عمران عاشر

 یوم پیدائش 01 دسمبر 

بند کر اِک نام کی ہر روز تھاپ

بس دلا اب اور نہ اُس کو الاپ

اُس نے میرا ہاتھ پکڑا اور لکھا

تم مرے ہو اور آگے فُل سٹاپ

اب تو صحرا ہے یہاں دریا بھی تھا

دیکھ لے آنکھوں سے اب اٹھتی یہ بھاپ

ایک کتے کی بجھائی پیاس اور

ایک پُن سے دھل گئے سارے ہی پاپ

زیست کے کُرتے کا کالر اور ہے

اور مری گردن کا عاشر اور ناپ

  عمران عاشر

رفیق سندیلوی

 یوم پیدائش 01 دسمبر 1961

مَیں تیری آگ کے اندر اُتر کے دیکھوں گا

جَلوں گا اور کرشمے ہُنر کے دیکھوں گا

تُجھے پتا چلے آبِ رواں کو کیا دُکھ ہے

مَیں ایک دن تُجھے چھاگل میں بھر کے دیکھوں گا

مِلاؤں گا نئے اجزا ترے مُرکّب میں

دوبارہ حُسن کی تشکیل کر کے دیکھوں گا

مرا مزاج کُہستانی ہے مگر پھر بھی

 ہَوا میں ریت کی صورت بکھر کے دیکھوں گا

ہمیشہ مَیں نے تُجھے سَرسَری ہی دیکھا ہے

حجاب اُٹھاؤں گا اور آنکھ بھر کے دیکھوں گا

 تری تہوں میں پڑا ہی نہیں رہوں گا مَیں

بس ایک جست بھروں گا، اُبھر کے دیکھوں گا 

ہمیشہ متن کا کچھ حصّہ چھوٹ جاتا ہے 

سو آج شب تری تلخیص کر کے دیکھوں گا

رفیق سندیلوی

یوسف ظفر

 یوم پیدائش 01 دسمبر 1914

صبح نو مغرب میں ہے بیدار بیداروں کے ساتھ

اور ہم گردش میں ہیں بے نور سیاروں کے ساتھ

چیختی کرنیں فضا کی دل کشی کو لے اڑیں

دھوپ سایوں سے لگی ہے سائے دیواروں کے ساتھ

دوش پر قابیل کے ہے لاش پھر ہابیل کی

لمحے قبریں کھودتے ہیں اپنی منقاروں کے ساتھ

نار نمرود اور گلزار براہیم ایک ہے

پھول بھی لو دے رہے ہیں آج انگاروں کے ساتھ

دیکھ اے چشم زلیخا قدر اپنے پیار کی

آج پھر یوسف کے بھائی ہیں خریداروں کے ساتھ

آل موسیٰ نے کیا عیسیٰ کو پھر بالائے دار

ہیں حواری بھی یہودی سنگ دل یاروں کے ساتھ

قبلۂ اول صلاح الدین ایوبی کو ڈھونڈ

آ ملی دیوار گریہ تیری دیواروں کے ساتھ

اے مسیحا زہر دے لیکن نہ دست غیر سے

یہ ستم اللہ اکبر اپنے بیماروں کے ساتھ

اس سیاست کی فضا میں سانس لینا ہے عذاب

دشمن اپنے ساتھ ہیں اغیار ہیں یاروں کے ساتھ

کربلا میں یکہ و تنہا حسین ابن علی

تعزیے شہروں میں ہیں لاکھوں عزاداروں کے ساتھ

دوستی کا حشر دیکھا تو کھلا ہم پر ظفرؔ

حشر میں کھل کر کریں گے دشمنی پیاروں کے ساتھ

یوسف ظفر

تابش رامپوری

 اک پیکرِجمال کی تنویر دیکھ کر

تصویر ہوگیا ہوں میں تصویر دیکھ کر

دل چاہتا ہے زلفِ گرہ گیر ہی رہوں 

اے شوخ تیر ے زلف کی زنجیر دیکھ کر

جنت کو دیکھنے کی تمنا جواں ہوئی

لوٹے ہیں جب سے وادئِ کشمیر دیکھ کر

صنفِ ادب میں نثر کو بھی اہمیت ملی

شبلی , حسین , حالی کی تحریر دیکھ کر

سپنے ہمارے پاس ہیں اور نیند اس کے پاس

شرمندہ ہم ہیں خواب کی تعبیر دیکھ کر

کیف و سرور پر ہے اجارہ امیر کا

پروائیاں بھی چلتی ہیں جاگیر دیکھ کر

عالم تمام حلقۂ احباب ہو گیا

تابش ترے کلام کی توقیر دیکھ کر

تابشِ رامپوری 

عاصم اعجاز

 یوم پیدائش 29 نومبر 1971

ترے بیمار سے الجھا ہوا ہے 

مرے محسن کو جانے کیا ہوا ہے 

سفینہ ساحلوں تک آ تو جائے 

ہوا نے راستہ بدلا ہوا ہے 

فضا میں تشنگی پھیلی ہوئی ہے 

مسافر دشت میں ٹھہرا ہوا ہے 

اکٹھے گھومتے ہیں قیس و لیلیٰ 

زمانہ اسقدر بدلا ہوا ہے 

میں اب تک گر گیا ہوتا زمیں پر 

کسی کے ہاتھ نے تھاما ہوا ہے 

تری جانب قدم اٹھتے نہیں ہیں 

مجھے حالات نے روکا ہوا ہے 

