اقبال احمد اقبال

 یوم پیدائش 13اگست 1969

حسن جاناں جو نگاہوں میں ٹھہر جائے گا 

پھر اسے چھوڑ کے دیوانہ کدھر جائے گا 

جاں بلب رہتا ہے یہ درد محبت ہر دم 

زخم تلوار نہیں ہے کہ جو بھر جائے گا 

جام الفت ہے اثر ہوگا یقینا دل پر 

" کیا خبر تھی کہ رگ جاں میں اتر جائے گا"

وادئ عشق میں آئے ہو سنبھل کر چلنا 

ورنہ یہ دور تلک گرد سفر جائے گا 

دل بیمار کو اک بار نظارہ دے دے 

غم جاناں ہے ذرا اور نکھر جائے گا 

کس کو معلوم تھا آئے گا زمانہ یہ بھی 

آدمی اپنی ہی نظروں سے اتر جائے گا 

لاکھ احساس محبت کو چھپالوں اقبال 

" وہ تو خوشبو ہے ہواؤں میں بکھر جائے گا "

( اقبال احمد اقبال )

دوارکا داس شعلہ

 یوم پیدائش 13 اگست 1910

اپنوں کے ستم یاد نہ غیروں کی جفا یاد

وہ ہنس کے ذرا بولے تو کچھ بھی نہ رہا یاد 

کیا لطف اٹھائے گا جہان گزراں کا

وہ شخص کہ جس شخص کو رہتی ہو قضا یاد

ہم کاگ اڑا دیتے ہیں بوتل کا اسی وقت

گرمی میں بھی آ جاتی ہے جب کالی گھٹا یاد

محشر میں بھی ہم تیری شکایت نہ کریں گے

آ جائے گی اس دن بھی ہمیں شرط وفا یاد

پی لی تو خدا ایک تماشا نظر آیا

آیا بھی تو آیا ہمیں کس وقت خدا یاد

اللہ ترا شکر کہ امید کرم ہے

اللہ ترا شکر کہ اس نے بھی کیا یاد

کل تک ترے باعث میں اسے بھولا ہوا تھا

کیوں آنے لگا پھر سے مجھے آج خدا یاد

دوارکا داس شعلہ

کرم حیدری

 یوم پیدائش 12اگست 1915

میں دشت زندگی کو چلا تھا نکھارنے

اک قہقہہ لگایا گزرتی بہار نے

گزرا ہوں جب سلگتے ہوئے نقش چھوڑتا

دیکھا ہے مجھ کو غور سے ہر رہ گزار نے

میکش نے جام زہر ہی منہ سے لگا لیا

پاگل بنا دیا جو نشے کے اتار نے

انسان حد‌ نور سے آگے نکل گیا

چھوڑا مگر نہ اس کو لہو کی پکار نے

ان مہ رخوں کی ہم سے جو یہ بے رخی رہی

جانا پڑے گا چاند پہ کچھ دن گزارنے

کرتے ہیں وہ ستارے بھی اب مجھ پہ چشمکیں

چمکا دیا جنہیں مری شب ہائے تار نے

ان گل کدوں کو بھی کوئی اے کاش دیکھتا

جھلسا ہے جن کو آتش فصل بہار نے

لاؤں کہاں سے ان کے لیے اور غم گسار

جو غم دئے ہیں مجھ کو مرے غم گسار نے

میری سرشت میں تھی محبت کی پرورش

مجھ کو قلم دیا مرے پروردگار نے

بخشا ہے اپنے حسن کا پرتو مجھے کرمؔ

فطرت کے ہر جمیل و حسیں شاہکار نے

کرم حیدری

وحید اختر

 یوم پیدائش 12 اگست 1935

اندھیرا اتنا نہیں ہے کہ کچھ دکھائی نہ دے

