تنویر شاہد محمد زئی

یوم پیدائش 01 مارچ 1960

جوبن جوانی جوش مرے خواب لے گیا

جو کچھ تھا میرے پاس وہ سیلاب لے گیا

دریا کو ناپسند تھیں شاید رفاقتیں

چوپال لے گیا مرے احباب لے گیا

بت خانہ ڈوب جائے تو اس کا بھی ہےملال

ساون تو اب کہ منبر و محراب لے گیا

بستی میں اس کا گھر بھی تو شامل تھا دوستو

سیلاب مجھ سے جینے کے اسباب لے گیا

کونے میں رکھ گیا ہے مجھے ہجر کا غبار

یعقوب کی طرح میرے اعصاب لے گیا

تنویر سوچتا ہوں میں الزام کس پہ دوں

چہروں سے آ ج کون تب و تاب لے گیا

تنویر شاہد محمد زئی

توصیف جالندھری

یوم پیدائش 01 مارچ 2001

ظلم کی ہر صدا کا ساتھ دیا

کوفیوں نے جفا کا ساتھ دیا

میں نے جب بھی دیا جلایا ہے

دوستوں نے ہوا کا ساتھ دیا

میرے حق میں کوئی نہیں بولا

سب نے اس بے وفا کا ساتھ دیا 

ہم قلندر مزاج لوگوں نے

عشق جیسی بلا کا ساتھ دیا

بے وفائی کو مات دی میں نے

یعنی اہلِ وفا کا ساتھ دیا

توصیف جالندھری

اطہر فیض آبادی

یوم پیدائش 01 مارچ 1920

خود فریبی ہے خود ستائی ہے

یہ خودی ہے کہ خود نمائی ہے

اطہر فیض آبادی

 

رضی ناطق

یوم پیدائش 01 مارچ 1918

اے وحشیو! بے شمع بھی ہوتا ہے چراغاں

زنجیر سے زنجیر کو زنداں میں لڑا دو

رضی ناطق

 

کلیم آزر

میرے گھر میں خوشی نہیں آتی

اب لبوں پر ہنسی نہیں آتی

دل کھلونا ہے ٹوٹ سکتا ہے

پر کبھی بے رخی نہیں آتی

جو بھی کرنا ہے کرلے ہستی میں

لوٹ کر زندگی نہیں آتی

چاند جس دم سے روٹھا ہے مجھ سے

میرے گھر چاندنی نہیں آتی

زندگی یونہی بس گزاری ہے

جانے کیوں عاشقی نہیں آتی

کلیم آزر

 

احمد محفوظ

یوم پیدائش 01 مارچ 1966

رقص شرر کیا اب کے وحشت ناک ہوا 

جلتے جلتے سب کچھ جل کر خاک ہوا 

سب کو اپنی اپنی پڑی تھی پوچھتے کیا 

کون وہاں بچ نکلا کون ہلاک ہوا 

موسم گل سے فصل خزاں کی دوری کیا 

آنکھ جھپکتے سارا قصہ پاک ہوا 

کن رنگوں اس صورت کی تعبیر کروں 

خواب ندی میں اک شعلہ پیراک ہوا 

ناداں کو آئینہ ہی عیار کرے 

خود میں ہو کر وہ کیسا چالاک ہوا 

تاریکی کے رات عذاب ہی کیا کم تھے 

دن نکلا تو سورج بھی سفاک ہوا 

دل کی آنکھیں کھول کے راہ چلو محفوظؔ 

دیکھو کیا کیا عالم زیر خاک ہوا 

احمد محفوظ

 

رضی ناطق

یوم پیدائش 01 مارچ 1918

اے رضیؔ میری وفا کی اور کیا ہوگی سند

آج بندے ماترم بھی شوق سے گاتا ہوں میں

رضی ناطق

 

الیاس وسیم صدیقی

یوم پیدائش 01 مارچ 1945

کوئی تو جا نہ سکا مہر و ماہ سے آگے

نکل گیا کوئی حدِ نگاہ سے آگے

اُکھڑ چکے تھے قدم احتیاط کے لیکن

مرا جنوں تھا خطِ انتباہ سے آگے

لہو بہائے بنا نصرتیں نہیں ملتیں

زمیں ہے سبز مگر رزم گاہ سے آگے

یہ شخص، پاؤں کے چھالے ہیں جس کا رختِ سفر

ابھی گیا ہے اسی شاہراہ سے آگے

تو جس کو مل گیا پرواز مل گئی اس کو

زمیں کہاں ہے تری جلوہ گاہ سے آگے

کرم یہ کس کا تھا پہنچا یقیں کی منزل تک

بڑھا تھا وہ تو رہِ اشتباہ سے آگے

یہ سینہ کوبی، یہ ماتم وسیؔم ترک بھی کر

کچھ اور رنگ ہیں سرخ و سیاہ سے آگے

الیاس وسیم صدیقی

 

