محمد حذیفہ

 دِکھا جو دلکش تمہارا چہرہ مریض دل کو قرار آیا

ہزار لَیلائیں ہیں جہاں میں مجھے تو بس تم پہ پیار آیا 

نشیلی آنکھیں، غزالی آنکھیں، شراب خانہ تمہاری آنکھیں

تمہاری آنکھوں کا جام پی کر ہی مجھ کو دلبر خمار آیا

سیاہ زلفیں، جمالی رخ ہے، گلابی لب ہیں ، عُنُق صراحی

حسین مُکھڑے پہ مرنے مٹنے مَیں لے کے سانسیں اُدھار آیا

کتابی رخ کا مطالعَہ ہو ، کہ نازنیں اب اُٹھا دو پردہ

 تمہاری خاطر ہی جانِ جاناں میں توڑ ساری دِوار آیا 

وہ مجھ سےجب ہم کلام ہو تو،لبوں سےاسکےہیں پھول جھڑتے

زبان شیرین و خوش بیانی ، یہ میرے حصے میں یار آیا

ہے تیری ہرنی سی چال جاناں، ادا نرالی ہے قہر ڈھاتی

تِری اداؤں پہ میرے ہمدم میں جان کرنے نثار آیا

حسین اتنا بنایا رب نے کہ چاند بھی تم پہ رشک کرتا

تمہارے جیسا نہیں ہے کوئی، میں دیکھ سارا دِیار آیا

شباب اسکا نہ پوچھ مجھ سے حذیفہ وہ تو الگ ہے سب سے

نصیب ور لوگ ہیں جو یارو، مرا بھی ان میں شمار آیا

   محمدحذیفہ

کاشی

 تھوڑی اَنا ضرور ہے مغرور تو نہیں

آزاد سا میں شخص ہوں محصور تو نہیں

سہتا رہے جفاؤں کو اُلفت کے نام پر

اب اس قدر بھی دل مرا مجبور تو نہیں

ہنس ہنس کے کیوں اٹھاؤں ترے ناز اور ستم

عاشق ہوں میں ترا کوئی مزدور تو نہیں

اک روز بھر ہی جائے گا یہ بے وفائی کا

چھوٹا سا ایک زخم ہے ناسور تو نہیں

کاشی رواں دواں ہے نئے راستوں پہ اب

 گھائل ہوا تھا دل مِرا معذور تو نہیں

"کاشی"

