حشمت کمال پاشا

یوم پیدائش 02 نومبر 1945

نظم ممی پاپا یہ بتلاؤ

کیوں ہوتا ہے نو دو گیارہ 

تین تیرہ اور نو اٹھارہ 

چھکا پنجہ اور پو بارہ 

ممی پاپا یہ بتلاؤ 

مکڑا کیوں ہے جالا بنتا 

سانپ کا پاؤں کیوں نہیں ہوتا 

مرغی پہلے ہے یا انڈا 

ممی پاپا یہ بتلاؤ 

تاڑ کے نیچے کیوں نہیں سایا 

رنگ حنا کیوں لال ہے ہوتا 

کیوں ہے گل کے ساتھ ہی کانٹا 

ممی پاپا یہ بتلاؤ 

اونٹ کے منہ میں زیرہ کیسا 

بڑے بول کا سر کیوں نیچا 

کیوں کہتے ہیں دال میں کالا 

ممی پاپا یہ بتلاؤ 

حل ہونے کی نہیں ہے آشا 

یہ سب ہے اک کھیل تماشا 

سر نہ کھپاؤ ممی پاپا 

کہہ گئے اپنے بھیا پاشاؔ

حشمت کمال پاشا

امرت لعل عشرت

یوم پیدائش 02 نومبر 1930

قدم قدم پہ ہمیں رنگ و بو کا دھوکا ہے

خزاں نصیب رفیقو یہ دور کیسا ہے

جو تو کہے اسے چھو کر ذرا یقیں کر لوں

تری جبیں پہ مجھے چاندنی کا دھوکا ہے

مری نگاہ نے بخشی ہے حسن کو رونق

نسیم صبح سے پھولوں کا رنگ بکھرا ہے

بنائے شعر ہے میرا مشاہدہ عشرتؔ

مرے کلام میں ہر دل کا درد ہوتا ہے

امرت لعل عشرت

بدر محمدی

یوم پیدائش 02 نومبر 1963

مری زمین ترے آسماں سے بہتر ہے 

یقیں یقیں ہے کسی بھی گماں سے بہتر ہے 

کہاں نہیں ہے تو جلوہ نما خدا میرے 

یہ لا مکانی تری ہر مکاں سے بہتر ہے 

میں اس کے ساتھ دلوں کے سفر پہ رہتا ہوں 

خیال اس کا کسی کارواں سے بہتر ہے 

ذرا سا وقت ہے اس کا رہے خیال تمہیں 

وہیں سے قصہ سناؤ جہاں سے بہتر ہے 

گزاری عمر ہی اب تک نہ آیا جینا ہمیں 

ہماری زندگی جانے کہاں سے بہتر ہے

 

دعائیں دینا کسی کو شعار خوب سہی 

دعائیں لینا مگر اپنی ماں سے بہتر ہے 

سکھائے وہ اسے جنت ہے جس کے قدموں میں 

زبان مادری ہر اک زباں سے بہتر ہے 

بدر محمدی

 

حاذق فریدی

یوم پیدائش 02 نومبر 1957

امن و اماں نہیں ہے کبوتر سمیٹ لو

جشن طرب ہے خوب تو پیکر سمیٹ لو

پی لیں گے پھر کبھی درمیخانہ بیٹھ کر

آج ان کے احترام میں ساغر سمیٹ لو

اسلام کا نظام ہی کام آئے گا یہاں 

سب جنگلوں کے کھیل کو مل کر سمیٹ لو

لفظوں سے کھیلنے کا ہنر ہے یہ شاعری

لفظوں میں فکروفن کے ہی گوہر سمیٹ لو

حاذق فریدی

 