ادھوری خواہشیں کب تک سمیٹوں 

یہ ملبہ دور تک بکھرا ہوا ہے 

 اندھیروں کا ہمارے گھر کے عاصمؔ 

پس دیوار بھی چرچا ہوا ہے

عاصم اعجاز

ظریف جبلپوری

 یوم پیدائش 30 نومبر 1913

نمائش کا سجدہ

فرشتوں کو جب سے عداوت نہیں ہے

محبت ابھی تک محبت نہیں ہے 

اگر عاشقی میں سیاست نہیں ہے

حسینوں کے دل پر حکومت نہیں ہے

جھکانے کو ہر درد پہ سر تو جھکا دوں

نمائش کا سجدہ عبادت نہیں ہے

میں عاشق ہو مفلس ہوں ہے چاکدامن

مگر میرے چہرے پہ وحشت نہیں ہے

وہ اتوار کو مجھ سے مل جائیں آکر

سنیچر کے دن نیک ساعت نہیں ہے

مجھے میرے سرکار دفتر ہے پیارا 

مجھے دل لگانے کی فرصت نہیں ہے

عجب کار فرما ہے ان کا تصور

کہ فرقت بھی رنج فرقت نہیں ہے

مجھے ناز بردار اپنا بنا لو

تمہاری سمجھ میں نزاکت نہیں ہے

میرے غم کدے میں نہ بجلی نہ بتی

دل جل رہا ہے تو ظلمت نہیں ہے

الٹ دیں امیروں کا یہ تخت شاہی

فقیروں کی ڈنڈے میں طاقت نہیں ہے

تمہاری ہی خاطر یہ قربانیاں ہیں

رقیبوں سے بھی مجھ کو عداوت نہیں ہے

لکھا نام اپنا وردی پہن جنگ پر جا

ذرا تجھ کو شوق شہادت نہیں ہے

اٹھالے بیاباں وحشت کو سر پر 

محبت میں کیا اتنی طاقت نہیں ہے

مرا خانہء دل دیکھا تو بولے

ہے ویسے تو اچھا کھلی چھت نہیں ہے

ظریف ایسی الفت سے باز آئے ہم تو

کہ جسمیں مصیبت ہے راحت نہیں ہے

ظریف جبلپوری

مولانا عامر عثمانی

 یوم پیدائش 30 نومبر 1920

عشق کے مراحل میں وہ بھی وقت آتا ہے

آفتیں برستی ہیں دل سکون پاتا ہے

آزمائشیں اے دل سخت ہی سہی لیکن

یہ نصیب کیا کم ہے کوئی آزماتا ہے

عمر جتنی بڑھتی ہے اور گھٹتی جاتی ہے

سانس جو بھی آتا ہے لاش بن کے جاتا ہے

آبلوں کا شکوہ کیا ٹھوکروں کا غم کیسا

آدمی محبت میں سب کو بھول جاتا ہے

کارزار ہستی میں عز و جاہ کی دولت

بھیک بھی نہیں ملتی آدمی کماتا ہے

اپنی قبر میں تنہا آج تک گیا ہے کون

دفتر عمل عامرؔ ساتھ ساتھ جاتا ہے

عامر عثمانی

زین احترام

 چار دن کی یہ زندگانی ہے

موت بر حق ہے سب کو آنی ہے

پھر یہ طاقت نہیں رہے شاید

 کر لے سجدے ابھی جوانی ہے

عقل کہتی رہی خسارہ ہے

عشق نے بات کس کی مانی ہے

 گفتگو نے بتا دیا اس کی

مفلسی میں بھی خاندانی ہے

زین تو روح کو سنوارا کر

روح باقی ہے جسم فانی ہے

زین احترام

کاشف ظریف

 یوم پیدائش 29 نومبر 

لقمہ ذرا حرام کا ٹھونسا نہ پیٹ میں

اس نے ہوس تو ڈالنی چاہی پلیٹ میں

اس کے لبوں کا میٹھا مِرے منہ میں بھر گیا

اتنی نہیں مٹھاس ملی چاکلیٹ میں

میں آگ ہوں جو مجھ کو سمجھتا ہے آبِ جو

آئے گا ایک روز وہ میری لپیٹ میں

پرکھوں کی یادگار ہے سونے سا ظرف یہ

اور مانگتے ہو تم اسے پیتل کے ریٹ میں

اس کو کھنڈر نہ جان یہی تھا کبھی محل

چمگادڑیں ہو دیکھتے جس خستہ گیٹ میں

وہ ہٹ گیا رسولِ محبت کی راہ سے

انسانیت کا قتل جو کرتا ہے ہیٹ میں

کاشف ظریف

سید مرتضی بسمل

 یوم پیدائش 29 نومبر

درد ہے وحشت ہے اور دل کا عذاب

ہر طرف ظلمت ہے اور دل کا عذاب

کچھ خزانہ ہے نہیں اس کے بغیر

دیکھ لو، فرقت ہے اور دل کا عذاب

یہ اذیت ختم ہو سکتی نہیں

تا ابد آفت ہے اور دل کا عذاب

پاس میرے نوکری جب ہے نہیں

لازمی ذلّت ہے اور دل کا عذاب

ہے اثاثہ زندگی کا بس یہی

یاد ہے خلوت ہے اور دل کا عذاب

یہ عذابِ مرگ بسمل کچھ نہیں

بس کٹھن چاہت ہے اور دل کا عذاب

سید مرتضیٰ بسمل