عارف بن قادر

 نہ بُزدل اتنا سمجھ ہم نے کر بھی جانا ہے 

مقامِ شوق سے آگے گزر بھی جانا ہے 

ذرا سی دیر ترے ہاں قیام ہے میرا 

کہ اِس کے بعد مجھے اپنے گھر بھی جانا ہے 

گھُلا ہوا ہے فضا میں عداوتوں کا جو زہر 

نہ سانس لو یہ لہو میں اُتر بھی جانا ہے 

لکھی نہیں ہے مقدر میں سب کے با ثمری 

جہان سے کسی نے بے ثمر بھی جانا ہے

نظامِ گردشِ دوراں ہے انگلیوں پہ تری

 جو تُو نے کہنا ہے رُک, یہ ٹھہر بھی جانا ہے 

چلایا جاتا رہا مجھ کو سیدھے رستے پر 

سو اب کی بار غلط راہ پر بھی جانا ہے 

فقط ہوا نہیں ہوگی اُجالوں کی قاتل

کچھ ان کا قتل چراغوں کے سر بھی جانا ہے 

مری کچھ اور پذیرائی ہونی ہے عارف

تری گلی سے نکل کر جدھر بھی جانا ہے

 

عارف بن قادر

ناصر ملک

 یوم پیدائش 15 اپریل 1972

مرا وجود ضروری تھا داستاں کے لیے

مگر اُتارا گیا مرگِ ناگہاں کے لیے

زمیں پہ بھیجنے والے زمیں سنبھال اپنی

نکل پڑا ہوں میں تسخیرِ آسماں کے لیے

اے مقتلِ شبِ تاریک تھوڑی مہلت دے

مجھے چراغ جلانے ہیں کارواں کے لیے

ہر ایک ظلم پہ میری صدا بلند ہوئی

خدائے پاک! میں حاضر ہوں امتحاں کیلئے

یہ بانجھ ضابطے روزی رساں نہیں ہوتے

کمانا پڑتا ہے بچوں کو خانداں کے لئے

ہوائیں کل بھی مسافر شناس ہوتی تھیں

ہوائیں آج بھی چلتی ہیں بادباں کے لیے

تمہارا لمس رہا محوِ گفتگو مجھ سے

یہ سانس چلتی رہی زیبِ داستاں کے لیے

ناصر ملک

خلیل فرحت کارنجوی

 یوم پیدائش 16 اپریل 1935

دل سے مرے تنہائی کی شدت نہیں جاتی

اب تو بھی چلا آئے تو وحشت نہیں جاتی

اس دور کی تعلیم کا معیار عجب ہے

تعلیم تو آتی ہے جہالت نہیں جاتی

کیا سوچ کے امید وفا باندھی تھی تم سے

اک عمر ہوئی دل کی ندامت نہیں جاتی

مفلس بھی تو خوددار ہوا کرتے ہیں لوگو

غربت میں بھی انساں کی شرافت نہیں جاتی

لے جاتی ہیں اب تک بھی مری نیند چرا کر

اب تک بھی ان آنکھوں کی شرارت نہیں جاتی

دے دیتا ہے اللہ مجھے حسب ضرورت

اب لے کے کسی در پہ ضرورت نہیں جاتی

سو بار تری جان پہ بن آئی ہے فرحتؔ

پھر بھی تری حق گوئی کی عادت نہیں جاتی

خلیل فرحت کارنجوی

خضر احمد خان شرر

 لُٹے   لُٹائے   سہی  اہتمام  رکھتے  ہیں 

فقیر  سب  کے  لئے انتظام رکھتے ہیں  

سبق  پڑھاؤ  نہیں  تم  ہمیں  شجاعت کا 

ہم  اپنے  ساتھ   خدائی  نظام  رکھتے ہیں 

کبھی کبھی تو خیالوں میں بھی نہیں آتے

کبھی  کبھی  مرے دل میں قیام رکھتے ہیں 

کبھی کبھی  وہ گذرتے  ہیں اجنبی بن کر 

کبھی کبھی  تو  بہت  اہتمام  رکھتے ہیں 

کبھی کبھی تو وہ خاموش ہیں سمندر سے

کبھی کبھی وہ بڑی دھوم دھام رکھتے ہیں

کوئی  تمھارے  سِوا  اب  نظر  نہیں آتا

تمھارے  نام  اُٹھا صبح  شام رکھتے ہیں 

جواب  دیں گے سرِ حشر  وہ  بھی رازق کو 

جو  تاجرانِ جہاں  اونچے  دام  رکھتے ہیں

کبھی تو  بہرِ خدا  لب تلک  ہنسی آئے

ہُجُومِ  غم  کا  شرر  ازدہام  رکھتے ہیں 

  

