فرید جاوید

 یوم پیدائش 18 اپریل 1927

یہ کہاں سے موج طرب اٹھی کہ ملال دل سے نکل گئے

وہی صبح و شام جو تھے گراں نفس بہار میں ڈھل گئے

یہ دیار شوق ہے ہم نشیں یہاں لغزشوں میں بھی حسن ہے

جو مٹے وہ اور ابھر گئے جو گرے وہ اور سنبھل گئے

حسیں زندگی کی تلاش تھی ہمیں سر خوشی کی تلاش تھی

ہوئے زندگی سے جو آشنا تو جراحتوں سے بہل گئے

ترے سوگواروں کی زندگی کبھی مطمئن نہ گزر سکی

جو بجھی کبھی کوئی تشنگی کئی اور درد مچل گئے

مری آرزوؤں کے خواب تھے کہ فضائے حسن و شباب تھے

کہیں نکہتوں میں بکھر گئے کہیں رنگ و نور میں ڈھل گئے

انہیں راحتوں کا خیال ہے نہ صعوبتوں کا ملال ہے

جو تری تلاش میں چل پڑے جو تری طلب میں نکل گئے

ہے بھری بہار تو کیا کروں نہ ملے قرار تو کیا کروں

مرے سامنے ہیں وہ آشیاں جو بھری بہار میں جل گئے

فرید جاوید

نیاز احمد عاطر

 چھن گیا سائباں دربدر ہو گیا

مرگئی جب سے ماں دربدر ہو گیا

شہر بھی ہے وہی لوگ بھی ہیں وہی

ڈھونڈتے آشیاں دربدر ہو گیا

ہر گلی ہر سڑک دیکھی بھالی مری

ہاۓ قسمت کہاں دربدر ہو گیا

کوئلوں بلبلوں کا جو تھا ہم نوا

دیکھ لے باغباں دربدر ہو گیا

جھڑکیوں ہچکیوں کے سفر میں رہا

بخت کے درمیاں دربدر ہو گیا

اوڑھ کر وحشتیں پھرتا ہوں کوبہ کو

ٹھہروں میں اب کہاں در بدر ہو گیا

دکھ بھری زندگی لٹ گئی ہر خوشی

بول کر داستاں دربدر ہو گیا

اپنے حالات کا ستایا ہوا

آج مالک مکاں دربدر ہو گیا

نیاز احمد عاطر

شاعر علی راحل

 اِس کارِ محبت میں تجارت نہیں کی ہے

حاصل کوئی اِس فن میں مہارت نہیں کی ہے

جب کر دیا ! سرخم ترے ہر حکم کے آگے

 پھر حکم عدولی کی جسارت نہیں کی ہے

 

جو رنج و الم سے کرے دو چار کسی کو

ایسی کبھی ہم نے تو شرارت نہیں کی ہے

مٹّی سے بنایا گیا تھا حضرتِ آدم

  یہ سوچ کے مٹّی سے حقارت نہیں کی ہے

کب تک ترے دیدار کوترسیں گی یہ آنکھیں 

اِک عرصہ ہُوا تیری زیارت نہیں کی ہے

اُلفت کا سبق دے کے اُتارا تھا زمیں پر

 کی سب سے محبت ہی حقارت نہیں کی ہے

جُھوٹے ہیں ترے وعدے یہ معلوم تھا رَاحِلؔ

سو جھوٹ پہ تعمیر عمارت نہیں کی ہے

شاعر علی رَاحِلؔ

ریاض خازم

 فریبِ محبت میں آ کر فدا کی

کہ دنیا میں جیسے ہمی نے خطا کی

بہت عشق میں رو چکے زندگی اب

ہمیں اور ضرورت نہیں ہے سزا کی

تمہیں کون کہتا ہے کہ عشق سیکھو

تمہیں کیا ضرورت پڑی ہے وفا کی

تمہیں تو میسر ہے سب کی توجہ

 تمہیں دولتِ حسن رب نے عطا کی

ہمیں کوئی چاہے ہمیں کوئی مانگے

ہمارے لئے بھی ہو بندی خدا کی

کسے تیری آہوں سے مطلب ہے حازم

تو نے ایسے ہی درد و غم کی صدا کی

ریاض حازم

محمد شہزاد حیدر

 نذرانہ ِ عقیدت بحضور سیدہ فاطمة الزہرہ ؓ 

بنت ِ خیر الوریٰ ﷺ سیدہ فاطمہ ؓ

زوجہ ِ مرتضیٰ ؓ سیدہ فاطمہ ؓ

عظمتوں کی بقا سیدہ فاطمہ ؓ

عابدہ ، زاہدہ سیدہ فاطمہ ؓ

مادر ِ باد شاہ ِ جناں ؓ مرحبا 

اوّلیں با صَفا سیدہ فاطمہ ؓ

زینبی رنگ میں فاطمی ڈھنگ تھا 

آپ کی تھی صدا سیدہ فاطمہ ؓ

" شب سیاہ ہوگی جب دفن کر دینا تب "

