اعظم شاہد

 یوم پیدائش 01 اپریل

اُس  سے بچھڑ  کے زیست  میں راحت نہیں رہی 

خود   اپنی   ذات  سے   بھی  محبت  نہیں  رہی 

میں   نے   سُنا    ہے   آج،    مرے   بعد    دوستو

اُس   بزم   میں   کسی   پہ   عنایت  نہیں   رہی

چھوڑا  ہے  جب  سے تتلیوں کے  پیچھے  بھاگنا 

دن  بھر  چمن  میں  رہنے  کی عادت  نہیں  رہی 

وہ   پیار   یاد  کر   کے   بہت  رو   رہے  ہیں  ہم 

اب  کے  ہمارے  سر   پہ  وہ  شفقت  نہیں  رہی 

بِکنے   لگا   هے   کوڑیوں   کے    بھاؤ   ہر   جگہ 

انسان    کی   جہان    میں   قیمت   نہیں   رہی 

بہتا   هے  بے  گناہوں  کا  کیوں خون  شہر  میں 

قاضی    نہیں    رہا    کہ   عدالت    نہیں    رہی 

غم    ہائے  روز  گار   میں  اعظم   کو   کیا   ہوا 

خود  کو بھی یاد  رکھنے کی فُرصت نہیں  رہی

                                  اعظم شاھد

آغا حاشر کشمیری

 یوم پیدائش 01 اپریل 1879

سوئے مے کدہ نہ جاتے تو کچھ اور بات ہوتی

وہ نگاہ سے پلاتے تو کچھ اور بات ہوتی

گو ہوائے گلستاں نے مرے دل کی لاج رکھ لی

وہ نقاب خود اٹھاتے تو کچھ اور بات ہوتی

یہ بجا کلی نے کھل کر کیا گلستاں معطر

اگر آپ مسکراتے تو کچھ اور بات ہوتی

یہ کھلے کھلے سے گیسو انہیں لاکھ تو سنوارے

مرے ہاتھ سے سنورتے تو کچھ اور بات ہوتی

گو حرم کے راستے سے وہ پہنچ گئے خدا تک

تری رہ گزر سے جاتے تو کچھ اور بات ہوتی

آغا حشر کاشمیری

مسعود بیگ تشنہ

 یوم پیدائش 01 اپریل 1954 

جب اسے راستہ دکھائی نہ دے

آنکھ والے کی رہنمائی نہ دے

چھین لے مجھ سے چاہے سب دولت

مفت میں ایسی جگ ہنسائی نہ دے

میں بھلا، اپنی خصلتوں میں بھلا

مجھ کو بے داغ پارسائی نہ دے

بے سکوں ہے یہ نامراد ابھی 

درد سے گہری آشنائی نہ دے

ٹانگا ڈولی جو کر کے لے جائیں

ٹوٹی پھوٹی وہ چار پائی نہ دے

تو ہی کافی ہے اور یہ فرعون! 

میرے مولا مجھے خدائی نہ دے

میری دنیا ہے چھوٹی سی "تشنہ" 

