مخمور دہلوی

 یوم پیدائش 07 نومبر 1901

یہ تجھ سے آشنا دنیا سے بیگانے کہاں جاتے

ترے کوچے سے اٹھتے بھی تو دیوانے کہاں جاتے

قفس میں بھی مجھے صیاد کے ہاتھوں سے ملتے ہیں

مری تقدیر کے لکھے ہوئے دانے کہاں جاتے

نہ چھوڑا ضبط نے دامن نہیں تو تیرے سودائی

ہجوم غم سے گھبرا کر خدا جانے کہاں جاتے

میں اپنے آنسوؤں کو کیسے دامن میں چھپا لیتا

جو پلکوں تک چلے آئے وہ افسانے کہاں جاتے

تمہارے نام سے منسوب ہو جاتے ہیں دیوانے

یہ اپنے ہوش میں ہوتے تو پہچانے کہاں جاتے

اگر کوئی حریم ناز کے پردے اٹھا دیتا

تو پھر کعبہ کہاں رہتا صنم خانے کہاں جاتے

نہیں تھا مستحق مخمورؔ رندوں کے سوا کوئی

نہ ہوتے ہم تو پھر لبریز پیمانے کہاں جاتے

مخمور دہلوی

نظیر صدیقی

 یوم پیدائش 07 نومبر 1930

ہر شخص بن گیا ہے خدا تیرے شہر میں

کس کس کے در پہ مانگیں دعا تیرے شہر میں

مجرم ہیں سارے اہل وفا تیرے شہر میں

کیا خوب ہے وفا کا صلہ تیرے شہر میں

اہل ہوس کے نام سے ہیں روشناس خلق

ملتی ہے جن کو داد وفا تیرے شہر میں

رکھتے ہیں لوگ تہمتیں اپنے نصیب پر

کرتے ہیں یوں بھی تیرا گلا تیرے شہر میں

اپنوں پہ اعتماد نہ غیروں پہ اعتماد

یہ کیسی چل پڑی ہے ہوا تیرے شہر میں

ہوتا ہے کس مرض کا مداوا ترے یہاں

ملتی ہے کس مرض کی دوا تیرے شہر میں

رکھتے ہیں ہر جزا کو قیامت پہ منحصر

دیتے ہیں ہر خطا کی سزا تیرے شہر میں

نظیر صدیقی

احمد علی برقی اعظمی

 بیاد شاعر مشرق علامہ اقبال

شاعری اقبال کی ہے فکروفن کا شاہکار

شہرہ آفاق ہیں ان کے یہ در شاہوار

" پس چہ باید کرد " ہو یا ان کی ہو " بانگ درا "

ہے جہان فکروفن میں ان کو حاصل اعتبار

" بال جبریل " اور ہیں "جاوید نامہ " بے مثال

ان کے افکار درخشاں کے ہیں جو آٸینہ دار

روح پرور ہیں " پیام مشرق" اور " ضرب کلیم "