اشرف یوسفی

یوم پیدائش 01 مارچ 1956

دیے کی آنکھ سے جب گفتگو نہیں ہوتی 

وہ میری رات کبھی سرخ رو نہیں ہوتی 

ہوا کے لمس میں اس کی مہک بھی ہوتی ہے 

وہ شاخ گل جو کہیں رو بہ رو نہیں ہوتی 

کسے نصیب یہ شیرینئ لب و لہجہ 

ہر ایک دشت میں یہ آب جو نہیں ہوتی 

میں حرف حرف میں پیکر ترا سموتا ہوں 

غزل تو ہوتی ہے پر ہو بہ ہو نہیں ہوتی 

کبھی کبھی تو میں خود سے کلام کرتا ہوں 

کبھی کبھی تو یہ لگتا ہے تو نہیں ہوتی

اشرف یوسفی

رفعت سلطان

یوم پیدائش 01 مارچ 1924

بہاروں کو چمن یاد آ گیا ہے 

مجھے وہ گل بدن یاد آ گیا ہے 

لچکتی شاخ نے جب سر اٹھایا 

کسی کا بانکپن یاد آ گیا ہے 

مری خاموشیوں پر ہنسنے والو 

مجھے وہ کم سخن یاد آ گیا ہے 

تمہیں مل کر تو اے یزداں پرستو 

غرور اہرمن یاد آ گیا ہے 

تری صورت کو جب دیکھا ہے میں نے 

عروج فکر و فن یاد آ گیا ہے 

کسی کا خوبصورت شعر سن کر 

ترا لطف سخن یاد آ گیا ہے 

ملے وہ اجنبی بن کر تو رفعتؔ 

زمانے کا چلن یاد آ گیا ہے

رفعت سلطان

 

رشید لکھنوی

یوم پیدائش 05 مارچ 1847

ہم اجل کے آنے پر بھی ترا انتظار کرتے

کوئی وعدہ سچ جو ہوتا تو کچھ اعتبار کرتے

جو نہ صبر اور دم بھر ترے بے قرار کرتے

ابھی برق کا طریقہ فلک اختیار کرتے

اگر اتنی بات سنتے کہ ہے عشق میں مصیبت

کبھی ہم نہ تیری خاطر دل بے قرار کرتے

دل زار بے خبر تھا کیا قتل تو مزا کیا

یہ سپہ گری ہے پہلے اسے ہوشیار کرتے

یہی چاہتے ہیں اے جاں مٹے غم کہ جان جائے

ابھی موت گر نہ آتی ترا انتظار کرتے

غم و درد و رنج سہہ کے تجھے دیتے ہم دل اپنا

انہیں بے وفائیوں پر ترا اعتبار کرتے

جو سفر کا وقت آیا نہ پکارے ساتھ والے

ابھی آنکھ لگ گئی تھی ہمیں ہوشیار کرتے

جو خلاف امید کے ہو تو شکستہ خاطری ہے

کئی ٹکڑے دل کے ہوتے جو تم ایک وار کرتے

وہ نہ آئے مر گئے ہم اگر آتے بھی تو کیا تھا

یہی جان صدقے کرتے یہی دل نثار کرتے

ہمیں جان دے کے مارا ہمیں دے کے دل مٹایا

نہ غم فراق ہوتا نہ خیال یار کرتے

وہ ادا تھی قتل گہہ میں کہ بیان سے ہے باہر

مرے دل پہ زخم پڑتا وہ کسی پہ وار کرتے

تری سمت کی توجہ نہ کبھی جہان فانی

جو ذرا ثبات پاتے تو کچھ اعتبار کرتے

خبر اس کی پہلے ہوتی کہ نہ آئے گا یہ ہم کو

تو رشیدؔ شعر کا فن نہ ہم اختیار کرتے

رشید لکھنوی

سلیم فوز

یوم پیدائش 28 فروری 1965

وہ رعُونت ہے کہ ہر شخص فغاں کھینچتا ہے

دیکھنا یہ ہے خدا ڈور کہاں کھینچتا ہے

تیرے دشمن ہیں ترے اپنے وزیر اور مُشیر

اور تُو اپنی رعایا پہ کماں کھینچتا ہے

دیکھ مت بول بڑے بول مخالف کے خلاف 

وقت حاکم کی بھی گُدّی سے زباں کھینچتا ہے 

سَر چھپانے کو جگہ بھی نہ ملے گی صاحب

آسمانوں پہ کمنّدیں تُو جہاں کھینچتا ہے

جان کے درپےہے اتنا بھی نہیں جانتا تُو

اک فرشتہ ہے معیّن کہ جو جاں کھینچتا ہے

سلیم فوز

 