سکوت ایسا نہیں ہے جو کچھ سنائی نہ دے 

جو سننا چاہو تو بول اٹھیں گے اندھیرے بھی

نہ سننا چاہو تو دل کی صدا سنائی نہ دے

جو دیکھنا ہو تو آئینہ خانہ ہے یہ سکوت

ہو آنکھ بند تو اک نقش بھی دکھائی نہ دے 

یہ روحیں اس لیے چہروں سے خود کو ڈھانپے ہیں

ملے ضمیر تو الزام بے وفائی نہ دے

کچھ ایسے لوگ بھی تنہا ہجوم میں ہیں چھپے

کہ زندگی انہیں پہچان کر دہائی نہ دے

ہوں اپنے آپ سے بھی اجنبی زمانے کے ساتھ

اب اتنی سخت سزا دل کی آشنائی نہ دے

سبھی کے ذہن ہیں مقروض کیا قدیم و جدید

خود اپنا نقد دل و جاں کہیں دکھائی نہ دے 

بہت ہے فرصت دیوانگی کی حسرت بھی

وحیدؔ وقت گر اذن غزل سرائی نہ دے

وحید اختر

جمیل ملک

 یوم پیدائش 12اگست 1928

رستے میں لٹ گیا ہے تو کیا قافلہ تو ہے

یارو نئے سفر کا ابھی حوصلہ تو ہے

واماندگی سے اٹھ نہیں سکتا تو کیا ہوا

منزل سے آشنا نہ سہی نقش پا تو ہے

ہاتھوں میں ہاتھ لے کے یہاں سے گزر چلیں

قدموں میں پل صراط سہی راستا تو ہے

مانگے کی روشنی تو کوئی روشنی نہیں

اس دور مستعار میں اپنا دیا تو ہے

یہ کیا ضرور ہے میں کہوں اور تو سنے

جو میرا حال ہے وہ تجھے بھی پتا تو ہے

اپنی شکایتیں نہ سہی تیرا غم سہی

اظہار داستاں کا کوئی سلسلہ تو ہے

ہم سے کوئی تعلق خاطر تو ہے اسے

وہ یار با وفا نہ سہی بے وفا تو ہے

وہ آئے یا نہ آئے ملاقات ہو نہ ہو

رنگ سحر کے پاس خرام صبا تو ہے

پاؤں کی چاپ سے مری دھڑکن ہے ہم نوا

اس دشت ہول میں کوئی نغمہ سرا تو ہے

سورج ہمارے گھر نہیں آیا تو کیا ہوا

دو چار آنگنوں میں اجالا ہوا تو ہے

کانٹا نکل بھی جائے گا جب وقت آئے گا

کانٹے کے دل میں بھی کوئی کانٹا چبھا تو ہے

میں ریزہ ریزہ اڑتا پھروں گا ہوا کے ساتھ

صدیوں میں جھانک کر بھی مجھے دیکھنا تو ہے

آشوب آگہی کی شب بے کنار میں

تیرے لیے جمیلؔ کوئی سوچتا تو ہے

جمیل ملک

ادہم گوونڈی

 یوم پیدائش 10 اگست 

موسلا دھار ہے برسات چلے آؤ اب

مان بھی جاؤ مِری بات چلے آؤ اب 

آپ سے بچھڑے ہوئے بیت گیا ایک برس

آپ سے کر لوں ملاقات چلے آؤ اب

ہجر کے دن کو شبِ وصل میں تبدیل کرو

سرد پڑ جائیں نہ جذبات چلے آؤ اب

مشورہ دیجیے دل کو میں سنبھالوں کیسے

چاہتا ہے یہ خرافات چلے آؤ اب

اب نہ تڑپاؤ، تمھیں اس رخ زیبا کی قسم

منتظر رہتا ہوں دن رات چلے آؤ اب

آسرا ہے مجھے بس آپ کا میرے ادہمؔ 

 ہر طرف ہیں مِرے صدمات چلے آؤ اب

 

