تلک راج پارس

یوم پیدائش 24 فروری 1952

جبریل ملے آپؐ سے سرکار حرا میں 

اقرا پڑھے تھے سیدِ ابرار حرا میں 

کی حمد خدا آ پ نے سرکار ! حرا میں

آ تے تھے یہاں سید ابرار حرا میں 

 پندرہ سو برس بیت گئے آپؐ کو آقا 

 خوشبو ہے مگر آپؐ کی سرکار حرا میں 

سینے کو کیا چاک فرشتے نے یہاں پر 

ضو بار ہوا آپؐ کا کردار حرا میں 

جو ان کےہیں قدموں کے نشاں کرتے ہیں باتیں 

رہتے ہیں سدا احمدِ مختار حرا میں 

محسوس ہوئی مجھ کو ترے لمس کی خوشبو

جب میں بھی گیا سید ابرار حرا میں

پارس ہو کبھی لطف وکرم چشمِ عنایت   

میں نعت لکھوں سید ابرار حرا میں 

تلک راج پارس

 

باسط اوجینی

یوم پیدائش 24 فروری 1919

روداد غم کی جب سے شہرت سی ہو گئی ہے 

رنگینئ جہاں سے وحشت سی ہو گئی ہے 

تیور بتا رہے ہیں انداز بے رخی کے 

ان کو جفا سے شاید رغبت سی ہو گئی ہے 

ناحق اٹھا رہے ہو طوفاں تجلیوں کے 

ذوق نظر کو میرے غفلت سی ہو گئی ہے 

محسوس کر رہا ہوں تار نفس میں تیزی 

کچھ اضطراب غم میں شدت سی ہو گئی ہے 

مطلب نہیں کرم سے بے مہریوں کا غم کیا 

صبر و رضا سے اب تو الفت سی ہو گئی ہے 

تاروں کی انجمن میں محو خیال ہو کر 

راتوں کو جاگنے کی عادت سی ہو گئی ہے 

دل بجھ چکا ہے باسطؔ باقی نہیں تمنا 

اب زندگی سے مجھ کو نفرت سی ہو گئی ہے

باسط اوجینی

 

مصدق اعظم

یوم پیدائش 22 فروری 1978

صبح کا منظر ہے لیکن گل کوئی تازہ نہیں 

روئے گلشن پر کہیں بھی اوس کا غازہ نہیں 

ٹوٹ کر ہم چاہنے والوں سے جب بچھڑیں گے آپ 

ہم ہی ہم بکھریں گے لیکن مثل شیرازہ نہیں

 

غار والوں کی طرح نکلا ہے وہ کمرے سے آج 

اس کو اس دنیا کی تبدیلی کا اندازہ نہیں 

کچھ نہ کچھ کہتے تو رہتے ہیں یہاں ہم لوگ جی 

پھر بھی اس شہر بتاں میں کئی وازہ نہیں 

اس عمارت کے مقدر کی لکیروں میں کہیں 

کھڑکیاں تو ہیں مگر مصداقؔ دروازہ نہیں

مصدق اعظم

ساگر چاپدنوی

یوم پیدائش 22 فروری 1935

لب ہنستے ہیں ، دل روتا ہے

ساتھی ایسا بھی ہوتاہے

ساگر چاپدنوی

 

درد فیض خان

یوم پیدائش 22 فروری 

جل کے جب دل لگی راکھ ہو جاتی ہے 

عاشقوں کی خوشی راکھ ہو جاتی ہے

ہجر کے شعر جس پر میں لکھ دیتا ہوں

میری وہ ڈائری راکھ ہو جاتی ہے

پتھروں کے مکانات جلتے نہیں 

ہاں مگر جھوپڑی راکھ ہو جاتی ہے 

عشق میں درد ہے درد میں ہے مزہ 

بے مزہ زندگی راکھ ہو جاتی ہے

 

