عبدالحئی پیام انصاری

یوم پیدائش 02 جولائی 1942

اپنے بھی انجام کو سوچیں گے لوگ

ڈوبتے سورج کو جب دیکھیں گے لوگ

اب کہاں یہ آگ بجھنے دیں گے لوگ

اپنی اپنی روٹیاں سینکیں گے لوگ

پہلے اکسائیں گے لڑنے کے لیے

پھر تماشا دور سے دیکھیں گے لوگ

اب کہاں مرہم لگائے گا کوئی

اب نمک ہی گھاؤ پر چھڑکیں گے لوگ

روکیں گے ہر ایک کو جس کام سے

چپکے سے وہ کام خود کرلیں گے لوگ

بھول جائیں گے وہ یہ بھی حادثہ

بس یہی دو چار دن چیخیں گے لوگ

دوستی کب تک نبھائیں گی یہ آگ

کب تلک اس آگ سے کھیلیں گے لوگ

جان لیں گے وہ پیام اچھا برا

قلب کی آواز جب سن لیں گے لوگ

عبدالحئی پیام انصاری1942

اپنے بھی انجام کو سوچیں گے لوگ

ڈوبتے سورج کو جب دیکھیں گے لوگ

اب کہاں یہ آگ بجھنے دیں گے لوگ

اپنی اپنی روٹیاں سینکیں گے لوگ

پہلے اکسائیں گے لڑنے کے لیے

پھر تماشا دور سے دیکھیں گے لوگ

اب کہاں مرہم لگائے گا کوئی

اب نمک ہی گھاؤ پر چھڑکیں گے لوگ

روکیں گے ہر ایک کو جس کام سے

چپکے سے وہ کام خود کرلیں گے لوگ

بھول جائیں گے وہ یہ بھی حادثہ

بس یہی دو چار دن چیخیں گے لوگ

دوستی کب تک نبھائیں گی یہ آگ

کب تلک اس آگ سے کھیلیں گے لوگ

جان لیں گے وہ پیام اچھا برا

قلب کی آواز جب سن لیں گے لوگ

عبدالحئی پیام انصاری

عمران یادگیری

یوم پیدائش 02 جولائی 1982

نظم رشتے

دلوں سے محبت وہ سینوں سے اُلفت 

کہاں جا رہی ہے کوئی تو بتا دے 

وہ معشوق و عاشق کہاں کھو گئے ہیں

وہ لیلیٰ وہ مجنوں کدھر کو گئے ہیں

کہاں ہے وہ سماّن و آدر بڑوں کا

وہ ایشور کا سایہ سا سرپر بڑوں کا

وہ بھائی سی چاہت وہ مائی سی مورت

کوئی کھوئی بہنا سے ہم کو ملا دے

دھرم جسکا رکشا ، لہو کے عوض ہے

کہاں ہے وہ بھیّا کوئی تو پتہ دے

وہ پیروں پہ جُھکنا وہ سمّان کرنا

لپٹ جائے ہم سے وہ باپو کہاںہے 

وہ ممتا کی مورت جو ہے وجہِ رحمت

وہ مائی کہاں ہے کوئی تو دکھادے

ہے ہم سب کا داتا وہ رب سارے جگ کا

کوئی تو بتادے وہ رہتا کہاں ہے

وہ رشتے کہاں ہیں جو عمرانؔ پوچھے

کوئی اُسکے اپنوں سے آکر ملا دے

عمران یادگیر

ی۔

 

