ایس ڈی عابد

 عقل ہے تو گیان بھی ہو گا 

ہے زباں تو بیان بھی ہو گا

جانے والے کو ۔۔ ڈھونڈ لوں گا میں

کچھ کہیں تو نشان بھی ہو گا

سوچ لینا تُو پہلے کرنے سے 

عشق میں امتحان بھی ہو گا

آج محفل ہے حُسن والوں کی

صاحبِ صاحبان بھی ہو گا

سارے دشمن نہیں زمانے میں 

کوئی تو مہربان بھی ہو گا

شہر سارا تو بدزبان نہیں  

ایک تو خوش گمان بھی ہو گا

اِن دنوں جو فقط کہانی ہے 

کل وہی داستان بھی ہو گا

قتل پُھولوں کا کرنے والوں میں

دیکھنا باغبان بھی ہو گا

عشق میں سب تو مر نہیں جاتے

کوئی تو نیم جان بھی ہوگا 

مانتا ہوں کہ سارے طالب ہیں 

طالبِ طالبان بھی ہو گا 

حشر کے دن کی ایک خوبی ہے 

سیّدِ سیّدان بھی ہو گا 

حُسن ہے یہ حساب کے دن کا

جلوہ گر لامکان بھی ہوگا 

عاجزی جس نے عابدؔ اپنا لی

ایک دن کامران بھی ہو گا

 ایس،ڈی،عابدؔ

فرید پربتی

 یوم پیدائش 04 اگست 1961

اور کچھ اس کے سوا اہل نظر جانتے ہیں

پگڑیاں اپنی بچانے کا ہنر جانتے ہیں

اک ستارے کو ضیا بار دکھانے کے لئے

وہ بجھائیں گے سبھی شمس و قمر جانتے ہیں

خواب میں دیکھتے ہیں کھڑکیاں ہر گھر کی کھلی

دور ہو جائے گا اب شہر سے ڈر جانتے ہیں

میزبانی تھی کبھی جن میں میسر تیری

پلٹ آئیں گے وہی شام و سحر جانتے ہیں

تری جھولی میں ستارے یہ نہیں گرنے کے

ہر طلب گار کا وہ طرز نظر جانتے ہیں

یہ جو سستانے یہاں آتے ہیں صاحب اک دن

سائے کے ساتھ وہ مانگیں گے شجر جانتے ہیں

تیز آندھی سے دیے سارے بچانے کو فریدؔ

خود کو رکھے گا سر راہ گزر جانتے ہیں

فرید پربتی

ارشد سراغ

 یوم پیدائش 04 اگست

دم بہ دم جاری سفر ہے اپنے پیارے کی طرف 

جا رہا ہوں جاودانی استعارے کی طرف 

دھڑکنیں بھی تیز ہونے لگ گئیں گاڑی کے ساتھ  

اس نے جاتے وقت کب دیکھا اشارے کی طرف 

آ رہی ہے ایک آندھی رنج و غم کی شہر میں

جاں بچانے کو سبھی دوڑے سہارے کی طرف

اپنے بچوں کو تھا سمجھانا مجھے مفہوم عشق

 اس لیے میں چل دیا تھا بہتے دھارے کی طرف

  

ساری دنیا کی توجہ ۔۔۔چاند سے چہرے پہ تھی 

میری نظریں تھی چمکتے اک ستارے کی طرف

ایک بچہ چپ کھڑا ہے عرش میں گاڑے نظر  

دیکھتا ہے کتنی حسرت سے غبارے کی طرف

اس کی آنکھوں میں لکھی تھی آخری خواہش سُراغ 

ڈوبنے والے کا چہرہ تھا کنارے کی طرف

ارشد سراغ

احسان علی احسان

 یوم پیدائش 04 اگست

رات بھر بھوک فاقہ کھلاتی رہی 

مفلسی شادمانی کو کھاتی رہی 

فاصلے قربتوں کا مقدر ہوئے

زندگی وحشتوں کو جگاتی رہی  

آج فرطِ قلق کا وہ ہنگام تھا 

میرے دل کو اداسی ڈراتی رہی

بند ہونے لگی آس کی کھڑکیاں 

زندگی پہ مری بے ثباتی رہی

آئی آزار کھینچے ہوئے زندگی

اور نگاہِ رمیده رلاتی رہی 

آگ نے میرے دل کو بھی جھلسا دیا

راکھ سی زندگانی اڑاتی رہی

میرے گلشن میں اتری ہوئی چاندنی 

نغمہ ہائے اجل گنگناتی رہی

احسان علی احسان

روحی کنجاہی

 یوم پیدائش 04 اگست 1936

ہر تلخ حقیقت کا اظہار بھی کرنا ہے

دنیا میں محبت کا پرچار بھی کرنا ہے

بے خوابیٔ پیہم سے بیزار بھی کرنا ہے

بستی کو کسی صورت بیدار بھی کرنا ہے

دشمن کے نشانے پر کب تک یونہی بیٹھیں گے

خود کو بھی بچانا ہے اور وار بھی کرنا ہے

شفاف بھی رکھنا ہے گلشن کی فضاؤں کو

ہر برگ گل تر کو تلوار بھی کرنا ہے

کانٹوں سے الجھنے کی خواہش بھی نہیں رکھتے

پھولوں سے محبت کا اظہار بھی کرنا ہے

اس جرم کی نوعیت معلوم نہیں کیا ہے

انکار بھی کرنا ہے اقرار بھی کرنا ہے

ہونے بھی نہیں دینا بحران کوئی پیدا

موقف پہ ہمیں اپنے اصرار بھی کرنا ہے

طے لمحوں میں کر ڈالیں صدیوں کا سفر لیکن

اس راہ کو اے روحیؔ ہموار بھی کرنا ہے

 

