اشہر اشرف

یوم پیدائش 15 اپریل 1982

جب کبھی چہرے سے وہ پردہ اٹھا دیتے ہیں

پھول بھی اپنی نگاہوں کو جھکا دیتے ہیں

ہم اگر سوئے ہیں تو خیر منا اپنی تُو

ہوش میں آتے ہیں تو حشر اٹھا دیتے ہیں

تم نے لوگوں سے سنا کاش کہ ہم سے سنتے !

لوگ توبات کا افسانہ بنا دیتے ہیں

بیقراری میں نہ جانے ہمیں کیا ہوتا ہے

رات بھر لکھتے ہیں خط صبح جلا دیتے ہیں

جانے والے تو بتا کر نہیں جاتے ہیں مگر

جاتے جاتے کچھ اشاروں میں بتا دیتے ہیں

جب بھی تنہائی کے موسم میں تڑپتے ہیں ہم 

تیری تصویر کو سینے سے لگا دیتے ہیں

رنج و غم ہو کہ خوشی کا کوئی موسم اشؔہر 

سارے موسم بخدا اپنا مزا دیتے ہیں

اشہر اشرف

 

پریم ناتھ بسمل

یوم پیدائش 15 اپریل 1985

ڈھونڈنے در بہ در گیا کوئی

دل کو لے کر کدھر گیا کوئی 

ہر گھڑی رہتا ہے خیال اس کا 

جیسے جادو سا کر گیا کوئی

آپ نفرت سے دیکھتے ہی رہیں!

پڑھ کے اردو سنور گیا کوئی

آج پھر سے اداس ہوں دلبر

دے کے ایسی خبر گیا کوئی 

اس نے دل سے مٹا دیا سب کچھ

جس کی الفت میں مر گیا کوئی

بھول جا تو مجھے ! کہا اس نے

آج دنیا سے ڈر گیا کوئی

پُرتبسّم ہو تیرا گھر، آنگن!

اشک آنکھوں میں بھر گیا کوئی

میں وفا کر کے بھی رہا تنہا 

کر کے وعدے مُکر گیا کوئی

میں بُرا اتنا تو نہیں بسملؔ

مجھ پہ الزام دھر گیا کوئی

پریم ناتھ بسمل

انعام عازمی

یوم پیدائش 15 اپریل 1997

جدا ہو کر سمندر سے کنارا کیا بنے گا 

نہیں سوچا ہے اب تک وہ ہمارا کیا بنے گا 

مجھے یہ ایک عرصے سے زمیں سمجھا رہی ہے 

فلک سے ٹوٹ کر میرا ستارا کیا بنے گا 

میں ایسا لفظ ہوں جس کا کوئی مطلب نہیں ہے 

خدا ہی جانے میرا استعارا کیا بنے گا 

مصور اس لئے تم کو بنانا چاہتا ہے 

اسے معلوم ہے تم بن نظارا کیا بنے گا 

ہوا سے دوستی کر لی ہے میرے نا خدا نے 

مری کشتی کا دریا میں سہارا کیا بنے گا 

تمہارا فیصلہ منظور ہے لیکن بتاؤ 

بچھڑ کے مجھ سے مستقبل تمہارا کیا بنے گا 

خدائے بحر و بر تو نے جو پھر دنیا بنائی 

ہماری خاک سے اس میں دوبارا کیا بنے گا

انعام عازمی

 