ابن تاج

یوم پیدائش 02جولائی 1978

گرچہ ہاتھوں کو اٹھا رکھا ہے

بے طلب دستِ دعا رکھا ہے

اب بھی کچھ پاسِ وفا رکھا ہے

کم سہی کچھ تو بچا رکھا ہے

ہے مجھے آبلہ پائی سے غرض

ورنہ اس دشت میں کیا رکھا ہے

سینکڑوں عکس مقید ٹھہرے

مجھ میں کچھ آئینہ سا رکھا ہے

نام آنکھوں کا رکھا برقِ تپاں

اور گیسو کا گھٹا رکھا ہے

رنگ جتنے ہیں جاں ستانی کے

تاجؔ سب ہم پہ روا رکھا ہے

ابن تاج

انیس سلطانہ

یوم پیدائش 02 جولائی 1941

بروز حشر مرا احتساب کیا ہوگا 

کہ اس زمیں کے سوا اور عذاب کیا ہوگا 

مدام فکر میں بے عقل کا تسلسل کار 

کتاب زیست کا آئندہ باب کیا ہوگا 

جواں دلوں میں فقط نفرتیں ہی ملتی ہیں 

زیادہ اس سے کوئی انقلاب کیا ہوگا 

عطا کیا مہ کامل کو عشرتوں کا غرور 

اندھیری رات سے بڑھ کر عذاب کیا ہوگا 

طلسم کیف و نظر مدعائے بے خبری 

طلسم ہوش و خرد کا نصاب کیا ہوگا 

گناہ گار نظر بھی ہے دل کی دھڑکن بھی 

وہ پوچھ لیں گے تو میرا جواب کیا ہوگا 

بہ فیض جرأت رندانہ دیکھنا تو انیسؔ 

ادا شناسوں کا تجھ پر عتاب کیا ہوگا 

انیس سلطانہ

عابد اللہ غٓازی

یوم پیدائش 01 جولائی 1939

 نظم یاد علی گڑھ

وہ چائے کی پیالی پہ یاروں کے جلسے 

وہ سردی کی راتیں وہ زلفوں کے قصے 

کبھی تذکرے حسن شعلہ رخاں کے 

محبت ہوئی تھی کسی کو کسی سے 

ہر اک دل وہاں تھا نظر کا نشانہ 

بہت یاد آتا ہے گزرا زمانہ 

بہت اپنا انداز تھا لاابالی 

کبھی تھے جلالی کبھی تھے جمالی 

کبھی بات میں بات یوں ہی نکالی 

سر راہ کوئی قیامت اٹھا لی 

کسی کو لڑانا کسی کو بچانا 

بہت یاد آتا ہے گزرا زمانہ

کبھی سچی باتوں کو جھوٹا بتایا 

کبھی جھوٹی باتوں کو سچ کر دکھایا 

کبھی راز دل کہہ کے اس کو چھپایا 

کبھی دوستوں میں یوں ہی کچھ اڑایا 

بتا کر چھپانا چھپا کر بتانا 

بہت یاد آتا ہے گزرا زمانہ 

کبھی بزم احباب میں شعلہ افشاں 

کبھی یونین میں تھے شمشیر براں 

کبھی بزم واعظ میں تھے پا بہ جولاں 

بدلتے تھے ہر روز تقدیر دوراں 

جہاں جیسی ڈفلی وہاں ویسا گانا 

بہت یاد آتا ہے گزرا زمانہ 

زمانہ تھا وہ ایک حیوانیت کا 

وہ دور ملامت تھا شیطانیت کا 

ہمیں درد تھا ایک انسانیت کا 

اٹھائے علم ہم تھے حقانیت کا 

بڑھے جا رہے تھے مگر باغیانہ 

بہت یاد آتا ہے گزرا زمانہ 

مقابل میں آئے جسارت تھی کس کو 

کوئی روک دے بڑھ کے ہمت تھی کس کو 

پکارے کوئی ہم کو طاقت تھی کس کو 

کہ ہر بوالہوس کو تھے ہم تازیانہ 

بہت یاد آتا ہے گزرا زمانہ 

خیالات پر شوق کا سلسلہ تھا 

بدل دیں زمانے کو وہ حوصلہ تھا 

ہر اک دل میں پیدا نیا ولولہ تھا 

ہر اک گام احباب کا قافلہ تھا 

ادھر دعویٰ کرنا ادھر کر دکھانا 

بہت یاد آتا ہے گزرا زمانہ 

