کلیم ضیاء

یوم پیدائش 04 مارچ 1956

قدم بڑھاتے ہی منزل دِکھانے لگتے ہیں

یہ راستے تو بڑے ہی سیانے لگتے ہیں

کسی غریب کے گھر میں اُگے اگر سورج

اندھیرے پورے محلّے پہ چھانے لگتے ہیں

ہَوا بھی رُخ کبھی اپنا جِدھر نہیں کرتی 

اُسی گلی کے مناظِر سُہانے لگتے ہیں

خزاں میں پیڑ پہ پتّے ذرا نہیں ٹِکتے

بہار آتے ہی رشتے نِبھانے لگتے ہیں

حِنا کا بوجھ اُٹھانے کی جِن میں تاب نہیں

وہ آسمان کو سَر پر اُٹھانے لگتے ہیں

کسی نظر سے اُترنے کو ایک پَل ہے بہت

نظر میں چَڑھنے کو لیکن زمانے لگتے ہیں

کلیم ضیاء

 

سرور ارمان

یوم پیدائش 04 مارچ 1953

روشنی سے تیرگی تعبیر کر دی جائے گی 

رنگ سے محروم ہر تصویر کر دی جائے گی

 

عدل کے معیار میں آ جائیں گی تبدیلیاں 

بے گناہی لائق تعزیر کر دی جائے گی 

ہر نظر کو آرزوؤں کا سمندر بخش کر 

ہر زباں پر تشنگی تحریر کر دی جائے گی 

دب کے رہ جائیں گے جذبوں کے اجالے ایک دن 

ظلمت افلاس عالمگیر کر دی جائے گی 

ہر کلائی ہر تمنا ہر حقیقت ہر وفا 

آشنائے حلقۂ زنجیر کر دی جائے گی 

بانجھ ہو کر رہ گیا جس وقت دھرتی کا بدن 

تب ہمارے نام یہ جاگیر کر دی جائے گی 

دفن کر کے اس کی بنیادوں میں انسانوں کے سر 

اک مہذب شہر کی تعمیر کر دی جائے گی

سرور ارمان

 

رشیدہ عیان

یوم پیدائش 04 مارچ 1932

مرے قلم کا اگر سر کبھی قلم ہوگا 

نیا فسانۂ درد و الم رقم ہوگا 

یہ مانتی ہوں مٹا دے گا میرا دور مجھے 

نئے زمانے کا اس خاک سے جنم ہوگا 

میں اپنے آپ کی پہچان بھول بیٹھی ہوں 

اب اس سے اور بڑا کیا کوئی ستم ہوگا 

نہ جانے کیوں مجھے سچ بولنے کی عادت ہے 

یہ جان کر کہ ہر اک گام سر قلم ہوگا 

چلو اٹھاتے ہیں ایوان وقت کا ملبہ 

اسی میں دفن مری ذات کا صنم ہوگا 

فلک نے موند لیں آنکھیں زمیں نے روکی سانس 

عیاںؔ کا آج نئی راہ پر قدم ہوگا

رشیدہ عیان

عقیل الرحمن وقار

یوم پیدائش 03 مارچ 1960

ہم بنے تھے تباہ ہونے کو

آپ کا عشق تو بہانا تھا!

عقیل الرحمن وقار

 

وفا سکندر پوری

یوم پیدائش 03 مارچ 1945

نظر سے کہہ دو نہ سونپے زباں کو اپنی بات

نگاہ ِ عام میں ہوگی نہیں یہ اچھی بات

 وہ ایک بات جو ہم دونوں کر گئے محسوس 

زمانہ اس کو سمجھتا ہے بے تکی سی بات

فسانہ وقت کا سنتا ہے آدمی لیکن

سنے نہ وقت کبھی رُک کے ، آدمی کی بات

گو اچھی بات ہے آہستہ بولیے پھر بھی

کہیں پڑوس میں پھیلے نہ الٹی سیدھی بات

خلوص ، جذبہ ء ایشار ، اتحاد ، وفاؔ

 مرے شعور میں آئی ہے کس صدی کی بات

 

