حلیم صابر

یوم پیدائش 26 جنوری 1945

میں بدلتے ہوئے حالات پہ اکثر رویا 

دیکھ کر شہر کا بدلا ہوا منظر رویا 

چپ ہوا رو کے جو پھر رویا مکرر رویا

رو کے جب جی نہ بھرا میرا تو جی بھر رویا 

جیسے تیسے مجھے رونا کبھی آیا ہی نہیں 

جب بھی رویا میں بہت سوچ سمجھ کر رویا 

منحصر تھا مرا رونا بھی مری مرضی پر 

چند لمحے کبھی رویا کبھی دن بھر رویا 

مجھ کو رونے کا ہنر آ گیا روتے روتے

رونے والوں سے بہ ہر طور میں بہتر رویا 

میرے رونے کا بھی انداز عجب تھا صابرؔ 

روتے روتے جو ہنسی آئی تو ہنس کر رویا

حلیم صابر

تحسین علی نقوی

یوم پیدائش 25 جنوری 1999

اُس نے جب مجھ سے اجتناب کیا

ہر حقیقت کو میں نے خواب کیا

اُس نے آ کر گلے لگایا اور 

میری سانسوں کو باریاب کیا

میر و غالب تلک گئی وہ مگر

شعر میرا ہی انتخاب کیا

چار لوگوں میں نام تھا لیکن

دوستوں نے مُجھے خراب کیا

خواب میں لائی اِس قدر وُسعت

سب خلاؤں کو دستیاب کیا

مُلحدو تُم سے بحث جیتوں گا

فلسفے کو جو ہم رکاب کیا

حوصلہ پست کرنے والوں کی خیر

مجھ کو الله نے کامیاب کیا

اُس نے گالی نکالی تھی میں نے

جب دلیلوں سے لاجواب کیا

کچھ نہیں گر درونِ ذات مرے

دِل نے کیوں محوِ اضطراب کیا

یار کا ادنیٰ معجزہ تحسین

دشت کو چھو لیا گلاب کیا

تحسین علی نقوی

معین الدین چشتی

یوم پیدائش 25 جنوری 1962

توڑ کر دیوار نفرت پیار کا نقشہ بنا

چل پڑے جس پر زمانہ ایسا اک رستہ بنا

بارہا اہلِ دول کا لے چکا ہوں امتحاں

بھوک میں تو بھیس اپنامت فقیرانہ بنا

آدمی کی جان لینے کو ازل سے آج تک

تیر ، خنجر ، نیزہ ، بھالا جانے پھر کیا کیا بنا

کون کس کا یار ہے خود ہی پتا چل جائے گا

پہلے اپنی ذات کو تو صبر کا پتلا بنا

کب بنا کیوں کر بنا ، شمسیؔ نہ ہم سے پوچھیے

دیکھتے ہی دیکھتے یاں خون کا دریا بنا

معین الدین چشتی

 

اسرار آصف

یوم پیدائش 24 جنوری 1959

صلیب و دار پہ رکھا مرا سر دیکھ سکتے ہو

امیرِ شہر کے گھر سے یہ منظر دیکھ سکتے ہو

پریشانی میں رہ کر بھی نہ ماتھے پہ شکن آئے

یہ منظر ماں کے چہرے کو بھی پڑھ کر دیکھ سکتے ہو

اسے دیوانہ سمجھوں یا کہ فرزانہ جو کہتا ہے

ہتھیلی کی لکیروں میں مقدر دیکھ سکتے ہو

جو اہلِ فن ہیں آصف خاکساری ان کا شیوہ ہے

کبھی جو وقت مل جائے تو مل کر دیکھ سکتے ہو

اسرار آصف

 

