حذیفہ خالد

یوم پیدائش 29 اپریل 1995

عجب ہے شوق میری زندگی کا

کھلا جب راز میری بے خودی کا

شب غم میں اُسے میں نے پکارا

یہی تو امتحاں ہے دوستی کا

ہوائے شام تو مجرم رہی ہے

دیا بھی ہمنوا ہے تیرگی کا

کوئی حکمت تھی میرے بند لب کی

مگر ہے شور میری خامشی کا

بپا ہے محفل یاران خالد

بہت احساس ہے تیری کمی کا

حذیفہ خالد

 

آذر عسکری

یوم پیدائش 28 اپریل 1911

نظم اس سے پہلے کہ گھر کے پردوں سے

۔۔۔۔۔۔۔۔۔۔۔۔

اس سے پہلے کہ گھر کے پردوں سے 

ٹیڈی پتلون کوئی سلوا لوں 

اس سے پہلے کہ تجھ کو دے کر دل 

تیرے کوچے میں خود کو پٹوا لوں 

اس سے پہلے کہ تیری فرقت میں 

خودکشی کی سکیم اپنا لوں 

اس سے پہلے کہ اک تری خاطر 

نام غنڈوں میں اپنا لکھوا لوں 

میں ترا شہر چھوڑ جاؤں گا 

اس سے پہلے کہ وہ عدو کم بخت 

تیرے گھر جا کے چغلیاں کھائے 

اس سے پہلے کہ دیں رپٹ جا کر 

تیرے میرے شریف ہمسائے 

اس سے پہلے کہ تیری فرمائش 

مجھ سے چوری کا جرم کروائے 

اس سے پہلے کہ اپنا تھانے دار 

مرغا تھانے میں مجھ کو بنوائے 

میں ترا شہر چھوڑ جاؤں گا 

تجھ کو آگاہ کیوں نہ کر دوں میں 

اپنے اس انتظام سے پہلے 

مشورہ بھی تجھی سے کرنا ہے 

اپنی مرگ حرام سے پہلے 

کوئی ایسی ٹرین بتلا دے 

جائے جو تیز گام سے پہلے 

آج کے اس ڈنر کو بھگتا کر 

کل کسی وقت شام سے پہلے 

میں ترا شہر چھوڑ جاؤں گا 

دل کی گردن مروڑ جاؤں گا

آذر عسکری

 

اطہر شکیل نگینوی

یوم پیدائش 28 اپریل 1968

چاہت کو زندگی کی ضرورت سمجھ لیا 

اب غم کو ہم نے تیری عنایت سمجھ لیا 

کھاتے رہے ہیں زیست میں کیا کیا مغالطے 

قامت کو اس حسیں کی قیامت سمجھ لیا 

کردار کیا رہا ہے کبھی یہ بھی سوچتے 

سجدے کیے تو ان کو عبادت سمجھ لیا 

ریشم سے نرم لہجے کے پیچھے مفاد تھا 

اس تاجری کو ہم نے شرافت سمجھ لیا 

اب ہے کوئی حسین نہ لشکر حسین کا 

سر کٹ گئے تو ہم نے شہادت سمجھ لیا 

اس طرح عمر چین سے کاٹی شکیلؔ نے 

دکھ اس سے جو ملا اسے راحت سمجھ لیا 

اطہر شکیل نگینوی

 

انیسہ صابری

یوم پیدائش 27 اپریل 1977

بجھتے ہوئے دیئے کو جلایا ہے آپ نے

دل میں مرے خوشی کو جگایا ہے آپ نے

ایسے نظر کا تیر چلایا ہے آپ نے

دل کو مرے دیوانہ بنایا ہے آپ نے

غم آپ نے دیئے تو مرا حوصلہ بڑھا

کیسے کہوں کہ دل کو دکھایا ہے آپ نے

ہیں کس کے انتظار میں آنکھیں بچھی ہوئیں

کس کے لیے یہ گھر کو سجایا ہے آپ نے

لوگوں نے خوب داد بھی دی ، تالیاں بجیں

محفل میں جو بھی شعر سنایا ہے آپ نے

دنیا کی چشم آپ پہ اس وقت ہے اٹھی

جب بارِ غم انیسہ اٹھایا ہے آپ نے

انیسہ صابری

 

