ابراہیم ہوش

 یوم پیدائش 06 مئی 1918

میں وہ نہیں کہ زمانے سے بے عمل جاؤں

مزاج پوچھ کے دار و رسن کا ٹل جاؤں

وہ اور ہوں گے جو ہیں آج قید بے سمتی

وہی ہے سمت میں جس سمت کو نکل جاؤں

فریب کھا کے جنوں عقل کے کھلونوں سے

خدا وہ وقت نہ لائے کہ میں بہل جاؤں

مرا وجود ہے مومی کہیں نہ ہو ایسا

کسی کی یاد کی گرمی سے میں پگھل جاؤں

جو چاہتا ہے کہ پستی میں گرتے گرتے بچوں

نظر کا اپنی عصا دے کہ میں سنبھل جاؤں

ابراہیم ہوش

ریاض احمد قاری

 یوم پیدائش 06 مئی 1965

سب انبیا ء سے ماسوا ان ﷺ کا مقام ہے

پیغام انﷺ کاجگ میں رواں صبح و شام ہے

پلوائیں گے وہ اپنے غلاموں کو روزِ حشر

" پیارے نبیﷺ کے ہاتھ میں کوثر کا جام ہے "

شاہوں کو بھی وہ دیتا ہے تاج اور تخت ہی

رتبے میں کیا بلند نبیﷺ کا غلام ہے

رحمت خدا کی آتی ہے بن بن کے اک گھٹا

جب سے نبیﷺ کے شہر میں اپنا قیام ہے

جو ان ﷺ کو مانتا ہے وہی جنتی ہوا

مومن پہ ہی تو آتشِ دوزخ حرام ہے

اے ریاضؔ ان کے بعد نبی کوئی بھی نہیں

وہ آخری نبی ﷺ ہیں انہی کو دوام ہے

ریاض احمد قادری

اشرف نقوی

 یوم پیدائش 06 مئی 1972

فلک سے جب بھی کسی نے ہمیں اِشارہ کیا 

سو اپنے ہونے, نہ ہونے کا استخارہ کیا 

کیا جو بند کسی نے بھی دل کا دروازہ 

پھر اُس طرف کا کبھی رُخ نہیں دوبارہ کیا 

مکین کوئی نہیں رہتے جن مکانوں میں 

نہ جانے کس لیے ہم نے اُنھیں سنوارا کیا 

میں وہ تھا جس نے تِری شب اُجالنے کے لیے 

جبیں کو چاند کیا, اشک کو ستارہ کیا 

مِرے نواح و مضافات میں ہے حبس اشرف 

سو میں نے لُو کو ہواؤں کا استعارہ کیا  

اشرف نقوی

ماہر اجمیری

 یوم پیدائش 05 مئی 1942

ہے کہیں زر کی کہیں گھر کی کہیں سر کی تلاش

آدمی کے ساتھ ہے بس زندگی بھر کی تلاش

کس طرح ممکن ہے ان حالات میں اپنا ملن

میں سراپا خار ہوں تم کو گلِ تر کی تلاش

سوچتا رہتا ہوں ان دیدہ وروں کو کیا ہوا

پتھروں کے شہر میں ہے آئینہ گر کی تلاش

جس کے لفظوں میں صداؤں میں ہو پیغامِ سحر

ظلمتِ شب کو ہے اب ایسے سخن ور کی تلاش

جس میں اخلاص و وفا کے چاہتوں کے رنگ ہوں

چشم ماہر کو رہی ہے ایسے منظر کی تلاش

ماہر اجمیری

محشر فیض آبادی

 مزاحیہ 

ابھی کھانسی ابھی نزلے کے کچھ آثار رہنے دے 

دواؤں سے ابھی مجھ کو ذرا دو چار رہنے دے 

پڑوسن روز آتی ہے طبیعت پوچھنے میری 

الہی اور کچھ دن تو مجھے بیمار رہنے دے

محشر فیض آبادی

محمد حسین آزاد

 یوم پیدائش 05 مئی 1830

نظم محنت کرو

ہے امتحاں سر پر کھڑا محنت کرو محنت کرو 

باندھو کمر بیٹھے ہو کیا محنت کرو محنت کرو 

بے شک پڑھائی ہے سوا اور وقت ہے تھوڑا رہا 

ہے ایسی مشکل بات کیا محنت کرو محنت کرو 

شکوے شکایت جو کہ تھے تم نے کہے ہم نے سنے 

جو کچھ ہوا اچھا ہوا محنت کرو محنت کرو 

محنت کرو انعام لو انعام پر اکرام لو 

جو چاہو گے مل جائے گا محنت کرو محنت کرو 

جو بیٹھ جائیں ہار کر کہہ دو انہیں للکار کر 

ہمت کا کوڑا مار کر محنت کرو محنت کرو 

تدبیریں ساری کر چکے باتوں کے دریا بہہ چکے 

بک بک سے اب کیا فائدہ محنت کرو محنت کرو 

یہ بیج اگر ڈالوگے تم دل سے اسے پا لو گے تم 

دیکھو گے پھر اس کا مزا محنت کرو محنت کرو 

محنت جو کی جی توڑ کر ہر شوق سے منہ موڑ کر 

کر دو گے دم میں فیصلہ محنت کرو محنت کرو 

کھیتی ہو یا سوداگری ہو بھیک ہو یا چاکری 

سب کا سبق یکساں سنا محنت کرو محنت کرو 

جس دن بڑے تم ہو گئے دنیا کے دھندوں میں پھنسے 

پڑھنے کی پھر فرصت کجا محنت کرو محنت کرو 

بچپن رہا کس کا بھلا انجام کو سوچو ذرا 