کوئی بھی چیز ٹکتی نہیں اُس کے پاس

ہر پرانی نئی راکھ ہو جاتی

جس میں اک دوسرے پر بھروسہ نہ ہو

ایسی ہر دوستی راکھ ہو جاتی ہے

چار دن جیب میں گر نہ پیسے رہیں

عشق کیا عاشقی راکھ ہو جاتی ہے

گل سے بلبل اگر بات کرنے لگے 

دیکھ کر ہر کلی راکھ ہو جاتی ہے 

اب تو جگنو بھی دعویٰ یہ کرنے لگے

ہم سے بھی تیرگی راکھ ہو جاتی ہے

صرف سگریٹ سے دل ہی جلتے نہیں

ان لبوں کی نمی راکھ ہو جاتی ہے 

جس میں مل کے بھی دو لوگ ملتے نہیں

ایسی وابستگی راکھ ہو جاتی ہے

اک سہیلی کو اس کی اگر پھول دوں 

دیکھ کر دوسری راکھ ہو جاتی ہے 

شعريت جس میں آتی نہیں ہے نظر 

فیض وہ شاعری راکھ ہو جاتی ہے

درد فیض خان

 

لطیف شاھد

یوم پیدائش 21 فروری 1950

قلیل ہوتی ہے ہر ایک شئے مزید کے بعد 

مہینہ خالی کا ہوتا ہے ،ماہ عید کے بعد 

اک آرزو ہوئی پوری کہ دوسری جاگی 

نگاہ شوق بھڑکتی ہے اور دید کے بعد 

ہرایک بستی میں ہے سینکڑوں کا نام حسین 

یزید نام نہ رکھا گیا یزید کے بعد 

خدا ہی جانے یہ ہے مصلحت کہ مجبوری 

ہم آئے یاد انھیں مدت مدید کے بعد 

صبا کے پیچھے ہی گلشن سے بوئے گل بھی گئی 

قرار مل نہ سکا پیر کو مرید کے بعد 

ہلال عید تو پیغام شادمانی ہے 

ہماری عید تو ہوگی تمہاری دید کے بعد 

 لطیف شاھد

بہار کوٹی

یوم وفات 21 فروری 1971

کروٹیں لے رہے ہیں ذرّوں میں 

جانے کتنے جہانِ نامعلوم 

بہار کوٹی

آیوش چراغ

یوم پیدائش 21 فروری 1991

تصور پیار کا جو ہے پرانا کرنے والا ہوں 

میں اپنی آپ بیتی کو فسانہ کرنے والا ہوں 

جہاں پہ صرف وہ تھی اور میں تھا اور خوشبو تھی 

اسی جھرمٹ کو اپنا آشیانہ کرنے والا ہوں 

جسے میں چاہتا ہوں وہ کہیں کی شاہزادی ہے 

سو اس کے واسطے خود کو شہانہ کرنے والا ہوں 

اداسی دیکھ آئی ہے مکاں شہر محبت میں 

جہاں میں شام کو جا کر بیانہ کرنے والا ہوں 

مجھے معلوم ہے وہ کیا شکایت کرنے والی ہے 

اسے معلوم ہے میں کیا بہانہ کرنے والا ہوں 

تری آنکھوں تری زلفوں ترے ہونٹھوں سے وابستہ 

کئی ارمان ہیں جن کو سیانا کرنے والا ہوں 

اسے جو عقل مندی کی بڑی باتیں بتاتے ہیں 

انہیں لوگوں کو اب اپنا دوانہ کرنے والا ہوں 

آیوش چراغ

 