جاوید عباس

یوم پیدائش 28 فروری 1957

قوم ایک عمارت ہے معمار معلم ہے

انسان کی عظمت کا مینار معلم ہے

تعلیم کے زیور کا زرگر ہے زمانے میں

تعلیم وہ تعلّم کا سردار معلم ہے

وہ قوم حوادث اور طوفاں سے نہیں ڈرتی

جس قوم کی کشتی کا پتوار معلم ہے

ہے علم اجالے کا پرنور سمندر بھی

اور جلوہ گرِ علم و افکار معلم ہے

جو علم سے انساں کو کندن ہے بناتا

وہ قوم کا سرمایہ، فنکار معلم ہے

جاوید معلم کی ہو شان بیاں کیسے

طلباء کے لیے چشمہِ انوار معلم ہے

جاوید عباس

 

ہاشم بلال

یوم پیدائش 28 فروری 

زباں پہ نام وہ رہتا ہے ذکر کی صورت

کہ گہرا ہے جو ارسطو کی فکر کی صورت

مرے لحاف میں خوشبو قیام کرتی ہے

گو سبز خواب ہیں آنکھوں میں عطر کی صورت

بکاؤ دنیا کی حالت ہے دیدنی ہاشم 

سجی ہوئی ہے یہ بازارِ مصر کی صورت

ہاشم بلال

 

شاہینہ خاتون شاہجہانپوری

یوم پیدائش 28 فروری 

دارِ فنا ہے یہ نہ مسافر ٹھہر گئے

ہم سوچتے رہے کہ زمانے گزر گئے

کیوں آجتک نہیں کیا اپنا محاسبہ

کتنی صدایئں ٹوٹ گیئؔن ہم بکھر گئے

جب رہروانِ شوق تھے منزل بھی مل گئ

شوقِ جنوں میں ہم بھی فلک سے گزر گئے

جو حق پرست تھے یہاں لنگر جلا دیئے

ٹکراکے ان کے عزم سے کتنے بھنور گئے

شاہینہ خاتون شاہجہانپوری

 

صبا نویدی

یوم پیدائش 28 فروری 1942

میں جس کا منتظر ہوں وہ منظر پکار لے

شاید نکل کے جسم سے باہر پکار لے

میں لے رہا ہوں جائزہ ہر ایک لہر کا

کیا جانے کب یہ مجھ کو سمندر پکار لے

صدیوں کے درمیان ہوں میں بھی تو اک صدی

اک بار مجھ کو اپنا سمجھ کر پکار لے

میں پھر رہا ہوں شہر میں سڑکوں پہ غالباً

آواز دے کے مجھ کو مرا گھر پکار لے

شیشے کی طرح وقت کے ہاتھوں میں ہوں ہنوز

کب جانے حادثات کا پتھر پکار لے

وہ لمحہ جس کی ذہن صباؔ کو تلاش ہے

رونے کے اہتمام میں ہنس کر پکار لے

صبا نویدی

 

نظر ایٹوی

یوم پیدائش 28 فروری 1953

انکی یادوں کا جشن جاری ہے

آج کی رات ہم پہ بھاری ہے

فاصلے قربتوں میں بدلیں گے

ہونٹ ان کے دعا ہماری ہے

عشق کرنے سے اس کو مت روکو

ہر پرندے کو جھیل پیاری ہے

اب بہت ہنس چکے مرے آنسو

قہقہوں اب تمہاری باری ہے

کون سی زندگی ملی تھی مجھے

کون سی زندگی گزاری ہے

مجھ سے یہ کہہ گیا سورج

اب چراغوں کی زمے داری ہے

ذکر جس کا نظرؔ نظرؔ ہے نظرؔ

اس نظر پر نظر ہماری ہے

نظر ایٹوی

 

