نظیر اکبرآبادی

یوم وفات 16 اگست 1830

دور سے آئے تھے ساقی سن کے مے خانے کو ہم 

بس ترستے ہی چلے افسوس پیمانے کو ہم 

مے بھی ہے مینا بھی ہے ساغر بھی ہے ساقی نہیں 

دل میں آتا ہے لگا دیں آگ مے خانے کو ہم 

کیوں نہیں لیتا ہماری تو خبر اے بے خبر 

کیا ترے عاشق ہوئے تھے درد و غم کھانے کو ہم 

ہم کو پھنسنا تھا قفس میں کیا گلہ صیاد کا 

بس ترستے ہی رہے ہیں آب اور دانے کو ہم 

طاق ابرو میں صنم کے کیا خدائی رہ گئی 

اب تو پوجیں گے اسی کافر کے بت خانے کو ہم 

باغ میں لگتا نہیں صحرا سے گھبراتا ہے دل 

اب کہاں لے جا کے بیٹھیں ایسے دیوانے کو ہم 

کیا ہوئی تقصیر ہم سے تو بتا دے اے نظیرؔ 

تاکہ شادی مرگ سمجھیں ایسے مر جانے کو ہم 

نظیر اکبرآبادی

 

ساغر صدیقی

اے حسن لالہ فام! ذرا آنکھ تو ملا

خالی پڑے ہیں جام! ذرا آنکھ تو ملا

کہتے ہیں آنکھ آنکھ سے ملنا ہے بندگی

دنیا کے چھوڑ کام! ذرا آنکھ تو ملا

کیا وہ نہ آج آئیں گے تاروں کے ساتھ ساتھ

تنہائیوں کی شام! ذرا آنکھ تو ملا

یہ جام یہ سبو یہ تصور کی چاندنی

ساقی کہاں مدام! ذرا آنکھ تو ملا

ساقی مجھے بھی چاہئے اک جام آرزو

کتنے لگیں گے دام! ذرا آنکھ تو ملا

پامال ہو نہ جائے ستاروں کی آبرو

اے میرے خوش خرام! ذرا آنکھ تو ملا

ہیں راہ کہکشاں میں ازل سے کھڑے ہوئے

ساغرؔ ترے غلام! ذرا آنکھ تو ملا

ساغر صدیقی

تنویر سحری

یوم پیدائش 15 اگست 1967

علم و وفا شعور کو دل میں بسا کے چل

 آئنہ زندگی کو بھی اپنی بنا کے چل

پانا ہے دو جہان میں عزت اگر تجھے

خاکِ در علوم کو سر پر سجا کے چل

جس کے گلوں سے روح میں آ جائے تازگی

 ایسا شجر تو اپنے چمن میں لگا کے چل

تابندہ ہوگا تیرا تخیل تبھی اگر

وحدت کا اک چراغ جو دل میں جلا کے چل

الفت تجھے جو فاتح خیبر سے ہے اگر

رستہ محبتوں کا سبھی کو بتا کے چل

 

