انیسہ صابری

یوم پیدائش 27 اپریل 1977

بجھتے ہوئے دیئے کو جلایا ہے آپ نے

دل میں مرے خوشی کو جگایا ہے آپ نے

ایسے نظر کا تیر چلایا ہے آپ نے

دل کو مرے دیوانہ بنایا ہے آپ نے

غم آپ نے دیئے تو مرا حوصلہ بڑھا

کیسے کہوں کہ دل کو دکھایا ہے آپ نے

ہیں کس کے انتظار میں آنکھیں بچھی ہوئیں

کس کے لیے یہ گھر کو سجایا ہے آپ نے

لوگوں نے خوب داد بھی دی ، تالیاں بجیں

محفل میں جو بھی شعر سنایا ہے آپ نے

دنیا کی چشم آپ پہ اس وقت ہے اٹھی

جب بارِ غم انیسہ اٹھایا ہے آپ نے

انیسہ صابری

 

مملکت بدر

یوم وفات 26 اپریل 2021

نوحہ وحدت کا مرکز

کس سمت ہے دشتِ کرب و بلا معبود کا کعبہ کہتا ہے

آ دیکھ لے مرکز وحدت کا شبیر کا سجدہ کہتا ہے

سر ننگے ہیں زینب میداں میں دنیا کا اندھیرا کہتا ہے

کس طرح چھپالیں دامن میں اجڑا ہوا خیمہ کہتا ہے

عباس وفا کے سائے میں یوں مشک بھری تھی پانی سے

ہر موج تمہاری ہو کے رہی بہتا ہوا دریا کہتا ہے

لیلیٰ ہیں سرہانے بیٹے کے عاشور کی شب ہے آنسو ہیں 

آرام سے اکبر سوتے ہیں شمعوں کا اجالا کہتا ہے

ہے رحلِ امامت پر قرآں یا باپ کے ہاتھوں پر اصغر

امت کو بچالیں گے ہنس کر معصوم ارادہ کہتا ہے

شانے بھی کٹے زخمی بھی ہوئے پانی نہ مگر خیمے میں گیا

دریا کے کنارے ریتی پر عباس کا لاشہ کہتا ہے

ہر گام پہ ٹھوکر مولا کی ہر راہ میں کثرت فوجوں کی 

کس طرح تمہیں ڈھونڈیں اکبر آنکھوں کا اندھیرا کہتا ہے

دل اپنا سنبھالو اے بانو اصغر نہ پلٹ کے آئیں گے

سوکھے ہوئے آنسو کہتے ہیں ٹھہرا ہوا جھولا کہتا ہے

رکتے ہوئے خنجر کی جنبش شبیر کا خوں مقتل کی زمیں

جب بال کھلے ہیں زہراء کے میداں کا اندھیرا کہتا ہے

کچھ پھول پڑے ہیں سہرا کے کچھ ایڑیاں گھسنے کے ہیں نشاں

شہ لے کے گئے ہیں قاسم کو میدان کا رستا کہتا ہے

برچھی کی چمک میں دل کا لہو انگڑائی جوانی اور اکبر

بابا کی نگاہیں دیکھ نہ لیں اکبر کا کلیجہ کہتا ہے

بے گور و کفن ہوگا بھائی خیمے بھی جلیں گے مقتل میں 

اور بال کھلیں گے میداں میں ہمشیر کا پردہ کہتا ہے

اکبر کی اجل شبیر کا دل خیمے پہ نگاہیں راہ کٹھن

کیا دیکھ لی میت لیلٰی نے ہلتا ہوا پردہ کہتا ہے

حق کو بھی چھپا سکتا ہے کوئی دنیا کی اندھیری منزل میں 

اے بدر ہر اک آنسو میں مرے شبیر کا جلوہ کہتا ہے

مملکت بدر

 

رفیق رافع

یوم پیدائش 25 اپریل 2002

ہے کچھ دنوں سے محبت دکھائی دینے لگی

ہماری چپ جو کسی کو سنائی دینے لگی

وگرنہ ہم بھی تو اندھوں میں ہو چکے تھے شمار

پھر اک نگاہ ہمیں روشنائی دینے لگی

ترے قریب جو دیکھا تو مجھ نکمے کو

سمجھ کے خاص یہ دنیا بدھائی دینے لگی

ہم آ گئے تھے قریب اس قدر کہ پھر ہم کو

چہار سمت سے وحشت دکھائی دینے لگی

زیادتی ہو بھلے نیکیوں میں نقصاں ہے

ہمیں بھی قرب میں کثرت جدائی دینے لگی

رفیق رافع

 

بلال ہادی

یوم پیدائش 25 اپریل 1990

جہاں چھوڑا تھا تو اب تک وہیں ہے

مری جاں یہ محبت بھی نہیں ہے

بھروسہ تم پہ تھا سب سے زیادہ

ابھی تک تُو مرا کامل یقیں ہے

دغا جس نے دیا تھا ہم کو جاناں

ہمارے بیچ رہتا ہی کہیں ہے

شکن لوگوں کے ماتھے پر رہے گی

چمکتی صرف تیری ہی جبیں ہے

معافی چاہتا ہوں ڈسنے والے

نوازش کر یہ میری آستیں ہے

بتا کر بات یہ میں جا رہا ہوں

ابھی کچھ اور کہنے کو نہیں ہے

بلال ہادی

 

