زاہدہ شمسی

یوم پیدائش 02 نومبر 1972

پہلے مسرور تھا ، غم سے اب چور ہے

وہ بھی دل کو بنائے ہوئے طور ہے

بس صداقت کی محفل سجایا کرو

سر کٹانا اگر تم کو منظور ہے

کردیا سامنے سب کے رسوا مجھے

میری غزلوں کو پڑھ کر جو مشہور ہے

مت سناؤ محبت کی رنگیں غزل

میرا پردیسی ساجن بہت دور ہے

غم ہی ملتا ہے شمسی رہِ عشق میں

زندگانی کیا ، یہ تو دستور ہے

زاہدہ شمسی

 

مرزاخان ارشدؔ شمس آبادی

یوم پیدائش 02 نومبر 1958

خامہ ناقص میں بھی دریا سی روانی لکھ دے

اے قلم نعتِ محمدؐ کے معانی لکھ دے

میری نسبت ہے بلالی تو مجھے خوف کہاں 

سر محمدؐ پہ بھی قربان جوانی لکھ دے

بے قراری نے تَجَسُّس سے نمو پائی ہے 

بس مدینے کی فضا شام سہانی لکھ دے

قلبِ بیمار کو دیدارِ محمدؐ کی طلب 

زیست میں ایک حقیقی یہ کہانی لکھ دے

کاش وہ کوچہِ انوار فضائیں دیکھوں

خشک ہونٹوں پہ مدینے کا تو پانی لکھ دے

ہر ادا ہو بھی محمدؐ کے غلاموں کی طرح

کوئی اجداد کی معروف نشانی لکھ دے

اب لیے جاتا نہیں عشق کہیں اور مجھے

ان کی مل جائے اگر قید سہانی لکھ دے

نالہ ارشدؔ کا یہی کاتبِ تقدیر سدا 

پس مقدر میں وہاں نقل مکانی لکھ دے

مرزاخان ارشدؔ شمس آبادی

 