نیلوفر فضل

یوم پیدائش 02 نومبر 1973

غم کو اس طرح سے چھپاتے ہیں

اشک پی پی کے مسکراتے ہیں

جن کو ہم پھول پیش کرتے ہیں

سنگ ہم پر وہی چلاتے ہیں

ایک رخ سے نقاب اٹھتے ہی

کتنے چہرے نظر میں آتے ہیں

زہر پیتے ہیں مسکرا کر ہم

رشتۂ درد یوں نبھاتے ہیں

کیوں کسی سے کریں گلہ شکوہ

ہم تو دانستہ زخم کھاتے ہیں

کوئی پوچھے گا آج نیلوفرؔ

موت پر اشک سب بہاتے ہیں

نیلوفر فضل

زاہدہ شمسی

یوم پیدائش 02 نومبر 1972

پہلے مسرور تھا ، غم سے اب چور ہے

وہ بھی دل کو بنائے ہوئے طور ہے

بس صداقت کی محفل سجایا کرو

سر کٹانا اگر تم کو منظور ہے

کردیا سامنے سب کے رسوا مجھے

میری غزلوں کو پڑھ کر جو مشہور ہے

مت سناؤ محبت کی رنگیں غزل

میرا پردیسی ساجن بہت دور ہے

غم ہی ملتا ہے شمسی رہِ عشق میں

زندگانی کیا ، یہ تو دستور ہے

زاہدہ شمسی

 

مرزاخان ارشدؔ شمس آبادی

یوم پیدائش 02 نومبر 1958

خامہ ناقص میں بھی دریا سی روانی لکھ دے

اے قلم نعتِ محمدؐ کے معانی لکھ دے

میری نسبت ہے بلالی تو مجھے خوف کہاں 

سر محمدؐ پہ بھی قربان جوانی لکھ دے

بے قراری نے تَجَسُّس سے نمو پائی ہے 

بس مدینے کی فضا شام سہانی لکھ دے

قلبِ بیمار کو دیدارِ محمدؐ کی طلب 

زیست میں ایک حقیقی یہ کہانی لکھ دے

کاش وہ کوچہِ انوار فضائیں دیکھوں

خشک ہونٹوں پہ مدینے کا تو پانی لکھ دے

ہر ادا ہو بھی محمدؐ کے غلاموں کی طرح

کوئی اجداد کی معروف نشانی لکھ دے

اب لیے جاتا نہیں عشق کہیں اور مجھے

ان کی مل جائے اگر قید سہانی لکھ دے

نالہ ارشدؔ کا یہی کاتبِ تقدیر سدا 

پس مقدر میں وہاں نقل مکانی لکھ دے

مرزاخان ارشدؔ شمس آبادی

 

قوی خان

یوم پیدائش 01 نومبر 1997

جتنی مہلت ملی، ہے غنیمت یہاں

ساٹھ، پینسٹھ کہ ستر برس، خوش رہو

جو ملا جس قدر بھی ملا خوب ہے

مال و دولت کی چھوڑو ہوس، خوش رہو

کوئی گل تم کو سمجھے یا موتی کوئی

یا ہی سمجھے کوئی خار و خَس، خوش رہو

لاکھ دنیا تمہاری مخالف رہے

تم نہ ہونا مگر ٹس سے مَس، خوش رہو

عشق کا بھی قوی وہ ہی دستور ہے

ہے جو دستورِ قید و قفس، خوش رہو

قوی خان

حرا رانا

یوم پیدائش 01 نومبر 1972

آج پھر سے ترے دیار میں ہوں

یعنی پھر تیرے اختیار میں ہوں

اس کہانی کا یہ ہوا انجام

آج میں دشتِ بے کنار میں ہوں

کوئی رستہ دکھائی دیتا نہیں

دھند کیسی ہے کس غبار میں ہوں

آج کل کس پہ ہے کرم تیرا

میں تو ویسے بھی کس شمار میں ہوں

ہوش کیسےرہےگا دل کو ترا

میں ترے درد کے خمار میں ہوں

ایک دنیا ہے میرے در پہ حراؔ

اور میں تیرے انتظار میں ہوں

حرا رانا

آفاق فاخری

یوم پیدائش 01 نومبر 1956

کیا ضروری کہ گروں میں تو سنبھالے کوئی 

اور مرے پاؤں کا کانٹا بھی نکالے کوئی 

خوشبوؤں کی طرح چاہیں گے زمانے والے 

پہلے کردار کو پھولوں سا بنا لے کوئی 

آج کے دور میں شہرت کی تمنا ہو اگر 

اپنے چہرے پہ کئی چہرے لگا لے کوئی 

اک دیا ہم نے جلایا جو سر راہ گزر 

کر نہ دے اس کو ہواؤں کے حوالے کوئی 

شب کی تاریکی میں بھی نور کا عالم ہوگا 

پہلے پلکوں پہ ستاروں کو سجا لے کوئی 

چاہے تو اپنے ہر اک حسن عمل سے آفاقؔ 

اپنے ماں باپ کی ہر وقت دعا لے کوئی 

آفاق فاخری