سید عادل عزیر

 یوم پیدائش 08 جنوری

وفا کا نام لے کر ہم ابھی تم کو بلا لیں گے

یہ جاں بھی وار دیں گے اور پلکوں پر بٹھا لیں گے 

سکوں دل میں میسر ہو، نہیں لگتا کسی کا ڈر 

امیدوں کے دیے ہم ہر اندھیرے میں جلا لیں گے

چلو جب دل تمہارا ہو تم اپنے غم سنا دینا

"کبھی ملنا، تمہارے مسئلے کا حل نکالیں گے"

وہ مجھ سے گفتگو اکثر بڑی الفت سے کرتا ہے

یہ سوچا ہے اسے دل میں محبت سے سجا لیں گے

یگانہ شخصیت اس کی ہے میرا دلربا ایسا

نظر اس کو نہ لگ جائے اسے دل میں چھپا لیں گے

پڑے ہیں شام سے ان کے تصور میں مگر عادل

یہی سوچا ہے اب جا کر انہیں اپنا بنا لیں گے

 سید عادل عزیز

شاہ رخ عبیر

 یوم پیدائش 08 جنوری

دل کی ویران سی گلیوں میں ستارے نکلے

تجھ میں جھانکا تو کئی رنگ ہمارے نکلے

تجھ کو سوچوں تو یہ دنیا بھی حسیں لگتی ہے

تیرے پہلو سے بہاروں کے شمارے نکلے

صبح کی پہلی کرن ہو یا ہوا کا جھونکا

زلف چہرے سے ہٹائی تو ستارے نکلے

سرمئی شام کی دہلیز پہ آ بیٹھے ہیں

وہ نظارے جو تری دید کے مارے نکلے

موج در موج سمندر میں تلاطم اٹھا

پھر سفینے میں کئی لوگ ہمارے نکلے

پھر جوانی نے کئی خواب دکھائے مجھ کو

پھر مری روح سے الفت کے شرارے نکلے

شاہ رخ عبیر

عنبرین خان

 یوم پیدائش 07 جنوری

استقامت کا یہ صلہ دے دے

جانے والے کوئی دعا دے دے

پھر دکھا راستہ یقیں کا مجھے

اور نیا ایک واہمہ دے دے

خود سے ملنا ضروری ہو گیا ہے

مجھ کو تھوڑا سا راستہ دے دے

غم زدہ کر کہ راحتوں سے ملا

کیفیت کی بس انتہا دے دے

دلربائی نہیں اگر ممکن

خواب تو کوٸی دلربا دے دے

جس کے دھاگے الجھ گئے مجھ سے

سوچ کا دوسرا سرا دے دے

وقت سے عنبرین کیا مانگیں

اور اٹھا کر نجانے کیا دے دے

عنبرین خان

سیماب ظفر

 یوم پیدائش 07 جنوری

 

 کھوٹ کی مالا جھوٹ جٹائیں اپنے اپنے دھیان 

اپنا اپنا مندر منبر اپنے رب بھگوان 

گھر جانے کی کوئی دوجی راہ نکالی جائے 

آن کے رہ میں بیٹھ گیا ہے اک جوگی انجان 

زخمی سورج زہر میں بھیگی لو پیاسے پنچھی 

ٹوٹی بکھری ہجر گلی میں کچھ شاخیں بے جان 

اپنے دکھ کا گھونٹ گلا اور یار کے آنسو اوڑھ 

ان آنکھوں کے درد سے بڑھ کر کیا ہوگا نقصان 

خاموشی کی کٹھنائی میں چپ کی بپتا میں 

اس آواز کا شہد گھلے تو مل جائے نروان 

اونچے نیچے دائیں بائیں مٹی کے ٹیلے 

آشاؤں کے سرد بدن بھیتر کا قبرستان 

آیت آیت نور کا پیکر حرف حرف مہکار 

دو سیمابؔ صفت ہونٹوں پر تھی سورہ رحمان

سیماب ظفر

انعمتا علی

 یوم پیدائش 06 جنوری

 