قوی خان

یوم پیدائش 01 نومبر 1997

جتنی مہلت ملی، ہے غنیمت یہاں

ساٹھ، پینسٹھ کہ ستر برس، خوش رہو

جو ملا جس قدر بھی ملا خوب ہے

مال و دولت کی چھوڑو ہوس، خوش رہو

کوئی گل تم کو سمجھے یا موتی کوئی

یا ہی سمجھے کوئی خار و خَس، خوش رہو

لاکھ دنیا تمہاری مخالف رہے

تم نہ ہونا مگر ٹس سے مَس، خوش رہو

عشق کا بھی قوی وہ ہی دستور ہے

ہے جو دستورِ قید و قفس، خوش رہو

قوی خان

حرا رانا

یوم پیدائش 01 نومبر 1972

آج پھر سے ترے دیار میں ہوں

یعنی پھر تیرے اختیار میں ہوں

اس کہانی کا یہ ہوا انجام

آج میں دشتِ بے کنار میں ہوں

کوئی رستہ دکھائی دیتا نہیں

دھند کیسی ہے کس غبار میں ہوں

آج کل کس پہ ہے کرم تیرا

میں تو ویسے بھی کس شمار میں ہوں

ہوش کیسےرہےگا دل کو ترا

میں ترے درد کے خمار میں ہوں

ایک دنیا ہے میرے در پہ حراؔ

اور میں تیرے انتظار میں ہوں

حرا رانا

آفاق فاخری

یوم پیدائش 01 نومبر 1956

کیا ضروری کہ گروں میں تو سنبھالے کوئی 

اور مرے پاؤں کا کانٹا بھی نکالے کوئی 

خوشبوؤں کی طرح چاہیں گے زمانے والے 

پہلے کردار کو پھولوں سا بنا لے کوئی 

آج کے دور میں شہرت کی تمنا ہو اگر 

اپنے چہرے پہ کئی چہرے لگا لے کوئی 

اک دیا ہم نے جلایا جو سر راہ گزر 

کر نہ دے اس کو ہواؤں کے حوالے کوئی 

شب کی تاریکی میں بھی نور کا عالم ہوگا 

پہلے پلکوں پہ ستاروں کو سجا لے کوئی 

چاہے تو اپنے ہر اک حسن عمل سے آفاقؔ 

اپنے ماں باپ کی ہر وقت دعا لے کوئی 

آفاق فاخری

نیراعظمی

یوم پیدائش 01 نومبر 1954

اس کے دل میں بھی وفا ہے مجھے معلوم نہ تھا

پھول پتھر پہ کھلا ہے مجھے معلوم نہ تھا

چشمِ ساقی میں نشہ ہے مجھے معلوم نہ تھا

جام خالی بھی بھرا ہے مجھے معلوم نہ تھا

تیری بکھری ہوئی زلفوں کی مہک سے پہلے

سانس بھی بادِ صبا ہے مجھے معلوم نہ تھا

جس کو پانے کے لیے کتنی نقابیں الٹیں

دل کے پردے میں چھپا ہے مجھے معلوم نہ تھا

جو سرِ شام چراغوں کو بجھا دیتی ہے

میرے دامن کی ہوا ہے مجھے معلوم نہ تھا

مفتیِ دین کے فتوے کو نہ فتویٰ سمجھا

تیری رحمت سے بڑا ہے مجھے معلوم نہ تھا

سجدہ ریزی سے تو اچھی تھی مری لاعلمی

کوئی بت ہے کہ خدا ہے مجھے معلوم نہ تھا

گھپ اندھیرے میں حقیقت ہوئی روشن نیّرؔ

دل کا ہر داغ دیا ہے مجھے معلوم نہ تھا

نیراعظمی

قمر پیامی

یوم پیدائش 01 نومبر 1952

جذبات سے عاری ہے قمر چہرہ بتوں کا

کیا جانیے یہ کونسی مٹی کے بنے ہیں

قمر پیامی

پروین کمار اشک

یوم پیدائش 01 نومبر 1951

سمندر آنکھ سے اوجھل ذرا نہیں ہوتا 

ندی کو ڈر کسی چٹان کا نہیں ہوتا 

وہ جب بھی روتا ہے میں ساتھ ساتھ روتا ہوں 

مزے کی بات ہے اس کو پتا نہیں ہوتا 

مسافروں کے لیے منزلیں ہی ہوتی ہیں 

مسافروں کے لیے راستہ نہیں ہوتا 

تماشا گاہ میں کس کا تماشا ہوتا ہے 

تماش بینوں کو اس کا پتا نہیں ہوتا 

میں روز فون پر اس کو صدائیں دیتا ہوں 

خدا کے ساتھ مرا رابطہ نہیں ہوتا 

جہاں ملیں انہیں سجدہ گزاریئے صاحب 

محبتوں کے لیے سوچنا نہیں ہوتا 

وہاں چراغ جلاتا ہوں زندگی کا اشکؔ 

جہاں ہوا کے لیے راستہ نہیں ہوتا 

پروین کمار اشک

منظر عباس نقوی

یوم پیدائش 01 نومبر 1933

جب تصور میں وہ بادیدۂ تر آتے ہیں

کیسے موتی مرے دامن میں نظر آتے ہیں

وہ بنا دیتے ہیں ہر دشت کو رشکِ گلزار

کوئے جاناں سے جو اک بار گزر آتے ہیں

زیست دشوار سہی غم سے گراں بار سہی

ہم کو مر مر کے بھی جینے کے ہنر آتے ہیں

منظر عباس نقوی

دتا تریہ کیفی

یوم پیدائش 01 نومبر 1955

اک خواب کا خیال ہے دنیا کہیں جسے 

ہے اس میں اک طلسم تمنا کہیں جسے 

اک شکل ہے تفنن طبع جمال کی 

اس سے زیادہ کچھ نہیں دنیا کہیں جسے 

خمیازہ ہے کرشمہ پرستئ دہر کا 

اہل زمانہ عالم عقبیٰ کہیں جسے 

اک اشک ارمیدۂ ضبط غم فراق 

موج ہوائے شوق ہے دریا کہیں جسے 

باوصف ضبط راز محبت ہے آشکار 

عقدہ ہے دل کا عقد ثریا کہیں جسے 

برہم زن حجاب ہے خود رفتگی حسن 

اک شان بے خودی ہے زلیخا کہیں جسے 

عکس صفائے قلب کا جوہر ہے آئینہ 

وارفتۂ جمال خود آرا کہیں جسے 

رم شیوہ ہے صنم تو ہے رم آشنا یہ دل 

حاصل ہے مجھ کو عیش مہیا کہیں جسے 

سب کچھ ہے اور کچھ بھی نہیں دہر کا وجود 

کیفیؔ یہ بات وہ ہے معما کہیں جسے

دتا تریہ کیفی