شوق انصاری

یوم پیدائش 11 اگست 1958

اب غم افلاس بھی کردار تک آگئے

 لوگ خود کو بیچنے بازار تک آگئے

 

سرفروشان وفا کی سرفروشی نہ پوچھ

گردنیں لے کر صلیب و دار تک آگئے

تب کہیں احساس تجھ کو میرے گھر کا ہوا

جب مرے شعلے تری دیوار تک آگئے

سرخرو ہوئے تو پھر حاسد الجھنے لگے

پھل لگا تو سنگ بھی یلغار تک آگئے

یہ وفا ہے شوق یا حسن ریاکار ہے

جو سر انکار تھے اقرار تک آگئے

شوق انصاری

خورشید ربانی

یوم پیدائش 11 اگست 1973

جب سے اس شہر بے مکان میں ہوں 

میں ترے اسم کی امان میں ہوں 

گنبد شعر میں جو گونجتی ہے 

میں اسی درد کی اذان میں ہوں 

میں نے تنہائیوں کو پا لیا ہے 

اس لیے خواب ہی کے دھیان میں ہوں 

تتلیاں رنگ چنتی رہتی ہیں 

اور میں خوشبوؤں کی کان میں ہوں 

وحشتیں عشق اور مجبوری 

کیا کسی خاص امتحان میں ہوں 

خواہشیں سایہ سایہ بکھری ہیں 

اور میں دھوپ کے مکان میں ہوں 

میں ہوں پیکان درد اے خورشیدؔ 

اور اک یاد کی کمان میں ہوں

خورشید ربانی

پوجا بھاٹیا

یوم پیدائش 11 اگست 1977

کس ہنر کے مظاہرے میں ہو 

تم تو خود سے مقابلے میں ہو 

قتل کرنا تو اس کو ٹھیک نہیں 

عشق کی موت حادثے میں ہو 

چاند آئے گا صلح کرنے کو 

جاگ جاؤ مغالطے میں ہو 

نام میں دوسرا محبت کا 

تم ہو پاگل یا پھر نشے میں ہو 

آتے آتے ہنسی یوں پھسلی ہے 

جیسے اشکوں کے راستے میں ہو 

چاند غائب ہے چاند راتوں سے 

کیا پتہ میرے آئنے میں ہو 

تم چلے تھے خلا کو بھرنے کیوں؟ 

لوٹ آئے کہ راستے میں ہو 

کون منصف بنے سوا دریا 

اک جزیرہ جو کٹگھرے میں ہو

پوجا بھاٹیا

عمر احسان ساحلؔ

یوم پیدائش 10 اگست 1989

وہ سوچوں میں ابال بن کر

میری جاں کا وبال بن کر

میں لکھنا چاہتا ہوں جب کچھ 

  آ جاتا ہے خیال بن کر

میرے ذہن و گماں کو گھیرے 

کیوں ہے وہ ایک جال بن کر 

پہلا سلجھا نہیں میں پاتا

پھر آ جائے سوال بن کر

خود کو اوڑھا ہوا ہے مجھ پے 

اس نے اک غم کی شال بن کر

جو ہوتے ہیں ادا زباں سے

ان لفظوں میں کمال بن کر

میرے اشعار کا وہ ساحلؔ

کیوں بیٹھا ہے جمال بن کر

عمر احسان ساحلؔ

سبینہ سحر

یوم پیدائش 10 اگست 

صنم سے زخمِ تازہ کی شکایت بھی نہیں جاتی

اسی بے رحم ظالم سے محبت بھی نہیں جاتی

محبت کا مری کرتا تو ہے دعویٰ بہت لیکن

ہراک کو دیکھنے کی اس کی عادت بھی نہیں جاتی

نہ ملنے کی اسے میں نے قسم کھائی تو ہے لیکن

اسی کو دیکھتے رہنے کی چاہت بھی نہیں جاتی

مداوہ میرے دکھ کا وہ کرے کیسے کہ اب میری

ہنسی میں غم چھپانے کی مہارت بھی نہیں جاتی

جو لفظوں کی چبھن تھی اس کو لہجے ہی نے روکا تھا

مگر لفظوں کی لہجے سے بغاوت بھی نہیں جاتی

