام رکھ دیا

فطرت میں آدمی کی ہے مبہم سا ایک خوف

اس خوف کا کسی نے خدا نام رکھ دیا

یہ روح کیا ہے جسم کا عکس لطیف ہے

یہ اور بات ہے کہ جدا نام رکھ دیا

مفلس کو اہل زر نے بھی کیا کیا دئیے فریب

اپنی جفا کا حکم خدا نام رکھ دیا

گوپال متل

رام پرساد بسمل

 یوم پیدائش 11 جون 1897

الٰہی خیر وہ ہر دم نئی بیداد کرتے ہیں

ہمیں تہمت لگاتے ہیں جو ہم فریاد کرتے ہیں

کبھی آزاد کرتے ہیں کبھی بیداد کرتے ہیں

مگر اس پر بھی ہم سو جی سے ان کو یاد کرتے ہیں

اسیران قفس سے کاش یہ صیاد کہہ دیتا

رہو آزاد ہو کر ہم تمہیں آزاد کرتے ہیں

رہا کرتا ہے اہل غم کو کیا کیا انتظار اس کا

کہ دیکھیں وہ دل ناشاد کو کب شاد کرتے ہیں

یہ کہہ کہہ کر بسر کی عمر ہم نے قید الفت میں

وہ اب آزاد کرتے ہیں وہ اب آزاد کرتے ہیں

ستم ایسا نہیں دیکھا جفا ایسی نہیں دیکھی

وہ چپ رہنے کو کہتے ہیں جو ہم فریاد کرتے ہیں

یہ بات اچھی نہیں ہوتی یہ بات اچھی نہیں ہوتی

ہمیں بیکس سمجھ کر آپ کیوں برباد کرتے ہیں

کوئی بسمل بناتا ہے جو مقتل میں ہمیں بسملؔ

تو ہم ڈر کر دبی آواز سے فریاد کرتے ہیں

رام پرساد بسمل