جن کے ہیں مداح اقصاٸے جہاں میں بیشمار

ہیں وہ یکساں آبروٸے سرزمین ہند و پاک

جو بھی ارباب نظر ہیں ان کے ہیں منت گذار

کھولے ہیں ہم پر انھوں نے باب علم و فضل کے

جن کی تہذیبی روایت ہے نہایت شاندار

درس عبرت ہے ہمارے واسطے ان کا کلام

دیتا ہے داد شجاعت جو ہمیں مردانہ وار

مشوروں پر ان کے ہم کرتے اگر لبیک آج

سر پہ ہم سب کے نہ ہوتا اشہب دوراں سوار

جنت الفردوس میں درجات ہوں ان کے بلند

ان پہ نازل ہو ہمیشہ رحمت پروردگار

صفحہ تاریخ کی زینت ہے ان کی شاعری

میرا یہ نذر عقیدت ان پہ ہے برقٕی نثار

احمدعلی برقی اعظمی

فرزند علی شوق

 یوم پیدائش 6 نومبر 1972

کر لیا جب منتخب دشتِ جنوں 

ہوگئی ہے اور بھی وحشت فزوں

جب محبت کا کرم مجھ پر ہوا

نفرتوں کا ہو گیا ہے سر نگوں

اڑ گئی آنکھوں سے نیندوں کی پری

عشق نے جب سے کیا ہے بے سکوں

لاکھ میں تنہا ہوں راہ ِ درد میں 

چن رہا ہوں آرزوں کا ستوں

کچے گھر میں رہ رہے ہیں فاقہ کش

زندگی ہے مدتوں سے جوں کی توں

دشمنِ امن و اماں کچھ تو بتا 

حادثوں کے شہر میں کیسے جیوں

جس کو بھی دیتا ہوں پھول اخلاص کے

ڈالتا ہے مجھ پہ وہ دامِ فسوں 

ساتھ میرا چھوڑ کر سب چل دیے

صرف ساتھی ہے میرا حالِ زبوں

بے زبانی دے گئے یارانِ شوق

داستانِ درد و غم کیسے کہوں

فرزند علی شوق

فاروق شائق سانگو

 شہر وحشت سے اب نکال ہمیں

میرے دل مہرباں سنبھال ہمیں

بگڑا دل میرا دلفریبی مزاج 

کچھ سدھرنے کا دو خیال ہمیں 

حل نہیں آتشیں مزاج ہے دن 

ڈستا ہے شام کا سوال ہمیں

گھر سے میں دربدر ہوں دشت جنوں

پاؤں میں بیڑیاں یوں ڈال ہمیں

دھڑکنیں تھم گئی یوں دل کی مری

تسکیں درکار ماہ سال ہمیں

مضطرب دل ہے وحشی ہجر کی شب

عشق شائق کیا نڈھال ہمیں

فاروق شائق سانگو

احمد رئیس

 حالِ دل کرنا بیاں ہے کام جوئے شیر کا

سوختہ جاں ہے عبث نالہ ترا شب گیر کا

ہجر ہے میرا مقدر بس یہی سمجھا ہے دل

لے لیا بوسہ تصور میں تری تصویر کا

حشر کو ہی ہم ملیں گے، بارہا وعدہ کیا

ہاں مگر یہ تو بتا کیا ہے سبب تاخیر کا

میں نہیں کہتا کہ مجھ کو کر غلامی میں قبول

  پاسباں کوئی ہو لیکن حسن کی جاگیر کا

اپنے ہاتھوں کی لکیریں دیکھتا ہی رہ گیا

پوچھ بیٹھا جب ستم گر خواب کی تعبیر کا

  سوچتا ہوں کیا کہوں نادان لوگوں کو بھلا

  میرے آگے چھیڑتے ہیں ذکر جب زنجیر کا

  شہر میں کربل بپا ہے، ہیں یزیدی چارسو

   آج بھی ہے سر پہ سایہ کفر کی شمشیر کا

غم نہ کھا بس اہل حق کی بزم میں جاکر تو دیکھ

   میں وہیں سمجھا ہوں کیا ہے فلسفہ تقدیر کا

چاہیے گر بادشاہی بن غلامِ مصطفیﷺ

  ہے سوا اس کے نہ رستہ عالمِ تسخیر کا

  احمد رئیس

حمید ناگپوری

 یوم پیدائش 05 نومبر 1907

فکر پابندی حالات سے آگے نہ بڑھی

زندگی قید مقامات سے آگے نہ بڑھی

ہم سمجھتے تھے غم دل کا مداوا ہوگی

وہ نظر پرسش حالات سے آگے نہ بڑھی

ان کی خاموشی بھی افسانہ در افسانہ بنی

ہم نے جو بات کہی بات سے آگے نہ بڑھی

سر خوشی بن نہ سکی زہر الم کا تریاق

زندگی تلخئ حالات سے آگے نہ بڑھی

عشق ہر مرحلۂ غم کی حدیں توڑ چکا

عقل اندیشۂ حالات سے آگے نہ بڑھی

ایسی جنت کی ہوس تجھ کو مبارک زاہد

جو ترے حسن خیالات سے آگے نہ بڑھی

نگہ دوست میں توقیر نہیں اس کی حمیدؔ

وہ تمنا جو مناجات سے آگے نہ بڑھی

حمید ناگپوری

سجاد ظہیر

 یوم پیدائش 05 نومبر 1905

نظم محبت کی موت

تم نے محبت کو مرتے دیکھا ہے؟ 

چمکتی ہنستی آنکھیں پتھرا جاتی ہیں 

دل کے دالانوں میں پریشان گرم لو کے جھکڑ چلتے ہیں 

گلابی احساس کے بہتے ہوئے خشک 

اور لگتا ہے جیسے 

کسی ہری بھری کھیتی پر پالا پڑ جائے! 

لیکن یارب 

آرزو کے ان مرجھائے سوکھے پھولوں 

ان گم شدہ جنتوں سے 

کیسی صندلی 

دل آویز 

خوشبوئیں آتی ہیں

سجاد ظہیر

حکیم احمد شجاع ساحر

 یوم پیدائش 04 نومبر 1896

توکل

اللہ پہ چھوڑو کام سبھی وہ ہے اپنا تو سب کچھ ہے

بے بس بندوں کو کیا کرنا وہ ہے داتا تو سب کچھ ہے

کچھ آج کمائی کر ایسی جو کل کو چل کر کام آئے

یاں سب کچھ ہے تو کچھ بھی نہیں واں کچھ بھی ملا تو سب کچھ ہے

ہیں خدمت خلق اور ذکر خدا دو کام فقط انسانوں کے

دکھ بانٹ کے اس کے بندوں کا وہ نام جپا تو سب کچھ ہے

 اے ساحر دنیا والوں نے گر چھوڑ دیا تو کیا غم ہے

 وہ دین اور دنیا کا مالک جب ہے تیرا تو سب کچھ ہے 

حکیم احمد شجاع ساحر

فیضان رضا

 یوم پیدائش 04 نومبر

مشقّتوں پہ یقیں، اور فن کی قلت تھی

ہجومِ اہلِ سخن تھا سخن کی قلت تھی

خوش آمدید بھی کہتے تو کس طرح کہتے

ہماری بزم میں شیریں سخن کی قلت تھی

مرے علاوہ کسی کا اُدھر نہ دھیان گیا

ریا سے پاک یہاں پر زمن کی قلت تھی

شکستہ حال تھا میں بھی مکاں بنا لیتا

کہ مجھ غریب میں تھوڑی جتن کی قلت تھی

اِسی لئے تو سبھی گھر اُداس رہتے تھے

مرے قبیلے میں اک انجمن کی قلت تھی

ہم ایسے شہر میں آ کے ٹھہر گئے تھے رضا

قدم قدم پہ جہاں اہلِ فن کی قلت تھی

فیضان رضا