سعدیہ بشیر

 یوم پیدائش 01 اپریل

ہم نہ چندا رہے اور نہ تارا ہوئے

ہم گزارا کیے , ہم گوارا ہوئے

جو میسر تھے وہ سارے روندے گئے

جو تہ خاک ہیں وہ ستارہ ہوئے

چپ کی بکل میں غم کی تھی صورت سوا

  جب شنیدن ہوئے پارا پارا ہوئے

 آنکھ میں ریت کی تابناکی رہی

  جو نہیں.جھک سکے , بے سہارا ہوئے

 میری مٹھی میں جگنو کی کچھ راکھ تھی

پربتوں کے محل بھی اسارا ہوئے

 جن کے الفاظ تھے قند کی ڈوریاں

اپنے لہجوں سے کیا آشکارا ہوئے

 قید گہ میں دیواروں کی جا در ہوئے

ہم اسیری کے لائق دوبارا ہوئے

سعدیہ بشیر 

نسرین سید

 یوم پیدائش 01 اپریل 

تب دیکھنا ، جب معجزہ گر بات کرے گا

اب تم سے یہ پلکوں کا گہر بات کرے گا

خیرات وہ درکار ہے، اُس دستِ عطا سے

کشکول نہیں ، کاسہء سر بات کرے گا

ہیں اور ، جو چپ رہتے ہیں دنیا کے مقابل

یہ عشق ہے، بے خوف و خطر بات کرے گا

کتنا رفو درکار ہے، عجلت میں نہ سُنیو

فرصت سے مرا زخمِ جگر بات کرے گا

جاتے ہوئے رسوا تجھے کر دے، نہیں ممکن

مت سوچ ، ترا شہر بدر بات کرے گا

اس بار اٹھائیں گے نہ احسانِ سماعت

اس بار فقط حُسنِ نظر بات کرے گا

کافی ہے، جو ڈالے گا اچٹتی سی نظر وہ

کافی ہے ، اگر ثانیہ بھر بات کرے گا

سوچا نہ تھا رشوت، نئی تہذیب بنے گی

مشکل ہو کوئی ، لقمہء تر بات کرے گا

مت کرنا کوئی راز ، زمانے کے حوالے

سُن لے گا اِدھر، جا کے اُدھر، بات کرے گا

نسرینؔ اسے رکھ تو سہی لا کے دکاں میں

ہے قدر جنہیں ، اُن سے ہنر بات کرے گا

    نسرین سید

کاملؔ بہزادی

 یوم پیدائش 01 اپریل 1934

آکاش کی حسین فضاؤں میں کھو گیا

میں اس قدر اڑا کہ خلاؤں میں کھو گیا

کترا رہے ہیں آج کے سقراط زہر سے

انسان مصلحت کی اداؤں میں کھو گیا

شاید مرا ضمیر کسی روز جاگ اٹھے

یہ سوچ کے میں اپنی صداؤں میں کھو گیا

لہرا رہا ہے سانپ سا سایہ زمین پر

سورج نکل کے دور گھٹاؤں میں کھو گیا

موتی سمیٹ لائے سمندر سے اہل دل

وہ شخص بے عمل تھا دعاؤں میں کھو گیا

ٹھہرے ہوئے تھے جس کے تلے ہم شکستہ پا

وہ سائباں بھی تیز ہواؤں میں کھو گیا

کاملؔ بہزادی

افروز عالم

 یوم پیدائش 01 اپریل 1975

ہمیشہ ہجرتوں کے سلسلے اچھے نہیں لگتے

ہمیں اب روکھے پھیکے ذائقے اچھے نہیں لگتے

ستارے ان کی منزل کا کبھی عنواں نہیں بنتے

جنھیں پُرخار تنہا راستے اچھے نہیں لگتے

مجھے اڑجانے دے تاکہ فضا کا جائزہ لے لوں

سنہری پٹیوں سے پر بندھے اچھے نہیں لگتے

ستاروں کو کہاں آرام ملتا ہے اندھیرے میں

جبھی تو مجھ کو یہ جلتے دیئے اچھے نہیں لگتے

کبھی وہ بات بھی کہہ دے کہ جو دل میں اتر جائے

بنا سر پیر کے کچھ فلسفے اچھے نہیں لگتے

اگر بہہ جائیں آنسو تو کھلے رخسار کی رنگت

رکے پلکوں پہ تو یہ قافلے اچھے نہیں لگتے

میں اپنے ہی جنوں سے ایک نیا عالم بناؤں گا

مجھے پابند کرتے دائرے اچھے نہیں لگتے

افروز عالم

محمد افضل شیر

 یوم پیدائش 01 اپریل 1964

زندگی تو ہے جستجو کرنا

کوئی خواہش نہ آرزو کرنا

عشق تو کربلا مسلسل ہے

لمحہ لمحہ لہو لہو کرنا

کام ہے آج کل، گریباں کو

چاک کرنا کبھی رفُو! کرنا

شیر آنکھوں سے ہم نے جانا ہے

ہمیں آیا نہیں وضو کرنا

  محمد افضل شیر

عاطف جاوید عاطف

 یوم پیدائش 01 اپریل

