ظہور احمد

 یوم پیدائش 30 جون

 

اپنے آئینہء احساس میں دیکھو مجھ کو

مجھ کو محسوس کرو مجھ سے نہ پوچھو مجھ کو

اک تبسم کے عوض جان بھی حاضر ہے مگر

اتنا ارزاں بھی نہیں ہوں کہ خریدو مجھ کو

رک گئے کیوں حد ادراک سے آگے جا کر

منظر دیدہء حیرت سے پکارو مجھ کو

قید گل سے بھی نکل جاوں گا خوشبو کی طرح

تم نہ بھنورے کی طرح پھول میں ڈھونڈو مجھ کو

میں بھی بکھرا ہوں کسی زلف پریشاں کی طرح

اپنے ہاتھوں سے کوئ آ کے سنوارو مجھ کو

ظہور احمد

فرخ نواز فرخ

 نہیں ہے پاس مگر تو دکھائی دیتا ہے

ترا خیال مجھے کب رہائی دیتا ہے

ترے لبوں سے ادا ہو اگر کوئی جملہ

مجھے وہ شعر کی صورت سنائی دیتا ہے

مرا گمان بدل جاتا ہے حقیقت میں

بغیر پوچھے جب اپنی صفائی دیتا ہے

گھٹا بھی دے یہ جدائی کا بے ثمر موسم

بھلا تو کیوں مجھے زخم جدائی دیتا ہے

قریب آ کے فقط ایک فکر لاحق ہے

وہ دل تک اپنے مجھے کب رسائی دیتا ہے

مرے رفیق مرے غم گسار تو ہی بتا

ہر ایک چہرے میں وہ کیوں دکھائی دیتا ہے

مری کتاب کی کوئی غزل اٹھا لے تو

ہر ایک شعر کا مصرع دہائی دیتا ہے

جو میری مانے تو فرخؔ اسے بھلا دے اب

وفا کے بدلے میں جو بے وفائی دیتا ہے 

فرخ نواز فرخ

کرار نوری

 یوم پیدائش 30 جون 1916

ہر گام تجربات کے پہلو بدل گئے

لوگوں کو آزما کے ہم آگے نکل گئے

ہم کو تو ایک لمحہ خوشی کا نہ مل سکا

کیا لوگ تھے جو زیست کے سانچے میں ڈھل گئے

کیا کیا تغیرات نے دنیا دکھائی ہے

محسوس یہ ہوا کہ بس اب کے سنبھل گئے

ہم زندگی کی جہد مسلسل کے واسطے

موجوں کی طرح سینۂ طوفاں میں ڈھل گئے

جب بھی کوئی فریب دیا اہل دہر نے

ہم اک نظر شناس کوئی چال چل گئے

حاوی ہوئے فسانے حقیقت پہ اس طرح

تاریخ زندگی کے حوالے بدل گئے

ہم نے لچک نہ کھائی زمانے کی ضرب سے

گو حادثات دہر کی رو میں کچل گئے

نوریؔ کبھی جو یاس نے ٹوکا ہمیں کہیں

ہم دامن حیات پکڑ کر مچل گئے

کرار نوری

خالق اخلاق

 یوم پیدائش 30 جون 

شفق ستارے دھنک کہکشاں بناتے ہوئے

وہ اس زمیں پہ ملا آسماں بناتے ہوئے

بھٹک نہ جائیں مرے بعد آنے والے لوگ

میں چل رہا ہوں زمیں پر نشاں بناتے ہوئے

چلو اب ان کی بھی بستی میں پھول بانٹ آئیں

جو تھک چکے ہیں یہ تیر و کماں بناتے ہوئے

مرے وجود کی رسوائیو تمہاری قسم

ہے دل میں خوف پھر اک رازداں بناتے ہوئے

جلائے ہاتھ تحفظ میں ورنہ آندھی سے

چراغ بجھ گیا ہوتا دھواں بناتے ہوئے

پڑا ہوا ہے وہ تاریکیوں کے ملبے میں

خیال و خواب میں اک کہکشاں بناتے ہوئے

یہی ہو اجر مرے کار خیر کا شاید

اکیلا رہ گیا خود کارواں بناتے ہوئے

زمیں پہ بیٹھ گیا تھک کے دو گھڑی خالدؔ

امیر لوگوں کی وہ کرسیاں بناتے ہیں

خالد اخلاق

روبن سن روبی

 یوم پیدائش 29 جون 1998

میں جدھر جاؤں کرتے جاتے ہیں

میری راہوں میں روشنی آنسو

چار چیزیں ہیں میرا سرمایہ

خامشی ، درد ، بے بسی آنسو

عشق آنکھوں کو نور دیتا ہے

اور دیتی ہے دل لگی آنسو

وہ کہاں راستہ بھٹکتے ہیں 

جن کی کرتے ہیں رہبری آنسو

