اقبال بالے

 جو لکھ گئی تھی ہماری قسمت وہی ہوئی ہے

"کہ یہ اداسی ہمارا سایہ بنی ہوئی ہے"

حسین زلفوں کے پیچ و خم میں الجھ گئے تھے

گزرتے لمحوں کے ساتھ پھر آگہی ہوئی ہے

روش کو اپنایا قیس و فرہاد کی تبھی تو

ہماری الفت کی داستاں سنسنی ہوئی ہے

نہیں ہے مجھ میں کوئی کمال اور شعور و دانش

کرم ہے رب کا جو بات اب تک بنی ہوئی ہے

اسی لئے جی رہا ہوں میں اس جہاں میں ،بالے

یہاں کی ہر شے میں وجہِ نسیاں بھری ہوئی ہے

اقبال بالے

ظہیر مشتاق

 یوم پیدائش 14 نومبر 1982

بچھڑتے وقت بھی ہارا نہیں گیا مجھ سے 

وہ جا رہا تھا پکارا نہیں گیا مجھ سے 

جو سچ کہوں تو زمانہ تری جدائی کا 

گزر گیا ہے گزارا نہیں گیا مجھ سے 

لچکتی شاخ بلاتی ہی رہ گئی لیکن

پرایا پھول اتارا نہیں گیا مجھ سے 

بدل چکا ہوں میں اتنا سوانگ بھرتے ہوئے

خود اپنا روپ ہی دھارا نہیں گیا مجھ سے 

جو ایک بارِ زیاں تھا ظہیر شانے پر

گرا دیا ہے اتارا نہیں گیا مجھ سے

ظہیر مشتاق

اطہر عطو

 وہ چاند ہے ستارہ ہے یا آفتاب ہے ؟

آنکھوں میں روشنی کی جگہ جس کا خواب ہے

میں آرزو کے گاوں کی لڑکی ہوں خار سی

تو شہرِ ممکنات کا کھلتا گلاب ہے

 مرنا ہی اب روا ہے مجھے ربِ کائنات

اس نامراد دور میں جینا عذاب ہے

اطہر عطو

شعیب زمان

 یوم پیدائش 14 نومبر

چاہے جس چاک پر گھماؤ مجھے

تم مرا آئینہ بناؤ مجھے

ڈوب سکتی نہیں مری آواز

لگنے والا نہیں یہ گھاؤ مجھے

ورنہ دل میں اتر بھی سکتا ہوں

پہلی فرصت میں بھول جاؤ مجھے

قید کرنا بھی سیکھ جاؤں گا

پہلے زنجیر تو بناؤ مجھے

ٹوٹ جانے سے بچ گیا ہوں میں

راس آیا ہے یہ جھکاؤ مجھے

شعیب زمان

ظہیر ناصری

 خزانہ دل میں علم وآگہی کا ہم بھی رکھتے ہیں

مٹانے تشنگی مٹّی کا کوزہ ہم بھی رکھتے ہیں

قلندرہیں ہمیں دربارِشاہی سے ھے کیا مطلب

وہاں تک باریابی کا وثیقہ ہم بھی رکھتے ہیں

چمن میں پھولنے پھلنے کا موقع کیوں نہیں حاصل

سرِشاخِ تمنّاآشیانہ ہم بھی رکھتے ہیں

ابھی طاقِ گماں میں کچھ دھواں باقی ھے ماضی کا

یقیں انگیز بنناہوتو سرمہ ہم بھی رکھتے ہیں

نواحِ شہرِ جاں میں آگ برسانے کی خوُ کب تک

بجھانے آگ نوحی پاک دریا ہم بھی رکھتے ہیں

ترے نقشِ قدم ہیں چاند کے سینے پہ، حیرت کیا

اُسے دونیم کرنے کا اشارا ہم بھی رکھتے ہیں

اگر زنخیر ٹوٹے پاسداری کی ظہیر اک دن

ہُنر حلقوں کو پھر سے جوڑنے کا ہم بھی رکھتے ہیں

ظہیر ناصری محبوب نگر

شاہین فصیح ربانی

 یوم پیدائش 14 نومبر 1964

خواب کے حسن کا الطاف نہیں پاتا ہوں

اس کو تعبیر کا ملبوس جو پہناتا ہوں

جب کبهی حسنِ سماعت کا بدن پاتا ہوں

"تیری آواز کے قدموں سے لپٹ جاتا ہوں"