 گھر میں دراڑ ڈالتے رشتوں کی خیر ہو 

اس آستیں میں آ بسے سانپوں کی خیر ہو 

وہ ٹوٹنے لگیں تو سہولت مجھے بھی ہے 

شب میں قرار بخشتے تاروں کی خیر ہو 

یہ لوگ ہر قدم پہ گرانے لگے مجھے 

لیکن سنبھالتی تری بانہوں کی خیر ہو 

تو جو نہیں تو پھول تو ہیں آس پاس بھی 

اس حبس میں کھلے ہوئے غنچوں کی خیر ہو 

رک سا گیا ندی کا بہاؤ برس سے تھا 

اس میں دھلے ہوئے ترے پیروں کی خیر ہو 

جس سمت ہوں رواں دواں منزل بھی ہے وہیں 

رستوں میں جا بہ جا پڑے کانٹوں کی خیر ہو 

میں کیا کہوں کہ کتنے زمانے گزر گئے 

حصے میں میرے آئیں نہ خوشیوں کی خیر ہو 

موج فنا نے دشت میں لا کر جھٹک دیا 

حیرت سے دیکھتی تری آنکھوں کی خیر ہو 

یہ اضطراب عشق سے تحفہ ملا مجھے 

منہ کو چڑا رہے ترے لفظوں کی خیر ہو 

باغوں میں سیر کرتے ہوئے جگنوؤں میں تم 

تم سے ضیا پکڑتے چراغوں کی خیر ہو 

ان کے سبب سے ہی ہوئی میں در سے بے اماں 

انعمؔ تمہارے حال پہ ہنستوں کی خیر ہو

انعمتا علی

مسرت جبیں زیبا

 یوم پیدائش: 07 جنوری 1951

زخم بھر جائیں گے لیکن اک نشاں رہ جائے گا 

کچھ بھی ہو پہلے کی طرح دل کہاں رہ جائے گا 

تم چلے جاؤ گے لیکن میرے سینے میں سدا 

راکھ میں لپٹا ہوا آتش فشاں رہ جائے گا 

آنکھ سے میگھا برس کر آپ ہی تھم جائے گی 

گھٹ کے سینے میں کچھ آہوں کا دھواں رہ جائے گا

آبلہ پائی کا حاصل نا مرادی گر رہا

آرزوؤں کا بھٹک کر کارواں رہ جائے گا

 

بجلیوں کی نذر ہو جائے گا دل کا آشیاں 

سوچتا ہوں کیا وہ پھر بے خانماں رہ جائے گا

لوٹ کر گل کا تبسم گر ہوئی رخصت خزاں 

زیباؔ عبرت کے لئے پھر گلستاں رہ جائے گا 

مسرت جبیں زیبا

عباس دانا

 پیدائش:07جنوری 1942

اپنے ہی خون سے اس طرح عداوت مت کر 

زندہ رہنا ہے تو سانسوں سے بغاوت مت کر

سیکھ لے پہلے اجالوں کی حفاظت کرنا 

شمع بجھ جائے تو آندھی سے شکایت مت کر

 

سر کی بازارِ سیاست میں نہیں ہے قیمت 

سر پہ جب تاج نہیں ہے تو حکومت مت کر

خواب ہو جام ہو تارہ ہو کہ محبوب کا دل 

ٹوٹنے والی کسی شے سے محبت مت کر

 

دیکھ پھر دست ضرورت میں نہ بک جائے ضمیر 

زر کے بدلے میں اصولوں کی تجارت مت کر

 

پرسش حال سے ہو جائیں گے پھر زخم ہرے 

اس سے بہتر ہے یہی میری عیادت مت کر

 

سر جھکانے کو ہی سجدہ نہیں کہتے داناؔ 

جس میں دل بھی نہ جھکے ایسی عبادت مت کر 

عباس دانا

اقبال سہیل

 یوم پیدائش 07 جنوری 1884

انجام وفا بھی دیکھ لیا اب کس لیے سر خم ہوتا ہے

نازک ہے مزاج حسن بہت سجدے سے بھی برہم ہوتا ہے

مل جل کے بہ رنگ شیر و شکر دونوں کے نکھرتے ہیں جوہر

دریاؤں کے سنگم سے بڑھ کر تہذیب کا سنگم ہوتا ہے

کچھ ما و شما میں فرق نہیں کچھ شاہ و گدا میں بھید نہیں

ہم بادہ کشوں کی محفل میں ہر جام بکف جم ہوتا ہے

دیوانوں کے جبہ و دامن کا اڑتا ہے فضا میں جو ٹکڑا

مستقبل ملت کے حق میں اقبال کا پرچم ہوتا ہے

منصور جو ہوتا اہل نظر تو دعویٔ باطل کیوں کرتا

اس کی تو زباں کھلتی ہی نہیں جو راز کا محرم ہوتا ہے

تا چند سہیلؔ افسردۂ غم کیا یاد نہیں تاریخ حرم

ایماں کے جہاں پڑتے ہیں قدم پیدا وہیں زمزم ہوتا ہے

اقبال سہیل

سجاد لاکھا

 یوم پیدائش 07 جنوری 1959

حقیقت تک رسائی مانگتے ہو 

بتوں سے کبریائی مانگتے ہو

یہاں تو رہبری اک داشتہ ہے

تم اس سے پارسائی مانگتے ہو

گراتے کیوں نہیں دیوار زنداں ؟

اسیرو ! کیوں رہائی مانگتے ہو

زمانے بھر کا وہ اک بے مروت

تم اس سے دل ربائی مانگتے ہو

ستم یہ ہے تم اپنی اجرتیں بھی

اسے دے کر دہائی ، مانگتے ہو

سجاد لاکھا

زبیر الحسن غافل

 یوم پیدائش 07 جنوری 1944

بے نام آدمی جو سر شام مرگیا

سورج کے شہر میں وہ اندھیرا ہی کر گیا

انسان جب حدود مکاں سے گزر گیا

حیران ہو کے وقت جہاں تھا ٹھہر گیا

کچلا ہے اس کو وقت کے پہیوں نے اس طرح

 آئینہ دیکھتے ہی اچانک وہ ڈر گیا

اپنی انا کے ریزے ہی لایا سمیٹ کر

پتھر کے دیش میں جو کبھی شیشہ گر گیا

کل تک جو چل رہا تھا لیے ہاتھ میں چراغ

جانے کہاں وہ آج مرا ہمسفر گیا

کل تک زمیں پہ تھا جو خداوند کی طرح

 آج اس کو دیکھئے کہ خلا میں بکھر گیا

غافل کو ڈھونڈھئے بھی تو پائیں گے اب کہاں 

دیوانہ آدمی تھا نہ جانے کدھر گیا

زبیر الحسن غافل