دین محمد امین صابونیہ

یوم پیدائش 21 فروری 1948

پوچھ پوچھ کر عقل سے چلنا ، دیوانوں کا کام نہیں

دن میں دیپ جلے تو جلنا ، پروانوں کا کام نہیں

اہل جنوں کی سنگت میں کچھ سال بتانے پڑتے ہیں

عشقِ بتاں کی باتیں کرنا ، ودوانوں کا کام نہیں

اُن کی مے میں مستی ہے اور ان کی مے میں عشق ہی عشق

اہل حرم کا شیوہ ہے جو، میخانوں کا کام نہیں

تاج ، حکومت چھوڑ کے عاشق ، بن باسی بن جاتے ہیں

عشق و محبت ٹوٹ کے کرنا ، فرزانوں کا کام نہیں

دل کی بستی کیسے اُجڑی ، بستے گھر ویران ہوئے

میرے اپنے ہی تھے دشمن ، بیگانوں کا کام نہیں

ذکرِ یار ذرا چھیڑو تو ، ایک غزل ہو جاتی ہے

عشق کی باتیں ظاہر کرنا ،افسانوں کا کام نہیں

دردِ دل ہے دردِ جگر ہے ،دردِ سر ہے عشق امین

عشق کی اُلجھن کو سلجھانا ، ایوانوں کا کام نہیں

دین محمد امین صابونیہ

بشیر النساء بیگم بشیر

یوم وفات 20 فروری 1972

تجھ پہ کیا خاک اے زمیں ہوتا 

ہم نہ ہوتے تو کچھ نہیں ہوتا 

نہ یہ دنیا میں شورشیں ہوتیں 

اور نہ یہ ذوق آں و ایں ہوتا 

زندگی نام ہے تڑپنے کا 

جب سکوں ہو سکوں نہیں ہوتا 

حشر سو بار رونما ہوتا 

دل کو آنکھوں پہ گر یقیں ہوتا 

کس قدر دل نواز منظر ہے 

کاش برجا دل حزیں ہوتا 

کچھ بڑی بات تھی ید اللہہی 

تجھ کو اپنے پہ گر یقیں ہوتا 

آگے چرچے تھے جن کی باتوں کے 

ان کا اب ذکر تک نہیں ہوتا 

دل میں اگلی سی بات گر ہوتی 

حرف نا خواندہ دل نشیں ہوتا 

گردش چرخ کہہ رہی ہے بشیرؔ 

جذب کامل سے کیا نہیں ہوتا

بشیر النساء بیگم بشیر

قمر نیاز

یوم پیدائش 20 فروری 

یہ دل مرا جیتا نہیں ، ہارا بھی نہیں ہے

تجھ ہجر کے گھائو کا مداوا بھی نہیں ہے

پوچھا جو نہیں اس نے مرا حال تو پھر کیا 

دریا کی کوئی پیاس بجھاتا بھی نہیں ہے

وحشت نے نئے رنگ بھرے آنکھ میں تیری

کیا ذکر ہو دریا کا کہ صحرا بھی نہیں ہے

اتنی تو سہولت تھی مرے خواب سجاتا

افسوس ! تُو اب خواب میں آتا بھی نہیں ہے

یہ بات بجا ، وجہِ سکوں ڈھونڈ رہا ہوں 

یہ بات الگ ، اور گوارا بھی نہیں ہے

ہر رنگ جو ملتا ہے قمر ، رنگ میں تیرے 

آنکھوں میں کوئی رنگ سمایا بھی نہیں ہے

قمر نیاز

 