نہیں گرنے دیا اشکوں کو پلکوں سے ان آنکھوں نے

مگر اشکوں کے گر جانے کی فطرت بھی نہیں جاتی

دیے کی لو سے راتیں ہو تو جاتیں ہیں جواں لیکن

سحر سے روشنی لینے کی لذت بھی نہیں جاتی

سبینہ سحر

محمد فاروق اعظم

یوم پیدائش 10 اگست 1982

کہا تیرا سچ آج ہونے لگا ہے

مجھے میرا ہونا ڈبونے لگا ہے

یہ چھپنے چھپانے کا ہے کھیل کب تک

کہ تُو خود کو مجھ میں سمونے لگا ہے

جو مرشد ہے میرا وہ رہبر بھی میرا

یہی فلسفہ صدق ہونے لگا ہے

ہوا منکشف راز مجھ پر کہ دشمن

مجھے میرا نشتر چبھونے لگا ہے

یہ فرقت کی شب ہے ، کر اختر شماری

عجب ہے تو فاروق سونے لگا ہے

محمد فاروق اعظم

ملک محی الدین

یوم پیدائش 10 اگست 1969

نیتیں صاف ہوں، برکت ہی الگ ہوتی ہے

گھر غریبوں کے فراغت ہی الگ ہوتی ہے

ہم جو پگھلیں تو نشیبوں کوکریں گے سیراب

کوہساروں کی طبیعت ہی الگ ہوتی ہے

دل کے صفحوں پہ لکھا جاتاہے افسانہء غم

خشک آنکھوں کی عبارت ہی الگ ہوتی ہے

پیش دستار سے کیا کم ہے جبینوں کے نشاں

ہم فقیروں کی عمارت ہی الگ ہوتی ہے

سرپھری موجوں کو واپس کرے ڈھارِس دے کر

بوڑھے ساحل میں مہارت ہی الگ ہوتی ہے

کھینچ لاتی ہے انھیں بوڑھے درختوں کی کشش

یا پرندوں کی محبت ہی الگ ہوتی ہے

ملک محی الدین

 

شہزاد مرزا

یوم پیدائش 10 آگست 

نکل کے خود سے وہ اپنے ساجن میں آ گئی ہے

کسی سپیرے کی روح، ناگن میں آگئی ہے

ہماری آنکھوں کی اس نمی کو کوئی تو دیکھے

کہ اب تو اسکی کشش بھی ساون میں آ گئی ہے

ہمارے لہجے میں دوستی جو چھپی ہوی تھی

وہ رفتہ رفتہ ہمارے دشمن میں آ گئی ہے

کسی کے آگے کسی کے پیچھے گزر رہی ہے

یہ زندگی جو ہمارے راشن میں آ گئی ہے

کئی طرح کے سمندروں نے پکارا لیکن

سنہری مچھلی ہمارے برتن میں آگئی ہے

ہمیں ہماری طرح کے لوگوں میں بیٹھنا ہے

کہ اب طبیعیت ذرا توازن میں آ گئی ہے

ہمیں سمجھنے میں تھوڑی غفلت ہوئی ہے اس سے

اسی لیئے تو وہ دوست ! الجھن میں آ گئی ہے

ہمیں وہ جھٹلا رہی ہے لیکن ہمیں پتا ہے

وہ آج پھر سے کسی کے باشن میں آگئی ہے

ہمارے سینے سے لگ گئی تو یقین آیا

کہ شاہزادی اب اپنے مسکن میں آ گئی ہے

شہزاد مرزا

زاہد مہر

یوم پیدائش 10 گست 1980

میرے اللہ تیرے بے بس بندوں کا

تو جانتا ہے تیرے سوا کوئی نہیں

گرمی میں تڑپنے والوں کا

سردی سے ٹھٹھرنے والوں کا 

آگ میں جلنے والوں کا

تو جانتا ہے تیرے سوا کوئی نہیں

سیلاب میں بہنے والوں کا

ملبے میں دبنے والوں کا

بے گور و کفن مرنے والوں کا 

تو جانتا ہے تیرے سوا کوئی نہیں

بھوک سے مرنے والوں کا 

آہ و زاری کرنے والوں کا 

بے جرم سزا پانے والوں کا 

تو جانتا ہے تیرے سوا کوئی نہیں

زاہد مہر

 

