مراتب اختر

 یوم پیدائش 09 مئی 1941

آئے تھے جس طرف سے وہ اک دن ادھر گئے 

برگد کا پیڑ کٹ گیا سادھو گزر گئے 

کیا زندگی ملی انہیں طوفاں کی گود میں 

دو جسم ایک جسم ہوئے اور مر گئے 

کرنے لگے قیاس کہیں قتل ہو گیا 

آندھی کا رنگ سرخ تھا سب لوگ ڈر گئے 

اب مجھ کو بھول بھال گئے سب معاشقے 

ساون کی رت گزر گئی دریا اتر گئے 

اک جسم میں اتر گیا اک سال دن بہ دن 

اک ایک کر کے صحن میں پتے بکھر گئے 

چھپ کر ملے بچھڑ گئے اور پھر نہ مل سکے 

اک پل میں داستان کی تکمیل کر گئے

مراتب اختر

یحییٰ امجد

 یوم پیدائش 09 مئی 1943

پھر لب پہ تیرا ذکر ہے پھر تیرا نام ہے 

پھر جاں لٹانے والوں کا اک ازدحام ہے 

سبط رسول ہونا ہی عزت کی بات ہے 

پر اس سے بڑھ کے تیرے عمل کا مقام ہے 

رسم یزید ظلم ہے ہر بار عارضی 

دین حسین جد و جہد ہے مدام ہے 

ہے حرب عشق فتح کی خواہش سے بے نیاز 

یہ بات الگ کہ ہار کے بھی فتح نام ہے 

کیا غم اگر یزید رہا اقتدار میں 

پرچم تو پھر حسین کا میر عوام ہے 

پرچم بنا ہے پھر کئی شہروں میں تیرا نام 

تو کاروان جد و جہد کا امام ہے

یحییٰ امجد

فرح رضوی

 یوم پیدائش 09 مئی 1973

موسم کا حال آنکھ کی کھڑکی بتائے گی 

دن ڈھل گیا ہے شام کی سرخی بتائے گی 

مرجھا گئے جو شاخ اجل پر کھلے گلاب 

رس اڑ گیا ہے سانس کی تتلی بتائے گی 

آنکھوں پہ اعتبار نہ کر فاصلہ تو دیکھ 

دریا کے پار کیا ہے یہ کشتی بتائے گی 

دیوار پر شبیہ بنائیں گی انگلیاں 

کم روشنی فریب کو پنچھی بتائے گی 

لا حاصلی کی سان پہ ازلوں کے ماجرے 

صدیوں کی داستان بھی چٹکی بتائے گی 

اپنی ہنسی کو حال کا پیمانہ کیجئے 

جتنی خوشی ہے ناپ کے اتنی بتائے گی

فرح رضوی

نشاط پروین

 یوم پیدائش 08 مئی 1973

یہ عشق والے دلوں کو ہی گھر بناتے ہیں

یہ وہ پرندے ہیں جن کو قفس ہی بھاتے ہیں

عجیب ان کی طعبیت عجب ہے خوداری 

یہ دل جھکاتے ہیں سر کو نہیں جھکاتے ہیں

خیالی لوگ خیالی ہیں بستیاں ان کی

اکیلے بیٹھ کے یہ محفلیں سجاتے ہیں

ہوا سے پھول سے خوشبو سے بات کرتے ہیں

یہ ان کی سنتے ہیں اپنی انہیں سناتے ہیں

نہ جانے کس کی کہانی انہیں رلاتی ہے

نہ جانے کس کے فسانے انہیں ہنساتے ہیں

خلا میں پھیرتے رہتے ہیں انگلیاں اپنی

یہ زندگی کے نئے زاویئے بناتے ہیں 

نشاط پروین

دانیال احمد زمان

یوم پیدائش 08 مئی 1996

حرارتوں کے واسطے فشار ِ خون کے لیے

عقیدتوں کے مان سارے ارض ِ سون کے لیے

جو بچ گئے بطور خط بنام یزداں جائیں گے

بس ایک دو ہی شعر چھوڑ کر فنون کے لیے

یقین کب تلک ادھیڑ عمر کے بشر چنے

گمان کی بساط اب الٹ سکون کے لیے

میں چونکتا نہیں ہوں اب کسی بھی اہتمام پر

کوئی بھی رنگ لازمی نہیں ہے فون کے لئے

محل کے چار سو ہیں دشمنوں کی چوکیاں زماں

