حفیظ بنارسی

یوم پیدائش 20 مئی 1933

کچھ سوچ کے پروانہ محفل میں جلا ہوگا 

شاید اسی مرنے میں جینے کا مزا ہوگا 

ہر سعی تبسم پر آنسو نکل آئے ہیں

انجام طرب کوشی کیا جانئے کیا ہوگا 

گمراہ محبت ہوں پوچھو نہ مری منزل 

ہر نقش قدم میرا منزل کا پتا ہوگا 

کیا تیرا مداوا ہو درد شب تنہائی 

چپ رہئے تو بربادی کہئے تو گلا ہوگا 

کترا کے تو جاتے ہو دیوانے کے رستے سے 

دیوانہ لپٹ جائے قدموں سے تو کیا ہوگا 

میخانے سے مسجد تک ملتے ہیں نقوش پا 

یا شیخ گئے ہوں گے یا رند گیا ہوگا 

فرزانوں کا کیا کہنا ہر بات پہ لڑتے ہیں 

دیوانے سے دیوانہ شاید ہی لڑا ہوگا 

رندوں کو حفیظؔ اتنا سمجھا دے کوئی جا کر 

آپس میں لڑو گے تم واعظ کا بھلا ہوگا

حفیظ بنارسی

 

امتیاز خان

یوم پیدائش 20 مئی 1989

وہ تبسم تھا جہاں شاید وہیں پر رہ گیا

میری آنکھوں کا ہر اک منظر کہیں پر رہ گیا 

میں تو ہو کر آ گیا آزاد اس کی قید سے 

دل مگر اس جلد بازی میں وہیں پر رہ گیا 

کون سجدوں میں نہاں ہے جو مجھے دکھتا نہیں 

کس کے بوسہ کا نشاں میری جبیں پر رہ گیا 

ہم لبوں کو کھول ہی کب پائے اس کے سامنے 

اک نیا الزام پھر دیکھو ہمیں پر رہ گیا

امتیاز خان

 

روبینہ شبنم

یوم پیدائش 18 مئی 1971

دیار عشق میں روشن دماغ تھے ہم بھی 

وہ خوش نظر تھا بہت سبز باغ تھے ہم بھی 

ہر ایک رشتہ تھا منکر ہماری ہستی سے 

نگار زیست کے دامن کا داغ تھے ہم بھی 

خزاں کا دور بھی ہوتا تو فصل گل ہوتی 

کسی کے فیض نظر سے وہ باغ تھے ہم بھی 

یہ اور بات ہمیں آج تم نہ پہچانو 

تمہاری بزم کا روشن چراغ تھے ہم بھی 

مزاج ہی نہیں ملتا تو دوستی کیسی 

وہ تند خو تھا بہت بد دماغ تھے ہم بھی 

کہیں پہ چاند کہیں آئنہ کہیں گل تھے 

یہ تم سے کس نے کہا ہے ایاغ تھے ہم بھی 

وہ ہم کو ڈھونڈ بھی لیتا تو کیا برا ہوتا 

کہ اس کی ذات کے شبنمؔ سراغ تھے ہم بھی

روبینہ شبنم

رفیعہ نوشین

یوم پیدائش 22 مئی 1967

خون دل کا پی رہی ہے

شاعری میں تازگی ہے

کس کے روکے سے رکی ہے؟

عمر تو بہتی ندی ہے!

چار دن کی چاندنی ہے

یہ بھی کوئی زندگی ہے؟

کون سا موسم ہے مجھ میں؟

تشنگی ہی تشنگی ہے!

رات کے آنسو ہیں شاید

صبح جو بھیگی ہوئی ہے

ذہن میں وہ آگئے ہیں

فکر روشن ہوگئی ہے

دل میں نوشین آرزو پھر

پاؤں پھیلانے لگی ہے

رفیعہ نوشین

 

آدی عباسی

یوم پیدائش 22 مئی 2000

ہم ترے شہر میں آئے تھے بڑے مان کے ساتھ

یوں نہیں کرتے جو تو نے کیا مہمان کے ساتھ

جس سے ملنے کے لیے رب سے دعائیں کی تھیں

یوں مِلا جیسے مِلا ہو کسی انجان کے ساتھ

عزتِ نفس نہ ماریں گے گنوا دیں گے تجھے

ہجر ہی کاٹنا تو کاٹیں گے پھر شان کے ساتھ

ایک شاعر کی محبت ہو اور جب تک ہو

ہوگی پہچان تمہاری میری پہچان کے ساتھ

عشق میں شرک کبھی بھی نہ کریں گے جانم

ہم مسلمان بھی کہلاتے ہیں انسان کے ساتھ

لاکھوں کی دنیا میں اِک شخص کو چاہا نہ مِلا

عمر بھر جینا پڑے گا اِسی ارمان کے ساتھ

عشق کرنے سے تو بہتر تھا تجارت کرتے

کچھ منافع بھی تو ہوتا ہمیں نقصان کے ساتھ

اب مجازی سے حقیقت کا سفر ہے آدی

شکریہ تم نے مِلایا مجھے رحمان کے ساتھ

آدی عباسی

 

