داور نوید

 یوم پیدائش 01 جولائی 1970

زلفوں کو رخ پہ ڈال بڑی تیز دھوپ ہے

اے یار خوش جمال بڑی تیز دھوپ ہے

چہرہ ہے سرخ سرخ پسینے سے جسم تر

خود کہہ رہا ہے حال بڑی تیز دھوپ ہے

شدت کی پیاس سے یوں جمی لب پہ پپٹریاں

جیسے شجر پہ چھال بڑی تیز دھوپ ہے

پہلے بھی تیز دھوپ تھی ایسی مگر نہ تھی

یعنی کہ اب کے سال بڑی تیز دھوپ ہے

پہرہ فرات پر ہے یزیدی سپاہ کا

پیاسی علی کی آل بڑی تیز دھوپ ہے

صحرا میں تو سراب نظر آتے ہیں نوید 

اوسان رکھ بحال بڑی تیز دھوپ ہے

داور نوید

سلیم انصاری

 یوم پیدائش 01 جولائی 1962

مجھ کو سزائے موت کا دھوکہ دیا گیا 

میرا وجود مجھ میں ہی دفنا دیا گیا 

بولو تمہاری ریڑھ کی ہڈی کہاں گئی 

کیوں تم کو زندگی کا تماشہ دیا گیا 

آنکھوں کو میری سچ سے بچانے کی فکر میں 

ٹی وی کے اسکرین پہ چپکا دیا گیا 

سازش نہ جانے کس کی بڑی کامیاب ہے 

ہر شخص اپنے آپ میں بھٹکا دیا گیا 

سلیم انصاری

خورشید بخاروی

 یوم پیدائش 01 جولائی 1963

ہمارے جسم کے اندر بھی کوئی رہتا ہے 

مگر یہ کیسے کہیں ہم کہ وہ فرشتہ ہے 

عجیب شخص ہے وہ پیاس کے جزیروں کا 

پہن کے دھوپ سدا مقتلوں میں رہتا ہے 

نظر ہے دن کے چمکتے لباس پر سب کی 

قبائے شام کے پیوند کون گنتا ہے 

ہماری عریاں ہتھیلی پہ اب بھی شام و سحر 

یہ کون ہے جو گہر آنسوؤں کے رکھتا ہے 

بچھڑ گئے تو اکیلے رہیں گے ہم شاربؔ 

کہ سارسوں سا ہمارا تمہارا رشتہ ہے

شارب مورانوی

شارب مورانوی

 یوم پیدائش 01 جولائی 1963

ہمارے جسم کے اندر بھی کوئی رہتا ہے 

مگر یہ کیسے کہیں ہم کہ وہ فرشتہ ہے 

عجیب شخص ہے وہ پیاس کے جزیروں کا 

پہن کے دھوپ سدا مقتلوں میں رہتا ہے 

نظر ہے دن کے چمکتے لباس پر سب کی 

قبائے شام کے پیوند کون گنتا ہے 

ہماری عریاں ہتھیلی پہ اب بھی شام و سحر 

یہ کون ہے جو گہر آنسوؤں کے رکھتا ہے 

بچھڑ گئے تو اکیلے رہیں گے ہم شاربؔ 

کہ سارسوں سا ہمارا تمہارا رشتہ ہے

شارب مورانوی

اطہر اعظمی

 یوم پیدائش 01 جولائی 1965

ڈری سی، سہمی سی اس سوگوار دنیا کا

خدایا! بخش دے پھر سے قرار دنیا کا

 

کسی کے جانے سے کب فرق پڑنے والا ہے 

چلے گا ایسے ہی سب کاروبار دنیا 

 

تمہیں خبر تھی میں دنیا تمہیں سمجھتا تھا

تمہارے بعد کہاں اعتبار دنیا کا 

 

سبھی یہ سوچ کے آنکھیں چرا رہے ہیں یہاں 

ہمیں پہ تھوڑی ہے دارومدار دنیا کا 

 

ذرا سی دیر کو قدرت نے آنکھ کیا بدلی 

غرور ہو گیا سب تار تار دنیا کا 

 