حکم تھا آپ کا سیدہ فاطمہ ؓ

درو کر دیجئے سارے رنج و الم 

صدقہ حسنین ؓ کا سیدہ فاطمہ ؓ

کیجے شہزؔاد پر اپنی نظر ِ سخا 

جان ِ شاہ ِ عطا ﷺ سیدہ فاطمہ ؓ

محمد شہزؔاد حیدر

عارف بن قادر

 نہ بُزدل اتنا سمجھ ہم نے کر بھی جانا ہے 

مقامِ شوق سے آگے گزر بھی جانا ہے 

ذرا سی دیر ترے ہاں قیام ہے میرا 

کہ اِس کے بعد مجھے اپنے گھر بھی جانا ہے 

گھُلا ہوا ہے فضا میں عداوتوں کا جو زہر 

نہ سانس لو یہ لہو میں اُتر بھی جانا ہے 

لکھی نہیں ہے مقدر میں سب کے با ثمری 

جہان سے کسی نے بے ثمر بھی جانا ہے

نظامِ گردشِ دوراں ہے انگلیوں پہ تری

 جو تُو نے کہنا ہے رُک, یہ ٹھہر بھی جانا ہے 

چلایا جاتا رہا مجھ کو سیدھے رستے پر 

سو اب کی بار غلط راہ پر بھی جانا ہے 

فقط ہوا نہیں ہوگی اُجالوں کی قاتل

کچھ ان کا قتل چراغوں کے سر بھی جانا ہے 

مری کچھ اور پذیرائی ہونی ہے عارف

تری گلی سے نکل کر جدھر بھی جانا ہے

 

عارف بن قادر

ناصر ملک

 یوم پیدائش 15 اپریل 1972

مرا وجود ضروری تھا داستاں کے لیے

مگر اُتارا گیا مرگِ ناگہاں کے لیے

زمیں پہ بھیجنے والے زمیں سنبھال اپنی

نکل پڑا ہوں میں تسخیرِ آسماں کے لیے

اے مقتلِ شبِ تاریک تھوڑی مہلت دے

مجھے چراغ جلانے ہیں کارواں کے لیے

ہر ایک ظلم پہ میری صدا بلند ہوئی

خدائے پاک! میں حاضر ہوں امتحاں کیلئے

یہ بانجھ ضابطے روزی رساں نہیں ہوتے

کمانا پڑتا ہے بچوں کو خانداں کے لئے

ہوائیں کل بھی مسافر شناس ہوتی تھیں

ہوائیں آج بھی چلتی ہیں بادباں کے لیے

تمہارا لمس رہا محوِ گفتگو مجھ سے

یہ سانس چلتی رہی زیبِ داستاں کے لیے

ناصر ملک

خلیل فرحت کارنجوی

 یوم پیدائش 16 اپریل 1935

دل سے مرے تنہائی کی شدت نہیں جاتی

اب تو بھی چلا آئے تو وحشت نہیں جاتی

اس دور کی تعلیم کا معیار عجب ہے

تعلیم تو آتی ہے جہالت نہیں جاتی

کیا سوچ کے امید وفا باندھی تھی تم سے

اک عمر ہوئی دل کی ندامت نہیں جاتی

مفلس بھی تو خوددار ہوا کرتے ہیں لوگو

غربت میں بھی انساں کی شرافت نہیں جاتی

لے جاتی ہیں اب تک بھی مری نیند چرا کر

اب تک بھی ان آنکھوں کی شرارت نہیں جاتی

دے دیتا ہے اللہ مجھے حسب ضرورت

اب لے کے کسی در پہ ضرورت نہیں جاتی

سو بار تری جان پہ بن آئی ہے فرحتؔ

پھر بھی تری حق گوئی کی عادت نہیں جاتی

خلیل فرحت کارنجوی

خضر احمد خان شرر

 لُٹے   لُٹائے   سہی  اہتمام  رکھتے  ہیں 

فقیر  سب  کے  لئے انتظام رکھتے ہیں  

سبق  پڑھاؤ  نہیں  تم  ہمیں  شجاعت کا 

ہم  اپنے  ساتھ   خدائی  نظام  رکھتے ہیں 

کبھی کبھی تو خیالوں میں بھی نہیں آتے

کبھی  کبھی  مرے دل میں قیام رکھتے ہیں 

کبھی کبھی  وہ گذرتے  ہیں اجنبی بن کر 

کبھی کبھی  تو  بہت  اہتمام  رکھتے ہیں 

کبھی کبھی تو وہ خاموش ہیں سمندر سے

کبھی کبھی وہ بڑی دھوم دھام رکھتے ہیں

کوئی  تمھارے  سِوا  اب  نظر  نہیں آتا

تمھارے  نام  اُٹھا صبح  شام رکھتے ہیں 

جواب  دیں گے سرِ حشر  وہ  بھی رازق کو 

جو  تاجرانِ جہاں  اونچے  دام  رکھتے ہیں

کبھی تو  بہرِ خدا  لب تلک  ہنسی آئے

ہُجُومِ  غم  کا  شرر  ازدہام  رکھتے ہیں 

  

   خضر احمد خان شرر

وقاص ذاکر ادبی

 تم نے تو اپنے ہی من کی مانی آخر

نہ سُنی بس اِس دل کی کہانی آخر

بات بِگڑی تھی تو بات بن سکتی تھی 

بات چاہی نہ پھر سے بنانی آخر

اب اچھے ہیں دن پہلے تلف ہوتے تھے

بارہا اب نہ احوال جانی آخر

 تھا دکھاوے کا احساس کب تک رہتا 

جھوٹ ظاہر ہو تو پیار فانی آخر

آخرت بن جائے گی کوشش تو کر

چھوڑ دے رنگیں دنیا بنانی آخر

بے کلی ہو جی کو گر حُزن یا خرمی 

اجنبی سے اب نہ ہے لگانی آخر

وقاص ذاکر ادبی