 ادہمؔ گونڈوی

ادیب دموہی

 یوم پیدائش 10 اگست 1978 

گلوں میں رنگ بھلے موسمِ بہار کا ہے

مگر یہ رنگ حقیقت میں وصلِ یار کا ہے

شکست کھا کے محبت میں غم نہیں کرنا

وہ جانثار نہیں جس کو رنج ہار کا ہے

طلب میں پھولوں کے ہاتھوں کو کر لیا زخمی

سمجھ رہے ہیں کہ یہ بھی قصور خار کا ہے 

عمل کو دیکھو نہ زر خار پیراہن دیکھو 

مدارِ حسن عمل پر ہی ذی وقار کا ہے

نہ وصلِ یار نہ دنیا کی رونقوں میں ہے وہ

جو لطف دوستو الفت میں انتظار کا ہے

بہانا کر نہیں پایا میں چاہ کر بھی ادیب

کہ حکم پینے کا مجھ کو نگاہ یار کا ہے 

ادیب دموہی

عقیل عباس جعفری

 یوم پیدائش 10 اگست 1957

رہیے احباب سے کٹ کر کہ وبا کے دن ہیں

سانس بھی لیجیے ہٹ کر کہ وبا کے دن ہیں

وہ جنہیں خود سے بھی ملنے کی نہیں تھی فرصت

رہ گئے خود میں سمٹ کر کہ وبا کے دن ہیں

رونق بزم جہاں خود کو سمجھنے والے

آ گئے گھر کو پلٹ کر کہ وبا کے دن ہیں

کیا کسی اور سے اب حرف تسلی کہیے

روئیے خود سے لپٹ کر کہ وبا کے دن ہیں

ایک جھٹکے میں ہوئے شاہ و گدا زیر و زبر

رہ گئی دنیا الٹ کر کہ وبا کے دن ہیں

سب کو معلوم ہے تعبیر تو یکساں ہوگی

خواب ہی دیکھ لیں ہٹ کر کہ وبا کے دن ہیں

ایک کمرے میں سمٹ آئی ہے ساری دنیا

رہ گئے خانوں میں بٹ کر کہ وبا کے دن ہیں

یہ مرا رنگ تغزل تو نہیں ہے لیکن

اک غزل لکھی ہے ہٹ کر کہ وبا کے دن ہیں

عقیل عباس جعفری

اشتیاق احمد یار

 یوم پیدائش 10 اگست

دیارِ عشق میں محشر بپا تھا

کسی کی آنکھ سے آنسو گِرا تھا

لگی تھی آگ سارے پانیوں میں

کلی نے قطرہء شبنم چُھوا تھا

نہیں ایسا کسی کی شاعری میں

جو میں نے آنکھ میں اُس کی پڑھا تھا

گِرا طوفاں کے آگے بے بسی سے

ضرورت سے شجر اونچا ہُوا تھا

کہاں اب لوٹ کے آئے گا وہ دن

کسی نے جب مجھے اپنا کہا تھا

قدم رنجا ہوئے صحرا میں جب وہ

گلستاں جا کے صحرا میں بسا تھا

میں زنداں میں مقیّد تھا ولیکن

خیالِ یار کا روزن کُھلا تھا

جہاں پر لوگ مَنّت مانگتے تھے

وہ میرے دلبراں کا نقشِ پا تھا

میسّر تھا نہیں پانی کہیں پر

کہ دریا آنکھ میں اُترا ہوا تھا

اشتیاق احمد یاد

پاپولر میرٹھی

 یوم پیدائش 09 اگست 1956

ایک بیوی کئی سالے ہیں خدا خیر کرے

کھال سب کھینچنے والے ہیں خدا خیر کرے

تن کے وہ اجلے نظر آتے ہیں جتنے یارو

من کے وہ اتنے ہی کالے ہیں خدا خیر کرے

کوچۂ یار کا طے ہوگا سفر اب کیسے

پاؤں میں چھالے ہی چھالے ہیں خدا خیر کرے

میرا سسرال میں کوئی بھی طرفدار نہیں

ان کے ہونٹوں پہ بھی تالے ہیں خدا خیر کرے

کیا تعجب ہے کسی روز ہمیں بھی ڈس لیں

سانپ کچھ ہم نے بھی پالے ہیں خدا خیر کرے

ایسی تبدیلی تو ہم نے کبھی دیکھی نہ سنی

اب اندھیرے نہ اجالے ہیں خدا خیر کرے

ہر ورق پر ہے چھپی غیر مہذب تصویر

کتنے بیہودہ رسالے ہیں خدا خیر کرے

پاپولرؔ ہاتھ میں کٹا ہے تو بستے میں ہیں بم

بچے بھی کتنے جیالے ہیں خدا خیر کرے

پاپولر میرٹھی