   خضر احمد خان شرر

وقاص ذاکر ادبی

 تم نے تو اپنے ہی من کی مانی آخر

نہ سُنی بس اِس دل کی کہانی آخر

بات بِگڑی تھی تو بات بن سکتی تھی 

بات چاہی نہ پھر سے بنانی آخر

اب اچھے ہیں دن پہلے تلف ہوتے تھے

بارہا اب نہ احوال جانی آخر

 تھا دکھاوے کا احساس کب تک رہتا 

جھوٹ ظاہر ہو تو پیار فانی آخر

آخرت بن جائے گی کوشش تو کر

چھوڑ دے رنگیں دنیا بنانی آخر

بے کلی ہو جی کو گر حُزن یا خرمی 

اجنبی سے اب نہ ہے لگانی آخر

وقاص ذاکر ادبی

حنیف شارب

 نعت رسول مقبول صلی اللہ علیہ وآلہ وسلم

پیار کا اظہار ہیں میرے نبیؐ

دین کے غمخوار ہیں میرے نبیؐ

پرسش اعمال کی کیوں فکر ہو

مالک و مختار ہیں میرے نبیؐ

علم گستر آپ سے بڑھ کر نہیں

علم کے مینار ہیں میرے نبیؐ

دشمنوں کو بھی دعا دیتے رہے

ایسے باکردار ہیں میرے نبیؐ

کوئی ان کا ہو نہ ہو پر وہ ضرور

شش جہت کے یار ہیں میرے نبیؐ

ذکر ہے قرآن میں یہ صاف صاف

بارشِ انوار ہیں میرے نبیؐ

ناز سے کہتا ہے شارب ہر جگہ

سر بسر ایثار ہیں میرے نبیؐ

حنیف شارب

شہزاد احمد

 یوم پیدائش 16 اپریل 1932

رخصت ہوا تو آنکھ ملا کر نہیں گیا

وہ کیوں گیا ہے یہ بھی بتا کر نہیں گیا

وہ یوں گیا کہ باد صبا یاد آ گئی

احساس تک بھی ہم کو دلا کر نہیں گیا

یوں لگ رہا ہے جیسے ابھی لوٹ آئے گا

جاتے ہوئے چراغ بجھا کر نہیں گیا

بس اک لکیر کھینچ گیا درمیان میں

دیوار راستے میں بنا کر نہیں گیا

شاید وہ مل ہی جائے مگر جستجو ہے شرط

وہ اپنے نقش پا تو مٹا کر نہیں گیا

گھر میں ہے آج تک وہی خوشبو بسی ہوئی

لگتا ہے یوں کہ جیسے وہ آ کر نہیں گیا

تب تک تو پھول جیسی ہی تازہ تھی اس کی یاد

جب تک وہ پتیوں کو جدا کر نہیں گیا

رہنے دیا نہ اس نے کسی کام کا مجھے

اور خاک میں بھی مجھ کو ملا کر نہیں گیا

ویسی ہی بے طلب ہے ابھی میری زندگی

وہ خار و خس میں آگ لگا کر نہیں گیا

شہزادؔ یہ گلہ ہی رہا اس کی ذات سے

جاتے ہوئے وہ کوئی گلہ کر نہیں گیا

شہزاد احمد

شہزاد خان

 یوم پیدائش 16 اپریل 1987

بقا کی راہ پہ چل کر فنا سے عشق ہوا

ارے چراغ کو کیسے ہوا سے عشق ہوا؟ 

کسی کو شاہ کسی کو گدا سے عشق ہوا

کوئی نہیں جسے اپنی رضا سے عشق ہوا

کہاں میں عام سا بندہ کہاں پہ تیرا جنون

مکینِ خاک کو کیوں کبریا سے عشق ہوا؟ 

تمام شہر ہی گریہ کناں ہے دل کے سبب

تمام شہر کو اُس بے وفا سے عشق ہوا

یہ چاشنی یہ دمک یوں نہیں ہے چہرے پر

خطیبِ حق کو مکمل، خدا سے عشق ہوا

بشر کا جبر مسلط رہے گا دنیا پر

بشر کو خُون میں رنگی رِدا سے عشق ہوا

شہزاد خان

زبیر رضوی

 یوم پیدائش 15 اپریل 1935

بچھڑتے دامنوں میں پھول کی کچھ پتیاں رکھ دو

تعلق کی گرانباری میں تھوڑی نرمیاں رکھ دو

بھٹک جاتی ہیں تم سے دور چہروں کے تعاقب میں

جو تم چاہو مری آنکھوں پہ اپنی انگلیاں رکھ دو

برستے بادلوں سے گھر کا آنگن ڈوب تو جائے

ابھی کچھ دیر کاغذ کی بنی یہ کشتیاں رکھ دو

دھواں سگرٹ کا بوتل کا نشہ سب دشمن جاں ہیں

کوئی کہتا ہے اپنے ہاتھ سے یہ تلخیاں رکھ دو

بہت اچھا ہے یارو محفلوں میں ٹوٹ کر ملنا

کوئی بڑھتی ہوئی دوری بھی اپنے درمیاں رکھ دو

نقوش خال و خد میں دل نوازی کی ادا کم ہے

حجاب آمیز آنکھوں میں بھی تھوڑی شوخیاں رکھ دو

ہمیں پر ختم کیوں ہو داستان خانہ ویرانی

جو گھر صحرا نظر آئے تو اس میں بجلیاں رکھ دو

زبیر رضوی

اظہر عنایتی

 یوم پیدائش 15 اپریل 1946

ہر ایک رات کو مہتاب دیکھنے کے لیے

میں جاگتا ہوں ترا خواب دیکھنے کے لیے

نہ جانے شہر میں کس کس سے جھوٹ بولوں گا

میں گھر کے پھولوں کو شاداب دیکھنے کے لیے

اسی لیے میں کسی اور کا نہ ہو جاؤں

مجھے وہ دے گیا اک خواب دیکھنے کے لیے

کسی نظر میں تو رہ جائے آخری منظر

کوئی تو ہو مجھے غرقاب دیکھنے کے لیے

عجیب سا ہے بہانا مگر تم آ جانا

ہمارے گاؤں کا سیلاب دیکھنے کے لیے

پڑوسیوں نے غلط رنگ دے دیا اظہرؔ

وہ چھت پہ آیا تھا مہتاب دیکھنے کے لیے

اظہر عنایتی