زہرہ مغل

یوم پیدائش 12 دسمبر 

مت سمجھنا زمانے سے ڈر جائیں گے 

ہم تو غازی ہیں لڑ لڑ کے مر جائیں گے

رُوئے تاباں کا دلکش لِبادہ لیئے 

نور پھیلائیں گے ہم جدھر جائیں گے

کٹ گئیں ساعتیں جُستجو میں جہاں 

حسرتوں کے بھی واں دن گزر جائیں گے

سنگ سا ہم بنا لیں گے خُود کو ابھی

سارے الزام شیشوں کے سَر جائیں گے

ہیں امیرِ سُخن تھے جو کل تیغزَن

زخمِ دل زہرہ تیرے بھی بھر جائیں گے 

زہرہ مغل

 

ثناء اعوان

یوم پیدائش 12 دسمبر 1995

نہیں چلتا مرے نقشِ قدم پر وہ

مرے جیسا سبھی کو جو بتاتا ہے

نہیں ہے روشنی اس چاند کی اپنی

یہ سورج سے اُدھاری مانگ لاتا ہے

گلہ کوئی شکایت بھی نہیں تجھ سے

تُو ملتے وقت کیوں نظریں جُھکاتا ہے

زمیں دیکھوں یا دیکھوں آسماں کو میں

نظر ان میں ترا ہی عکس آتا ہے

یقیں کر تُو تجھے جو جو بتاتا ہوں

وہ سب باتیں خدا مجھ کو بتاتا ہے

کسی صورت مداوا تو نہیں ممکن

ثناء پھر کس لیے آنسو بہاتا ہے

ثناء اعوان

 

سلمی سحر

یوم پیدائش 12 دسمبر 1976

آنکھوں سے میری نیند اڑا کر چلا گیا

اک شخص مجھ کو خواب دکھا کر چلا گیا

میں تو ہمیشہ خود کو سمجھتی تھی اک چٹان

اک جھونکا آیا اور ہلا کر چلا گیا

اس نے کہا کہ کہنی پڑے گی مجھے غزل

کاغذ ، قلم ، دوات تھما کر چلا گیا

وہ آیا تھوڑی دور چلا اور اس کے بعد

رستے میں اک چراغ جلا کر چلا گیا

تم جس کے انتظار میں بیٹھی ہو اے سحرؔ

تم کو پتا بھی ہے کہ وہ آ کر چلا گیا

سلمی سحر

 

شاہد ذکی

یوم پیدائش 13 دسمبر 1974

یار بھی راہ کی دیوار سمجھتے ہیں مجھے 

میں سمجھتا تھا مرے یار سمجھتے ہیں مجھے 

جڑ اکھڑنے سے جھکاؤ ہے مری شاخوں میں 

دور سے لوگ ثمر بار سمجھتے ہیں مجھے 

کیا خبر کل یہی تابوت مرا بن جائے 

آپ جس تخت کا حق دار سمجھتے ہیں مجھے 

نیک لوگوں میں مجھے نیک گنا جاتا ہے 

اور گنہ گار گنہ گار سمجھتے ہیں مجھے 

میں تو خود بکنے کو بازار میں آیا ہوا ہوں 

اور دکاں دار خریدار سمجھتے ہیں مجھے 

میں بدلتے ہوئے حالات میں ڈھل جاتا ہوں 

دیکھنے والے اداکار سمجھتے ہیں مجھے 

وہ جو اس پار ہیں اس پار مجھے جانتے ہیں 

یہ جو اس پار ہیں اس پار سمجھتے ہیں مجھے 

میں تو یوں چپ ہوں کہ اندر سے بہت خالی ہوں 

اور یہ لوگ پر اسرار سمجھتے ہیں مجھے 

روشنی بانٹتا ہوں سرحدوں کے پار بھی میں 

ہم وطن اس لیے غدار سمجھتے ہیں مجھے 

جرم یہ ہے کہ ان اندھوں میں ہوں آنکھوں والا 

اور سزا یہ ہے کہ سردار سمجھتے ہیں مجھے 

لاش کی طرح سر آب ہوں میں اور شاہدؔ 

ڈوبنے والے مددگار سمجھتے ہیں مجھے

شاہد ذکی

 

اسلم آزاد

یوم پیدائش 12 دسمبر 1948

کشت دل ویراں سہی تخم ہوس بویا نہیں 

خواہشوں کا بوجھ میں نے آج تک ڈھویا نہیں 

اس کی آنکھوں میں بچھا ہے سرخ تحریروں کا جال 

ایسا لگتا ہے کہ اک مدت سے وہ سویا نہیں 

خواب کی انجان کھڑکی میں نظر آیا تھا جو 

ذہن نے اس چہرۂ مانوس کو کھویا نہیں 

ایک مدت پر ملے بھی تو نہ ملنے کی طرح 

اس طرح خاموش ہو منہ میں زباں گویا نہیں 

میں نے اپنی خواہشوں کا قتل خود ہی کر دیا 

ہاتھ خون آلود ہیں ان کو ابھی دھویا نہیں 

دیکھ کر ہونٹوں پہ میرے مسکراہٹ کی لکیر 

وہ سمجھتے ہیں کہ اسلمؔ میں کبھی رویا نہیں

اسلم آزاد

 