ہمارے حرص نے رنگت بگاڑ دی اسکی 

تو آؤ کرتے ہیں پھر سے سنگار دنیا 

اگر فقیری کا اتنا ہی شوق ہے اطہر 

تو پھر اتارئے سر سے خمار دنیا کا 

اطہر اعظمی

عمران انجم

 یوم پیدائش 01 جولائی 1970

کوئی بھی اب اسے تبدیل کر نہیں سکتا

بگڑ گیا ہے وہ اتنا سدھر نہیں سکتا

ہمارے زعم سے واقف ہے پانیوں کا مزاج

ہمارے سامنے دریا بپھر نہیں سکتا

ہمارا قتل بغاوت کو تقویت دے گا

ہمارا نظریہ مر کے بھی مر نہیں سکتا

مجھے تو چھو کے بتا ہوں کہ یا نہیں ہوں میں

میں اپنے ہونے کی تصدیق کر نہیں سکتا

 اس آئینے کا بدن کرچیوں میں دفنا دو

تمہیں جو دیکھ کے خود ہی نکھر نہیں سکتا

جنوں کو میں نے دکھاٸی ہے اعتدال کی راہ

سو چاہ کے بھی وہ حد سے گزر نہیں سکتا

مثال دی تری اس کو وہ جس کا دعوی تھا

یہ ماہتاب زمیں پر اتر نہیں سکتا

بس ایک عشق ہی صحرا میں ڈھوتا رہتا ہوں

میں کوٸی اور مشقت تو کر نہیں سکتا

ترے گلے میں جو کشکول حرص و لالچ ہے

زمیں کے چاند ستاروں سے بھر نہیں سکتا

عمران انجم

جبیب بنارسی

 یوم پیدائش 01 جولائی 1965

آج کا دور بھی افسوس اسی ہیجان میں ہے

قیصریّت کی ادا کیوں ابھی سلطان میں ہے

میں عقیدت کو نہ بدلوں گا تمھارے ڈر سے

پختگی ظالمو! اب بھی مرے ایمان میں ہے

آج خورشیدِ مصائب ہے سوا نیزے پر

اب تو ہر شخص یہاں حشر کے میدان میں ہے

کیسے انصاف ہو قانون میں ٹھہراؤ نہیں

ایک ہلچل سی ابھی عدل کی میزان میں ہے

خوشنما پھول کی مانند حبیبِ ناداں

نقشِ پا آج بھی دیکھ آؤ بیابان میں ہے

 حبیب بنارسی

شارق خلیل آبادی

 یوم پیدائش 01 جولائی 1956

شاید مرے اپنے مرے قاتل تو نہیں تھے

احباب ٰمرے خون میں شامل تو نہیں تھے

جو چھوڑ گئے ساتھ یوں لشکر کا اچانک

ایسا مجھے لگتا ہےٰ وہ بزدل تو نہیں تھے

کچھ لوگ جو تعریف مری کر کے گئے ہیں

وہ میری تمناؤں کے قاتل تو نہیں تھے

حق گوئی پہ جو لوگ بھڑک اٹھتے تھے ہم پر

لگتا ہے وہ شیدائی باطل تو نہیں تھے

رسوا جو ہوئے بزم ادب سے تری کل شب

تہذیب کے ارکان سے غافل تو نہیں تھے

یہ موج بہا لائی ہے منجدھار میں جن کو

وہ لوگٰ بتاؤ لب ساحل تو نہیں تھے

 ہاں عشق میں تم ٹوٹ کے بکھرے تھے یقینا

پر صورتٍ شارق کبھی تٍل تٍل تو نہیں تھے

شارق خلیل آبادی

نہال رضوی

 یوم پیدائش 01 جولائی 1957

مت کرئے چھیڑ چھاڑ چمن کے اصول سے

کانٹے الگ نہ کیجئے گلشن میں پھول سے

کسدرجہ تلملائی ہیں خوشیاں نہ پوچھئے

دل پر مرے صحیفہء غم کے نزول سے

حالت کسی بھی دور میں ایسی نہ تھی کبھی

 خطرہ ہے آج علم کو جتنا جہول سے

 

کھو جائیں آسمان تو حیرت نہ کیجئے

افلاک پٹ گئے ہیں کچھ اسدرجہ دھول سے

جاکر وہاں حیات کا مقصد نہ ڈھونڈھئے

اکثر ہمارے فعل جہاں ہوں فضول سے

چہرے اتر گئے ہیں ہماری خوشی سے کیوں

کیوں دوست لگ رہے ہیں ہمارے ملول سے

شکوہ کسی سے اور مناسب نہیں نہال 

ہم دربدر ہوئے ہیں خود اپنی ہی بھول سے

نہال رضوی

اعتبار ساجد

 یوم پیدائش 01 جولائی 1948

تمہیں جب کبھی ملیں ' فرصتیں مرے دل سے بوجھ اتاردو

میں بہت دنوں سے اداس ہوں مجھے کوئی شام ادھار دو

مجھے اپنے روپ کی دھوپ دو کہ چمک سکیں مرے خال وخد

مجھے اپنے رنگ میں رنگ دو، مرے سارے زنگ اتار دو

کسی اور کو مرے حال سے نہ غرض ہے کوئی نہ واسطہ

میں بکھر گیا ہوں سمیٹ لو' میں بگڑ گیا ہوں سنوار دو

مری وحشتوں کو بڑھا دیا ہے جدائیوں کے عذاب نے

مرے دل پہ ہاتھ رکھو ذرا' مری دھڑکنوں کو قرار دو

تمہیں صبح کیسی لگی کہو' مری خواہشوں کے دیار کی

جو بھلی لگی تو یہیں رہو' اسے چاہتوں سے نکھار دو

وہاں گھر میں کون ہے منتظر کہ ہو فکر دیر سویر کی

بڑی مختصر سی یہ رات ہے اسی چاندنی میں گزار دو

کوئی بات کرنی ہے چاند سے کسی شاخسار کی اوٹ میں

مجھے راستے میں یہیں کہیں کسی کنج گل میں اتار دو

اعتبار ساجد