روحی کنجاہی

باصر سلطان کاغ

 یوم پیدائش 04 اگست 1953

یہ نہیں ہے کہ تجھے میں نے پکارا کم ہے

میرے نالوں کو ہواؤں کا سہارا کم ہے

اس قدر ہجر میں کی نجم شماری ہم نے

جان لیتے ہیں کہاں کوئی ستارا کم ہے

دوستی میں تو کوئی شک نہیں اس کی پر وہ

دوست دشمن کا زیادہ ہے ہمارا کم ہے

صاف اظہار ہو اور وہ بھی کم از کم دو بار

ہم وہ عاقل ہیں جنہیں ایک اشارا کم ہے

ایک رخسار پہ دیکھا ہے وہ تل ہم نے بھی

ہو سمرقند مقابل کہ بخارا کم ہے

اتنی جلدی نہ بنا رائے مرے بارے میں

ہم نے ہم راہ ابھی وقت گزارا کم ہے

باغ اک ہم کو ملا تھا مگر اس کو افسوس

ہم نے جی بھر کے بگاڑا ہے سنوارا کم ہے

آج تک اپنی سمجھ میں نہیں آیا باصرؔ

کون سا کام ہے وہ جس میں خسارا کم ہے

باصر سلطان کاظمی

یوسف اعظمی

 یوم پیدائش 04 اگست 1944

ہونٹوں کے صحیفوں پہ ہے آواز کا چہرہ

سایہ سا نظر آتا ہے ہر ساز کا چہرہ

آنکھوں کی گپھاؤں میں تڑپتی ہے خموشی

خوابوں کی دھنک ہے مرے ہم راز کا چہرہ

میں وقت کے کہرام میں کھو جاؤں تو کیا غم

ڈھونڈے گا زمانہ مری آواز کا چہرہ

سورج کے بدن سے نکل آئے ہیں ستارے

انجام میں بیدار ہے آغاز کا چہرہ

پلکیں ہیں کہ سرگوشی میں خوشبو کا سفر ہے

آنکھوں کی خموشی ہے کہ آواز کا چہرہ

یوسف اعظمی

اشرف رفیع

 یوم پیدائش 04 اگست 1940

پردے مری نگاہ کے بھی درمیاں نہ تھے

کیا کہیے ان کے جلوے کہاں تھے کہاں نہ تھے

جس راستے سے لے گئی تھی مجھ کو بے خودی

اس راہ میں کسی کے قدم کے نشاں نہ تھے

راز آشنا ہے میری نظر یا پھر آئنہ

ورنہ وہ اپنے حسن کے خود رازداں نہ تھے

کچھ بے صدا سے لفظ نظر کہہ گئی ضرور

مانا لب خموش رہین بیاں نہ تھے

آئے تو یوں کہ جیسے ہمیشہ تھے مہرباں

بھولے تو یوں کہ جیسے کبھی مہرباں نہ تھے

اشرفؔ فریب زیست ہے کب امتحاں سے کم

اس کے سوا تو اور یہاں امتحاں نہ تھے

اشرف رفیع

امجد اسلام امجد

 یوم پیدائش 04 اگست 1944

کہاں آ کے رکنے تھے راستے کہاں موڑ تھا اسے بھول جا

وہ جو مل گیا اسے یاد رکھ جو نہیں ملا اسے بھول جا

وہ ترے نصیب کی بارشیں کسی اور چھت پہ برس گئیں

دل بے خبر مری بات سن اسے بھول جا اسے بھول جا

میں تو گم تھا تیرے ہی دھیان میں تری آس تیرے گمان میں

صبا کہہ گئی مرے کان میں مرے ساتھ آ اسے بھول جا

کسی آنکھ میں نہیں اشک غم ترے بعد کچھ بھی نہیں ہے کم

تجھے زندگی نے بھلا دیا تو بھی مسکرا اسے بھول جا

کہیں چاک جاں کا رفو نہیں کسی آستیں پہ لہو نہیں

کہ شہید راہ ملال کا نہیں خوں بہا اسے بھول جا

کیوں اٹا ہوا ہے غبار میں غم زندگی کے فشار میں

وہ جو درد تھا ترے بخت میں سو وہ ہو گیا اسے بھول جا

تجھے چاند بن کے ملا تھا جو ترے ساحلوں پہ کھلا تھا جو

وہ تھا ایک دریا وصال کا سو اتر گیا اسے بھول جا

امجد اسلام امجد

صوفی تبسم

 یوم پیدائش 04 اگسٹ 1899

ہزار گردش شام و سحر سے گزرے ہیں

وہ قافلے جو تری رہ گزر سے گزرے ہیں

ابھی ہوس کو میسر نہیں دلوں کا گداز

ابھی یہ لوگ مقام نظر سے گزرے ہیں

ہر ایک نقش پہ تھا تیرے نقش پا گماں

قدم قدم پہ تری رہ گزر سے گزرے ہیں

نہ جانے کون سی منزل پہ جا کے رک جائیں

نظر کے قافلے دیوار و در سے گزرے ہیں

رحیل شوق سے لرزاں تھا زندگی کا شعور

نہ جانے کس لیے ہم بے خبر سے گزرے ہیں

کچھ اور پھیل گئیں درد کی کٹھن راہیں

غم فراق کے مارے جدھر سے گزرے ہیں

جہاں سرور میسر تھا جام و مے کے بغیر

وہ مے کدے بھی ہماری نظر سے گزرے ہیں

صوفی تبسّم