وفا سکندر پوری

ابوالمجاب راؤ لیاقت علی آزاد

یوم پیدائش 03 مارچ 1953

محنت بغیر کچھ بھی کسی کو ملا نہیں 

ہمت ہے گر بلند تو کچھ بھی چُھپا نہیں

ٰعلم و ہنر کو اپنی پسِ پُشت ڈال کر

روتے ہیں پھر نصیب کو اس میں لکھا نہیں

دنیا میں گرنا گر کے سنبھلنا تو عام ہے 

پر جس طرح سے ہم گرے کوئی گرا نہیں 

جو چین ڈھونڈتے ہیں شراب و شباب میں 

انکو کبھی سکون کا رستہ ملا نہیں 

وہ جو کہ امتی ہیں سراجٙٙ منیر کے

افسوس ان کے ہاتھ میں کوئی دِیا نہیں 

 ابوالمجاب راؤ لیاقت علی

آزاد

افتخار حیدر

یوم پیدائش 03 مارچ 1973

مستیاں بھی ہیں حادثات بھی ہیں 

اور محبت میں معجزات بھی ہیں 

دل سے دل کا معاملہ ہی نہیں 

کچھ ہوس کے معاملات بھی ہیں 

گھومتے بھی ہیں کائنات کے گرد 

وجہِ تخلیقِ کائنات بھی ہیں 

ہجر موسم میں تیرگی ہی نہیں 

تھوڑی تھوڑی تجّلیات بھی ہیں 

خونِ دل سےسنوارتے ہیں سخن 

اور منّت کشِ دوات بھی ہیں 

شاعری مسئلہ تو ہے لیکن 

کچھ محبت کے واجبات بھی ہیں

افتخار حیدر

طرفہ قریشی

یوم پیدائش 03 مارچ 1913

نگاہیں نیچی رکھتے ہیں بلندی کے نشاں والے 

اٹھا کر سر نہیں چلتے زمیں پر آسماں والے

تقید حبس کا آزادیاں دل کی نہیں کھوتا 

قفس کو بھی بنا لیتے ہیں گلشن آشیاں والے

نہیں ہے رہبریٔ منزل عرفان دل آساں 

بھٹک جاتے ہیں اکثر راستے سے کارواں والے

زمیں کی انکساری بھی بڑا اعجاز رکھتی ہے 

جبیں سا ہو گئے خشکی پہ بحر بیکراں والے

کسی دن گرم بازار عقیدت ہو تو جانے دو 

لگائیں گے مرے سجدوں کی قیمت آسماں والے

اجل کہتے ہیں جس کو نام ہے کمزور ہی دل کا 

اسے خاطر میں کیوں لائیں حیات جاوداں والے

ہمیں طرفہؔ کی لے سے کیوں نہ ہو عرفان دل حاصل 

سبک نغمے سناتے ہی نہیں ساز گراں والے

طرفہ قریشی

احمد حسین مجاہد

یوم پیدائش 02 مارچ 1961

ہوں کہ جب تک ہے کسی نے معتبر رکھا ہوا

ورنہ وہ ہے باندھ کر رخت ِ سفر رکھا ہوا

مجھ کو میرے سب شہیدوں کے تقدس کی قسم

ایک طعنہ ہے مجھے شانوں پہ سر رکھا ہوا

اک نئی منزل کی دھن میں دفعتاً سرکا لیا

اس نے اپنا پاؤں میرے پاؤں پر رکھا ہوا

میرے بوجھل پاؤں گھنگھرو باندھ کر ہلکے ہوئے

سوچنے سے کیا نکلتا دل میں ڈر رکھا ہوا

تو ہی دنیا کو سمجھ پروردہ ء دنیا ہے تو

میں یونہی اچھا ہوں سب سے بے خبر رکھا ہوا

احمد حسین مجاہد

شائستہ مہہ جبین

یوم پیدائش 02 مارچ

تم نے ہی تو گرائی تھیں مجھ پر یہ بجلیاں 

دینے کو آ رہی ہو مجھے کیوں تسلیاں 

سونے سی تھی کھری میں چمک برقرار تھی 

پھر کیوں ہزار بار لیں میری تلاشیاں 

نکلے جو آشیاں کو گرانے کبھی مرے 

گرنے لگی ہے آج انہیں پر یہ بجلیاں 

سلجھایا جتنا اتنی ہی الجھی یہ زندگی 

اس زندگی کی حل نہیں ہوتی پہیلیاں 

شائستگی محبتیں الفت وفا حیا 

رکھی ہے میرے پاس تری سب نشانیاں 

کرتا نہیں ہے کوئی محبت یہاں ہمیں 

آتی ہے روز روز ہمیں کیوں یہ ہچکیاں 

شائستہؔ یاد تجھ کو کرے کب تلک بتا 

اب چاہیے مجھے تری یادوں سے چھٹیاں

شائستہ مہہ جبین