ریاض ساغر

ستم یہ ہے شکستہ حال ہیں ہم اس ریاست میں،

ہمارے نام کا سکہ جہاں جاری رہا برسوں

ریاض ساغر

 

 

عبید اللہ علیم

یوم پیدائش 12جون 1939

عزیز اتنا ہی رکھو کہ جی سنبھل جائے

اب اس قدر بھی نہ چاہو کہ دم نکل جائے

ملے ہیں یوں تو بہت آؤ اب ملیں یوں بھی

کہ روح گرمیٔ انفاس سے پگھل جائے

محبتوں میں عجب ہے دلوں کو دھڑکا سا

کہ جانے کون کہاں راستہ بدل جائے

زہے وہ دل جو تمنائے تازہ تر میں رہے

خوشا وہ عمر جو خوابوں ہی میں بہل جائے 

میں وہ چراغ سر رہ گزار دنیا ہوں

جو اپنی ذات کی تنہائیوں میں جل جائے 

ہر ایک لحظہ یہی آرزو یہی حسرت

جو آگ دل میں ہے وہ شعر میں بھی ڈھل جائے

عبید اللہ علیم

مہتاب اعظمی

یوم پیدائش 11جون

یہ ہی رہتا ہےاب ملال مجھے

تیرا آتا نہیں خیال مجھے

زخمِ دوراں سے اب نڈھال ہوں میں

درد ہجراں ، کہ اب سنبھال مجھے

اس کے عہد شکن کا ذکر ہی کیا

خود سے کرنا ہے کچھ سوال مجھے

خود قفس ہےیہ میری تنہائی

کر لیا جس نے یر غمال مجھے

اب مجھے وقت کی نہیں پرواہ

یادرکھتے ہیں ماہ و سال مجھے

 عشق میں معجزوں سے گزرا ہوں

کیوں کہ ہونا تھا با کمال مجھے

خود سے مہتاب آج مل پایا

خود سے کرنا ہے عرض حال مجھے

مہتاب اعظمی

 

ندیم نادم

یوم پیدائش 11 جون 1994

سر اٹھانے کی تو ہمت نہیں کرنے والے 

یہ جو مردہ ہیں بغاوت نہیں کرنے والے

 

مفلسی لاکھ سہی ہم میں وہ خودداری ہے 

حاکم وقت کی خدمت نہیں کرنے والے 

ان سے امید نہ رکھ ہیں یہ سیاست والے 

یہ کسی سے بھی محبت نہیں کرنے والے

 

ہاتھ آندھی سے ملا آئے اسی دور کے لوگ 

یہ چراغوں کی حفاظت نہیں کرنے والے 

عشق ہم کو یہ نبھانا ہے تو جو رکھ شرطیں 

ہم کسی شرط پہ حجت نہیں کرنے والے

پھوڑ کر سر ترے در پر یہیں مر جائیں گے 

ہم ترے شہر سے ہجرت نہیں کرنے والے

ندیم نادم

 

ریاض حازم

یوم پیدائش 11 جون

جو بھی انجام سے ڈر گئے مر گئے

ڈر کے زندہ رہے کیا رہے ؟ مر گئے

ایسے حالات پیدا ہوئے مر گئے

عشق سے جتنا پیچھے ہٹے مر گئے

ہم دکھوں کے اثاثے چھپائے ہوئے

عشق دل خواب آنکھیں لئے مر گئے

شہر کی ساری بدیاں فنا ہو گئیں

یہ بھی اچھا ہوا ہم برے مر گئے

رو کے دنیا سے کیا لینا کیا دینا تھا

کیا یہ بہتر نہیں چپ کئے مر گئے

ریاض حازم

 

ثناء اللہ ظہیر

یوم وفات 10 جون 2022

خود میں اترے اور طغیانی سے باہر آ گئے 

آ کے گہرائی میں ہم پانی سے باہر آ گئے 

اس کی رونق میں بہت سنسان سے لگتے تھے ہم 

شہر سے نکلے تو ویرانی سے باہر آ گئے 

لفظ وہ جن کو زباں تک لانے کی ہمت نہ تھی 

آخر اک دن میری پیشانی سے باہر آ گئے 

دم بخود اس حسن کو ہی دیکھتے رہتے تھے ہم 

یوں برت ٹوٹا کہ حیرانی سے باہر آ گئے 

آستیں میں پل رہے تھے لیکن اک دن یوں ہوا 

سانپ آپس کی پریشانی سے باہر آ گئے 

وہ تعلق ہم کو قید خواب جیسا تھا ظہیرؔ 

کھل گئیں آنکھیں تو آسانی سے باہر آ گئے

ثناء اللہ ظہیر

 

