مائل لکھنوی

 تاریخ وفات 10 جنوری 1968

سن ولادت: 1905

نگاہِ ناز کی پہلی سی برہمی بھی گئی

میں دوستی کو ہی روتا تھا دشمنی بھی گئی

یاد اور ان کی یاد کی اللہ رے محویت 

جیسے تمام عمر کی فرصت خرید لی 

نہ پوچھ کیسے گزاری ہے زندگی میں نے 

گزارنے کی تھی اک شے گزار دی میں نے 

محبت اور مائلؔ جلد بازی کیا قیامت ہے 

سکون دل بنے گا اضطراب آہستہ آہستہ 

نظر اور وسعت نظر معلوم 

اتنی محدود کائنات نہیں 

 میں نے دیکھے ہیں دہکتے ہوئے پھولوں کے جگر 

دل بینا میں ہے وہ نور تمہیں کیا معلوم 

 دعوۂ انسانیت مائلؔ ابھی زیبا نہیں 

پہلے یہ سوچو کسی کے کام آ سکتا ہوں میں 

 سیلاب عشق غرق کن عقل و ہوش تھا 

اک بحر تھا کہ شام و سحر گرم جوش تھا 

مائل لکھنوی

نیاز نذر فاطمی

 یوم پیدائش 10 جنوری 1952

حسن میں ناز و ادا عشق میں وحشت کیسی 

اس زمانے میں وفا کیسی محبت کیسی

 