تابش کمال

یوم پیدائش 15 اپریل 1965

کب کھلے گا کہ فلک پار سے آگے کیا ہے 

کس کو معلوم کہ دیوار سے آگے کیا ہے 

ایک طرہ سا تو میں دیکھ رہا ہوں لیکن 

کوئی بتلائے کہ دستار سے آگے کیا ہے

ظلم یہ ہے کہ یہاں بکتا ہے یوسف بے دام 

اور نہیں جانتا بازار سے آگے کیا ہے 

سر میں سودا ہے کہ اک بار تو دیکھوں جا کر 

سر میدان سجی دار سے آگے کیا ہے 

جس نے انساں سے محبت ہی نہیں کی تابشؔ 

اس کو کیا علم کہ پندار سے آگے کیا ہے

تابش کمال

حاتم علی مہر

یوم پیدائش 15 اپریل 1815

اس زلف کے سودے کا خلل جائے تو اچھا 

اس پیچ سے دل اپنا نکل جائے تو اچھا 

شطرنج میں جی ان کا بہل جائے تو اچھا

اے مہرؔ یہ چال اچھی ہے چل جائے تو اچھا 

اس زیست سے اب موت بدل جائے تو اچھا 

بے چین ہے دل جان نکل جائے تو اچھا 

محروم ہوں اس دور میں ساقی فقط اک میں 

اے کاش خم بادہ ابل جائے تو اچھا 

خم ٹھونک کے کرتا ہے یہ اب بیچ بلا کے 

اس طرح کے طرار کا بل جائے تو اچھا 

اس عشق میں پھر جان کے پڑ جائیں گے لالے 

اب بھی دل بیتاب سنبھل جائے تو اچھا 

چھو جائے جو بندے کی سوا جسم سے تیرے 

اللہ کرے ہاتھ وہ گل جائے تو اچھا 

کیا عشق سا ہے عشق محبت سی محبت

بدلوں گا میں اس دل کو بدل جائے تو اچھا 

ممکن ہی نہیں ہے کہ بچے جان سلامت 

اس کوچہ میں مشتاق اجل جائے تو اچھا 

بوسوں میں مزا قند مکرر کا ہو ساقی 

اک دور دوبارہ کا بھی ڈھل جائے تو اچھا 

اب ذوق کی مانند غم عشق جگر میں 

کانٹا سا کھٹکتا ہے نکل جائے تو اچھا 

رنگینی فکر اور میری روشنی طمع 

کچھ لعل و گہر اور اگل جائے تو اچھا 

احباب‌ بنارس کے لیے مہرؔ کا تحفہ 

ایک اور بھی ساتھ اس کے غزل جائے تو اچھا

حاتم علی مہر

محمد نعیم اللہ خیالی

یوم پیدائش 15 اپریل 1920

ستم کی تیغ چلی تیر بھی جفا کے چلے 

جو بات حق تھی سر دار ہم سنا کے چلے 

کچھ ایسی دور نہ تھیں منزلیں محبت کی 

وفور شوق میں ہم فاصلے بڑھا کے چلے 

جو آب و دانہ چمن سے اٹھا چمن والو 

ہر اک شاخ پہ ہم آشیاں بنا کے چلے 

اٹھے تو محفل رنداں سے تشنہ کام مگر 

قدم قدم پہ ہم ایک مے کدہ بنا کے چلے 

سلگ سلگ کے رہے جو دیا بجھا نہ سکے 

گئے تو جاتے ہوئے آگ وہ لگا کے چلے 

خیالیؔ شعر ہے کیا یہ تو اہل فن جانیں 

ہم اپنے دل کی بہ شکل غزل سنا کے چلے

محمد نعیم اللہ خیالی

شعیب شوبی

یوم پیدائش 14 اپریل 2000

راس آئی نہ کوئی راہ گزر ، وقت لگا

ہائے! بےکار گیا میرا سفر ، وقت لگا

زخم گُھلتے ہیں یہاں وقت کی گُزران سے گر

راس آئے گی یہ تنہائی ، اگر وقت لگا ؟

میں بھری دنیا میں کہتا تھا تجھے اپنا کبھی

کُھل گئی رمزِ شناسائی مگر وقت لگا

دل کی تنہائی کسی طور بھی جانے کی نہیں

ویسے کا ویسا ہے یہ زخم جگر ، وقت لگا

اِک جَماعت نے مِرے بغض میں کیا کیا نہ کیا

کب مِرا ظرف ہوا زیر و زبر ، وقت لگا 

اُس نے "کُن" کہہ کے بنا ڈالی یہ دنیا ساری 

ہم سے بن پایا نہ اِک ادنیٰ سا گھر ، وقت لگا

شعیب شوبی

طاہر عدیم

یوم پیدائش 14 اپریل 1973

مجھے وہ چھوڑ کر جب سے گیا ہے انتہا ہے 

رگ و پے میں فضائے کربلا ہے انتہا ہے 

غم و آلام ہیں یا حسرتیں ہیں زندگی میں 

تمہارے بعد باقی کیا بچا ہے انتہا ہے 

فقط تم ہی نہیں ناراض مجھ سے جان جاناں 

مرے اندر کا انساں تک خفا ہے انتہا ہے 

خموشی توڑ دے اے خالق ارض و سما اب 

تری مخلوق بن بیٹھی خدا ہے انتہا ہے 

غزل جو تم پہ طاہرؔ نے لکھی تھی جان طاہرؔ 

وہی تو زینت بام بقا ہے انتہا ہے

طاہر عدیم

احمد ستی

یوم پیدائش 13 اپریل 1977

نظم نظریہ

میں نظریہ ہوں

تم غریبوں کے خون میں لتھڑے

اپنے

سونے چاندی کے تیروں سے

میرے خالق کو شہید کرسکتے ہو

مگر

مجھے نہیں

میں

تمھارے محلوں کو ہلادوں گا

تمھاری آنکھیں نوچ لوں گا

تمھارے

پیٹ چاک کردوں گا

میں

حق لوں گا

میں

یتیم بچوں کو بستہ

دوں گا

میں حق داروں کو رستہ دوں گا

بوڑھی ماں کا علاج میں ہوں

مزدوروں کے سر کا تاج میں ہوں

میں

نہ ڈروں گا

نہ جھکوں گا

نہ بِکوں گا

میں

لڑوں گا

میں لڑوں گا

میں

لڑوں گا

احمد ستی

آفتاب پانی پتی

یوم پیدائش 13 اپریل 1896

نظم جذباتِ آفتاب

آہ میں اے دل مظلوم اثر پیدا کر 

جس میں سودائے محبت ہو وہ سر پیدا کر 

غم کا طوفاں بھی اگر آئے تو کچھ فکر نہ کر 

قوم کا درد ہر اک دل میں مگر پیدا کر  

سرفروشوں کی طرح پہلے مٹا دے خود کو 

ہند کی خاک سے پھر لعل و گہر پیدا کر 

آگ بے فیض کی دولت کو لگا دے یا رب 

کام آئے جو غریبوں کے وہ زر پیدا کر 

آسماں کانپتا ہے نام سے جن کے اب تک 

آج پھر قوم میں وہ لخت جگر پیدا کر 

عہد رفتہ میں جنم تو نے دیا تھا جن کو 

مادر ہند وہی نور نظر پیدا کر 

چین راحت سے اگر عمر بسر کرنی ہے 

دل میں اغیار کے بھی انس سے گھر پیدا کر 

گر تمنا ہے کہ ہو سارا زمانہ اپنا 

جذبۂ عشق و محبت کی نظر پیدا کر 

آفتابؔ اب تری تقدیر کا چمکے گا ضرور 

مرد بن کر کوئی دنیا میں ہنر پیدا کر

آفتاب پانی پتی