محمد حسین آزاد

 یوم پیدائش 05 مئی 1830

نظم محنت کرو

ہے امتحاں سر پر کھڑا محنت کرو محنت کرو 

باندھو کمر بیٹھے ہو کیا محنت کرو محنت کرو 

بے شک پڑھائی ہے سوا اور وقت ہے تھوڑا رہا 

ہے ایسی مشکل بات کیا محنت کرو محنت کرو 

شکوے شکایت جو کہ تھے تم نے کہے ہم نے سنے 

جو کچھ ہوا اچھا ہوا محنت کرو محنت کرو 

محنت کرو انعام لو انعام پر اکرام لو 

جو چاہو گے مل جائے گا محنت کرو محنت کرو 

جو بیٹھ جائیں ہار کر کہہ دو انہیں للکار کر 

ہمت کا کوڑا مار کر محنت کرو محنت کرو 

تدبیریں ساری کر چکے باتوں کے دریا بہہ چکے 

بک بک سے اب کیا فائدہ محنت کرو محنت کرو 

یہ بیج اگر ڈالوگے تم دل سے اسے پا لو گے تم 

دیکھو گے پھر اس کا مزا محنت کرو محنت کرو 

محنت جو کی جی توڑ کر ہر شوق سے منہ موڑ کر 

کر دو گے دم میں فیصلہ محنت کرو محنت کرو 

کھیتی ہو یا سوداگری ہو بھیک ہو یا چاکری 

سب کا سبق یکساں سنا محنت کرو محنت کرو 

جس دن بڑے تم ہو گئے دنیا کے دھندوں میں پھنسے 

پڑھنے کی پھر فرصت کجا محنت کرو محنت کرو 

بچپن رہا کس کا بھلا انجام کو سوچو ذرا 

یہ تو کہو کھاؤ گے کیا محنت کرو محنت کرو 

محمد حسین آزاد

امداد امام اثر

 یوم پیدائش 05 مئی 1849

جفائیں ہوتی ہیں گھٹتا ہے دم ایسا بھی ہوتا ہے

مگر ہم پر جو ہے تیرا ستم ایسا بھی ہوتا ہے

عدو کے آتے ہی رونق سدھاری تیری محفل کی

معاذ اللہ انساں کا قدم ایسا بھی ہوتا ہے

رکاوٹ ہے خلش ہے چھیڑ ہے ایذا پہ ایذا ہے

ستم اہل وفا پر دم بدم ایسا بھی ہوتا ہے

حسینوں کی جفائیں بھی تلون سے نہیں خالی

ستم کے بعد کرتے ہیں کرم ایسا بھی ہوتا ہے

دل مہجور آخر انتہا ہے ہر نحوست کی

کبھی سعدین ہوتے ہیں بہم ایسا بھی ہوتا ہے

نہ کر شکوہ ہماری بے سبب کی بد گمانی کا

محبت میں ترے سر کی قسم ایسا بھی ہوتا ہے

نہ ہو درد جدائی سے جو واقف اس کو کیا کہیے

ہمیں وہ دیکھ کر کہتے ہیں غم ایسا بھی ہوتا ہے

بتوں کے ملنے جلنے پر نہ جانا اے دل ناداں

بڑھا کر ربط کر دیتے ہیں کم ایسا بھی ہوتا ہے

ہمیں بزم عدو میں وہ بلاتے ہیں تمنا سے

کرم ایسا بھی ہوتا ہے ستم ایسا بھی ہوتا ہے

جگہ دی مجھ کو کعبے میں خدائے پاک نے زاہد

تو کہتا تھا کہ مقبول حرم ایسا بھی ہوتا ہے

ہوا کرتا ہے سب کچھ اے اثرؔ اس کی خدائی میں

کریں دعویٰ خدائی کا صنم ایسا بھی ہوتا ہے

امداد امام اثرؔ

محسن نقوی

