جاوید عارف

 وقت کے آلام میں ہر شخص ہے الجھا ہوا

میں اکیلے ہی نہیں وحشت زدہ ٹوٹا ہوا

اے مسیحا چھوڑ دے اب حال پر اپنے مجھے 

زخمِ دل چارہ گر ی سے اور بھی گہرا ہوا 

آگ گلشن میں لگائی سرکشوں نے ہی مگر

سر کسی معصوم کا ہے دار پر لٹکا ہوا 

موت کی دہلیز کے آگے کھڑی ہے زندگی 

میں ابھی ہوں مال و زر کی حرص میں الجھا ہوا

برق سے پہلے ہوا نے سازشیں کی اس قدر

راکھ کی صورت نشیمن ہے مرا،بکھرا ہوا

دیکھ کر وحشت زدہ ہوں میں چمن کے حال پر

شاخِ گل ہے باغباں کے خوف سے سہما ہوا 

لاکھ تدبیریں کی عارف کچھ نہیں بدلا مگر

جو مقدر میں خدا نے تھا مرے لکھا ہوا

  جاوید عارف

شوزیب کاشر

 سفر پسند کبھی تھا نہ ہوں کہ چلتا رہوں

وہ بے گھری ہے مگر جوں کی توں کہ چلتا رہوں

تمہارے ساتھ سے مطلب ہے منزلوں سے نہیں

قدم قدم پہ ہے ایسا سکوں کہ چلتا رہوں

نہ رنجِ آبلہ پائی نہ خوفِ دربدری

الگ ہی دُھن ہے کوئی ان دنوں کہ چلتا رہوں

کہیں پہنچنا بھی ہے اور چلنا بھی مشکل 

عجیب مخمصے میں ہوں رکوں کہ چلتا رہوں

یہ گمرہی تو کبھی ختم ہونے والی نہیں 

سو زہزنوں سے بھی ملتا چلوں کہ چلتا رہوں

پتے کی بات کھڑے پانیوں سے سیکھی ہے

طرف کوئی بھی ہو بہتا رہوں کہ چلتا رہوں

نہ رہبروں سے شکایت نہ رہزنوں سے گلہ

مری تو اپنی بھی چاہت تھی یوں کہ چلتا رہوں

نہ سنگِ میل ، نہ نقشِ قدم ، نہ قطب نما

نہ ضو فگن ہے فلک نیلگوں کہ چلتا رہوں

کٹھن ضرور ہے مانا یہ زندگی کا سفر

شکستہ پا ہوں پر اتنا تو ہوں کہ چلتا رہوں

تلاشِ ذات بھی کاشر عجب مصیبت ہے

تھکن سے چور ہوں لیکن جنوں کہ چلتا رہوں

شوزیب کاشر

دلاور فگار

 یوم پیدائش 08 جولائی 1929

وطن والو! یہ مصنوعی گرانی دیکھتے جاؤ

کہ سستا ہے لہو، مہنگا ہے پانی دیکھتے جاؤ

وہ شے جسکے لئے جنت کو ٹھکرایا تھا آدم نے

وہ شئے پھر ہو گئی خلد آشینائی دیکھتے جاؤ

جنہیں روٹی نہیں ملتی وہ دس بچوں کے والد ہیں

یہ افلاس اور یہ جوش جوانی دیکھتے جاؤ

ہر اک والد یہاں مثلِ مصور ہم سے کہتا ہے

کہ بعد نقشِ اول نقشِ ثانی دیکھتے جاؤ

غریبوں کے لئے راشن امیروں کے لئے خرمن

مگر مارے گئے ہم درمیانی دیکھتے جاؤ

فگار اس دور میں بھی طنزیہ اشعار کہتا ہے

تم اس شاعر کی آشفتہ بیانی دیکھتے جاؤ

دلاور فگار

منور لکھنوی

 یوم پیدائش 08 جولائی 1897

ہزار کفر ہیں اک چشم پارسا میں تری

بھری ہوئی ہے شرارت ادا ادا میں تری

بقا کو اپنی مشیت تری سمجھتا ہوں

مری حیات‌ قضا کار ہے رضا میں تری

مرے حبیب مری آخرت کے اے ضامن

مرے نصیب کی جنت ہے خاک پا میں تری

یہ کس مقام سے تو نے خطاب فرمایا

سنی گئی مری آواز بھی صدا میں تری

یہ سوچ کر نہ منورؔ نے کچھ کیا شکوہ

وفا کی داد کا پہلو بھی ہے جفا میں تری

منور لکھنوی

ڈاکٹر احمد علی برقی اعظمی

 نظم حیدرآباد دکن

حیدرآباد ہے سرچشمہ تہذیب کہن

جس کی عظمت کے نشاں اس کے ہیں آبنائے وطن

ضوفگن اس میں تھے ہر دور میں حکمت کے چراغ

ہے یہ تہذیب و تمدن کا تر و تازہ چمن

چارمینار ہی اس کی نہیں عظمت کا نشاں

قابل دید ہیں اس کے سبھی آثار کہن

میوزیم اس کا ہے اقصائے جہاں میں مشہور

ہے جو تہذیب و ثقافت کا ہماری درپن

بہمنی اور قطب شاہی زمانے سے یہاں

علم و عرفان کی ہے شمع فروزاں روشن

زیب تاریخ ہیں اسمائے گرامی جن کے

ہے یہ صدیوں سے مشاہیر ادب کا مدفن

مجتبی مغنی و مخدوم کے افکار سے ہے