رتن پنڈوروی

 یوم پیدائش 07 جولائی 1907

یہ کون سا مقام ہے اے جوش بے خودی

رستہ بتا رہا ہوں ہر اک رہنما کو میں

دونوں ہی کامیاب ہوئے ہیں تلاش میں

ذات خدا ملی مجھے ذات خدا کو میں

مٹی اٹھا کے دیکھتا ہوں راہ شوق کی

بھولا نہیں ہوں جوش طلب میں فنا کو میں

ہستی فنا ہوئی تو حقیقت یہ کھل گئی

میں خود بقا ہوں کس لیے ڈھونڈوں بقا کو میں

کیوں کر میں اس کو دشمن ہستی قرار دوں

پاتا ہوں مدعا کا ذریعہ قضا کو میں

کیوں اس کی جستجو کا ہو سودا مجھے رتنؔ

مجھ سے اگر جدا ہو تو ڈھونڈوں خدا کو میں

رتن پنڈوروی

حسن عابدی

 یوم پیدائش 07 جولائی 1929

پل رہے ہیں کتنے اندیشے دلوں کے درمیاں

رات کی پرچھائیاں جیسے دیوں کے درمیاں

پھر کسی نے ایک خوں آلود خنجر رکھ دیا

خوف کے ظلمت کدے میں دوستوں کے درمیاں

کیا سنہری دور تھا ہم زرد پتوں کی طرح

در بہ در پھرتے رہے پیلی رتوں کے درمیاں

اے خدا انسان کی تقسیم در تقسیم دیکھ

پارساؤں دیوتاؤں قاتلوں کے درمیاں

آشتی کے نام پر اتنی صف آرائی ہوئی

آ گئی بارود کی خوش بو گلوں کے درمیاں

میرا چہرہ خود بھی آشوب سفر میں کھو گیا

میں یہ کس کو ڈھونڈتا ہوں منزلوں کے درمیاں

حسن عابدی

حافظ لدھیانوی

 یوم پیدائش 07 جولائی 1920

وہ قریۂ مہتاب رہے صبح و مسا یاد

کچھ بھی نہ رہے شہر تمنا کے سوا یاد

انوار کی بارش تھی سر منزل طیبہ

ہر منزل خوش دیکھ کے آتا تھا خدا یاد

اب تک ہیں نگاہوں میں در و بام حرم کے

اب تک ہے مجھے وادئ‌ رحمت کی فضا یاد

ہے سیرت اطہر مرا سرمایۂ ہستی

محبوب دو عالم کی ہے ایک ایک ادا یاد

ڈوبے نہ کبھی میرے مقدر کا ستارا

اک بار جو کر لیں مجھے محبوب خدا یاد

قربان ہوئی جاتی تھیں رحمت کی گھٹائیں

ان کانپتے ہونٹوں کا ہے انداز دعا یاد

ہر ایک کے دامن میں مرادوں کے گہر تھے

حافظؔ مجھے دربار کی ہے شان سخا یاد

حافظ لدھیانوی

ماجد دیوبندی

 یوم پیدائش 07 جولائی 1964

آسماں کی رفعتوں سے طرز یاری سیکھ لو

سر اٹھا کر چلنے والو خاکساری سیکھ لو

پیش خیمہ ہیں تنزل کا تکبر اور غرور

مرتبہ چاہو تو پہلے انکساری سیکھ لو

خود بدل جائے گا نفرت کی فضاؤں کا مزاج

پیار کی خوشبو لٹاؤ مشکباری سیکھ لو

چن لو قرطاس و قلم یا تیغ کر لو انتخاب

کوئی فن اپناؤ لیکن شاہکاری سیکھ لو

پھر تمہارے پاؤں چھونے خود بلندی آئے گی

سب دلوں پر راج کر کے تاج داری سیکھ لو

عشق کا میدان آساں تو نہیں ہے محترم

عشق کرنا ہی اگر ہے غم شعاری سیکھ لو

جس شجر کی چھاؤں ہو ماجدؔ زمانے کے لئے

کیسے ہوگی اس شجر کی آبیاری سیکھ لو

ماجد دیوبندی

گلزار دہلوی

 یوم پیدائش 07 جولائی 1926

عمر جو بے خودی میں گزری ہے

بس وہی آگہی میں گزری ہے

کوئی موج نسیم سے پوچھے

کیسی آوارگی میں گزری ہے

ان کی بھی رہ سکی نہ دارآئی

جن کی اسکندری میں گزری ہے

آسرا ان کی رہبری ٹھہری

جن کی خود رہزنی میں گزری ہے

آس کے جگنوؤ سدا کس کی

زندگی روشنی میں گزری ہے

ہم نشینی پہ فخر کر ناداں

صحبت آدمی میں گزری ہے

یوں تو شاعر بہت سے گزرے ہیں

اپنی بھی شاعری میں گزری ہے

میر کے بعد غالب و اقبال

اک صدا، اک صدی میں گزری ہے

گلزار دہلوی

تلوک چند محروم

 یوم پیدائش 01 جولائی 1887

دست خرد سے پردہ کشائی نہ ہو سکی

حسن ازل کی جلوہ نمائی نہ ہو سکی

رنگ بہار دے نہ سکے خارزار کو

دست جنوں میں آبلہ سائی نہ ہو سکی

اے دل تجھے اجازت فریاد ہے مگر

رسوائی ہے اگر شنوائی نہ ہو سکی

مندر بھی صاف ہم نے کئے مسجدیں بھی پاک

مشکل یہ ہے کہ دل کی صفائی نہ ہو سکی

فکر معاش و عشق بتاں یاد رفتگاں

ان مشکلوں سے عہد برآئی نہ ہو سکی

غافل نہ تجھ سے اے غم عقبیٰ تھے ہم مگر

دام غم جہاں سے رہائی نہ ہو سکی

منکر ہزار بار خدا سے ہوا بشر

اک بار بھی بشر سے خدائی نہ ہو سکی

خود زندگی برائی نہیں ہے تو اور کیا

محرومؔ جب کسی سے بھلائی نہ ہو سکی

تلوک چند محروم

فیضان رضا

 مرا تو کوئی غم تازہ نہیں ہے

مجھے فرقت کا پچھتاوا نہیں ہے

کہیں پر ہم اذیّت پی گئے ہیں

کہیں پر ساغر و مینا نہیں ہے

مقفّل ہو چکی راہِ محبّت

اور اس کا قیس کو صدمہ نہیں ہے

ضرورت سے سوا رختِ سفر ہو

فقیری میں یہ کام اچھا نہیں ہے

کسی کی یاد میں بکھرا ہوا ہوں

کہ دھوکے سے یہ دل بیٹھا نہیں ہے

تماشا ختم ہونے جا رہا ہے

رضا کس آنکھ میں دریا نہیں ہے ؟

فیضان رضا

محمد مشرف خاور

 یوم پیدائش 06 جولائی 

نظر کے پاس رہ کر بھی پہنچ سے دور ہو جانا

محبت میں اسے کہتے ہیں ہم مجبور ہو جانا

خوشا اے دل مداوا ان کے زخموں کا نہیں ورنہ

کہاں ہر زخم کی قسمت میں ہے ناسور ہو جانا

بڑھانا اس طرح سے بے قراری اور بھی دل کی

جھلک عشاق کو دکھلا کے پھر مستور ہو جانا

محبت کا ہمارا دائرہ بس اتباع تک ہے

ہمیں زیبا نہیں ہے سرمد و منصور ہو جانا

نظر چھلکے نہ چھلکے منحصر ہے ظرف پر لیکن

ہے پہلی شرط دل کا درد سے معمور ہو جانا

نظر کو تاب نظارہ رہی ہے تیرے جلووں کی

کہ لازم تو نہیں ہر جلوہ گہ کا طور ہو جانا

تجھے پا لینے کا احساس اس کو کہتے ہیں شاید

ترے عارض کو چھو کر زلف کا مغرور ہو جانا

ہمیں کیا راس آئے بادہ و ساغر کہ اپنا تو

نگاہوں پہ ہے ان کی منحصر مخمور ہو جانا

لباس خاک ہی سے جب مری ساری فضیلت ہے

تو کیوں کر زیب ہے مجھ کو بھلا پھر نور ہو جانا

احمد مشرف خاور