تلخ باتوں پہ خموشی بھی بڑا عزم ہے پر 

گالیاں سن کے دعا دے وہ شرافت کیسی

لوگ غالیچوں پہ سجدے سے بھی کتراتے ہیں 

تیغ کے سائے میں کرتے تھے عبادت کیسی

عہد خوشحالی کا مطلب ہی لیا عیاشی

اب اگر ٹوٹ گئے ہو تو شکایت کیسی

کوئی بولا ہے کہ شاداں ہے کسی کا ہو کر

ہو مجھے رنج وہ خوش ہے تو محبت کیسی

عمر بھر طفل طبیعت کو شرارت سوجھی

وقت آخر یہ جگی خواہش جنت کیسی

مسکن امن و اماں تھا یہ وطن نذرؔ مرا

آج برپا ہے ہر اک سمت قیامت کیسی

نیاز نذر فاطمی

مبارک مونگیری

 یوم پیدائش 10 جنوری 1914

اب سوچتا ہوں عمر دو روزہ سے کیا ملا

دنیا کو کیا دیا مجھے دنیا سے کیا ملا

جو کم نگاہ تھے وہی اہل نظر بنے

ہم کو ہمارے دیدۂ بینا سے کیا ملا

دل کو دئے ہیں ذوق تمنا نے سو فریب

دل کو مگر فریب تمنا سے کیا ملا

عرفان شوق جوش جنوں ذوق بندگی

ان کی طلب تھی اور مجھے کیا سے کیا ملا

دل ہے کہ رنگ و بو کے تلاطم میں غرق ہے

میں کیا کہوں کہ اس گل رعنا سے کیا ملا

وہ مطمئن ہیں عہد رفاقت کو توڑ کر

ہم منفعل کہ وعدۂ فردا سے کیا ملا

دامن میں آج خار ہیں چھالے ہیں پاؤں میں

گلشن سے کیا ملا مجھے صحرا سے کیا ملا

میرے سرور شوق نے بے خود کیا مجھے

ورنہ خمار بادۂ صہبا سے کیا ملا

تاب نظر نہیں سہی ذوق نظر تو ہے

دل کو خبر سے سعیٔ تماشا سے کیا ملا

کیا شام آرزو سے مبارکؔ کریں امیدؔ

ہم کو ہماری صبح تمنا سے کیا ملا

مبارک مونگیری

اسلم حنیف

 یوم پیدائش 03جنوری 1956

سامنے اک کتاب ادھ کھلی اور میں 

بے سبب شمع جلتی ہوئی اور میں 

بے صدا ایک نغمے کے ہیں منتظر 

دف بجاتی ہوئی خامشی اور میں 

وقت کی کوکھ کا بر محل سانحہ 

یہ جہاں مضطرب زندگی اور میں 

کچھ پرند آسماں سے اترتے ہوئے 

لطف اندوز جن سے ندی اور میں 

وقت کی شاخ پر خوش نما پھول تھے 

وہ گلی حسن کی سادگی اور میں 

گردش رنگ و بو مشعلیں اور تو 

بے کراں اک خلا تیرگی اور میں 

جسم دھنسنے لگا رات کی قبر میں 

پھر وہی خواب کی آگہی اور میں 

جسم پر رینگ اٹھیں بے بدن چیٹیاں 

پھر وہی دھوپ سی چاندنی اور میں 

اسلم حنیف

فاروق شفق

 یوم پیدائش 04 جنوری 1945ء

اپنی پہچان کوئی زمانے میں رکھ 

خود کو ضائع نہ کر کچھ خزانے میں رکھ

رات کی بے لباسی پہ مضمون لکھ

شام کے پھول چن کے لفافے میں رکھ

روشنی کی ضرورت پڑے گی تجھے

آگ محفوظ کچھ آشیانے میں رکھ

جانتا ہوں مرا کوئی مصرف نہیں

ایک فیشن سمجھ کے حوالے میں رکھ

سارے تیروں کو اک ساتھ ضائع نہ کر

فرق کچھ تو اندھیرے اجالے میں رکھ

فاروق شفق

تنویر انجم

 یوم پیدائش 03 جنوری 1957

کبھی وہ مثل گل مجھے مثال خار چاہئے

کبھی مزاج مہرباں وفا شعار چاہئے

جبین خود پسند کو سزائے درد یاد ہو

سر جنون کوش میں خیال دار چاہئے

فریب قرب یار ہو کہ حسرت سپردگی

کسی سبب سے دل مجھے یہ بے قرار چاہئے

غم زمانہ جب نہ ہو غم وجود ڈھونڈ لوں

کہ اک زمین جاں جو ہے وہ داغ دار چاہئے

وہ آزمائش جنوں وہ امتحان بے خودی

وہ صحبت تباہ کن پھر ایک بار چاہئے

تنویر انجم

اکبر گیاوی

 یوم پیدائش 09 جنوری 1930

ہماری آہِ دل آتش فشاں ہے

بہت تو نے ستایا آسماں ہے

نہ کر اے چارہ گر تدبیرِ درماں

کہ اب تو دردِ دل روحِ رواں ہے

مجھے شیخِ حرم کعبے سے کیا کام

کہ دل آوارۂ کوئے بتاں ہے

ٹرپتے ہم ہیں جن کے دردِ دل سے

وہی کہتے ہیں دردِ دل کہاں ہے

نہ چھیڑو ذکر گیسوئے بتاں کا

یہ قصہ داستاں در داستاں ہے

کرے اب تیغ ہی مشکل کشائی

اے اکبر اب بڑی مشکل میں جاں ہے

اکبر گیاوی

حاتم جاوید

 پیدائش:09 جنوری 1963

 

ایک انجان سفر پر نکلا

میں تری یاد پہن کر نکلا

چوٹ کھا کھا کے دعائیں لوٹیں

جس کو پوجا وہی پتھر نکلا

پی گیا خون پسینہ میرا

کتنا کم ظرف سمندر نکلا

جب بھی نکلا وہ عیادت کو مری

لے کے الفاظ کے خنجر نکلا

میں تری دید کی حسرت اوڑھے

جسم کی قید سے باہر نکلا

میری میت کو لگایا کاندھا

غیر تھا آپ سے بہتر نکلا

حاتم جاوید

آذر تمنا

 یوم پیدائش 09 جنوری 1954

یقیں بناتا ہے کوئی گماں بناتا ہے

جو آدمی ہے الگ داستاں بناتا ہے

شکست کرتا ہے زنجیر خانہ و محراب

اور ایک حلقۂ آوارگاں بناتا ہے

گل وجود سے کرتا ہے کسب کوزۂ جاں

خمار سود میں لیکن زیاں بناتا ہے

کمال بے خبری ہے اگر بہم ہو جائے

مگر یہ زیست کو آساں کہاں بناتا ہے

پس چراغ ارادہ کوئی تو ہے آذرؔ

جو میرے شعلۂ دل کو دھواں بناتا ہے

آذر تمنا

انجم عظیم آبادی

 یوم پیدائش 01 جنوری 1943

دھوپ چھاؤں ذہنوں کا آسرا نہیں رکھتے

ہم غرض کے بندوں سے واسطہ نہیں رکھتے

زعم پارسائی میں کب خیال ہے ان کو

طنز تو وہ کرتے ہیں آئنہ نہیں رکھتے

سازشیں علامت تو پست ہمتی کی ہیں

سازشیں جو کرتے ہیں حوصلہ نہیں رکھتے

وہ غرور تقویٰ میں بس یہی سمجھتے ہیں

جیسے ہے خدا ان کا ہم خدا نہیں رکھتے

تم ہوس پرستوں کے سینکڑوں خدا ٹھہرے

ایک ہے خدا اپنا دوسرا نہیں رکھتے

کس طرح منور ہو خانۂ شعور انجمؔ

ذہن کے دریچوں کو تم کھلا نہیں رکھتے

انجم عظیم آبادی