مفتی صدر الدین آرزادہ

یوم پیدائش 12 دسمبر 1789

نالوں سے میرے کب تہ و بالا جہاں نہیں 

کب آسماں زمین و زمیں آسماں نہیں

 

آنکھوں سے دیکھ کر تجھے سب ماننا پڑا 

کہتے تھے جو ہمیشہ چنیں ہے چناں نہیں 

اس بزم میں نہیں کوئی آگاہ درد کب 

واں خندہ زیر لب ادھر اشک نہاں نہیں 

افسردہ دل نہ ہو در رحمت نہیں ہے بند 

کس دن کھلا ہوا در پیر مغاں نہیں

 

لب بند ہوں تو روزن سینہ کو کیا کروں 

تھمتا تو مجھ سے نالۂ آتش عناں نہیں 

ملنا ترا یہ غیر سے ہو بہر مصلحت 

ہم کو تو سادگی سے تری یہ گماں نہیں

 

اے دل تمام نفع ہے سودائے عشق میں 

اک جان کا زیاں ہے سو ایسا زیاں نہیں

 

بے وقت آئے دیر میں کیا شورشیں کریں 

ہم پیر و پیر میکدہ بھی نوجواں نہیں 

کٹتی کسی طرح سے نہیں یہ شب فراق 

شاید کہ گردش آج تجھے آسماں نہیں 

آزردہؔ ہونٹ تک نہ ہلے اس کے روبرو 

مانا کہ آپ سا کوئی جادو بیاں نہیں 

مفتی صدر الدین آرزادہ

عتیق انظر

یوم پیدائش 11 دسمبر 1963

اندر اندر سلگ رہا ہوں میں 

وہ سمجھتا ہے بجھ گیا ہوں میں 

آندھیوں میں پلا بڑھا ہوں میں

اب ہواؤں سے ڈر رہا ہوں میں 

بعد میرے شب قیامت ہے 

طاق میں آخری دیا ہوں میں 

اپنے مرنے کا غم نہیں مجھ کو 

سانپ کو مار کر مرا ہوں میں 

کیوں مجھے دیکھتے ہو نفرت سے 

عشق کے واسطے بنا ہوں میں 

جس سے کل ٹوٹ کر گرے تھے تم

اب اسی شاخ پر کھلا ہوں میں 

اک امر بیل مجھ سے لپٹی ہے 

اور اب تک ہرا بھرا ہوں میں 

ہوگئی شام وہ نہیں لوٹی

راہ چڑیا کی دیکھتا ہوں میں

 

 عتیق انظر

 

بلراج بخشی

یوم پیدائش 10 دسمبر 1949

کہیں بھی زندگی اپنی گزار سکتا تھا 

وہ چاہتا تو میں دانستہ ہار سکتا تھا 

زمین پاؤں سے میرے لپٹ گئی ورنہ 

میں آسمان سے تارے اتار سکتا تھا 

جلا رہی ہیں جسے تیز دھوپ کی نظریں 

وہ ابر باغ کی قسمت سنوار سکتا تھا 

عجیب معجزہ کاری تھی اس کی باتوں میں 

کہ وہ یقیں کے جزیرے ابھار سکتا تھا

مرے مکان میں دیوار ہے نہ دروازہ 

مجھے تو کوئی بھی گھر سے پکار سکتا تھا 

پر اطمینان تھیں اس کی رفاقتیں بلراجؔ 

وہ آئینے میں مجھے بھی اتار سکتا تھا

بلراج بخشی

مجیب الرحمن میکش

یوم پیدائش 10 دسمبر 1950

آپ سے جب بھی دور ہوئے ہیں

ہم بے حد رنجور ہوئے ہیں

ویسے تو چہرے پہ ہنسی ہے

زخم مگر ناسور ہوئے ہیں

عہدِ وفا ، ایثار کے قصے

ہم سے ہی مشہور ہوئے ہیں

میکشؔ ان کی آنکھیں توبہ

کتنے شیشے چور ہوئے ہیں

مجیب الرحمن میکش

فیاض ندیم اکملی

یوم پیدائش 10 دسمبر 1956

زندگی میری اس جہان میں کیا

یوں ہی گزرے گی امتحان میں کیا

کیوں نہیں بولتے ستم پر لوگ

قوتِ حِس نہیں زبان میں کیا

لب پہ ہر وقت قتل کی باتیں

کوئی رنجش ہے خاندان میں کیا

مجھ کو پڑھتا ہے مسکراتا ہے

میں قصیدہ ہوں اُس کی شان میں کیا 

فیاض ندیم اکملی