مجھ کو دستک پہ بهی ملتی نہیں کردار کی بھیک

درِ افسانہ سے خالی ہی پلٹ آتا ہوں

آ گئی راس مجھے ہجر کی بے چین فضا

اب تری پیشکشِ قرب کو ٹھکراتا ہوں

جب بھی تنہائی تری یاد سے ملواتی ہے

دل پہ کھائی ہوئی اک چوٹ کو سہلاتا ہوں

دن فقط سوچ کی دیتا ہے سہولت پیارے

رات ہونے دے، ترے خواب میں آ جاتا ہوں

یوں رہِ زیست سرابوں سے اٹی ہے کہ نہ پوچھ

پانی بھرنے کے لیے دشت میں آ جاتا ہوں

عمر آوازوں کے جنگل میں گزاری ہے فصیح

بات کرتا ہوں تو لگتا ہے کہ چِلّاتا ہوں

شاہین فصیح ربانی

پیر نصیر الدین شاہ نصیر

 یوم پیدائش 14 نومبر 1949

کبھی ان کا نام لینا کبھی ان کی بات کرنا

مرا ذوق ان کی چاہت مرا شوق ان پہ مرنا

وہ کسی کی جھیل آنکھیں وہ مری جنوں مزاجی

کبھی ڈوبنا ابھر کر کبھی ڈوب کر ابھرنا

ترے منچلوں کا جگ میں یہ عجب چلن رہا ہے

نہ کسی کی بات سننا، نہ کسی سے بات کرنا

شب غم نہ پوچھ کیسے ترے مبتلا پہ گزری

کبھی آہ بھر کے گرنا کبھی گر کے آہ بھرنا

وہ تری گلی کے تیور، وہ نظر نظر پہ پہرے

وہ مرا کسی بہانے تجھے دیکھتے گزرنا

کہاں میرے دل کی حسرت، کہاں میری نارسائی

کہاں تیرے گیسوؤں کا، ترے دوش پر بکھرنا

چلے لاکھ چال دنیا ہو زمانہ لاکھ دشمن

جو تری پناہ میں ہو اسے کیا کسی سے ڈرنا

وہ کریں گے نا خدائی تو لگے گی پار کشتی

ہے نصیرؔ ورنہ مشکل، ترا پار یوں اترنا

پیر نصیر الدین شاہ نصیر

سیدہ مظلوم فاطمہ جعفری

 علم وادب کی خود میں ہے چاشنی سمیٹے

کتنی یہ منفرد ہے اردو زبان اپنی

سیدہ مظلوم فاطمہ جعفری

رانا التمش ماشی

 یہ نگر وہ نگر قیامت تک 

زندگی ہے سفر قیامت تک

اس کی مرضی ہے کب ملے نہ ملے

میں تو ہوں منتظر قیامت تک

جسم میں روح ڈال کر بولا

آدمی موج کر قیامت تک

وہ کسی اور کا نہ ہو جائے 

رکھ نظر پر نظر قیامت تک

چاندنی آتی جاتی رہنی ہے 

چاند ہے عرش پر قیامت تک

ایک پل ہی ہمیں ڈراتا ہے  

اور رہتا ہے ڈر قیامت تک

مرتے جائیں گے باری باری سب 

چلتا جائے گا گھر قیامت تک

چہرے مٹتے رہیں گے لمحوں میں 

یاد ہو گی مگر قیامت تک

چار دن کی ہے چاندنی دنیا 

چار دن کا اثر قیامت تک

یہ قیامت ہے کیا بھلا ماشی

نہیں ملنی خبر قیامت تک

رانا التمش ماشی

اظہر

 کوئی دل سے اتر گیا شاید

زخم امید بھر گیا شاید

اب وہ روتا ہے روز روتا ہے

کوئی اپنا مکر گیا شاید

اس کا کوچہ پڑا ہے ویرانہ

لوٹ کر اپنے گھر گیا شاید۔

اس کے سانسیں رکی اچانک سے

سن کے آواز ڈر گیا شاید

تیرے لب پر جو مسکراہٹ ہے

دل کا غم اب اتر گیا شاید

یہ جو ہلچل سی دل میں ہے اظہر

پھر سے ارماں ابھر گیا شاید

اظہر