وہ شہہ راہ میرس کے پر پیچ چکر 

وہ شمشاد بلڈنگ پہ اک شور محشر 

وہ مبہم سی باتیں وہ پوشیدہ نشتر 

وہ بے فکر دنیا وہ لفظوں کے دفتر 

کہ جن کا سرا تھا نہ کوئی ٹھکانہ 

بہت یاد آتا ہے گزرا زمانہ 

کسی کو ہوئی تھی کسی سے محبت 

کوئی کر رہا تھا کسی کی شکایت 

غرض روز ڈھاتی تھی تازہ قیامت 

کسی کی شباہت کسی کی ملامت 

کسی کی تسلی کسی کا ستانا 

بہت یاد آتا ہے گزرا زمانہ 

کوئی غم زدہ تھا کوئی ہنس رہا تھا 

کوئی حسن ناہید پر مر مٹا تھا 

کوئی چشم نرگس کا بیمار سا تھا 

کوئی بس یوں ہی تاکتا جھانکتا تھا 

کبھی چوٹ کھانا کبھی مسکرانا 

بہت یاد آتا ہے گزرا زمانہ 

وہ ہر جنوری میں نمائش کے چرچے 

وہ پر شوق آنکھیں وہ حیران جلوے 

وہ چکر پہ چکر تھے بارہ دری کے 

وہ حسرت کہ سو بار مل کر بھی ملتے 

ہزاروں بہانوں کا وہ اک بہانا 

بہت یاد آتا ہے گزرا زمانہ 

وہ رخ آفتابی پہ ابرو ہلالی 

وہ تمثال سیمیں وہ حسن مثالی 

شگوفوں میں کھیلی گلابوں میں پالی 

وہ خود اک ادا تھی ادا بھی نرالی 

نگاہیں بچا کر نگاہیں ملا کر 

بہت یاد آتا ہے گزرا زمانہ 

وہ ہرچند مجھ کو نہیں جانتی تھی 

مگر میری نظروں کو پہچانتی تھی 

اگرچہ مرے دل میں وہ بس گئی تھی 

مگر بات بس دل کی دل میں رہی تھی 

مگر آج احباب سے کیا چھپانا 

بہت یاد آتا ہے گزرا زمانہ 

وہ اک شام برسات کی دن ڈھلا تھا 

ابھی رات آئی نہ تھی جھٹپٹا تھا 

وہ باد بہاری سے اک گل کھلا تھا 

دھڑکتے ہوئے دل سے اک دل ملا تھا 

نظر سن رہی تھی نظر کا فسانہ 

بہت یاد آتا ہے گزرا زمانہ 

جوانی اداؤں میں بل کھا رہی تھی 

کہانی نگاہوں میں لہرا رہی تھی 

محبت محبت کو سمجھا رہی تھی 

وہ چشم تمنا جھکی جا رہی تھی 

قیامت سے پہلے قیامت وہ ڈھانا 

بہت یاد آتا ہے گزرا زمانہ 

ہمیں بیتی باتیں جو یاد آ رہی تھیں 

وہ مخمور نظریں جو شرما رہی تھیں 

بہت عقل سادہ کو بہکا رہی تھیں 

بڑی بے نیازی سے فرما رہی تھیں 

انہیں یاد رکھنا ہمیں بھول جانا 

بہت یاد آتا ہے گزرا زمانہ 

اب وہ امنگیں نہ دل میں مرادیں 

اب رہ گئیں چند ماضی کی یادیں 

یہ جی چاہتا ہے انہیں بھی بھلا دیں 

غم زندگی کو کہاں تک دعا دیں 

حقیقت بھی اب بن گئی ہے فسانہ 

بہت یاد آتا ہے گزرا زمانہ 

علی گڑھ ہے بڑھ کر ہمیں کل جہاں سے 

ہمیں عشق ہے اپنی اردو زباں سے 

ہمیں پیار ہے اپنے نام و نشاں سے

یہاں آ گئے ہم نہ جانے کہاں سے 

قسم دے کے ہم کو کسی کا بلانا 

بہت یاد آتا ہے گزرا زمانہ 

محبت سے یکسر ہے انجان دنیا 

یہ ویران بستی پریشان دنیا

کمال خرد سے یہ حیران دنیا 

خود اپنے کیے پر پشیمان دنیا 

کہاں لے کے آیا ہمیں آب و دانہ 

بہت یاد آتا ہے گزرا زمانہ 

عابد اللہ غٓازی

 

