زین احترام

 یوم پیدائش 22 اگسٹ

اٹھاتا کون ہے نخرے ہمارے

کسے فرصت سنے قصّے ہمارے

گلے ملتے اچانک رک گیا وہ

پرانے دیکھ کر کپڑے ہمارے

وہ ہلکے زندگی کے بوجھ سے تھے

کتابوں سے بھرے بستے ہمارے

نئے اس سال سوچا تھا ملیں گے

مگر آئے نہ دن اچھّے ہمارے

یہ بہتر ہے کہانی موڑ لیں ہم 

نہیں ملتے اگر رستے ہمارے

انا کی ضد کہاں تک لے گئ ہے

ذرا سی دیر کے جھگڑے ہمارے

ٹھہر جا زین کب سے ہے سفر میں

صدا دینے لگے جوتے ہمارے

زین احترام

زبیر قلزم

 ہمیں بھی تو محبت ہو گئی تھی

نہ پوچھو کیا قیامت ہو گئی تھی

ہمیں جب عشق نے قیدی رکھا تھا

تو جاں دے کر ضمانت ہو گئی تھی

نبھا کا وعدہ کہتے بھول جائیں

جوانی میں حماقت ہو گئی تھی

اٹھائے پھر رہا ہوں لاش اپنی

مری مجھ سے ہلاکت ہو گئی تھی

یہ تم نے کیسے بدلی ہے بتاؤ

تمہیں بھی میری عادت ہو گئی تھی

میں جب تک لوٹا اپنے پاس تب تک

مرے اندر بغاوت ہو گئی تھی

اجل آئی ہے میں صدقے میں واری

اذیت میری قسمت ہو گئی تھی 

بچھڑتے وقت یہ بھی دکھ تھا قلزم

وہ کتنی خوبصورت ہو گئی تھی

زبیر قلزم

ڈاکٹر احمد علی برقی اعظمی

 بیادِ ممتاز فلمی اداکارہ : مینا کماری

تاریخ تولد: یکم اگست ۱۹۳۲۔ تاریخ وفات ۳۱ مارچ ۱۹۷۲

 یاد ہے کیا آپ کو یوم تولد اس کا آج

جو دلوں ہر کرتی تھی اپنی اداکاری سے راج

مہ جبیں بانو سے جو مینا کماری بن گٸی

دلبری اور دلنوازی کا تھا اس میں امتزاج

سن بہتر میں جو اس دنیا سے رخصت ہوگٸی

حکمراں ہے وہ دلوں پر آج بھی بے تخت و تاج

فلمٕی دنیا میں ہے جس کا شہرہ آفاق نام

رہتی دنیا تک کریں گے پیش سب اس کو خراج

مٹ نہیں سکتے کبھی اس کے نقوش جاوداں

جیسے تھے مقبول کل وہ ویسے ہیں مقبول آج

اس اداکارہ کا سب سے منفرد انداز تھا

غمزدہ انسانیت کی تھی صداٸے احتجاج

تھی اداکارہ وہ جیسی ویسی ہی تھی شاعرہ

غم کی اک ملکہ تھی جس کا درد دل تھا لاعلاج

ً جواربھاٹہ ً اور ً پاکیزہ ً میں اپنے کام سے

کردیا پیدا دلوں میں اہل دل کے اختلاج

پر دہ سیمیں پہ تھیں جس کی اداٸیں دلنواز

فلم بینوں کی تھی برقی اعظمی وہ ہم مزاج

احمد علی برقی اعظمی

اشنال سید

 یوم پیدائش 01 آگسٹ 

کھلا اک در مقفل ہوگیا ہے

جو اندر تھا وہ پاگل ہو گیا ہے

کیا اس نے تو بس ترکِ تعلق

یہاں سب کچھ معطل ہوگیا ہے

مرے امکان میں اب اک شجر ہے

جو بویا تھا وہ کونپل ہو گیا ہے

خبر تجھ کو نہیں ہے اور کوئی

تری نظروں سے گھائل ہو گیا ہے

میں اس تک کیسے پہنچوں راستے میں

ہرے سے لال سگنل ہوگیا ہے

ہماری پیاس کی شدت کا سن کر

رواں پانی بھی دلدل ہوگیا ہے

جو سنجیدہ تھا دنیا کی نظر میں

مرے دیکھے سے چنچل ہو گیا ہے

مری بینائی تھی مشروط جس سے

وہی نظروں سے اوجھل ہوگیا ہے

ادھورا تھا مرا اشنال جیون 

اسے پا کر مکمل ہوگیا ہے

اشنال سید

شکیل جمالی

 یوم پیدائش 01 آگسٹ 1958

وفاداروں پہ آفت آ رہی ہے

میاں لے لو جو قیمت آ رہی ہے

میں اس سے اتنے وعدے کر چکا ہوں

مجھے اس بار غیرت آ رہی ہے

نہ جانے مجھ میں کیا دیکھا ہے اس نے

مجھے اس پر محبت آ رہی ہے

بدلتا جا رہا ہے جھوٹ سچ میں

کہانی میں صداقت آ رہی ہے

مرا جھگڑا زمانے سے نہیں ہے

مرے آڑے محبت آ رہی ہے

ابھی روشن ہوا جاتا ہے رستہ

وہ دیکھو ایک عورت آ رہی ہے

مجھے اس کی اداسی نے بتایا