نام اس شہر کا دنیائے ادب میں روشن

تھا یہ ہر دور میں گہوارہ اردو برقی

صوفگن آج بھی اس شہر میں ہے شمع سخن

ڈاکٹر احمد علی برقی اعظمی

حسنین عاقب

 یوم پیدائش 08 جولائی 1971

اور تھوڑا سا بکھر جاؤں یہی ٹھانی ہے

زندگی میں نے ابھی ہار کہاں مانی ہے

ہاتھ پر ہاتھ دھرے بیٹھے تو کچھ ملتا نہیں

دشت و صحرا کی میاں خاک کبھی چھانی ہے

قتل کو قتل جو کہتے ہیں غلط کہتے ہیں

کچھ نہیں ظل الٰہی کی یہ نادانی ہے

سہم جاتے ہیں اگر پتہ بھی کوئی کھڑکے

جانتے سب ہیں ترا ذمہ نگہبانی ہے

اپنی غیرت کا سمندر ابھی سوکھا تو نہیں

بوند بھر ہی سہی آنکھوں میں ابھی پانی ہے

حسنین عاقب

مینو بخشی

 یوم پیدائش 08 جولائی 1955

کچھ تو خودی کا رنگ ہے کچھ بے خودی کا رنگ

دونوں کا امتزاج ہے یہ زندگی کا رنگ

پیش نگاہ میرے ہزاروں ہی رنگ تھے

دل نے کیا پسند مگر آپ ہی کا رنگ

یہ ہے فریب چشم کہ یہ دل کا واہمہ

ہر گل میں دیکھتی ہوں گل‌ کاغذی کا رنگ

اس کو بھلائے گرچہ زمانہ گزر گیا

آتا ہے یاد آج بھی مجھ کو اسی کا رنگ

رنگیں ہے جس کے دم سے مری کائنات دل

وہ ہے جمال یار کی تابندگی کا رنگ

آہیں بھرے گا کب کوئی پھولوں کو دیکھ کر

آئے گا کب کسی میں بھلا دلبری کا رنگ

اس میں ہے رنگ تیرے رخ بے مثال کا

سب سے جدا ہو کیوں نہ مری شاعری کا رنگ

مینو بخشی

عالم فیضی

 یوم پیدائش 08 جولائی 1990

مشکلوں میں رہ کے اب ہر خوشی نہیں ملتی

زندگی تو ملتی ہے پر بھلی نہیں ملتی

جب سے مل گئی دولت بھول بیٹھے یوں رب کو

ان کی اب دعاؤں میں عاجزی نہیں ملتی

پھر رہا ہے بن کے تو قوم کا مسیحا جو 

تجھ میں کچھ بزرگوں سی سادگی نہیں ملتی

بیٹھ کر جو کرتے ہیں محفلوں میں لفاظی

قول میں بھی اب ان کے دل کشی نہیں ملتی

دیکھنے میں لگتے ہیں جو بہت ہی بھولے سے

لب جو ان کا وا ہوتا کچھ ہنسی نہیں ملتی

شکر رب کی نعمت کا جو سدا نہیں کرتے 

ان کو رب کی دولت بھی دائمی نہیں ملتی

جان بھی اگر عالم تم انھیں ہبہ کردو 

ظالموں کی آنکھوں میں کچھ نمی نہیں ملتی

عالم فیضی

داؤد اسلوبی

 یوم پیدائش 07 جولائی 1961

زندگی اجنبی سی لگتی ہے

آپ کی اک کمی سی لگتی ہے

تم نہ آئے تو روشنی کیسی 

 دور تک تیرگی سی لگتی ہے

اس کا چہرہ ہے چاند سا چہرہ

یاد بھی چاندنی سی لگتی ہے

اسکے ہونٹوں سے پھول جھڑتے ہیں

وہ مجھے پھل جھڑی سی لگتی ہے

اسکی آنکھوں میں روشنی کم ہے

نبض میں بر ہمی سی لگتی

ختم ہوگا نہ زندگی کا سفر

 دور منزل کھڑی سی لگتی

دورِ حاضر ترا خدا حافظ

رہبری رہزنی سی لگتی ہے

وہ نہیں بزم ناز میں داؤد

ایک اس کی کمی سی لگتی ہے

داؤد اسلوبی

اقبال عظیم

 یوم پیدائش 08 جولائی 1913

مانا کہ زندگی سے ہمیں کچھ ملا بھی ہے

اس زندگی کو ہم نے بہت کچھ دیا بھی ہے

محسوس ہو رہا ہے کہ تنہا نہیں ہوں میں

شاید کہیں قریب کوئی دوسرا بھی ہے

قاتل نے کس صفائی سے دھوئی ہے آستیں

اس کو خبر نہیں کہ لہو بولتا بھی ہے

غرقاب کر دیا تھا ہمیں ناخداؤں نے

وہ تو کہو کہ ایک ہمارا خدا بھی ہے

ہو تو رہی ہے کوشش آرائش چمن

لیکن چمن غریب میں اب کچھ رہا بھی ہے

اے قافلے کے لوگو ذرا جاگتے رہو

سنتے ہیں قافلے میں کوئی رہنما بھی ہے

ہم پھر بھی اپنے چہرے نہ دیکھیں تو کیا علاج

آنکھیں بھی ہیں چراغ بھی ہے آئنا بھی ہے

اقبالؔ شکر بھیجو کہ تم دیدہ ور نہیں

دیدہ وروں کو آج کوئی پوچھتا بھی ہے

اقبال عظیم