ساحر ہوشیار پوری

 یوم پیدائش 10 فروری 1913

کون کہتا ہے محبت کی زباں ہوتی ہے

یہ حقیقت تو نگاہوں سے بیاں ہوتی ہے 

وہ نہ آئے تو ستاتی ہے خلش سی دل کو

وہ جو آئے تو خلش اور جواں ہوتی ہے 

روح کو شاد کرے دل کو جو پر نور کرے

ہر نظارے میں یہ تنویر کہاں ہوتی ہے 

ضبط سیلاب محبت کو کہاں تک روکے

دل میں جو بات ہو آنکھوں سے عیاں ہوتی ہے 

زندگی ایک سلگتی سی چتا ہے ساحرؔ

شعلہ بنتی ہے نہ یہ بجھ کے دھواں ہوتی ہے 

ساحر ہوشیار پوری

الطاف مشہدی

 یوم پیدائش 10 فروری 1914

آہ دنیا سرائے فانی ہے

کس قدر مختصر کہانی ہے

خود کو دیتا ہوں مسکرا کے فریب

دل مگر وقف نوحہ خوانی ہے

مجھ سے ہنس بول لیں مرے ساتھی

اب کوئی دن کی زندگانی ہے

موسم گل میں وہ جو آن ملیں

ہم بھی جانیں کہ رت سہانی ہے

بے سبب تو نہیں بہے آنسو

آنسو آنسو میں اک کہانی ہے

اک سراپا کہ رنج و یاس ہیں ہم

درد دل مونس جوانی ہے

مسکراؤں میں کس طرح الطافؔ

تاک میں دور آسمانی ہے

الطاف مشہدی

ضیا فتح آبادی

 یوم پیدائش 09 فروری 1913

فرشتے امتحان بندگی میں ہم سے کم نکلے

مگر اک جرم کی پاداش میں جنت سے ہم نکلے

غم‌ دنیا و دیں ان کو نہ فکر نیک و بد ان کو

محبت کرنے والے بے نیاز بیش و کم نکلے

غرض کعبہ سے تھی جن کو نہ تھا مطلب کلیسا سے

حد دیر و حرم سے بھی وہ آگے دو قدم نکلے

سحر کی منزل روشن پہ جا پہنچے وہ دیوانے

شب تاریک میں جو نور کا لے کر علم نکلے

مہ و خورشید بن کر آسمانوں پر ہوئے روشن

دو آنسو وہ مری آنکھوں سے جو شام الم نکلے

سکوت شب میں ہم نے ایک رنگیں خواب دیکھا تھا

مسرت جاوداں ہوگی اگر تعبیر غم نکلے

نہ ملتی ہوں شراب زندگی کی تلخیاں جن میں

سنا ہے وہ ضیاؔ کے دل سے ایسے شعر کم نکلے

ضیا فتح آبادی

سید علی ظہیر

 یوم پیدائش 09 فروری 1947

یہ چمک دھول میں تحلیل بھی ہو سکتی ہے

کائنات اک نئی تشکیل بھی ہو سکتی ہے

تم نہ سمجھو گے کوئی اور سمجھ لے گا اسے

خامشی درد کی ترسیل بھی ہو سکتی ہے

کچھ سنبھل کر رہو ان سادہ ملاقاتوں میں

دوستی عشق میں تبدیل بھی ہو سکتی ہے

میں ادھورا ہوں مگر خود کو ادھورا نہ سمجھ

مجھ سے مل کر تری تکمیل بھی ہو سکتی ہے

کاٹنا رات کا آسان بھی ہو سکتا ہے

دل میں اک یاد کی قندیل بھی ہو سکتی ہے

اس قدر بھی نہ بڑھو دامن دل کی جانب

یہ محبت کوئی تمثیل بھی ہو سکتی ہے

ہاں دل و جان فدا کردہ ظہیرؔ اس پہ مگر

یہ بھی امکان ہے تذلیل بھی ہو سکتی ہے

سید علی ظہیر

جانثار اختر

 یوم پیدائش 08 فروری 1914

ہم سے بھاگا نہ کرو دور غزالوں کی طرح

ہم نے چاہا ہے تمہیں چاہنے والوں کی طرح 

خودبخود نیند سی آنکھوں میں گھلی جاتی ہے

مہکی مہکی ہے شب غم ترے بالوں کی طرح 

تیرے بن رات کے ہاتھوں پہ یہ تاروں کے ایاغ

خوبصورت ہیں مگر زہر کے پیالوں کی طرح 

اور کیا اس سے زیادہ کوئی نرمی برتوں

دل کے زخموں کو چھوا ہے ترے گالوں کی طرح 

گنگناتے ہوئے اور آ کبھی ان سینوں میں

تیری خاطر جو مہکتے ہیں شوالوں کی طرح 

تیری زلفیں تری آنکھیں ترے ابرو ترے لب

اب بھی مشہور ہیں دنیا میں مثالوں کی طرح 

ہم سے مایوس نہ ہو اے شب دوراں کہ ابھی

دل میں کچھ درد چمکتے ہیں اجالوں کی طرح 

مجھ سے نظریں تو ملاؤ کہ ہزاروں چہرے

میری آنکھوں میں سلگتے ہیں سوالوں کی طرح 

اور تو مجھ کو ملا کیا مری محنت کا صلہ

چند سکے ہیں مرے ہاتھ میں چھالوں کی طرح 

جستجو نے کسی منزل پہ ٹھہرنے نہ دیا