تُو چلا ہے تو گِر کے پلکوں سے

کر گیا آج خودکشی آنسو

چاہتا ہوں خوشی کا کہلائے

ہے مِرے پاس آخری آنسو

روبن سن روبی

عامر زمان خان

 یوم پیدائش 29 جون 1969

لا شعوری سلسلوں کے درمیاں تھی زندگی

اِس مکاں سے اُس مکاں تک لامکاں تھی زندگی

ڈھونڈنے نکلوں گا اپنے آپ کو میں ایک دن

لا کے پھر رکھوں گا میں پہلے جہاں تھی زندگی

تیغ قاتل اب بنی ہے پہلے تو ایسی نہ تھی

آپ سے پہلے تو ہم پہ مہرباں تھی زندگی

 خان عامر

مجید امجد

 یوم پیدائش 29 جون 1914

دل سے ہر گزری بات گزری ہے

کس قیامت کی رات گزری ہے

چاندنی نیم وا دریچہ سکوت

آنکھوں آنکھوں میں رات گزری ہے

ہائے وہ لوگ خوب صورت لوگ

جن کی دھن میں حیات گزری ہے

تمتماتا ہے چہرۂ ایام

دل پہ کیا واردات گزری ہے

کسی بھٹکے ہوئے خیال کی موج

کتنی یادوں کے سات گزری ہے

پھر کوئی آس لڑکھڑائی ہے

کہ نسیم حیات گزری ہے

بجھتے جاتے ہیں دکھتی پلکوں پہ دیپ

نیند آئی ہے رات گزری ہے

مجید امجد

رانا غلام محی الدین

 یوم پیدائش 29 جون 1950

رفاقتوں کی نئی مسندِ سعید پہ ہوں

میں کچھ دنوں سے، کسی کی صوابدید پہ ہوں

معاملہ ہی نہیں تجھ سے ، بھاؤ تاؤ کا 

ترے لئے تو ، اسی قیمتِ خرید پہ ہوں

بضد ہے وہ کہ قناعت ہو ، اک نگہ پر ہی 

پہ میں بھی میں ہوں ، ابھی لغزشِ مزید پہ ہوں

مجھے وہ ساعتِ موجود پر نہیں درکار

اسے یہ رنج ، کہ میں عرصہء بعید پہ ہوں 

ابھی وہ لمحہءِ روئیدگی نہیں آیا

ابھی میں موسمِ سر سبز کی نوید پہ ہوں

میں پیار تھا ، جو کہیں نفرتوں میں مارا گیا

تو پھر یہ کیوں نہ کہوں، رتبہء شہید پہ ہوں

رانا غلام محی الدین

آصفہ نشاط

 دریافت کر لیا ہے بسایا نہیں مجھے

سامان رکھ دیا ہے سجایا نہیں مجھے

کیسا عجیب شخص ہے اٹھ کر چلا گیا

برباد ہو گیا تو بتایا نہیں مجھے

وہ میرے خواب لے کے سرہانے کھڑا رہا 

میں سو رہی تھی اس نے جگایا نہیں مجھے

بازی تو اس کے ہاتھ تھی پھر بھی نہ جانے کیوں

مہرہ سمجھ کے اس نے بڑھایا نہیں مجھے

اس نے ہزار عہد محبت کے باوجود

جو راز پوچھتی ہوں بتایا نہیں مجھے

وہ انتہائے شوق تھی یا انتہائے ضبط

تنہائی میں بھی ہاتھ لگایا نہیں مجھے

آصفہ نشاط

آصف شہزاد

 یوم پیدائش 26 جون 1980

مرے گیتوں سے رونے کی صدا آتی رہی پیہم

مرے زخموں کو سہلانے صبا آتی رہی پیہم

ہمیں اپنے گناہوں کی سزا ملتی رہی پیہم

ہمیں بیدار کرنے کو ہوا آتی رہی پیہم

کوئی قاسم ، کوئی خالد ، کوئی طارق نہیں ہم میں

خود اپنے آپ پر ہم کو حیا آتی رہی پیہم

تسلط غیر کا قصہ یہ سن کر ساری دنیا میں

مرے اشکوں کی آہوں کی صدا آتی رہی پیہم

گلے کٹتے رہے نیزے پہ سر چڑھتے رہے لیکن

زبانوں سے صداۓ لا اللہ آتی رہی پیہم

سیاست ہو رہی ہے آج کل بچوں کی لاشوں پر

ہمارے ساتھ ان کی بد دعا آتی رہی پیہم

مری چیخیں مرے اندر ہی گھٹ کے مر گئیں آخر

مجھے ہی لوٹ کر میری صدا آتی رہی پیم

غزل میں ڈھل گیا شہراد کا دکھ آج پھر یارو

مکاں سے اس کے غزلوں کی صدا آتی رہی پیم

آصف شہزاد