نیاز جیراجپوری

یوم پیدائش 21 مارچ 1960

سوچ لو پھر نسل آئندہ کا کیا ہوگا نیاز

مر گئی اردو تو پھر تہذیب بھی مر جائے گی

 نیاز جیراجپوری

عرفان عارف

یوم پیدائش 21 مئی 1978

ستمگر کے ستم سہیے کسے کیا فرق پڑتاہے

اندھیروں میں پڑے رہیے کسے کیا فرق پڑتاہے

اسے تو نام پہ مذہب کے بس کرنی سیاست ہے

کسی کوبھی خدا کہیے کسے کیا فرق پڑتا ہے

لٹا کے گھر کی عصمت کو چھپا کے اپنے چہروں کو

جھکائے سر کھڑے رہیے کسے کیا فرق پڑتا ہے

صحافت آج بے شرمی کا چولا اوڑھ بیٹھی ہے

جو جی میں آئے وہ کہیے کسے کیا فرق پڑتا ہے

سیاست سے عدالت تک یہاں سارے ہی بہرے ہیں

مسلسل چیختے رہیے کسے کیا فرق پڑتا ہے

حمایت کرنے اٹھے ہیں غریبوں کی کسانوں کی

میاں عرفان چُپ رہیے کسے کیا فرق پرتا ہے

عرفان عارف

 

فیصل قادری گنوری

یوم پیدائش 21 مئی 1995

اُن سے شکوہ شکایت نہیں آج کل

جِن کو ملنے کی چاہت نہیں آج کل

یاد تواُن کی دل میں بسائےہوں میں

کیا ہوا ہے جو قربت نہیں آج کل

کیا سبب یے جو بے چین رہنے لگا

کیوں مرے دل کو راحت نہیں آج کل

کتنی مصروف رہتی ہے تُو زندگی

”خالی رہنے سے فرصت نہیں آج کل“

جو تھے کل تک مرے ساتھ ہر دم اُنھیں

ایک لمحے کی مہلت نہیں آج کل

اُن کےحالات ہم سے نہ پوچھے کوئی

ہوتی محفل میں شرکت نہیں آج کل

کام ہوگا تو فیصل وہ آ جائیں گے

اُن کو تیری ضرورت نہیں آج کل

فیصل قادری گنوری

 

صبغہ احمد

یوم پیدائش 21 مئی

کہیں نہ جی لگے ، ہم کیا کریں کدھر جائیں

ہمیں نہ دشت نہ گلشن نہ انجمن بھائیں 

کہ بحرِعشق میں ملتا ہے لطفِ جان کنی

یہاں پہ تیرنے والے بھی ڈوبتے جائیں

یہ میرا دل ہے، یہ کوئی سرائے تو نہیں ہے 

ہوئی ہے آپ کو وحشت تو دشت کو جائیں 

خدا کرے وہ سدا اب رہیں رقیب نواز 

نہ میرا حال وہ پوچھیں ، نہ میرا غم کھائیں

صبغہ احمد

 

اکبر وارثی میرٹھی

یوم وفات 20 مئی 1953

راز دل کس کو سنائیں راز داں ملتا نہیں 

جان جاتی ہے غضب ہے جان جاں ملتا نہیں 

جس مکاں میں تو مکیں ہے وہ مکاں ملتا نہیں 

جستجو میں گم ہوئے ایسے نشاں ملتا نہیں 

داور محشر قیامت ہے مری فریاد ہے 

لے گیا دل چھین کر اک دل ستاں ملتا نہیں 

تجھ سے ملنے کا بتا پھر کون سا دن آئے گا

عید کو بھی مجھ سے گر اے میری جاں ملتا نہیں 

اس بت‌ نا مہرباں سے پھر ملا دے ایک بار 

یا الٰہی کوئی ایسا مہرباں ملتا نہیں 

ملتا جلتا رہتا ہے وہ عام سے اور مجھ سے خاص 

ہاں میں ہاں ملتی نہیں جب تک نہاں ملتا نہیں 

بیل میں بوٹے میں پھل میں پتیوں میں پھول میں 

ہر چمن میں اس کا مظہر ہے کہاں ملتا نہیں 

سانس کے چابک کی زد نے دم میں پہنچایا عدم 

کچھ سراغ توسن عمر رواں ملتا نہیں 

جیسی چاہے کوششیں کر واعظ باطن خراب 

تیرے رہنے کو تو جنت میں مکاں ملتا نہیں 

کم نہیں گلشن میں شبنم گل بدن گل پیرہن 

غسل کر مل مل کے گر آب رواں ملتا نہیں 

کس سے پوچھوں شہر خاموشاں میں سب خاموش ہیں 

خاک ملتی ہے سراغ رفتگاں ملتا نہیں 

کیا بتائیں کیا سنائیں کیا پڑھیں اکبرؔ غزل 

کوئی دنیا میں سخن کا قدرداں ملتا نہیں

اکبر وارثی میرٹھی