ہم بھٹکتے رہے آوارہ خیالوں کی طرح 

زندگی جس کو ترا پیار ملا وہ جانے

ہم تو ناکام رہے چاہنے والوں کی طرح

جاں نثاراختر

پیرزادہ قاسم

 یوم پیدائش 08 فروری 1943

اداکاری میں بھی سو کرب کے پہلو نکل آئے

کہ فنکارانہ روتے تھے مگر آنسو نکل آئے

ہمیں اپنی ہی جانب اب سفر آغاز کرنا ہے

سو مثل نکہت گل ہو کے بے قابو نکل آئے

یہی بے نام پیکر حسن بن جائیں گے فردا کا

سخن مہکے اگر کچھ عشق کی خوشبو نکل آئے

اسی امید پر ہم قتل ہوتے آئے ہیں اب تک

کہ کب قاتل کے پردے میں کوئی دل جو نکل آئے

سمجھتے تھے کہ مہجوری کی ظلمت ہی مقدر ہے

مگر پھر اس کی یادوں کے بہت جگنو نکل آئے

دلوں کو جیت لینا اس قدر آسان ہی کب تھا

مگر اب شعبدے ہیں اور بہت جادو نکل آئے

سفر کی انتہا تک ایک تازہ آس باقی ہے

کہ میں یہ موڑ کاٹوں اس طرف سے تو نکل آئے

پیرزادہ قاسم

وسیم بریلوی

 یوم پیدائش 08 فروری 1940

اپنے ہر ہر لفظ کا خود آئینہ ہو جاؤں گا

اس کو چھوٹا کہہ کے میں کیسے بڑا ہو جاؤں گا 

تم گرانے میں لگے تھے تم نے سوچا ہی نہیں

میں گرا تو مسئلہ بن کر کھڑا ہو جاؤں گا 

مجھ کو چلنے دو اکیلا ہے ابھی میرا سفر

راستہ روکا گیا تو قافلہ ہو جاؤں گا 

ساری دنیا کی نظر میں ہے مرا عہد وفا

اک ترے کہنے سے کیا میں بے وفا ہو جاؤں گا

وسیم بریلوی

ریاست علی تاج

 یوم پیدائش 07 فروری 1930

خیال و فکر جہاں زاویے بدلتے ہیں

وہیں سے نت نئے اسلوب چل نکلتے ہیں 

وہ رات کو پئے گل گشت جب نکلتے ہیں

فلک پہ چاند ستاروں کے دل مچلتے ہیں 

مرے کلام میں مفروضہ‌‌ و قیاس نہیں

یہ تجربات ہیں جو شعر بن کے ڈھلتے ہیں 

رخ حیات کو ہر زاویے سے دیکھا ہے

مشاہدات کے قالب میں شعر ڈھلتے ہیں 

قدم قدم پہ حیا سوزیوں کا عالم ہے

سنور سنور کے نگاران شہر چلتے ہیں 

تمہارے غم سے عبارت ہے زندگی میری

تمہارے یاد کے دل میں چراغ چلتے ہیں 

ہیں کامران وہی لوگ آج دنیا میں

جو وقت اور زمانے کے ساتھ چلتے ہیں 

گداز قلب بھی ہوتا ہے کچھ انہیں کو نصیب

جو درد مند ہیں ان کے ہی دل پگھلتے ہیں 

رہ حیات میں ایسا بھی ہے مقام کوئی

جہاں جنون و خرد ساتھ ساتھ چلتے ہیں 

جدا ہے رنگ سخن تاجؔ ہر سخن ور کا

بے اعتبار نظر فکر و فن بدلتے ہیں  

ریاست علی تاج

عبدالسلام بنگلوری

 یوم پیدائش 06 فروری 1953

دل کی حالت بیاں نہیں ہوتی 

خامشی جب زباں نہیں ہوتی 

حرف حسرت ہے تم نے کیا سمجھا 

زندگی داستاں نہیں ہوتی 

کیا مقابل ہو حسن جاناں کے 

چاندنی بے کراں نہیں ہوتی 

تم جو آؤ تو ہو جواں محفل 

ورنہ کب کہکشاں نہیں ہوتی 

حسن کی بے رخی ادا ٹھہری 

عاشقی بد گماں نہیں ہوتی 

بے قراری کی بس دوا تم ہو 

یہ طبیبوں کے ہاں نہیں ہوتی 

جو یہ ہندوستاں نہیں ہوتا 

تو یہ اردو زباں نہیں ہوتی 

کچھ مراسم سلامؔ رہنے دے 

دشمنی جاوداں نہیں ہوتی

عبد السلام بنگلوری

تنویر نقوی

 یوم پیدائش 06 فروری 1919

ہمارے واسطے ہر آرزو کانٹوں کی مالا ہے

ہمیں تو زندگی دے کر خدا نے مار ڈالا ہے 

ادھر قسمت ہے جو ہر دم نیا غم ہم کو دیتی ہے

ادھر ہم ہیں کہ ہر غم کو ہمیشہ دل میں پالا ہے 

ابھی تک اک کھٹک سی ہے ابھی تک اک چبھن سی ہے

اگرچہ ہم نے اپنے دل سے ہر کانٹا نکالا ہے 

غلط ہی لوگ کہتے ہیں بھلائی کر بھلا ہوگا

ہمیں تو دکھ دیا اس نے جسے دکھ سے نکالا ہے 

تماشا دیکھنے آئے ہیں ہم اپنی تباہی کا

بتا اے زندگی اب اور کیا کیا ہونے والا ہے

تنویر نقوی