حیات لکھنوی

یوم پیدائش 27 فروری 1931

یہ جذبۂ طلب تو مرا مر نہ جائے گا

تم بھی اگر ملوگے تو جی بھر نہ جائے گا 

یہ التجا دعا یہ تمنا فضول ہے 

سوکھی ندی کے پاس سمندر نہ جائے گا 

جس زاویے سے چاہو مری سمت پھینک دو 

مجھ سے ملے بغیر یہ پتھر نہ جائے گا 

دم بھر کے واسطے ہیں بہاریں سمیٹ لو 

ویرانیوں کو چھوڑ کے منظر نہ جائے گا 

یوں خوش ہے اپنے گھر کی فضاؤں کو چھوڑ کر 

جیسے وہ زندگی میں کبھی گھر نہ جائے گا 

اس کو بلندیوں میں مسلسل اچھالیے 

لیکن وہ اپنی سطح سے اوپر نہ جائے گا 

شہر مراد مل بھی گیا اب تو کیا حیاتؔ 

مایوسیوں کا دل سے کبھی ڈر نہ جائے گا 

حیات لکھنوییوم پیدائش 27 فروری 1931

یہ جذبۂ طلب تو مرا مر نہ جائے گا

تم بھی اگر ملوگے تو جی بھر نہ جائے گا 

یہ التجا دعا یہ تمنا فضول ہے 

سوکھی ندی کے پاس سمندر نہ جائے گا 

جس زاویے سے چاہو مری سمت پھینک دو 

مجھ سے ملے بغیر یہ پتھر نہ جائے گا 

دم بھر کے واسطے ہیں بہاریں سمیٹ لو 

ویرانیوں کو چھوڑ کے منظر نہ جائے گا 

یوں خوش ہے اپنے گھر کی فضاؤں کو چھوڑ کر 

جیسے وہ زندگی میں کبھی گھر نہ جائے گا 

اس کو بلندیوں میں مسلسل اچھالیے 

لیکن وہ اپنی سطح سے اوپر نہ جائے گا 

شہر مراد مل بھی گیا اب تو کیا حیاتؔ 

مایوسیوں کا دل سے کبھی ڈر نہ جائے گا 

حیات لکھنوی

اجتبی رضوی

یوم وفات 26 جنوری 1991

اب حالت دل نہ پوچھ کیا ہے 

شعلہ تھا بھڑک کے بجھ گیا ہے

 

انسان کو دل ملا مگر کیا 

اندھے کے ہاتھ میں دیا ہے 

تاثیر نے یہ کہا ہے ہم سے 

نالہ نغمے کی انتہا ہے 

تیری دنیا کو ہم سنواریں 

یہ ایک عجیب ماجرا ہے 

جو دور سے آ رہی ہے رضویؔ 

پہچانی ہوئی سی یہ صدا ہے 

اجتبی رضوی

 

ابراہیم شوبی

یوم پیدائش 26 جنوری 1984

یوں بھی کڑوا انہیں لگوں گا میں

سچ کی عادت ہے سچ کہوں گا میں 

ہار مانوں گا کب سہولت سے 

جب تلک سانس ہے لڑوں گا میں 

لڑکھڑانے لگے قدم میرے

گر گیا بھی تو پھر اُٹھوں گا میں

جیسی کرنی ہے ویسی بھرنی ہے 

گر کیا ہے بُرا بھروں گا میں 

تم جو چاہو تو کیا نہیں ممکن

تم نہ چاہو تو کیا کروں گا میں

جس میں نورِ خُدا بھرا ہوا ہے

طاقچے میں وہ دل رکھوں گا میں

ایسا سوچا بھی تھا نہیں شوبی 

کہ کسی پہ کبھی مروں گا میں 

ابراہیم شوبی

 