اقبال عادل

یوم پیدائش 23 جنوری 1999

زیرِ لب مسکرا رہا ہوں

آپ کو آزما رہا ہوں

یہ بھی کتنی بڑی جسارت ہے

آپ سے دل لگا رہا ہوں

زندگی اک عجب کہانی ہے

اور کہانی سنا رہا ہوں

آپ سے دور ہوں تو لگتا ہے

آپ کے پاس جا رہا ہوں

یہ بھی میرا کمال ہے عادل

درد میں مسکرا رہا ہوں میں

اقبال عادل

اشوک مزاج بدر

یوم پیدائش 23 جنوری 1957

وصل کی تو کبھی فرقت کی غزل لکھتے ہیں 

ہم تو شاعر ہیں محبت کی غزل لکھتے ہیں 

پڑھیے ان کو کسی کاغذ پہ نہیں سرحد پر 

اپنے خوں سے جو شہادت کی غزل لکھتے ہیں 

رہنما اپنے وطن کے بھی ہیں کتنے شاطر 

وہ شہادت پہ سیاست کی غزل لکھتے ہیں 

تم نے مزدور کے چھالے نہیں دیکھے شاید

اپنے ہاتھوں پہ وہ محنت کی غزل لکھتے ہیں 

ملک ایسے بھی ہیں کچھ خاص پڑوسی اپنے 

سرحدوں پہ جو عداوت کی غزل لکھتے ہیں 

ہم سبھی چین سے سوتے ہیں مگر راتوں میں 

فوج والے تو حفاظت کی غزل لکھتے ہیں 

شوق لکھنے کا بہت ہم کو بھی ہے لیکن ہم 

سونے کے پین سے غربت کی غزل لکھتے ہیں

اشوک مزاج بدر

بسنت لکھنوی

یوم پیدائش 23 جنوری 1932

یہ اور بات اسے لطف زندگی نہ ملا

اسیر اپنی انا میں وہ آدمی نہ ملا

کبھی ملا بھی تو بس اپنی بات کی اس نے

وہ بے غرض تو کسی شخص سے کبھی نہ ملا

تری حیات ہے نغمہ مری حیات افکار

مری حیات سے تو اپنی زندگی نہ ملا

کجا یہ دیں کے اجالےکجا یہ کرب جمود

سحر کے نور میں تو شب کی تیرگی نہ ملا

بہت تلاش کیا زندگی نہ ہاتھ آئی

جہاں میں ہم کو کہیں کستِ دايمی نہ ملا

ہمارا ہوتا جو دمساز، ہمنوا ، ہمدم

ہمارے شہر میں ایسا ہمیں کوئی نہ ملا

ملے تو شیخ و برہمن، ولی مجاہد سب

بسنت راہ ِ وفا پر کوئی کبھی نہ ملا

بسنت لکھنوی

 

صادق سعیدی

یوم پیدائش 22 جنوری 1995

کیا ملا ہم کو محبت پہ گزارا کر کے

"دل کے بازار میں بیٹھے ہیں خسارہ کر کے"

میں کہ اک خاک ہوں مٹ جاؤں گا مٹی بن کر

سارا عالم ہی مری جان تمھارا کر کے

کیا بھروسہ کہ میں خود کو ہی لڑادوں خود سے

اس نے چھوڑا ہے مجھے مجھ سے کنارہ کر کے

اب کے اس طرح سے اس نے ہے چرایا مجھ کو

خود کو رکھا ہے مری آنکھ کا تارا کر کے

عدل دہلیز پہ قائد کی چھپا بیٹھا ہے

آپ بیٹھے ہیں عدالت پہ اجارہ کر کے

میرے مسکن پہ نظر کس کی لگی ہے آخر

دل دہل جائے ہے یک دم سے نظارہ کر کے

جن پہ پابندیِ گفتار ہو نافذ صادق

بات کرتے ہیں وہ آنکھوں سے اشارہ کرکے

صادق سعیدی

شمسہ نجم

یوم پیدائش 02 جنوری 1968

محشر میں مل سکے گا سہارا رسول کا 

اپنا لیا جو ہم نے طریقہ رسول کا 

اک معجزہ تھا ذات کا ایمان پہ دلیل 

سب ڈھونڈتے رہے نہ تھا سایہ رسول کا 

دنیا بنی اسی کی بنی اس کی آخرت 

کردار میں بسا لے جو تقویٰ رسول کا 

ہے آرزو یہی کہ مدینے کو جا سکوں 

اور دیکھنا نصیب ہو روضہ رسول کا 

گونجی بلال کی نہ مدینے میں جب اذاں 

گھڑیاں تھمیں کہ چپ تھا دلارا رسول کا 

ہر چیز میں توکل و تقویٰ کی تھی جھلک 

جامہ رسول کا کہ بچھونا رسول کا 

بخشش تبھی تو ہو جو شفاعت ملے مجھے 

وعدہ خدا کا پر ہو ارادہ رسول کا 

پوری یہ کائنات ستاروں سے ہے بھری 

سب سے بلند بخت ستارہ رسول کا 

گو ہے گناہ گار ہے بخشش کی آس پر 

شمسہؔ کو صرف ایک سہارا رسول کا

شمسہ نجم

روحی قادری

یوم پیدائش 21 جنوری 1920

گمان و وہم کے دوزخ میں ڈال دیتا ہے

مجھے یقیں کا سمندر اچھال دیتا ہے

روحی قادری