بلال سہارن پوری

یوم پیدائش 20 فروری 1983

قہر برسا آسماں سے تب پشیمانی ہوئی 

بھول بیٹھے ہم خدا کو ہم سے نادانی ہوئی 

کیا حسیں رونق یہاں تھی کس قدر آباد تھا 

آج اپنے شہر کو دیکھا تو حیرانی ہوئی 

ہو گئے ہیں مندر و مسجد کے دروازے بھی بند 

ساری دنیا پر مسلط کیسی ویرانی ہوئی 

جی حضوری کر نہ پائے حکم پر اس کے بلالؔ 

بادشاہ وقت کی ہم سے نہ دربانی ہوئی

بلال سہارن پوری

یوسف مثالی

یوم پیدائش 20 فروری 1955

کیا ضروری ہے ! کوئی زخم کریدا جائے

میں جو خوش ہوں تو مرا حال نہ پوچھا جائے

ایک اک کر کے سبھی چھوڑ گئے ہیں مجھ کو

اب تو سوچا ہے پرندہ بھی نہ پالا جائے

تو نے دیکھے نہیں یاروں کے بھیانک چہرے

یہ وہ منظر ہے کہ آنکھوں سے نظر کھا جائے

شام ، ہر شام دلاسے نہیں دینے والی

اس سے کہنا کہ وہ اب لوٹ کے گھر آجائے

اپنی سوچوں سے مری جان کہاں پھوٹے گی

آج بھی سوچ رہا ہوں کہ نہ سوچا جائے

تیری یادوں کی کڑی دھوپ سے شکوہ کیسا

اپنی دیوار ہی سائے کو اگر کھا جائے

یوسف مثالی

سید شکیل دسنوی

یوم پیدائش 20 فروری 1941

اتنی مدت بعد ملے ہو کچھ تو دل کا حال کہو 

کیسے بیتے ہم بن پیارے اتنے ماہ و سال کہو 

روپ کو دھوکا سمجھو نظر کا یا پھر مایا جال کہو 

پریت کو دل کا روگ سمجھ لو یا جی کا جنجال کہو 

آنکھوں دیکھی کیا بتلائیں حال عجب کچھ دیکھا ہے 

دکھ کی کھیتی کتنی ہری اور سکھ کا جیسے کال کہو 

ایک وفا کو لے کے تمہاری ساری بازی کھیل گئے 

یاروں نے تو ورنہ چلی تھی کیسی کیسی چال کہو 

ٹھیس لگی ہے کیسی دل پر ہم سے کھنچے سے رہتے ہو 

آخر پیارے آیا کیسے اس شیشے میں بال کہو 

سیدؔ جی کیا بیتی تم پر کھوئے کھوئے رہتے ہو 

کچھ تو دل کی بات بتاؤ کچھ اپنے احوال کہو

سید شکیل دسنوی

سدرشن فاکر

یوم وفات 19 فروری 2008

اہل الفت کے حوالوں پہ ہنسی آتی ہے 

لیلیٰ مجنوں کی مثالوں پہ ہنسی آتی ہے 

جب بھی تکمیل محبت کا خیال آتا ہے 

مجھ کو اپنے ہی خیالوں پہ ہنسی آتی ہے 

لوگ اپنے لئے اوروں میں وفا ڈھونڈتے ہیں 

ان وفا ڈھونڈنے والوں پہ ہنسی آتی ہے 

دیکھنے والو تبسم کو کرم مت سمجھو 

انہیں تو دیکھنے والوں پہ ہنسی آتی ہے 

چاندنی رات محبت میں حسیں تھی فاکرؔ 

اب تو بیمار اجالوں پہ ہنسی آتی ہے

سدرشن فاکر

 

غلام محمد بختیار قیسی

یوم وفات 18 فروری 2023

اناللہ واناالیہ راجعون 

 شہر ناگپور کے بزرگ شاعر حضرت غلام محمد بختیار قیسی

آج اس دارفانی سے کوچ کر گئے

نور محمد جالب

یوم وفات 18 فروری 2023

ہر ایک سے نباہ کا اقرار کم کرو

کچی سڑک پہ نکلے ہو رفتار کم کرو

مانا کہ تشنہ لب کوئی تم سا نہیں مگر

دریا سے اپنی پیاس کا اظہار کم کرو

کانوں میں پھر اذان کی آواز آئے گی

کمرے کی گونجتی ہوئی جھنکار کم کرو

ہے زندگی کا لطف نشیب و فراز میں

بہتر ہے اپنا راستہ ہموار کم کرو

جالب تمہیں بھی تنکا سمجھ لیں نہ یہ کہیں

ان سر پھری ہواؤں سے تکرار کم کرو

نور محمد جالب

 