سپاہی چاہئے ہیں مجھکو اندرون کے لیے

دانیال احمد زمان

عزیز بھارتی

 یوم پیدائش 08 مئی 1939

کسے طلب ہے صدی کی ، صدی کو رہنے دو

وہ ایک لمحہ بہت ہے جو خوشگوار آئے

عزیز بھارتی

محمد رئیس علوی

 یوم پیدائش 07 مئی 1943

جب دل میں غرور آئے تو دانائی بھی کیا ہے 

جب رات اندھیری ہو تو بینائی بھی کیا ہے 

جب ڈوبنا ٹھہرا ہے تو طوفاں کا کسے خوف 

جب اشک سمندر ہوں تو گہرائی بھی کیا ہے 

جب زخم ہوں سینے میں تو پھر درد ہے کیا چیز 

گلشن میں مرے موج ہوا لائی بھی کیا ہے 

پھر غیر کے ہر جھوٹ پہ کرتا ہے یقیں وہ 

پھر شوق کو سکتہ ہے کہ سچائی بھی کیا ہے 

پھر عمر گریزاں نے کہا جاؤ چلے جاؤ 

کیا اس سے کہو گے وہاں سنوائی بھی کیا ہے 

پھر دل نے کہا ہنس کے وہ صحرا ہو قفس ہو 

جب اس سے بچھڑنا ہے تو تنہائی بھی کیا ہے 

پھر ذکر مرا سن کے کہا اس نے رئیسؔ ایک 

بس چاک گریباں ہے وہ سودائی بھی کیا ہے 

محمد رئیس علوی

تنویر الہی

 یوم پیدائش 07 مئی 1980

نہ جانے کیا کہیں افراد سن کر

 بظاہر شاد کو ناشاد سن کر

 

 جو آئے تھے تماشا دیکھنے کو 

 وہی روتے گئے روداد سن کر

 

 اسے کوئی بھلا کیسے منائے

 جو مطلب لیتا ہو متضاد سن کر

  

 مجھے وہ غیر ہیں اپنوں سے بڑھ کر

 جو کرنے آ گئے امداد سن کر

 

 کھٹن اس سے بھی میرے امتحان ہیں

 بڑا حیران ہے فرہاد سن کر

 

 پلٹ کر دیکھنے آیا ستم گر

 لگائے زخموں کی تعداد سن کر

 

 کہی تنویر نے تجھ پر غزل تو 

 عدو بھی کہہ اٹھے ارشاد سن کر

تنویر الہی

مشتاق احمد نوری

 یوم پیدائش 07 مئی 1950

روایتوں کا بہت احترام کرتے ہیں 

کہ ہم بزرگوں کو جھک کر سلام کرتے ہیں 

ہر ایک شخص یہ کہتا ہے اور کچھ کہئے 

ہم اپنی بات کا جب اختتام کرتے ہیں 

کبھی جلاتے نہیں ہم تو برہمی کا چراغ 

وہ دشمنی کی روش روز عام کرتے ہیں 

حریف اپنا اگر سر جھکا کے ملتا ہے 

تو ہم بھی تیغ کو زیب نیام کرتے ہیں 

مجھے خبر بھی نہیں ہے کہ ایک مدت سے 

وہ میرے خانۂ دل میں قیام کرتے ہیں 

حقیقتوں کو جنہیں سن کے وجد آجائے 

کچھ ایسے کام بھی ان کے غلام کرتے ہیں 

شراب کم ہو تو نوریؔ بہ نام تشنہ بھی 

لہو نچوڑ کے لبریز جام کرتے ہیں

مشتاق احمد نوری

نعمت اللہ پیغمبر پوری

 یوم پیدائش 07 مئی 2002

دل کسی سے  لگانے سے کیا فائدہ 

زخم  پر زخم  کھانے سے کیا فائدہ

عشق مجھ سے نہیں تھا تمہیں جب صنم 

پھر یہ وعدہ نبھانے سے کیا فائدہ

گر  خوشی کوئی  پائی ہے تُونے  بتا 

من ہی من مسکرانے سے کیا فائدہ

مشکلیں درمیاں لاکھ آئیں  مگر 

راستہ چھوڑ جانے سے کیا فائدہ

جس سے حاصل ثمر ہو نہ سایہ کوئی 

پیڑ  ایسا  لگانے سے کیا فائدہ

 رب سے "نعمت" جو ہے مانگنا مانگ لے

غیر  کے  در پہ جانے سے کیا فائدہ

نعمت اللہ پیغمبر پوری