منیرؔ شکوہ آبادی

یوم وفات 10 اگست 1880

ہاتھ ملواتی ہیں حوروں کو تمہاری چوڑیاں 

پیاری پیاری ہے کلائی پیاری پیاری چوڑیاں 

بند کر دیتی ہیں سب کو پیاری پیاری چوڑیاں 

بولتی ہیں لاکھ میں بڑھ کر تمہاری چوڑیاں 

اے بتو سرکش اگر ہو آتش رنگ حنا 

شعلۂ جوالہ بن جائیں تمہاری چوڑیاں 

برہمی حلقہ بگوشوں کی انہیں منظور ہے 

پھوٹ ڈلواتی ہیں لاکھوں میں تمہاری چوڑیاں 

حوروں کی آنکھوں کے حلقے اے پری موجود ہیں 

ان بتانوں سے چڑھاؤ پیاری پیاری چوڑیاں 

دل میں چھید کر خون کی بوندوں سے ہر ریزہ بھرے 

ٹوٹ کر بن جائیں بوندے کی کٹاری چوڑیاں 

سرو قامت ہیں ہزاروں دام الفت میں اسیر 

طوق قمری ہیں تمہاری پیاری پیاری چوڑیاں 

صدقے ہوتی ہیں برابر ان کلائی پہنچوں پر 

گرد پھرتی ہیں خوشی سے باری باری چوڑیاں 

دست نازک نے زمانے کو کیا حلقہ بگوش 

کیا کھلے بندوں نظر آئیں تمہاری چوڑیاں 

اے فلک ان کو نہیں بھاتا ستاروں کا بھی جوڑ 

کہتے ہیں میری بلا پہنے کنواری چوڑیاں 

روئے روشن پر جو تم نے ہاتھ رکھا ناز سے 

چاند کا ہالہ نظر آئیں تمہاری چوڑیاں 

حوریں بھیجیں گی تجھے اے رشک گل فردوس سے 

لائے گی مشاطہ فصل بہاری چوڑیاں 

کیوں نہ نکلے نوک خوں ریزی کے ہر انداز میں 

لوٹ کر بھی دل میں چبھتی ہیں تمہاری چوڑیاں 

بل نکالا سیکڑوں بانکوں کا دست ناز سے 

بانک کے فن میں ہوئیں یکتا تمہاری چوڑیاں 

خون کی بوندیں بنی ہیں چننیاں یاقوت کی 

دل میں چبھ کر دے رہی ہیں زخم کاری چوڑیاں 

کیوں نہ ہوں حلقہ بگوش آ کر حسینان بہشت 

حوروں کے کانوں کی بالی ہیں تمہاری چوڑیاں 

میں نے ہاتھا پائی جب کی سرد مہرے سے کہا 

گرم جوشی سے ہوئیں ٹھنڈی ہماری چوڑیاں 

دیکھ لو اے گل رخو مرغان دل پابند ہیں 

بال کے پھندے کی صورت ہیں تمہاری چوڑیاں 

کرتے ہیں اپنے زبانوں میں ترے ہاتھوں کا وصف 

بولتی ہیں ایک منہ ہو کر ستاری چوڑیاں 

ہر ستارے کی چمک نور جہان حسن ہے 

رکھتی ہیں حکم جہانگیری تمہاری چوڑیاں 

جان پڑ جاتی ہے دست ناز سے ہر چیز میں 

رنگ بن کر چڑھتی ہیں ہاتھوں میں ساری چوڑیاں 

گو گہر ہو اے پری ناز نگاہ حور کا 

عینک رضواں کی حلقہ ہیں تمہاری چوڑیاں 

کر کے ہاتھا پائی ڈولی میں کیا ان کو سوار 

صاف ٹھنڈی ہو گئیں وقت سواری چوڑیاں 

بوندوں کے حلقے نہیں پڑتے ہیں اے گل نہر میں 

ڈالتا ہے ہندو ابر بہاری چوڑیاں 

خون لاکھوں کا کیا کرتے ہیں ہر جھنکار سے 

خوب سچا جوڑ چلتی ہیں تمہاری چوڑیاں 

غیر ڈیوڑھی پر کیا کرتے ہیں آرائش کا ذکر 

حلقۂ بیرون در ٹھہری تمہاری چوڑیاں 

ناز سے فرماتے ہیں لوں کس طرح تیرا سلام 

ہاتھ اٹھ سکتے نہیں ایسی ہیں بھاری چوڑیاں 

اتری پڑتی ہیں پھسل کر دست نازک سے مدام 

کس طرح ٹھہریں کلائی میں تمہاری چوڑیاں 

مار ڈالا آتش غم نے جلا کر اے منیرؔ 

ٹھنڈی کر دیں سوگ میں اس گل نے ساری چوڑیاں

منیرؔ شکوہ آبادی