رجب چوہدری

یوم پیدائش 18 فروری 

مکان دل کا سجانے کی اب ضرورت ہے

کسی کو اس میں بسانے کی اب ضرورت ہے

بھڑک اٹھیں گے مری راکھ سے کئی شعلے 

ذرا سی آگ دکھانے کی اب ضرورت ہے

نئی صدی ہے بدل دو پرانی رسموں کو

نیا سماج زمانے کی اب ضرورت ہے

کچھ اتنا دور نہیں ہے پہنچ سے سورج بھی

بس ایک جست لگانے کی اب ضرورت ہے

دئیے کا تیل بدلنے سے کچھ نہیں ہوگا

نئے چراغ جلانے کی اب ضرورت ہے

تھکے تھکے سے بہت لگ رہے ہیں منزل پر

مسافروں کو ٹھکانے کی اب ضرورت ہے

رجب چوہدری 

سرفراز شاکر

یوم وفات 17 فروری 2023

سوکھ جائے گا سمندر دیکھنا

پھر مری آنکھوں کا منظر دیکھنا

خالی رہ جائے گا یہ گھر دیکھنا

جب نکل جاؤں میں باہر دیکھنا 

نوچ کر لے جائے گا مجھ کو کوئی

تم مرے بکھرے ہوئے پر دیکھنا

وہ جو دنیا کے قفس میں بند ہیں

اڑ ہی جائیں گے کبوتر دیکھنا

سونی ہے شاکر حویلی تو مگر

چیختا ہے کون اندر دیکھنا

سرفراز شاکر   

سید غلام ربانی ایاز

یوم پیدائش 17 فروری 1942

روتے روتے حالِ دل پر مسکرانا آگیا

نالۂ شب گیر کو نغمہ بنانا آگیا

خارزارِ زندگی ہے رشکِ گلزارِ ارم

اب خزاں کے دور میں بھی گل کھلانا آگیا

آتے آتے آگیا جینے کا فن آخر ہمیں

آسماں کو اپنے قدموں پر جھکانا آگیا

خلق‘ اخلاق و رواداری ‘ محبت‘ پیارسے

دشمنِ جاں کو بھی سینے سے لگانا آگیا

تم کو گل چینو! مبارک ہوں یہ گل اندازیاں 

اب ہمیں پلکوں سے کانٹوں کو اٹھانا آگیا

ہے گلِ خنداں کی صورت اب دلِ صد چاک ایازؔ

کھاتے کھاتے چوٹ پیہم مسکرانا آگیا

سید غلام ربانی ایاز

ریاض غازی پوری

یوم پیدائش 17 فروری 1937

تسلی دے کے بہلایا گیا ہوں 

سکوں کی راہ پر لایا گیا ہوں 

عدم سے جانب گلزار ہستی 

میں خود آیا نہیں لایا گیا ہوں 

کڑی منزل عدم کی ہے اسی سے 

یہاں دم بھر کو ٹھہرایا گیا ہوں 

حقیقت کا ہوا ہے بول بالا 

میں جب سولی پہ لٹکایا گیا ہوں 

حقیقت سے میں افسانہ بنا کر 

ہر اک محفل میں دہرایا گیا ہوں 

خدا معلوم ان کی انجمن سے 

میں خود اٹھا کہ اٹھوایا گیا ہوں 

ریاضؔ اپنا تھا شیوہ گل پرستی 

مگر کانٹوں میں الجھایا گیا ہوں

ریاض غازی پوری

 

آفتاب عالم مٹابرجی

یوم پیدائش 16 فروری 1964

صاف دامن ہے کہاں داغ گناہوں کے ہیں 

کس لئے سادہ دل انسان مجھے کھینچتا ہے 

بحر و آوزان کی حاجت نہیں پڑھتی مجھ کو

خوں پلانے کو قلمدان مجھے کھینچتا ہے 

سر یہ خم کیوں نہ رہے آپ کے آجانے پر 

آج بھی آپ کا احسان مجھے کھینچتا ہے 

آرزو ضبط سے جب آگے نکال جاتی ہے 

" دشت میں روح کا ہیجان مجھے کھینچتا ہے "

میرے اللہ مجھے حفظ و امان میں رکھنا

وسوسے ڈال کے شیطان مجھے کھینچتا ہے 

وہ بلائیں گے تو سب چھوڑ کے جانا ہوگا 

آج کل کوزہء ویران مجھے کھینچتا ہے 

اپنی انکھوں پہ لگائے ہوئے پٹی عالم

بے وجہ عدل کا میزان مجھے کھینچتا ہے 

آفتاب عالم مٹابرجی

 

