ریاست علی تاج

 یوم پیدائش 07 فروری 1930

خیال و فکر جہاں زاویے بدلتے ہیں

وہیں سے نت نئے اسلوب چل نکلتے ہیں 

وہ رات کو پئے گل گشت جب نکلتے ہیں

فلک پہ چاند ستاروں کے دل مچلتے ہیں 

مرے کلام میں مفروضہ‌‌ و قیاس نہیں

یہ تجربات ہیں جو شعر بن کے ڈھلتے ہیں 

رخ حیات کو ہر زاویے سے دیکھا ہے

مشاہدات کے قالب میں شعر ڈھلتے ہیں 

قدم قدم پہ حیا سوزیوں کا عالم ہے

سنور سنور کے نگاران شہر چلتے ہیں 

تمہارے غم سے عبارت ہے زندگی میری

تمہارے یاد کے دل میں چراغ چلتے ہیں 

ہیں کامران وہی لوگ آج دنیا میں

جو وقت اور زمانے کے ساتھ چلتے ہیں 

گداز قلب بھی ہوتا ہے کچھ انہیں کو نصیب

جو درد مند ہیں ان کے ہی دل پگھلتے ہیں 

رہ حیات میں ایسا بھی ہے مقام کوئی

جہاں جنون و خرد ساتھ ساتھ چلتے ہیں 

جدا ہے رنگ سخن تاجؔ ہر سخن ور کا

بے اعتبار نظر فکر و فن بدلتے ہیں  

ریاست علی تاج

عبدالسلام بنگلوری

 یوم پیدائش 06 فروری 1953

دل کی حالت بیاں نہیں ہوتی 

خامشی جب زباں نہیں ہوتی 

حرف حسرت ہے تم نے کیا سمجھا 

زندگی داستاں نہیں ہوتی 

کیا مقابل ہو حسن جاناں کے 

چاندنی بے کراں نہیں ہوتی 

تم جو آؤ تو ہو جواں محفل 

ورنہ کب کہکشاں نہیں ہوتی 

حسن کی بے رخی ادا ٹھہری 

عاشقی بد گماں نہیں ہوتی 

بے قراری کی بس دوا تم ہو 

یہ طبیبوں کے ہاں نہیں ہوتی 

جو یہ ہندوستاں نہیں ہوتا 

تو یہ اردو زباں نہیں ہوتی 

کچھ مراسم سلامؔ رہنے دے 

دشمنی جاوداں نہیں ہوتی

عبد السلام بنگلوری

تنویر نقوی

 یوم پیدائش 06 فروری 1919

ہمارے واسطے ہر آرزو کانٹوں کی مالا ہے

ہمیں تو زندگی دے کر خدا نے مار ڈالا ہے 

ادھر قسمت ہے جو ہر دم نیا غم ہم کو دیتی ہے

ادھر ہم ہیں کہ ہر غم کو ہمیشہ دل میں پالا ہے 

ابھی تک اک کھٹک سی ہے ابھی تک اک چبھن سی ہے

اگرچہ ہم نے اپنے دل سے ہر کانٹا نکالا ہے 

غلط ہی لوگ کہتے ہیں بھلائی کر بھلا ہوگا

ہمیں تو دکھ دیا اس نے جسے دکھ سے نکالا ہے 

تماشا دیکھنے آئے ہیں ہم اپنی تباہی کا

بتا اے زندگی اب اور کیا کیا ہونے والا ہے

تنویر نقوی

ارم لکھنوی

 یوم پیدائش 05 فروری 1967

ہم باغ تمنا میں دن اپنے گزار آئے

آئے نہ بہار آخر شاید نہ بہار آئے 

رنگ ان کے تلون کا چھایا رہا محفل پر

کچھ سینہ فگار اٹھے کچھ سینہ فگار آئے 

فطرت ہی محبت کی دنیا سے نرالی ہے

ہو درد سوا جتنا اتنا ہی قرار آئے 

کیا حسن طبیعت ہے کیا عشق کی زینت ہے

دل مٹ کے قرار آئے رنگ اڑ کے نکھار آئے 

در سے ترے ٹکرایا اک نعرۂ مستانہ

بے نام لیے تیرا ہم تجھ کو پکار آئے 

تصویر بنی دیکھی اک جان تمنا کی

آنسو مری آنکھوں میں کیا سلسلہ وار آئے 

کچھ ان سے نہ کہنا ہی تھی فتح محبت کی

جیتی ہوئی بازی کو ہم جان کے ہار آئے 

اس درجہ وہ پیارے ہیں کہتے ہی نہیں بنتا

کیا اور کہا جائے جب اور بھی پیار آئے

اس بزم میں ہم آخر پہنچے بھی تو کیا پایا

دل ہی کی دبی چوٹیں کچھ اور ابھار آئے

ارم لکھنوی

محمود شام

 یوم پیدائش 05 فروری 1940

مرے لیے تری نظروں کی روشنی ہے بہت

کہ دیکھ لوں تجھے پل بھر مجھے یہی ہے بہت

یہ اور بات کہ چاہت کے زخم گہرے ہیں

تجھے بھلانے کی کوشش تو ورنہ کی ہے بہت

کچھ اس خطا کی سزا بھی تو کم نہیں ملتی

غریب شہر کو اک جرم آگہی ہے بہت

کہاں سے لاؤں وہ چہرہ وہ گفتگو وہ ادا

ہزار حسن ہے گلیوں میں آدمی ہے بہت

کبھی تو مہلت نظارہ نکہت گزراں