دائم بٹ

یوم پیدائش 25 فروری 1975

خدا بناتے چلے جا رہے ہیں صدیوں سے

بشر مٹاتے چلے جا رہے ہیں صدیوں سے

یہ کس نے کھینچ دیں نفرت کی ہم میں دیواریں 

لہو بہاتے چلے جا رہے ہیں صدیوں سے

عجیب خبط ہے اس شہرِ بے سماعت میں

صدا لگاتے چلے جا رہے ہیں صدیوں سے

قیام اپنے لیے موت کے ہے مترادف

سفر بڑھاتے چلے جا رہے ہیں صدیوں سے

دکھائی دیتا ہے یہ آئینے میں کون ہمیں

نظر چراتے چلے جا رہے ہیں صدیوں سے

ہم ایسے دھوپ گزیدہ کہ صحرا در صحرا

شجر اگاتے چلے جا رہے ہیں صدیوں سے

ہم اپنے مدِ مقابل ہیں آپ ہی دائم

شکست کھاتے چلے جا رہے ہیں صدیوں سے

 دائم بٹ

ظہیر الہ آبادی

یوم پیدائش 25 فروری 1985

کیسے بتاؤں دہر میں کیا کیا بدل گیا

امت کا فاطمہ ؓ سے رویہ بدل گیا

 پرسہ تو دور باپ کا، در بھی جلا دیا 

ماحول کیوں مدینے کا اتنا بدل گیا

در فاطمہ ؓ کا دیکھ کے حیران شہر ہے

سرکارؐ کیا گئے کہ مدینہ بدل گیا

کیسے ستم یہ ٹوٹے ہیں بنت رسول پر

احوال غیر ہو گئے حلیہ بدل گیا

دیتے نہیں جواب سلام علی ؓ کا اب

مردہ ضمیر لوگوں کا لہجہ بدل گیا

دیوار کے سہارے ہی چلتی ہیں سیدہ

چلنا رسول زادی کا کتنا بدل گیا

دیتے نہیں ہیں ساتھ جو کل تک مرید تھے

بعد رسول پل میں زمانہ بدل گیا

  ظہیر الہ آبادی

نجم الحسن کاظمی

یوم پیدائش 25 فروری 1998

خواب کچھ یوں مجھے رکھتا ہے پریشانی میں

اپنے ہی گھر کو جلاتا ہوں میں نادانی میں

ایک موقع تو ملے حسبِ توقع مجھ کو

تھوڑی مہلت ہی سہی وقت کی طغیانی میں

اکثر اوقات مرے قد سے بڑا ہوتا ہے

سائے کو دیکھتا رہتا ہوں میں حیرانی میں

دوست اک بار پلٹ کر مری بربادی دیکھ 

دوست تو دیکھ ابھی خوش ہوں میں ویرانی میں

 سب کے سب رنج برابر نظر آتے ہیں مجھے

عکس دھندلا نہیں ہوتا ہے کبھی پانی میں 

نجم الحسن کاظمی

 

احمد معاذ

یوم پیدائش 25 فروری 2002

آ کے گلشن میں کِھلو پھول سی چاہت کر کے

جب کہ بکھرو گے تو خوشبو کی وضاحت کر کے

خاک ہونا مرے ماتھے پہ لکھا تھا ورنہ

میں نے اک عمر گزاری تھی محبت کر کے

آندھیاں ان کے تعاقب میں چلا کرتی ہیں

جو بھی رہتے ہیں چراغوں کی حمایت کر کے

حافظے میں وہ کہیں جا کے ٹھہر جاتا ہے

یاد کرتا ہوں میں جب اس کو تلاوت کر کے

مجھ سے ناچیز میں شعلے کی جھلک جب دیکھی

کر دیا راکھ مجھے اس نے ملامت کر کے

اس کی ضد تھی کہ کہیں اور نہ دیکھوں احمد

سو مجھے پیار کیا اس نے جسارت کر کے

احمد معاذ

 

ضیاء الحق قاسمی

یوم پیدائش 25 فروری 1935

دل کے زخموں پہ وہ مرہم جو لگانا چاہے 

واجبات اپنے پرانے وہ چکانا چاہے 

میری آنکھوں کی سمندر میں اترنے والا 

ایسا لگتا ہے مجھے اور رلانا چاہے 

دل کے آنگن کی کڑی دھوپ میں اک دوشیزہ 

مرمریں بھیگا ہوا جسم سکھانا چاہے 

سیکڑوں لوگ تھے موجود سر ساحل شوق 

پھر بھی وہ شوخ مرے ساتھ نہانا چاہے 

آج تک اس نے نبھایا نہیں وعدہ اپنا 

وہ تو ہر طور مرے دل کو ستانا چاہے 

میں نے سلجھائے ہیں اس شوخ کے گیسو اکثر 

اب اسی جال میں مجھ کو وہ پھنسانا چاہے 

میں تو سمجھا تھا فقط ذہن کی تخلیق ہے وہ 

وہ تو سچ مچ ہی مرے دل میں سمانا چاہے 

اس نے پھیلائی ہے خود اپنی علالت کی خبر 

وہ ضیاؔ مجھ کو بہانے سے بلانا چاہے

ضیاء الحق قاسمی

 

سرور جاوید

یوم پیدائش 25 فروری 1947

یہی دنیا ہے کھو جائے گا تو بھی

اسی جنگل کا ہو جائے گا تو بھی

مجھے معلوم کب تک طشت دل میں

زیاں کی فصل بو جائے گا تو بھی

مسافت عمر بھر کی ایک شب میں

دم فرقت ہے سو جائے گا تو بھی

تری آنکھیں ستارے بانٹی ہیں

مرا دامن بھگو جائے گا تو بھی 

سرور جاوید