عبد الحق بیتاب

یوم پیدائش 15 فروری 1964

ہوکر حصارِ ذات میں محبوس آئینہ

کرتا ہے درد و کرب کو محسوس آئینہ

کل کو عجب نہیں کہ وہ ثابت ہو خالی نیک

گو آج میرے حق میں ہے منحوس آئینہ

اے کاش کوئی کھول دے تصویر پر یہ راز

کیوں اپنی زندگی سے ہے مایوس آئینہ

خائف شعور ہے کہیں بیتابؔ کر نہ لے

عکسِ توہّمات کو معکوس آئینہ

عبد الحق بیتاب

منصور عمر

یوم پیدائش 15 فروری 1955

خدایا ذرا ان پہ احسان کر دے 

جو ہیں آدمی ان کو انسان کر دے 

رہیں یاد کے وہ گھروندے سلامت 

مگر دل کے آنگن کو ویران کر دے 

کبھی اپنے ہی روبرو جب کھڑا ہو 

تو آئینہ اس کو بھی حیران کر دے 

زمیں تا فلک ہو مرا نام روشن 

کچھ ایسا ہی جینے کا سامان کر دے 

بہت ناز ہے جن کو اپنی انا پر 

کبھی میرے گھر ان کو مہمان کر دے 

کروں نام کا اپنے سکہ میں رائج 

مجھے ایک دن کا جو سلطان کر دے 

اگر صلح منصورؔ کرتے نہیں وہ 

تو بڑھ کے لڑائی کا اعلان کر دے

منصور عمر

 

نسیم سحر

یوم پیدائش 15 فروری 1944

آپ ہی اپنا سفر دشوار تر میں نے کیا 

کیوں ملال فرقت دیوار و در میں نے کیا 

میرے قد کو ناپنا ہے تو ذرا اس پر نظر 

چوٹیاں اونچی تھیں کتنی جن کو سر میں نے کیا 

چل دیا منزل کی جانب کارواں میرے بغیر 

اپنے ہی شوق سفر کو ہم سفر میں نے کیا 

منزلیں دیتی نہ تھیں پہلے مجھے اپنا سراغ 

پھر جنوں میں منزلوں کو رہ گزر میں نے کیا 

ہر قدم کتنے ہی دروازے کھلے میرے لئے 

جانے کیا سوچا کہ خود کو در بدر میں نے کیا 

لفظ بھی جس عہد میں کھو بیٹھے اپنا اعتبار 

خامشی کو اس میں کتنا معتبر میں نے کیا 

زندگی ترتیب تو دیتی رہی مجھ کو نسیمؔ 

اپنا شیرازہ مگر خود منتشر میں نے کیا

نسیم سحر

 

قیصر القاسمی

یوم پیدائش 14 فروری 1940

رکھنا قدم سنبھال کر اے ناخدا ذرا

بحرِ الم نے لاکھ سفینے ڈبوئے ہیں

قیصر القاسمی

عرش منیر

یوم پیدائش 14 فروری 

عمل کر لو تو پھر جینے میں آسانی بہت ہوگی

مرے لہجے سے ہاں تم کو پریشانی بہت ہوگی

شریفوں کے بہت سے راز پوشیدہ ہیں سینے میں

 زباں کھولو ں گی تو دنیا کو حیرانی بہت ہوگی

 