سگنل پر وہ چالیس لمحے برسوں ہم کو یاد رہے

گجرے والا بولا تھا جب، صاحب !! جوڑی شاد رہے

چوراہے پر یاد ہے کیسے دیتا تھا مجذوب دعا 

تیرے گھر کا چولہا چوکا صدیوں تک آباد رہے

عقل و دانش، فہم ، فراست، ایک نظر میں ڈھیر ہوۓ 

اُن کی پلکیں اُٹھنے تک بس، ہم اُن کے استاد رہے 

شب کی ہر سلوٹ سے پوچھو کیسے جاگے چاند اور میں 

سُونی رات کے اک بستر پر کیسے دو افراد رہے 

پریم نگر میں گارے مٹی سے بھی گھر بن جاتے ہیں 

بنیادوں میں سچ کی پُختہ اینٹیں ہوں بس یاد رہے

خود پر اسمِ اعظم پڑھ کے خود کو ہی تسخیر کریں 

 کب تک اِس آسیب نگر میں تنہا یہ ہمزاد رہے 

 عاطف جاوید عاطف

الیاس عباسی

 یوم پیدائش 01 اپریل 1985

جسے بھی دیکھو اڑاتا ہے اب ہنسی میری

تماشا بن گئی گویا کہ سادگی میری

یہ اور بات کہ روشن کیا زمانے کو

مگر مجھی کو نہ مل پائی روشنی میری

دعا کرو کہ پھڑک جائے یہ رگِ احساس

بجا رہا ہے کوئی اور بانسری میری

میں اک حقیر سا جگنو ہوں ذات میں اپنی

مگر چراغ کو چبھتی ہے روشنی میری

یہ سوچ کر بھی گناہوں سے باز رہتا ہوں

نہ جانے کون سی ہو سانس آخری میری

ہمیشہ ساتھ جو سائے کی طرح رہتا ہے

قبول کرتا نہیں وہ بھی برتری میری

گلہ میں غیر سے کرتا نہیں کبھی الیاس

ہمیشہ اپنے ہی کرتے ہیں جب نفی میری

الیاس عباسی

ارشد کاکوی

 یوم پیدائش 01 اپریل 1928

ان کی فطرت اس کو کہئے یا کہ فطرت کا اصول 

ڈوب جاتے ہیں ستارے اور بکھر جاتے ہیں پھول 

اک نظر کی کیا حقیقت ہے مگر اے دوستو 

عمر بھر کی موت بن جاتی ہے اک لمحے کی بھول

 

ہم تو ہیں ان محفلوں کے آج تک مارے ہوئے 

جن میں نغموں کی ہے شورش جن میں زلفوں کی ہے دھول 

اور جو کچھ بھی ہے ان کے درمیاں وہ ہے گراں 

زندگی ارزاں ہے اور ہے موت بھی سہل الحصول 

آج تک دہکی ہوئی سینے میں ہے عارض کی آگ 

دل میں اب تک چبھ رہے ہیں ان کی پلکوں کے ببول

 

دے رہے ہیں اس طرح وہ کاکویؔ صاحب کی داد 

پوچھتے ہیں آپ کے اشعار کی شان نزول 

ارشد کاکوی

مشتاق عاجز

 یوم پیدائش 01 اپریل 1944

لہو جلا کے اجالے لٹا رہا ہے چراغ

کہ زندگی کا سلیقہ سکھا رہا ہے چراغ

وفور شوق میں لیلئ شب کے چہرے سے

نقاب زلف پریشاں اٹھا رہا ہے چراغ

ہمارے ساتھ پرانے شریک غم کی طرح

عذاب ہجر کے صدمے اٹھا رہا ہے چراغ

یہ روشنی کا پیمبر ہے اس کی بات سنو

صداقتوں کے صحیفے سنا رہا ہے چراغ

شب سیاہ کا آسیب ٹالنے کے لیے

تمام عمر شریک دعا رہا ہے چراغ

ہوائے دہر چلی ہے بڑی رعونت سے

دیار عشق میں کوئی جلا رہا ہے چراغ

وہ ہاتھ بھی ید بیضا سے کم نہیں عاجزؔ

جو خاک ارض وطن سے بنا رہا ہے چراغ

مشتاق عاجز

سیدہ فرحت

 یوم پیدائش 01 اپریل 1938

نہ فرش خاک پہ ٹھہریں گے نقش پا کی طرح

رواں دواں ہیں فضاؤں میں ہم ہوا کی طرح

پکار وقت کی نزدیک تھی مگر ہم نے

سنا ہے دور سے آتی ہوئی صدا کی طرح

سزائیں دیتی ہے مکر و فریب کی دنیا

صداقتوں کا ہے اظہار اک خطا کی طرح

خدا کرے تجھے احساس درد و غم نہ رہے

دعائے خیر وہ دیتے ہیں بد دعا کی طرح

نہ ہو سخن میں جو شان پیمبری ممکن

خموش رہ کے بھی دیکھیں ذرا خدا کی طرح

جھلک دکھائے کہیں تو امید کا سورج

ہجوم یاس ہے امڈی ہوئی گھٹا کی طرح

سیدہ فرحت