مبین احمد زخم

یوم پیدائش 10 جون 1974

کالی رات اور اجلا چاند

 تنہا میں اور تنہا چاند

 کس نے دیکھا ایسا چاند

 زلف گھٹا اور چہرہ چاند

 وہ تو صرف ایک جگنو تھا 

جس کو میں نے سمجھا چاند

 مبین احمد زخم

 

عاجز ہنگن گھاٹی

یوم پیدائش 10 جون 1936

زخموں کے دہن بھر دے خنجر کے نشاں لے جا 

بے سمت صداؤں کی رفعت کا گماں لے جا 

احساس بصیرت میں عبرت کا سماں لے جا 

اجڑی ہوئی بستی سے بنیاد مکاں لے جا 

شہروں کی فضاؤں میں لاشوں کا تعفن ہے 

جنگل کی ہوا آ جا جسموں کا دھواں لے جا 

ہے اور ابھی باقی تاریک سفر شب کا 

اگنے دے نیا سورج پھر چاہے جہاں لے جا 

جلتی ہوئی راتوں کا بجھتا ہوا منظر ہوں 

گھر آ کے کبھی عاجزؔ مجھ سے یہ سماں لے جا

عاجز ہنگن گھاٹی

نورا شرفی

یوم پیدائش 10 جون 1963

تم کو جواب دیں گے نہ تیر و کماں سے ہم

خنجر سے تم لڑوگے تو طرزِ بیاں سے ہم

جائیں کہاں نکل کے اب اس گلستاں سے ہم

مر کر بھی جاسکیں گے نہ ہندوستاں سے ہم

پھیلاؤ مت ہوا میں سیاست کی گندگی

رہنے نہ پائیں گے کبھی امن واماں سے ہم

جس باغ سے چبھن ملے قدموں کو آپ کے

کانٹے نکال ڈالیں گے اس گلستاں سے ہم

ہم بھی اسی زمین پہ پیدا ہوئے ہیں دوست

بادل کی طرح برسے نہیں آسماں سے ہم

اپنے گناہ دھونے کو دریا بھی کم پڑے

چشمہ بہائیں خون کا چشمِ رواں سے ہم

اردو کے دم سے آئی ہے تہذیب پر بہار

پھر کیسے منہ کو پھیر لیں اردو زباں سے ہم

گفتار گر حسیں ہو میاں نور اشرفی

دل جیت لیں گے شہر کا طرزِ بیاں سے ہم

نورا شرفی

 

سید نوید جعفری

یوم پیدائش 10 جون 1968

اشک ہر وقت میرا ساتھ نبھانے نکلے

 جب خوشی آئی تو خوشیوں کے بہانے نکلے

 

 جس نے نسلوں کی سیاہی کو اجالا بخشا

  چند شب زاد وہ سورج کو بجھانے نکلے

  

جستجو جس نے تیری عرفان دو عالم بخشا

ہم جسے ڈھونڈنے نکلے وہ سرہانے نکلے

شام سے ڈوبنے لگتا ہے جو دل تو ھم بھی

اپنے پیمانے سے خورشید اگانے نکلے

تیری الفت تیری حسرت تیری فرقت کا ملال

دل کھنڈر جب ھوا پوشیدہ خزانے نکلے

جن کو فرقت میں کبھی دیکھنے رکھ چھوڑا تھا

ان درازوں میں وہی خواب پرانے نکلے

شہر میں دشت میں گلشن میں تجھی کو پایا

اے غم یار تیرے کتنے ٹھکانے نکلے

چاند نکلا تو میں لوگوں سے لپٹ کر رویا

غم کے آنسو تھے جو خوشیوں کے بہانے نکلے

رزق میں جن کے نہ محنت کا نہ برکت کا خمیر

رزق آشوب کئی ایسے گھرانے نکلے

لوگ آسان سمجھتے ہیں غزل خواں ہونا

ہجر جھیلا ہے تو الفت کے ترانے نکلے

یاد کس کی ہوئی ہے پاوں کی زنجیر نوید

قرض جاں عشق میں ہم جب بھی چکانے نکلے

 سید نوید جعفری