یہ تو کہو کھاؤ گے کیا محنت کرو محنت کرو 

محمد حسین آزاد

امداد امام اثر

 یوم پیدائش 05 مئی 1849

جفائیں ہوتی ہیں گھٹتا ہے دم ایسا بھی ہوتا ہے

مگر ہم پر جو ہے تیرا ستم ایسا بھی ہوتا ہے

عدو کے آتے ہی رونق سدھاری تیری محفل کی

معاذ اللہ انساں کا قدم ایسا بھی ہوتا ہے

رکاوٹ ہے خلش ہے چھیڑ ہے ایذا پہ ایذا ہے

ستم اہل وفا پر دم بدم ایسا بھی ہوتا ہے

حسینوں کی جفائیں بھی تلون سے نہیں خالی

ستم کے بعد کرتے ہیں کرم ایسا بھی ہوتا ہے

دل مہجور آخر انتہا ہے ہر نحوست کی

کبھی سعدین ہوتے ہیں بہم ایسا بھی ہوتا ہے

نہ کر شکوہ ہماری بے سبب کی بد گمانی کا

محبت میں ترے سر کی قسم ایسا بھی ہوتا ہے

نہ ہو درد جدائی سے جو واقف اس کو کیا کہیے

ہمیں وہ دیکھ کر کہتے ہیں غم ایسا بھی ہوتا ہے

بتوں کے ملنے جلنے پر نہ جانا اے دل ناداں

بڑھا کر ربط کر دیتے ہیں کم ایسا بھی ہوتا ہے

ہمیں بزم عدو میں وہ بلاتے ہیں تمنا سے

کرم ایسا بھی ہوتا ہے ستم ایسا بھی ہوتا ہے

جگہ دی مجھ کو کعبے میں خدائے پاک نے زاہد

تو کہتا تھا کہ مقبول حرم ایسا بھی ہوتا ہے

ہوا کرتا ہے سب کچھ اے اثرؔ اس کی خدائی میں

کریں دعویٰ خدائی کا صنم ایسا بھی ہوتا ہے

امداد امام اثرؔ

محسن نقوی

 یوم پیدائش 05 مئی 1947

ترے بدن سے جو چھو کر ادھر بھی آتا ہے

مثال رنگ وہ جھونکا نظر بھی آتا ہے

تمام شب جہاں جلتا ہے اک اداس دیا

ہوا کی راہ میں اک ایسا گھر بھی آتا ہے

وہ مجھ کو ٹوٹ کے چاہے گا چھوڑ جائے گا

مجھے خبر تھی اسے یہ ہنر بھی آتا ہے

اجاڑ بن میں اترتا ہے ایک جگنو بھی

ہوا کے ساتھ کوئی ہم سفر بھی آتا ہے

وفا کی کون سی منزل پہ اس نے چھوڑا تھا

کہ وہ تو یاد ہمیں بھول کر بھی آتا ہے

جہاں لہو کے سمندر کی حد ٹھہرتی ہے

وہیں جزیرۂ لعل و گہر بھی آتا ہے

چلے جو ذکر فرشتوں کی پارسائی کا

تو زیر بحث مقام بشر بھی آتا ہے

ابھی سناں کو سنبھالے رہیں عدو میرے

کہ ان صفوں میں کہیں میرا سر بھی آتا ہے

کبھی کبھی مجھے ملنے بلندیوں سے کوئی

شعاع صبح کی صورت اتر بھی آتا ہے

اسی لیے میں کسی شب نہ سو سکا محسنؔ

وہ ماہتاب کبھی بام پر بھی آتا ہے

محسن نقوی

ظفر گورکھپوری

 یوم پیدائش 05 مئی 1935

دیکھیں قریب سے بھی تو اچھا دکھائی دے

اک آدمی تو شہر میں ایسا دکھائی دے

اب بھیک مانگنے کے طریقے بدل گئے

لازم نہیں کہ ہاتھ میں کاسہ دکھائی دے

نیزے پہ رکھ کے اور مرا سر بلند کر

دنیا کو اک چراغ تو جلتا دکھائی دے

دل میں ترے خیال کی بنتی ہے اک دھنک

سورج سا آئینے سے گزرتا دکھائی دے

چل زندگی کی جوت جگائے عجب نہیں

لاشوں کے درمیاں کوئی رستہ دکھائی دے

کیا کم ہے کہ وجود کے سناٹے میں ظفرؔ

اک درد کی صدا ہے کہ زندہ دکھائی دے

ظفر گورکھپوری

سردار آصف

 یوم وفات 04 مئی 2021

میں جن کو ڈھونڈنے نکلا تھا گہرے غاروں میں

پتہ چلا کہ وہ رہتے ہیں اب ستاروں میں

پرکھ رہا ہے مجھے جو وہ اس خیال کا ہے

ہمیشہ جھوٹ نہیں ہوتا اشتہاروں میں

انہیں یقین تھا دنیا کی عمر لمبی ہے

جو لوگ پیڑ لگاتے تھے رہ گزاروں میں

میں خود کو دیکھوں اگر دوسرے کی آنکھوں سے

ملیں گی خامیاں اپنے ہی شاہ کاروں میں

تمہاری خوشبو کو مجھ سے کہیں یہ چھین نہ لے

ہوا جو رہتی ہے دیوار کی دراروں میں

خدا کا شکر کہ میں اس سے تھوڑی دور رہا

سفید سانپ تھا گیندے کے پیلے ہاروں میں

نشیلی رات کا نشہ کچھ اور بڑھ جاتا

ترا نظارا بھی ہوتا اگر نظاروں میں

زباں پہ آئی تو اپنی مٹھاس کھو بیٹھی

جو بات ہوتی تھی پہلے کبھی اشاروں میں

سردار آصف