ماجد دیوبندی

 یوم پیدائش 07 جولائی 1964

آسماں کی رفعتوں سے طرز یاری سیکھ لو

سر اٹھا کر چلنے والو خاکساری سیکھ لو

پیش خیمہ ہیں تنزل کا تکبر اور غرور

مرتبہ چاہو تو پہلے انکساری سیکھ لو

خود بدل جائے گا نفرت کی فضاؤں کا مزاج

پیار کی خوشبو لٹاؤ مشکباری سیکھ لو

چن لو قرطاس و قلم یا تیغ کر لو انتخاب

کوئی فن اپناؤ لیکن شاہکاری سیکھ لو

پھر تمہارے پاؤں چھونے خود بلندی آئے گی

سب دلوں پر راج کر کے تاج داری سیکھ لو

عشق کا میدان آساں تو نہیں ہے محترم

عشق کرنا ہی اگر ہے غم شعاری سیکھ لو

جس شجر کی چھاؤں ہو ماجدؔ زمانے کے لئے

کیسے ہوگی اس شجر کی آبیاری سیکھ لو

ماجد دیوبندی

گلزار دہلوی

 یوم پیدائش 07 جولائی 1926

عمر جو بے خودی میں گزری ہے

بس وہی آگہی میں گزری ہے

کوئی موج نسیم سے پوچھے

کیسی آوارگی میں گزری ہے

ان کی بھی رہ سکی نہ دارآئی

جن کی اسکندری میں گزری ہے

آسرا ان کی رہبری ٹھہری

جن کی خود رہزنی میں گزری ہے

آس کے جگنوؤ سدا کس کی

زندگی روشنی میں گزری ہے

ہم نشینی پہ فخر کر ناداں

صحبت آدمی میں گزری ہے

یوں تو شاعر بہت سے گزرے ہیں

اپنی بھی شاعری میں گزری ہے

میر کے بعد غالب و اقبال

اک صدا، اک صدی میں گزری ہے

گلزار دہلوی

تلوک چند محروم

 یوم پیدائش 01 جولائی 1887

دست خرد سے پردہ کشائی نہ ہو سکی

حسن ازل کی جلوہ نمائی نہ ہو سکی

رنگ بہار دے نہ سکے خارزار کو

دست جنوں میں آبلہ سائی نہ ہو سکی

اے دل تجھے اجازت فریاد ہے مگر

رسوائی ہے اگر شنوائی نہ ہو سکی

مندر بھی صاف ہم نے کئے مسجدیں بھی پاک

مشکل یہ ہے کہ دل کی صفائی نہ ہو سکی

فکر معاش و عشق بتاں یاد رفتگاں

ان مشکلوں سے عہد برآئی نہ ہو سکی

غافل نہ تجھ سے اے غم عقبیٰ تھے ہم مگر

دام غم جہاں سے رہائی نہ ہو سکی

منکر ہزار بار خدا سے ہوا بشر

اک بار بھی بشر سے خدائی نہ ہو سکی

خود زندگی برائی نہیں ہے تو اور کیا

محرومؔ جب کسی سے بھلائی نہ ہو سکی

تلوک چند محروم

فیضان رضا

 مرا تو کوئی غم تازہ نہیں ہے

مجھے فرقت کا پچھتاوا نہیں ہے

کہیں پر ہم اذیّت پی گئے ہیں

کہیں پر ساغر و مینا نہیں ہے

مقفّل ہو چکی راہِ محبّت

اور اس کا قیس کو صدمہ نہیں ہے

ضرورت سے سوا رختِ سفر ہو

فقیری میں یہ کام اچھا نہیں ہے

کسی کی یاد میں بکھرا ہوا ہوں

کہ دھوکے سے یہ دل بیٹھا نہیں ہے

تماشا ختم ہونے جا رہا ہے

رضا کس آنکھ میں دریا نہیں ہے ؟

فیضان رضا

محمد مشرف خاور

 یوم پیدائش 06 جولائی 

نظر کے پاس رہ کر بھی پہنچ سے دور ہو جانا

محبت میں اسے کہتے ہیں ہم مجبور ہو جانا

خوشا اے دل مداوا ان کے زخموں کا نہیں ورنہ

کہاں ہر زخم کی قسمت میں ہے ناسور ہو جانا

بڑھانا اس طرح سے بے قراری اور بھی دل کی

جھلک عشاق کو دکھلا کے پھر مستور ہو جانا

محبت کا ہمارا دائرہ بس اتباع تک ہے

ہمیں زیبا نہیں ہے سرمد و منصور ہو جانا

نظر چھلکے نہ چھلکے منحصر ہے ظرف پر لیکن

ہے پہلی شرط دل کا درد سے معمور ہو جانا

نظر کو تاب نظارہ رہی ہے تیرے جلووں کی

کہ لازم تو نہیں ہر جلوہ گہ کا طور ہو جانا

تجھے پا لینے کا احساس اس کو کہتے ہیں شاید

ترے عارض کو چھو کر زلف کا مغرور ہو جانا

ہمیں کیا راس آئے بادہ و ساغر کہ اپنا تو

نگاہوں پہ ہے ان کی منحصر مخمور ہو جانا

لباس خاک ہی سے جب مری ساری فضیلت ہے

تو کیوں کر زیب ہے مجھ کو بھلا پھر نور ہو جانا