مملکت بدر

یوم وفات 26 اپریل 2021

نوحہ وحدت کا مرکز

کس سمت ہے دشتِ کرب و بلا معبود کا کعبہ کہتا ہے

آ دیکھ لے مرکز وحدت کا شبیر کا سجدہ کہتا ہے

سر ننگے ہیں زینب میداں میں دنیا کا اندھیرا کہتا ہے

کس طرح چھپالیں دامن میں اجڑا ہوا خیمہ کہتا ہے

عباس وفا کے سائے میں یوں مشک بھری تھی پانی سے

ہر موج تمہاری ہو کے رہی بہتا ہوا دریا کہتا ہے

لیلیٰ ہیں سرہانے بیٹے کے عاشور کی شب ہے آنسو ہیں 

آرام سے اکبر سوتے ہیں شمعوں کا اجالا کہتا ہے

ہے رحلِ امامت پر قرآں یا باپ کے ہاتھوں پر اصغر

امت کو بچالیں گے ہنس کر معصوم ارادہ کہتا ہے

شانے بھی کٹے زخمی بھی ہوئے پانی نہ مگر خیمے میں گیا

دریا کے کنارے ریتی پر عباس کا لاشہ کہتا ہے

ہر گام پہ ٹھوکر مولا کی ہر راہ میں کثرت فوجوں کی 

کس طرح تمہیں ڈھونڈیں اکبر آنکھوں کا اندھیرا کہتا ہے

دل اپنا سنبھالو اے بانو اصغر نہ پلٹ کے آئیں گے

سوکھے ہوئے آنسو کہتے ہیں ٹھہرا ہوا جھولا کہتا ہے

رکتے ہوئے خنجر کی جنبش شبیر کا خوں مقتل کی زمیں

جب بال کھلے ہیں زہراء کے میداں کا اندھیرا کہتا ہے

کچھ پھول پڑے ہیں سہرا کے کچھ ایڑیاں گھسنے کے ہیں نشاں

شہ لے کے گئے ہیں قاسم کو میدان کا رستا کہتا ہے

برچھی کی چمک میں دل کا لہو انگڑائی جوانی اور اکبر

بابا کی نگاہیں دیکھ نہ لیں اکبر کا کلیجہ کہتا ہے

بے گور و کفن ہوگا بھائی خیمے بھی جلیں گے مقتل میں 

اور بال کھلیں گے میداں میں ہمشیر کا پردہ کہتا ہے

اکبر کی اجل شبیر کا دل خیمے پہ نگاہیں راہ کٹھن

کیا دیکھ لی میت لیلٰی نے ہلتا ہوا پردہ کہتا ہے

حق کو بھی چھپا سکتا ہے کوئی دنیا کی اندھیری منزل میں 

اے بدر ہر اک آنسو میں مرے شبیر کا جلوہ کہتا ہے

مملکت بدر

 

رفیق رافع

یوم پیدائش 25 اپریل 2002

ہے کچھ دنوں سے محبت دکھائی دینے لگی

ہماری چپ جو کسی کو سنائی دینے لگی

وگرنہ ہم بھی تو اندھوں میں ہو چکے تھے شمار

پھر اک نگاہ ہمیں روشنائی دینے لگی

ترے قریب جو دیکھا تو مجھ نکمے کو

سمجھ کے خاص یہ دنیا بدھائی دینے لگی

ہم آ گئے تھے قریب اس قدر کہ پھر ہم کو

چہار سمت سے وحشت دکھائی دینے لگی

زیادتی ہو بھلے نیکیوں میں نقصاں ہے

ہمیں بھی قرب میں کثرت جدائی دینے لگی

رفیق رافع

 