 یوم پیدائش 05 مئی 1947

ترے بدن سے جو چھو کر ادھر بھی آتا ہے

مثال رنگ وہ جھونکا نظر بھی آتا ہے

تمام شب جہاں جلتا ہے اک اداس دیا

ہوا کی راہ میں اک ایسا گھر بھی آتا ہے

وہ مجھ کو ٹوٹ کے چاہے گا چھوڑ جائے گا

مجھے خبر تھی اسے یہ ہنر بھی آتا ہے

اجاڑ بن میں اترتا ہے ایک جگنو بھی

ہوا کے ساتھ کوئی ہم سفر بھی آتا ہے

وفا کی کون سی منزل پہ اس نے چھوڑا تھا

کہ وہ تو یاد ہمیں بھول کر بھی آتا ہے

جہاں لہو کے سمندر کی حد ٹھہرتی ہے

وہیں جزیرۂ لعل و گہر بھی آتا ہے

چلے جو ذکر فرشتوں کی پارسائی کا

تو زیر بحث مقام بشر بھی آتا ہے

ابھی سناں کو سنبھالے رہیں عدو میرے

کہ ان صفوں میں کہیں میرا سر بھی آتا ہے

کبھی کبھی مجھے ملنے بلندیوں سے کوئی

شعاع صبح کی صورت اتر بھی آتا ہے

اسی لیے میں کسی شب نہ سو سکا محسنؔ

وہ ماہتاب کبھی بام پر بھی آتا ہے

محسن نقوی

ظفر گورکھپوری

 یوم پیدائش 05 مئی 1935

دیکھیں قریب سے بھی تو اچھا دکھائی دے

اک آدمی تو شہر میں ایسا دکھائی دے

اب بھیک مانگنے کے طریقے بدل گئے

لازم نہیں کہ ہاتھ میں کاسہ دکھائی دے

نیزے پہ رکھ کے اور مرا سر بلند کر

دنیا کو اک چراغ تو جلتا دکھائی دے

دل میں ترے خیال کی بنتی ہے اک دھنک

سورج سا آئینے سے گزرتا دکھائی دے

چل زندگی کی جوت جگائے عجب نہیں

لاشوں کے درمیاں کوئی رستہ دکھائی دے

کیا کم ہے کہ وجود کے سناٹے میں ظفرؔ

اک درد کی صدا ہے کہ زندہ دکھائی دے

ظفر گورکھپوری

سردار آصف

 یوم وفات 04 مئی 2021

میں جن کو ڈھونڈنے نکلا تھا گہرے غاروں میں

پتہ چلا کہ وہ رہتے ہیں اب ستاروں میں

پرکھ رہا ہے مجھے جو وہ اس خیال کا ہے

ہمیشہ جھوٹ نہیں ہوتا اشتہاروں میں

انہیں یقین تھا دنیا کی عمر لمبی ہے

جو لوگ پیڑ لگاتے تھے رہ گزاروں میں

میں خود کو دیکھوں اگر دوسرے کی آنکھوں سے

ملیں گی خامیاں اپنے ہی شاہ کاروں میں

تمہاری خوشبو کو مجھ سے کہیں یہ چھین نہ لے

ہوا جو رہتی ہے دیوار کی دراروں میں

خدا کا شکر کہ میں اس سے تھوڑی دور رہا

سفید سانپ تھا گیندے کے پیلے ہاروں میں

نشیلی رات کا نشہ کچھ اور بڑھ جاتا

ترا نظارا بھی ہوتا اگر نظاروں میں

زباں پہ آئی تو اپنی مٹھاس کھو بیٹھی

جو بات ہوتی تھی پہلے کبھی اشاروں میں

سردار آصف

عارف نسیم فیضی

 یوم پیدائش 05 مئی 

حال دل بھی کہا نہیں جاتا 

بن کہے بھی رہا نہیں جاتا 

ہو چکا اب تلک جو، کافی ہے 