لبوں پہ آگ سلگتی ہے تشنگی ہے بہت

کسی نے ہنس کے جو دیکھا تو ہو گئے اس کے

کہ اس زمانے میں اتنی سی بات بھی ہے بہت

محمود شام

ابرار اعظمی

 یوم پیدائش 05 فروری 1936

کس کا ہے جرم کس کی خطا سوچنا پڑا

رہتے ہیں کیوں وہ ہم سے خفا سوچنا پڑا

گل کی ہنسی میں رقص نجوم و قمر میں بھی

شامل ہے کتنی تیری ادا سوچنا پڑا

جب بھی مری وفاؤں کی بات آ گئی کہیں

ان کو پھر ایک عذر جفا سوچنا پڑا

غنچے اداس گل ہیں فسردہ چمن چمن

کس کا کرم ہے باد صبا سوچنا پڑا

شاید تمہاری یاد مرے پاس آ گئی

یا ہے مرے ہی دل کی صدا سوچنا پڑا

جب بھی کوئی بھٹک کے سر راہ آ گیا

کتنی کٹھن ہے راہ وفا سوچنا پڑا

زنداں کی بات دار کے چرچے رسن کا ذکر

کتنی عجب ہے طبع رسا سوچنا پڑا

ابرار اعظمی

عنوان چشتی

 یوم پیدائش 05 فروری 1935

زندہ باد اے دشت کے منظر زندہ باد

شہر میں ہے جلتا ہوا ہر گھر زندہ باد

کتنے نو عمروں کے قصے پاک کیے

کرفیو میں چلتا ہوا خنجر زندہ باد

تیرے میرے رشتوں کے سنگین گواہ

ٹوٹی مسجد جلتا مندر زندہ باد

آگ لگی ہے من کے باہر کیا کہیے

پھول کھلے ہیں من کے اندر زندہ باد

دل پر اک گھنگھور گھٹا سی چھائی ہے

آنکھوں میں پھرتا ہے سمندر زندہ باد 

عنوان چشتی

اختر دربھنگوی

 یوم پیدائش 04 فروری 1955

پیکرِحسن کی حشمت ہے تیری لاثانی

حدت عشق کی ندرت ہے میری لافانی

شام کی شاخ پہ یادوں کے پرندے آ کر

میری آنکھوں میں بڑھاتے ہے شررافشانی

نصف راتوں کو صبا درد جگا دیتی ہے

اور زخموں پر الٹ دیتی ہے نمکیں پانی

خون سے تر ہیں تمناؤں کے اجلے دامن

خیمۂ دل میں غموں کی ہے ستم سامانی

وصل کی جاہتیں اب میرے تصور میں نہیں

عمر کے ساتھ ہی کھوجاتی ہے سب تابانی

اب شب ہجر کی بے مہر ہو کچھ بھی مدت

مجھ کو دینی ہے محبت میں بڑی قربانی

حجرۂ دل سے گزرتا ہے اگر نقش پا

دل کے جذبات میں آجاتی ہے اک طغیانی

لب پر رکھتا ہوں سلگتی یہ لجاجت اختر

سجدۂ عشق میں رکھتا ہوں سدا پیشانی

اختر دربھنگوی

آفتاب قابل

 لذتِ غم نہ کم کرے کوئی

ہے تمنا ستم کرے کوئی

شوق غم بھی نہ کم کرے کوئی

سر ادب سے جو خم کرے کوئی

دن میں جلوؤں کی بھیڑ ہوتی ہے

رات میں آنکھ نم کرے کوئی

وہ نہیں ہے تو کیا کرے جی کر

اب دوا اور نہ دم کرے کوئی

دیکھیں کیسے نہ روئے گی دنیا

میرا قصہ رقم کرے کوئی

ہے مسیحائی کا اگر دعویٰ

میری تکلیف کم کرے کوئی

زندگی کا جب اعتبار نہیں

کیوں غرورِ حشم کرے کوئی

جتنا ہو پیار بانٹئے قابل

کس لئے بیش و کم کرے کوئی

آفتاب قابل

مخدوم محی الدین

 یوم پیدائش 04 فروری 1908

نظم انتظار

رات بھر دیدۂ نمناک میں لہراتے رہے 

سانس کی طرح سے آپ آتے رہے جاتے رہے 

خوش تھے ہم اپنی تمناؤں کا خواب آئے گا 

اپنا ارمان برافگندہ نقاب آئے گا 

نظریں نیچی کیے شرمائے ہوئے آئے گا 

کاکلیں چہرے پہ بکھرائے ہوئے آئے گا 

آ گئی تھی دل مضطر میں شکیبائی سی 

بج رہی تھی مرے غم خانے میں شہنائی سی 

پتیاں کھڑکیں تو سمجھا کہ لو آپ آ ہی گئے 

سجدے مسرور کہ معبود کو ہم پا ہی گئے 

شب کے جاگے ہوئے تاروں کو بھی نیند آنے لگی 

آپ کے آنے کی اک آس تھی اب جانے لگی 

صبح نے سیج سے اٹھتے ہوئے لی انگڑائی 

او صبا! تو بھی جو آئی تو اکیلی آئی 

میرے محبوب مری نیند اڑانے والے 

میرے مسجود مری روح پہ چھانے والے 

آ بھی جا، تاکہ مرے سجدوں کا ارماں نکلے 

آ بھی جا، تاکہ ترے قدموں پہ مری جاں نکلے 

مخدوم محی الدین