محسن کاکوروی

یوم وفات 24 اپریل 1905

سخن کو رتبہ ملا ہے مری زباں کے لئے 

زباں ملی ہے مجھے نعت کے بیاں کے لئے 

زمیں بنائی گئی کس کے آستاں کے لئے 

کہ لا مکاں بھی اٹھا سرو قد مکاں کے لئے 

ترے زمانے کے باعث زمیں کی رونق ہے 

ملا زمین کو رتبہ ترے زماں کے لئے 

کمال اپنا دیا تیرے بدر عارض کو 

کلام اپنا اتارا تری زباں کے لئے 

نبی ہے نار ترے دشمنوں کے جلنے کو 

بہشت وقف ترے عیش جاوداں کے لئے 

تھی خوش نصیبیٔ عرش بریں شب معراج 

کہ اپنے سر پہ قدم شاہ مرسلاں کے لئے 

نہ دی کبھی ترے عارض کو مہر سے تشبیہ 

رہا یہ داغ قیامت تک آسماں کے لئے 

عجب نہیں جو کہے تیرے فرش کو کوئی عرش 

کہ لا مکاں کا شرف ہے ترے مکاں کے لیے 

خدا کے سامنے محسنؔ پڑھوں گا وصف نبیؐ 

سجے ہیں جھاڑ یہ باتوں کے لا مکاں کے لیے

محسن کاکوروی

کامل حیدرآبادی

یوم وفات 23 اپریل 2023

افکار کو غرور کے سانچے میں ڈھال کے

اسباب پیدا کر لئے اس نے زوال کے

معلوم ہیں مزے ہمیں روٹی کے دال کے

برسوں سے کھا رہے ہیں نوالے حلال کے

باغی نہ ہو سکا مرے اندر کا آدمی

رکھا ہے اسکے پاؤں میں زنجیریں ڈال کے

جگنو غزل گلاب گہر چاند بن گئے

جب ٹکڑے ٹکڑے ہوگئے میرے خیال کے

ناسور بن نہ جائے کہیں سرکشی جناب

کوڑے میں پھینک دیجیے اس کو نکال کے

بوسیدہ سے مکاں میں ہے کامل مرا قیام

اجداد کی رکھی ہے امانت سنبھال کے

کامل حیدرآبادی

نیلوفر علی

یوم پیدائش 22 اپریل 

ہر قدم پر نیا اک موڑ بنا رکّھا ہے

زندگی اور تجھے جینے میں کیا رکّھا ہے

ڈر نہ جائے کوئی بے ربطگیِ عالم سے 

اُس نے ہر چیز کو ترتیب میں لا رکّھا ہے

عشق سے اب بھی مُکرتے ہو تو بتلاؤ ذرا

اور کس آگ میں یہ ہاتھ جلا رکّھا ہے

کھو نہ جائے یہ تب و تابِ سماعت میری 

وقت کی نبض پہ کانوں کو لگا رکّھا ہے

نیلوفر علی

 

بلبل کشمیری

یوم پیدائش 22 اپریل 1922

میخانے کے در پر جو لٹکا نظر آتا ہے 

یہ شیخ حرم ہی کا کرتا نظر آتا ہے 

پاؤڈر ہے کہ چہرے پر آٹا نظر آتا ہے 

محبوب خود آرا تو بنیا نظر آتا ہے 

لڑکا نظر آتی ہے لڑکی نظر آتا ہے 

مغرب کا جو سیدھا ہے الٹا نظر آتا ہے 

ململ کا عمامہ تو لندن میں نہیں ملتا 

اے شیخ ترے سر پر ڈھاکہ نظر آتا ہے 

غائب ہیں نمازی بھی غائب ہے وہ ملا بھی 

مسجد میں مصلے پر لوٹا نظر آتا ہے 

عاشق کے جنازے پر دنیا ہی چلی آئی 

کالا نظر آتا ہے گورا نظر آتا ہے 

واعظ نے کٹا ڈالی میخانے میں پھر بولے 

کیا چور کی داڑھی میں تنکا نظر آتا ہے

بلبل کشمیری

عذرا تبسم

یوم پیدائش 22 اپریل 1965

غرور جس کے خلوص و وفا پہ تھا مجھ کو

کیا اُسی نے ہے ساماں مرے مٹانے کا

ہمارا اشک بھلا شعلہ سرد کیا کرتا

مزاج ہم نے بنایا دلھن جلانے کا

انا نے سر نہ جھکانے دیا کبھی مجھ کو

سلیقہ ورنہ مجھے تھا اسے منانے کا

گلہ رقیب کا کرتیں بھی کس طرح عذرا

انھیں ملانہ کوئی دوست بھی ٹھکانے کا

عذرا تبسم

 

مُشیر کاظمی

یوم پیدائش 22 اپریل 1924

رات ہم نے بھی یوں خوشی کر لی

دل جلا کر ہی روشنی کر لی 

آتے جا تے رہا کرو صاحب 

آنے جانے میں کیوں کمی کر لی

کانٹے دامن تو تھام لیتے ہیں

کیسے پھولوں سے دوستی کر لی 

ہم نے اک تیری دوستی کے لئے 

ساری دنیا سے دشمنی کر لی 

تیری انکھوں کی گہری چھیلوں میں

غرق ہم نے یہ زندگی کرلی

ہم نے اُن سے نظر ملا کے مُشیر 

کتنی بیچین زندگی کرلی

 مُشیر کاظمی