محشر فیض آبادی

ذلیل و خوار ہو کر ہر طرف سے خوب آیا ھے 

نہ جانے کون سے نالے میں جاکے ڈوب آیا ھے 

میں جب تھانے سے لوٹا تو پڑوسن نے کہا میری 

بہارو پھول برساؤ مرا محبوب آیا ھے 

محشر فیض آبادی

نازاں جمشید پوری

یوم پیدائش 01 جولائی 1950

بدلے میں دعاؤں کے کبھی زر نہیں لیتے 

احسان کسی کا بھی قلندر نہیں لیتے 

خود منزل مقصود لپٹ جاتی ہے ان سے 

رہبر کا سہارا وہ کہیں پر نہیں لیتے 

سو جاتے ہیں بورے پہ چٹائی پہ کہیں بھی 

مفلس تو کبھی مخملی بستر نہیں لیتے 

ہو جائے جہاں رات وہیں دن کو بسیرا 

بے چارے یہ بنجارے کہیں گھر نہیں لیتے 

سب لوٹ لیا کرتے ہیں بلوائی فسادی 

اجڑے ہوئے لوگوں کا مقدر نہیں لیتے 

اشکوں سے ہی ہم پیاس بجھا لیتے ہیں نازاںؔ 

خوددار ہیں کچھ ایسے سمندر نہیں لیتے

نازاں جمشید پوری

ضمیر الدین احمد عرش گیاوی

یوم وفات 01 جولائی 1936

ہمارے جامۂ ہستی کو اک دن چاک‌ ہونا تھا 

ہوئے تھے خاک سے پیدا ہمیں پھر خاک ہونا تھا

ترے غمزے تیری شرمیلی آنکھوں سے یہ کہتے ہیں 

تمہیں جلاد ہونا تھا تمہیں سفاک ہونا تھا

ازل سے مرغ دل کو خطرۂ صیاد کیا ہوتا 

کہ اس کو تو اسیر حلقۂ فتراک ہونا تھا

ہوائے دامن جاناں نہ اپنی خاک تک پہنچی 

مقدر میں تو ممنون مزار پاک ہونا تھا

عدو کیونکر نہ آ جاتا یکایک بزم عشرت میں 

اسے بشاش ہونا تھا مجھے غم ناک ہونا تھا

سیہ بختی مری بھی او قلم ہم دم نہ کیوں ہوتی 

میرے سینے کو بھی ترے ہی صورت چاک‌ ہونا تھا

نہ ہوتی دل میں الفت اپنی کیوں قاتل کے ابرو کی 

کہ مجھ کو تو قتیل خنجر سفاک ہونا تھا

جلال الدین احمد کیوں نہ جاتا عرشؔ دنیا سے 

مجھے مرگ پسر میں مرتے دم غم ناک ہونا تھا

ضمیر الدین احمد عرش گیاوی

بشیر احمد شہید

یوم پیدائش 01 جولائی 1916

دل کے ہر داغ کو سینے سے لگائے رکھیے

خانۂ دل میں یہ فانوس جلائے رکھیے

زندگی وقت کے سانچے میں ڈھلی جاتی ہے

دیدہ و دل کو قرینے سے سجائے رکھیے

شام غم کا جو فسانہ تھا وہ اب ختم ہوا 

صبح امید کا ماحول بنائے رکھیے

اپنے اخلاص و محبت کے ہیں قائل سب لوگ

زندگانی کا یہی رنگ جمائے رکھیے

میں ابھی چپکے سے پی آتا ہوں مے خانے سے

زاہدوں کو ذرا باتوں میں لگائے رکھیے

رازداں اپنا فرشتہ نہیں انساں ہی تو ہے 

دل کے ہر راز کو دل میں ہی چھپائے رکھیے

یہ جو ہے فرصت امروز غنیمت ہے شہیدؔ

آج کے کام کو کل پر نہ اٹھائے رکھیے

بشیر احمد شہید

محبوب خزاں

یوم پیدائش 01 جولائی 1930

ہم آپ قیامت سے گزر کیوں نہیں جاتے 

جینے کی شکایت ہے تو مر کیوں نہیں جاتے 

کتراتے ہیں بل کھاتے ہیں گھبراتے ہیں کیوں لوگ 

سردی ہے تو پانی میں اتر کیوں نہیں جاتے 

آنکھوں میں نمک ہے تو نظر کیوں نہیں آتا 

پلکوں پہ گہر ہیں تو بکھر کیوں نہیں جاتے 

اخبار میں روزانہ وہی شور ہے یعنی 

اپنے سے یہ حالات سنور کیوں نہیں جاتے 

یہ بات ابھی مجھ کو بھی معلوم نہیں ہے 

پتھر ادھر آتے ہیں ادھر کیوں نہیں جاتے 

تیری ہی طرح اب یہ ترے ہجر کے دن بھی 

جاتے نظر آتے ہیں مگر کیوں نہیں جاتے 

اب یاد کبھی آئے تو آئینے سے پوچھو 

محبوبؔ خزاں شام کو گھر کیوں نہیں جاتے

محبوب خزاں