اور ہم سے جیا نہیں جاتا 

ہم نے ٹھانی ہے جن منازل کی 

اس طرف راستہ نہیں جاتا 

آج کے دور میں کوئی بھی فرات 

سوئے کرب و بلا نہیں جاتا 

چاکِ دامن ہوئے رفو لیکن 

چاک دل کا سیا نہیں جاتا 

جان لینی ہے لیجئے لیکن 

کیا کروں دل دیا نہیں جاتا 

دار پرچڑھ کے بول اٹھا عارف 

سچ کسی سے سہا نہیں جاتا

عارف نسیم فیضی

سمیع اللہ عرفی

 یوم پیدائش 5 مئ 1958

خون کے دیپ فصیلوں پے جلا رکھےہیں

اپنے انداز زمانے سے جدا رکھے ہیں

دل میں امید نہیں لب پے کوئی بات نہیں

ہاتھ پھر بھی تو دعاؤں کو اٹھا رکھے ہیں

گھل رہاہے کہ وہ اوروں کو بتائے کیسے

خواب گونگے نے بھی آنکھوں میں بسا رکھے ہیں

یہ الگ بات کہ اظہار تلک آنہ سکے

دل میں جذبات مگر بیش بہا رکھے ہیں

اپنی عمروں کا لہو دے کےا نہیں پالا ہے

ہم نے تو درد بھی بیٹوں سے سوا رکھےہیں

کوئی وعدہ ہی نہیں ہے کہ کوئی آئےگا

جانے کیوں راہ میں دل پھول کھلا رکھے ہیں

کتنے ڈرپوک پیں عرفی یہ قبیلے والے

گزرے وقتوں کے سبھی قرض اٹھارکے ہیں

سمیع اللہ عرفی

علیم اسرار

 یوم پیدائش 05 مئی 1976

کبھی رستہ کبھی منزل تمنا

امیدوں کا حسیں ساحل تمنا

جہاں کا فلسفہ مشکل تمنا

کسی کی آرزو حاصل تمنا

سجائے کاغذوں پر اک دوانہ 

ستارےچاند جان و دل تمنا

کنارہ کرتے ہو کیوں خواہشوں سے

نہیں ہوتی کوئی کامل تمنا 

نئے عنوان سن کر مسکرائے

پرانے زخم کی حامل تمنا

کہواسرار ہم سے کہتی ہے کیا

نگاہوں سے عیاں جھمل تمنا

علیم اسرار

محمد شبیر انصاری راج

 یوم پیدائش 05 مئی 1976

ہے قیامت کی نشانی دنیا والوں دیکھ لو

جس قدر سے ڈر رہا ہے آدمی سے آدمی

محمد شبیر انصاری راج

محشر بدایونی

 یوم پیدائش 04 مئی 1922

آخر آخر ایک غم ہی آشنا رہ جائے گا

اور وہ غم بھی مجھ کو اک دن دیکھتا رہ جائے گا

سوچتا ہوں اشک حسرت ہی کروں نذر بہار

پھر خیال آتا ہے میرے پاس کیا رہ جائے گا

اب ہوائیں ہی کریں گی روشنی کا فیصلہ

جس دیے میں جان ہوگی وہ دیا رہ جائے گا

آج اگر گھر میں یہی رنگ شب عشرت رہا

لوگ سو جائیں گے دروازہ کھلا رہ جائے گا

تا حد منزل توازن چاہئے رفتار میں

جو مسافر تیز تر آگے بڑھا رہ جائے گا

گھر کبھی اجڑا نہیں یہ گھر کا شجرہ ہے گواہ

ہم گئے تو آ کے کوئی دوسرا رہ جائے گا

روشنی محشرؔ رہے گی روشنی اپنی جگہ

میں گزر جاؤں گا میرا نقش پا رہ جائے گا

محشر بدایونی