بلال ہادی

یوم پیدائش 25 اپریل 1990

جہاں چھوڑا تھا تو اب تک وہیں ہے

مری جاں یہ محبت بھی نہیں ہے

بھروسہ تم پہ تھا سب سے زیادہ

ابھی تک تُو مرا کامل یقیں ہے

دغا جس نے دیا تھا ہم کو جاناں

ہمارے بیچ رہتا ہی کہیں ہے

شکن لوگوں کے ماتھے پر رہے گی

چمکتی صرف تیری ہی جبیں ہے

معافی چاہتا ہوں ڈسنے والے

نوازش کر یہ میری آستیں ہے

بتا کر بات یہ میں جا رہا ہوں

ابھی کچھ اور کہنے کو نہیں ہے

بلال ہادی

 

محسن کاکوروی

یوم وفات 24 اپریل 1905

سخن کو رتبہ ملا ہے مری زباں کے لئے 

زباں ملی ہے مجھے نعت کے بیاں کے لئے 

زمیں بنائی گئی کس کے آستاں کے لئے 

کہ لا مکاں بھی اٹھا سرو قد مکاں کے لئے 

ترے زمانے کے باعث زمیں کی رونق ہے 

ملا زمین کو رتبہ ترے زماں کے لئے 

کمال اپنا دیا تیرے بدر عارض کو 

کلام اپنا اتارا تری زباں کے لئے 

نبی ہے نار ترے دشمنوں کے جلنے کو 

بہشت وقف ترے عیش جاوداں کے لئے 

تھی خوش نصیبیٔ عرش بریں شب معراج 

کہ اپنے سر پہ قدم شاہ مرسلاں کے لئے 

نہ دی کبھی ترے عارض کو مہر سے تشبیہ 

رہا یہ داغ قیامت تک آسماں کے لئے 

عجب نہیں جو کہے تیرے فرش کو کوئی عرش 

کہ لا مکاں کا شرف ہے ترے مکاں کے لیے 

خدا کے سامنے محسنؔ پڑھوں گا وصف نبیؐ 

سجے ہیں جھاڑ یہ باتوں کے لا مکاں کے لیے

محسن کاکوروی

کامل حیدرآبادی

یوم وفات 23 اپریل 2023

افکار کو غرور کے سانچے میں ڈھال کے

اسباب پیدا کر لئے اس نے زوال کے

معلوم ہیں مزے ہمیں روٹی کے دال کے

برسوں سے کھا رہے ہیں نوالے حلال کے

باغی نہ ہو سکا مرے اندر کا آدمی

رکھا ہے اسکے پاؤں میں زنجیریں ڈال کے

جگنو غزل گلاب گہر چاند بن گئے

جب ٹکڑے ٹکڑے ہوگئے میرے خیال کے

ناسور بن نہ جائے کہیں سرکشی جناب

کوڑے میں پھینک دیجیے اس کو نکال کے

بوسیدہ سے مکاں میں ہے کامل مرا قیام

اجداد کی رکھی ہے امانت سنبھال کے

کامل حیدرآبادی

نیلوفر علی

یوم پیدائش 22 اپریل 

ہر قدم پر نیا اک موڑ بنا رکّھا ہے

زندگی اور تجھے جینے میں کیا رکّھا ہے

ڈر نہ جائے کوئی بے ربطگیِ عالم سے 

اُس نے ہر چیز کو ترتیب میں لا رکّھا ہے

عشق سے اب بھی مُکرتے ہو تو بتلاؤ ذرا

اور کس آگ میں یہ ہاتھ جلا رکّھا ہے

کھو نہ جائے یہ تب و تابِ سماعت میری 

وقت کی نبض پہ کانوں کو لگا رکّھا ہے

نیلوفر علی