دعوتِ جشنِ اجتماعی نہ دے 

مسعود بیگ تشنہ

سعدیہ بشیر

 یوم پیدائش 01 اپریل

اک ادائے خوش نما زنجیر کیسے ہو گئی ؟

روشنی کی زلف یوں دل گیر کیسے ہو گئی ؟

میرے اللہ! تجھ کو مجھ پہ پیار کتنا آ گیا 

اک ذرا سی آہ میـں تاثیر کیسے ہو گئی ؟

تیرے دل کے چور مجھ پہ سارے کیسے کُھل گئے 

ہائے ! نادانی مِری تقصیر کیسے ہو گئی ؟

سارے وعدے ایسے کیسے پانیوں پہ بَہہ گئے 

چاہِ یوسُف کی صدا تحریر کیسے ہو گئی ؟

دل سمَجھنے سے ہے قاصِر' اک جدائی کی خبر 

مسئَلہ کیوں بن گئی ؟ گمبھیر کیسے ہو گئی ؟

وقت کی اک چال سے سب برملا کہنے لگے 

بے صدا لاٹھی تھی جو' وہ تیر کیسے ہو گئی ؟

سعدیہؔ بشـیر 

مظفر حنفی

 یوم پیدائش 01 اپریل 1936

یوں توڑ نہ مدت کی شناسائی ادھر آ

آ جا مری روٹھی ہوئی تنہائی ادھر آ

مجھ کو بھی یہ لمحوں کا سفر چاٹ رہا ہے

مل بانٹ کے رو لیں اے مرے بھائی ادھر آ

اے سیل روان ابدی زندگی نامی

میں کون سا پابند ہوں ہرجائی ادھر آ

اس نکہت و رعنائی سے کھائے ہیں کئی زخم

اے تو کہ نہیں نکہت و رعنائی ادھر آ

اعصاب کھنچے جاتے ہیں اب شام و سحر میں

ہونے ہی کو ہے معرکہ آرائی ادھر آ

سنتا ہوں کہ تجھ کو بھی زمانے سے گلہ ہے

مجھ کو بھی یہ دنیا نہیں راس آئی ادھر آ

میں راہ نماؤں میں نہیں مان مری بات

میں بھی ہوں اسی دشت کا سودائی ادھر آ

مظفر حنفی

ساحل منیر

 خودخدا محبت ہے

گھر کے سُونے آنگن میں

رونقیں محبت سے

دِل کی ویراں بستی میں

راحتیں محبت سے

بزمِ کیف و مستی کی

شدتیں محبت سے

تیرے میرے جذبوں کی

حِدتیں محبت سے

مامتا کے ہونٹوں پر

اِک دعا محبت ہے

باپ کے بڑھاپے کا 

آسرا محبت ہے

ظلمتوں کی بستی میں

اِک دِیا محبت ہے

زہر کے پیالے کا

فلسفہ محبت ہے

سُولیوں پہ چڑھنے کا

سِلسلہ محبت ہے

سجدہ گاہِ مقتل کی

ہر دُعا محبت ہے

رزمِ حق و باطل میں 

کربلاؔ محبت ہے

مُنکرِ محبت سُن!

خود خُدا محبت ہے

ساحل منیر

احمد صدیقی

 یوم پیدائش 31 مارچ 1993

اس جیسا یہاں کوئی بھی فن کار نہیں ہے

قاتل ہے مگر ہاتھ میں تلوار نہیں ہے

اٹھوں گا مگر صبح تو ہونے دے مؤذن

سونے کے لئے نیند بھی درکار نہیں ہے

یوں ہے کہ فقط دیکھ کے ہوتی ہے تسلی

معمولی کوئی نقش یا دیوار نہیں ہے

درد دل مجروح کوئی سمجھے تو کیسے

اس شہر میں مجھ سا کوئی بیمار نہیں ہے

ہاتھوں میں لئے ہاتھ گزرتے رہے ہم دو

پھر جا کے ہوا علم مجھے پیار نہیں ہے

تصویر تری آنکھ ملاتی رہی دن بھر

پر ہاتھ ملانے کو یہ تیار نہیں ہے

احمد صدیقی

افتخار راغب

 یوم پیدائش 31 مارچ 1973

انکار ہی کر دیجیے اقرار نہیں تو

الجھن ہی میں مر جائے گا بیمار نہیں تو

لگتا ہے کہ پنجرے میں ہوں دنیا میں نہیں ہوں

دو روز سے دیکھا کوئی اخبار نہیں تو

دنیا ہمیں نابود ہی کر ڈالے گی اک دن

ہم ہوں گے اگر اب بھی خبردار نہیں تو

کچھ تو رہے اسلاف کی تہذیب کی خوشبو

ٹوپی ہی لگا لیجیے دستار نہیں تو

ہم برسر پیکار ستم گر سے ہمیشہ

رکھتے ہیں قلم ہاتھ میں تلوار نہیں تو

بھائی کو ہے بھائی پہ بھروسہ تو بھلا ہے

آنگن میں بھی اٹھ جائے گی دیوار نہیں تو

بے سود ہر اک قول ہر اک شعر ہے راغبؔ

گر اس کے موافق ترا کردار نہیں تو

افتخار راغب

احمد شمیم

 یوم پیدائش 31 مارچ 1930

ابھی رنج سفر کی ابتدا ہے

ابھی سے جی بہت گھبرا رہا ہے

دئے بجھنے لگے ہیں طاقچوں میں

ہر اک شے پر اندھیرا چھا رہا ہے

ہوا شاخوں میں چھپ کر رو رہی ہے

نہ جانے کیسا موسم آ رہا ہے

ٹھٹھرتی رت میں زخمی انگلیوں سے

ہمیں دریا میں سونا ڈھونڈھنا ہے

اسی امید پر بن باس کاٹیں

ہمیں بھی ایک دن گھر لوٹنا ہے

بہت چاہوں کہ میں بھی ہاتھ اٹھاؤں

مرے ہونٹوں پہ لیکن بد دعا ہے

احمد شمیم

انجم عثمان

 یوم پیدائش 29 مارچ

پس یقیں کہیں ہم بھی ترے گمان میں ہیں

ترا نشاں ہیں یہ تارے جو آسمان میں ہیں

حرم سرا تھا ترا دل سو چھوڑ آئے اسے

وگرنہ کہنے کو اب بھی اسی مکان میں ہیں

مرے نصیب کے خوش رنگ خواب اور سراب

نہ اس جہان میں تھے اور نہ اس جہان میں ہیں

میں اپنے واسطے ان میں سے خود ہی چن لوں گی

وہ سانحے جو میسر تری دکان میں ہیں

سراب ہیں یہ تمہارے سب آئنہ خانے

بصارتیں بھی نہ جانے کس امتحان میں ہیں

کبھی وہ آئنہ چشم میں سنورتے تھے

وہ سارے خواب نصابوں کے جو بیان میں ہیں

نہ جانے لائیں گے دل پر تباہیاں کیا کیا

وہ حادثے جو ابھی تک تری کمان میں ہیں

یہ پل صراط کہاں لے چلا ہمیں انجمؔ

نہ ہم زمیں کے رہے اور نہ آسمان میں ہیں

انجم عثمان