بچھڑ جانے کی ساعت آ رہی ہے

بڑوں کے درمیاں بیٹھا ہوا ہوں

نصیحت پر نصیحت آ رہی ہے

شکیل جمالی

ن م راشد

 یوم پیدائش 01 آگسٹ 1910

جو بے ثبات ہو اس سر خوشی کو کیا کیجے

یہ زندگی ہے تو پھر زندگی کو کیا کیجے

رکا جو کام تو دیوانگی ہی کام آئی

نہ کام آئے تو فرزانگی کو کیا کیجے

یہ کیوں کہیں کہ ہمیں کوئی رہنما نہ ملا

مگر سرشت کی آوارگی کو کیا کیجے

کسی کو دیکھ کے اک موج لب پہ آ تو گئی

اٹھے نہ دل سے تو ایسی ہنسی کو کیا کیجے

ہمیں تو آپ نے سوز الم ہی بخشا تھا

جو نور بن گئی اس تیرگی کو کیا کیجے

ہمارے حصے کا اک جرعہ بھی نہیں باقی

نگاہ دوست کی مے خانگی کو کیا کیجے

جہاں غریب کو نان جویں نہیں ملتی

وہاں حکیم کے درس خودی کو کیا کیجے

وصال دوست سے بھی کم نہ ہو سکی راشدؔ

ازل سے پائی ہوئی تشنگی کو کیا کیجے

ن م راشد

مظفر رزمی

 یوم پیدائش 01 آگسٹ 1936

اس راز کو کیا جانیں ساحل کے تماشائی

ہم ڈوب کے سمجھے ہیں دریا تری گہرائی

جاگ اے مرے ہمسایہ خوابوں کے تسلسل سے

دیوار سے آنگن میں اب دھوپ اتر آئی

چلتے ہوئے بادل کے سائے کے تعاقب میں

یہ تشنہ لبی مجھ کو صحراؤں میں لے آئی

یہ جبر بھی دیکھا ہے تاریخ کی نظروں نے

لمحوں نے خطا کی تھی صدیوں نے سزا پائی

کیا سانحہ یاد آیا رزمیؔ کی تباہی کا

کیوں آپ کی نازک سی آنکھوں میں نمی آئی

مظفر رزمی

مینا کماری ناز

 یوم پیدائش 01 آگسٹ 1933

یوں تیری رہ گزر سے دیوانہ وار گزرے

کاندھے پہ اپنے رکھ کے اپنا مزار گزرے

بیٹھے ہیں راستے میں دل کا کھنڈر سجا کر

شاید اسی طرف سے اک دن بہار گزرے

دار و رسن سے دل تک سب راستے ادھورے

جو ایک بار گزرے وہ بار بار گزرے

بہتی ہوئی یہ ندیا گھلتے ہوئے کنارے

کوئی تو پار اترے کوئی تو پار گزرے

مسجد کے زیر سایہ بیٹھے تو تھک تھکا کر

بولا ہر اک منارہ تجھ سے ہزار گزرے

قربان اس نظر پہ مریم کی سادگی بھی

سائے سے جس نظر کے سو کردگار گزرے

تو نے بھی ہم کو دیکھا ہم نے بھی تجھ کو دیکھا

تو دل ہی ہار گزرا ہم جان ہار گزرے

مینا کماری ناز

عدیم ہاشمی

 یوم پیدائش 01 آگسٹ 1946

راحت جاں سے تو یہ دل کا وبال اچھا ہے

اس نے پوچھا تو ہے اتنا ترا حال اچھا ہے

ماہ اچھا ہے بہت ہی نہ یہ سال اچھا ہے

پھر بھی ہر ایک سے کہتا ہوں کہ حال اچھا ہے

ترے آنے سے کوئی ہوش رہے یا نہ رہے

اب تلک تو ترے بیمار کا حال اچھا ہے

یہ بھی ممکن ہے تری بات ہی بن جائے کوئی

اسے دے دے کوئی اچھی سی مثال اچھا ہے

دائیں رخسار پہ آتش کی چمک وجہ جمال

بائیں رخسار کی آغوش میں خال اچھا ہے

آؤ پھر دل کے سمندر کی طرف لوٹ چلیں

وہی پانی وہی مچھلی وہی جال اچھا ہے

کوئی دینار نہ درہم نہ ریال اچھا ہے

جو ضرورت میں ہو موجود وہ مال اچھا ہے

کیوں پرکھتے ہو سوالوں سے جوابوں کو عدیمؔ

ہونٹ اچھے ہوں تو سمجھو کہ سوال اچھا ہےع

عد

یم ہاشمی

اسلم کولسری

 یوم پیدائش 01 آگسٹ 1946

جب میں اس کے گاؤں سے باہر نکلا تھا

ہر رستے نے میرا رستہ روکا تھا

مجھ کو یاد ہے جب اس گھر میں آگ لگی

اوپر سے بادل کا ٹکڑا گزرا تھا

شام ہوئی اور سورج نے اک ہچکی لی

بس پھر کیا تھا کوسوں تک سناٹا تھا

میں نے اپنے سارے آنسو بخش دیے

بچے نے تو ایک ہی پیسہ مانگا تھا

شہر میں آ کر پڑھنے والے بھول گئے

کس کی ماں نے کتنا زیور بیچا تھا

اسلم کولسری