تنویر سحری

روبینہ میر

یوم پیدائش 15 اگست 1969

بے رخی ہی بے رخی ہے ہر طرف 

بکھری بکھری زندگی ہے ہر طرف 

دشمنی ہی دشمنی ہے ہر طرف 

آگ نفرت کی لگی ہے ہر طرف 

کس نے یہ جینا اجیرن کر دیا 

خوف دہشت سنسنی ہے ہر طرف 

کوئی شے بھی اب نہیں ہے مشرقی 

رنگ سب کا مغربی ہے ہر طرف 

بات جو دل میں ہے کہہ سکتے نہیں 

کیسی اپنی بے بسی ہے ہر طرف 

آدمی میں آدمیت تک نہیں 

بات اچھی کون سی ہے ہر طرف 

جس میں روبینہؔ نہیں ہے فکر و فن

کیا کہیں کیا شاعری ہے ہر طرف

روبینہ میر

زاہد سعید شیخ

یوم پیدائش 15 اگست 1951

مکیں کو دیکھا گیا مکاں سے

یقیں کا رستہ ملا گماں سے 

یہ اپنے اندر کہانیاں ہیں 

نظر جو آتے ہیں یہ مکاں سے

تمہیں دکھاؤں تمہارا چہرہ 

لکیر کھینچوں گا درمیاں سے 

جڑی ہوئی ہے ہر اک کہانی 

کہیں تبسم، کہیں فغاں سے 

یہ کیا کہ پھر امتحاں ہے سر پر 

ابھی تو گزرا ہوں امتحاں سے

یہی تو ہیں، زندگی کا حاصل 

یہ چند لمحے، جو رائگاں سے

زاہد سعید شیخ

عبدالسمیع

یوم پیدائش 15 اگست 1963

دامنِ صبر مرے ہاتھوں میں رہتا ہے جب

پھول بن جاتے ہیں حالات کے پتھر اس وقت

عبدالسمیع

سلیمان مجاز کوروائی

یوم پیدائش 15 اگست 1952

دھوپ چٹکی ہے کہیں برف جما رکھی ہے

اُس نے دنیا بڑی حکمت سے سجا رکھی ہے 

گھر کی ہر چیز سلیقے سے سجا رکھی ہے

اپنی تہذیب مگر دل سے بھلا رکھی ہے

وہ مرا ہے وہ مرا تھا وہ رہیگا میرا

میں نے دنیا سے یہی شرط لگا رکھی ہے

آگ لگ جائے نہ خوشبو کے دریچوں میں کہیں

اُس نے خوش رنگ ہتھیلی پہ حنا رکھی ہے

پی لئے ریت پہ بہتے ہوئے دریا کس نے

کس نے سوکھے ہوئے ہونٹوں پہ دعا رکھی ہے

لوگ کیسے ہیں کہ جینے کو مرے جاتے ہیں

زندگی اصل مگر بعدِ فنا رکھی ہے 

کون کاٹے گا اسےاور پکے گی کب تک

فصل جو ہم نے گناہوں کی لگا رکھی ہے

اب مجھے اپنی غزل راس نہ آئیگی مجاز

سامنے میرے ابھی بانگِ درا رکھی ہے 

سلیمان مجاز کوروائی

فیض لدھیانوی

یوم پیدائش 15 اگست 1911

نظم آدمی 

جس قدر دنیا میں مخلوقات ہے 

سب سے اشرف آدمی کی ذات ہے 

اس کی پیدائش میں ہے الفت کا راز 

اس کی ہستی پر ہے خود خالق کو ناز 

اس کی خاطر کل جہاں پیدا ہوا 

یہ زمیں یہ آسماں پیدا ہوا 

عقل کا جوہر اسے بخشا گیا 

علم کا زیور اسے بخشا گیا 

اس کے سر میں ہے نہاں ایسا دماغ 

جس میں روشن ہے لیاقت کا چراغ 

سوچ کر ہر کام کر سکتا ہے یہ 

شیر کو بھی رام کر سکتا ہے یہ 

یہ صفائی سے چٹانیں توڑ دے 

اپنی دانائی سے دریا موڑ دے 

من چلا ہے اس کی ہمت ہے بلند 

ڈال سکتا ہے ستاروں پر کمند 

اس کو خطروں کی نہیں پروا ذرا 

آگ میں کودا یہ سولی پر چڑھا 

اس کے ہر انداز میں اعجاز ہے 

عرش تک اس نور کی پرواز ہے 

اس کی باتوں میں عجب تاثیر ہے 

خاک کا پتلا نہیں اکسیر ہے 

یہ اگر نیکی کے زینے پر چڑھے 

ایک دن سارے فرشتوں سے بڑھے 

اور اگر عصیاں کی دلدل میں پھنسے 

اس کا درجہ کم ہو حیوانات سے 

یہ کبھی روئی سے بڑھ کر نرم ہے 

یہ کبھی سورج سے بڑھ کر گرم ہے 

ایک حالت پر نہیں اس کا مزاج 

ہر زمانے میں بدلتا ہے رواج 

اور تھا پہلے یہ اب کچھ اور ہے 

آئے دن اس کا نرالا طور ہے 

اس نے بے حد روپ بدلے آج تک 

اس کی تدبیروں سے حیراں ہے فلک 

ڈاکٹر تاجر پروفیسر وکیل 

ان کا ہونا ہے ترقی کی دلیل 

اس کے پہلو میں وہ دل موجود ہے 

جو بھڑکنے میں نرا بارود ہے 

ریل گاڑی ریڈیو موٹر جہاز 

اس کی ایجادوں کا قصہ ہے دراز 

دست کاری میں بڑا مشاق ہے 

جدتوں کا ہر گھڑی مشتاق ہے 

کھول آنکھیں جنگ کی رفتار دیکھ 

دیکھ اس کے خوفناک اوزار دیکھ 

یہ کہیں حاکم کہیں محکوم ہے 

یہ کہیں ظالم کہیں مظلوم ہے 

آدمی جب غیر کے آگے جھکا 

آدمیت سے بھٹکتا ہی گیا 

آدمی ملنا بہت دشوار ہے 

خود خدا کو آدمی درکار ہے 

پیارے بچو آدمی بن کر رہو 

ہر کسی کے ساتھ ہمدردی کرو 

سچ اگر پوچھو تو بس وہ مرد ہے 

جس کے دل میں دوسروں کا درد ہے 

فیضؔ پہنچاتا نہیں جو آدمی 

اس کو اپنی ذات سے ہے دشمنی 

اس کو اپنی ذات سے ہے دشمنی

فیض لدھیانوی

 

علی اکبر ناطق

یوم پیدائش 15 اگست 1976

زرد پھولوں میں بسا خواب میں رہنے والا 

دھند میں الجھا رہا نیند میں چلنے والا

دھوپ کے شہر مری جاں سے لپٹ کر روئے 

سرد شاموں کی طرف میں تھا نکلنے والا 

کر گیا آپ کی دیوار کے سائے پہ یقیں 

میں درختوں کے ہرے دیس کا رہنے والا 

اس کے تالاب کی بطخیں بھی کنول بھی روئے 

ریت کے ملک میں ہجرت تھا جو کرنے والا

علی اکبر ناطق

گلنار آفرین

یوم پیدائش 15 اگست 1942

شام الم بھی گزری پہلو بدل بدل کر 

روتا رہا ہے یہ دل پہروں مچل مچل کر 

منزل کی جستجو میں پہنچے کہاں کہاں ہم 

دیکھا کیے تماشہ رستے بدل بدل کر 

شہر وفا میں ہم نے سب کچھ لٹا دیا ہے 

یہ بات ان سے کہنا لوگو سنبھل سنبھل کر 

کیا ضد کریں گے تجھ سے اے گردش زمانہ 

ہنسنا بھی آ گیا ہے غم سے بہل بہل کر 

گلنارؔ ضبط غم کی یہ انتہا بھی دیکھی 

دامن بھگو رہے ہیں آنسو نکل نکل کر 

گلنار آفرین