احمد مشرف خاور

ذوالفقار علی بخاری

 یوم پیدائش 06 جولائی 1904

گم کردہ راہ خاک بسر ہوں ذرا ٹھہر

اے تیز رو غبار سفر ہوں ذرا ٹھہر

رقص نمود یک دو نفس اور بھی سہی

دوش ہوا پہ مثل شرر ہوں ذرا ٹھہر

اپنا خرام تیز نہ کر اے نسیم زیست

بجھنے کو ہوں چراغ سحر ہوں ذرا ٹھہر

وہ دن قریب ہے کہ میں آنکھوں کو موند لوں

یعنی ہلاک ذوق نظر ہوں ذرا ٹھہر

اے دوست میری تلخ نوائی پہ تو نہ جا

شیریں مثال خواب سحر ہوں ذرا ٹھہر

جس راہ سے اٹھا ہوں وہیں بیٹھ جاؤں گا

میں کارواں کی گرد سفر ہوں ذرا ٹھہر

اے شہسوار حسن مجھے روند کر نہ جا

واماندہ مثل راہ گزر ہوں ذرا ٹھہر

اے آفتاب حسن مری کیا بساط ہے

دریوزہ گر ہوں نور قمر ہوں ذرا ٹھہر 

موہوم سی امید ہوں مجھ سے گریز کیا

اپنی کسی دعا کا اثر ہوں ذرا ٹھہر

ذوالفقار علی بخاری 

ہارون علی ماجدؔ عادل آبادی

 خود نمائی کا نشہ دل سے اتر جانے کے بعد

زندگی چیز ہے کیا جانا بکھر جانے کے بعد

حوصلہ یار کبھی کم نہیں ہونے دینا 

جیت پانا ترا ممکن نہیں ڈر جانے کے بعد

لوٹ کر آتا نہیں وقت سنبھل جاؤ ابھی

ہاتھ ملنا نہ پڑے وقت گذر جانے کے بعد

چاہے تریاق ہو یا زہر ہو یا مے یا دوا

رنگ لاتی نہیں شے کوئی اثر جانے کے بعد

تھی روانی تو بہت شور مچاتا تھا جو

کتنا خاموش ہے وہ دریا ٹھہر جانے کے بعد

جب برے تھے تو کسی نے بھی نہیں کی تنقید

لوگ تنقید بھی کرتے ہیں سدھر جانے کے بعد

چاہے بادۂِ محبت ہو یا مے صبر کی ہو

یار پیمانہ چھلک جاتا ہے بھر جانے کے بعد

کر گزر کام کوئی ایسا کہ دنیا ماجدؔ

یاد تجھ کو رکھے صدیوں ترے مر جانے کے بعد

ہارون علی ماجدؔ عادل آبادی

انور جلال پوری

 یوم پیدائش 06 جولائی 1947

پرایا کون ہے اور کون اپنا سب بھلا دیں گے

متاع زندگانی ایک دن ہم بھی لٹا دیں گے

تم اپنے سامنے کی بھیڑ سے ہو کر گزر جاؤ

کہ آگے والے تو ہرگز نہ تم کو راستہ دیں گے

جلائے ہیں دیئے تو پھر ہواؤں پر نظر رکھو

یہ جھونکے ایک پل میں سب چراغوں کو بجھا دیں گے

کوئی پوچھے گا جس دن واقعی یہ زندگی کیا ہے

زمیں سے ایک مٹھی خاک لے کر ہم اڑا دیں گے

گلہ شکوہ حسد کینہ کے تحفے میری قسمت ہیں

مرے احباب اب اس سے زیادہ اور کیا دیں گے

مسلسل دھوپ میں چلنا چراغوں کی طرح جلنا

یہ ہنگامے تو مجھ کو وقت سے پہلے تھکا دیں گے

اگر تم آسماں پر جا رہے ہو شوق سے جاؤ

مرے نقش قدم آگے کی منزل کا پتا دیں گے

انور جلال پوری

محبوب خزاں

 یوم پیدائش 01 جولائی 1930

ہر بات یہاں بات بڑھانے کے لیے ہے

یہ عمر جو دھوکا ہے تو کھانے کے لیے ہے

یہ دامن‌ حسرت ہے وہی خواب گریزاں

جو اپنے لیے ہے نہ زمانے کے لیے ہے

اترے ہوئے چہرے میں شکایت ہے کسی کی

روٹھی ہوئی رنگت ہے منانے کے لیے ہے

غافل تری آنکھوں کا مقدر ہے اندھیرا

یہ فرش تو راہوں میں بچھانے کے لیے ہے

گھبرا نہ ستم سے نہ کرم سے نہ ادا سے

ہر موڑ یہاں راہ دکھانے کے لیے ہے

محبوب خزاں

رمزی آثم

 یوم پیدائش 01 جولائی 1975

عشق تھا اور عقیدت سے ملا کرتے تھے

پہلے ہم لوگ محبت سے ملا کرتے تھے

روز ہی سائے بلاتے تھے ہمیں اپنی طرف

روز ہم دھوپ کی شدت سے ملا کرتے تھے

صرف رستہ ہی نہیں دیکھ کے خوش ہوتا تھا

در و دیوار بھی حسرت سے ملا کرتے تھے

اب تو ملنے کے لیے وقت نہیں ملتا ہے

ورنہ ہم کتنی سہولت سے ملا کرتے تھے

رمزی آثم