صعوبت جھیلنا ہے ، رہنما کی رہنمائی میں

ابھی منزل تلک رستے میں ویرانی بہت ہوگی

میں تب پوچھوں گی حضرت اور کہیے اپنے بارے میں

طبیعت آپ کی جب شرم سے پانی بہت ہوگی

کسی مسند پہ گر قابض ہوا کم ظرف اور جاہل

تو پھر دعوے سے کہتی ہوں کہ من ما نی بہت ہوگی

چلیں میں پوچھتی ہوں خاک کب اکسیر ہوتی ہے

اگرچہ آپ نے بھی خاک تو چھانی بہت ہوگی

مجھے معلوم ہی تھا عرش جب آؤں گی محفل میں

مرے آنے سے پہلے حشر سامانی بہت ہوگی

عرش منیر

محمد عثمان سحر

یوم پیدائش 13 فروری 1991

اب کے تجدیدِ وفا ہو تو بہت بہتر ہے

عشق کا رنگ نیا ہو تو بہت بہتر ہے

ہو کے مجبور بچھڑنے کے سوا سب ہےقبول

ہجر کی اور وجہ ہو تو بہت بہتر ہے

لذَّتِ عشق میں جنت کے سبھی درجوں پر 

جانِ من ساتھ ترا ہو تو بہت بہتر ہے 

آخری سانس ہو سجدے میں ترے ہاتھوں پر

سامنے میرے خدا ہو تو بہت بہتر ہے 

خوب واقف ہے محبت کے فضائل سے سحر

دل کا ہر درس ادا ہو تو بہت بہتر ہے 

تبصرہ ہجر پہ میرا ہے فقط اتنا سحر

جسم سے روح جدا ہو تو بہت بہتر ہے

محمد عثمان سحر

ناصر فراز

یوم پیدائش 13 فروری 1961

تصورات میں یادوں کی جب برات چلی

تو یوں لگا کہ مرے ساتھ کائنات چلی

کوئی نہ روک سکا اس کے جاتے قدموں کو

چھڑا کے ہاتھ جو شہزادیِ حیات چلی

عجیب چیز ہے دولت کی یہ حسیں دیوی

یہ جس کے ساتھ نہ چلنا تھا اس کے ساتھ چلی

خدائے قادرِ مطلق کے روبرو اے فرازؔ

نہ میری بات چلی ہے نہ تیری بات چلی

ناصر فراز

نجم السحر ثاقب

یوم پیدائش 13 فروری 2000

سخاوتیں بھی ہیں جدا عنایتیں بھی خوب ہیں

یہ خوشبوؤں کے شہر کی روایتیں بھی خوب ہیں

سمجھ نہیں رہے ہیں کچھ پہ سنتے ہیں بغور سب

عجیب لوگ ہیں یہاں سماعتیں بھی خوب ہیں

بس اک قدم پہ تھا ہدف مگر پہنچ نہیں سکا

یہ وقت اور وقت کی نزاکتیں بھی خوب ہیں

کہاں ہوا ہے فیصلہ کوئی بھی وقت پر یہاں

ہمارے ملک میں تو یوں عدالتیں بھی خوب ہیں

دماغ سوچتا ہے کچھ ، کچھ اور کر رہا ہے دل

مرے دل و دماغ کی رقابتیں بھی خوب ہیں

نجم السحر ثاقب

صفدر صدیق رضی

یوم پیدائش 13 فروری 1949

آنکھوں میں ہے اب تک وہی زیبائشِ دنیا

رکھا نہ کہیں کا مجھے اے خواہشِ دنیا

اچھا ہے کہ جلتے ہو خود اپنی ہی تپش میں

تم تک ابھی پہنچی ہی نہیں آتشِ دنیا

وسعت میں ہمیشہ سے جداگانہ ہیں دونوں

دنیا میں نہیں دل میں ہے گنجائشِ دنیا

اے جذبہءپندار قدم بوس نہ ہونا

 پیروں سے لپٹ جائے گی آلائشِ دنیا

چشم و لب و رخسار تو غارت گرِ جاں ہیں

 جس دم وہ کھُلا ہم پہ کھُلی سازشِ دنیا

دنیا کو کیا ترک جب اس کیلئے ہم نے

کی ہم سےتب اس شخص نےفرمائشِ دنیا

صفدر صدیق رضی

 

مضطر مجاز

یوم پیدائش 13 فروری 1935

فن کار ہے تو اپنے ہنر کی بھی جانچ کر 

دو اور دو کو چھ نہیں کرتا تو پانچ کر 

ہیں تیرے کتنے کام کے بے کار کس قدر 

دریاؤں کو کھنگال ستاروں کی جانچ کر 

لے لے نہ سارے شہر کو اپنی لپیٹ میں 

سر میں سلگ رہی ہے جو ٹھنڈی وہ آنچ کر 

سچ بولنے کی تاب نہیں ہے تو کم سے کم 

اے عقل مند جھوٹ کو چمکا کے سانچ کر 

کب تک زمیں مکاں زن و فرزند کاروبار 

ہستی کا حل بھی ڈھونڈ کوئی سونچ سانچ کر 

مٹی بھی تیری دیکھ کے اگلے گی سیم و زر 

اپنے لہو سے چھوڑ اسے سینچ سانچ کر 

ہیرے کو کون پوچھنے والا ہے اے عزیز 

ہیرے کو چھیل چھال کے چمکا کے کانچ کر 

مضطر مجاز

 

کیدار ناتھ کیدار

یوم پیدائش 12 فروری 1926

بن رہا ہے پھر جنوں نغموں کے جال

انگلیاں رکھی ہیں کس نے ساز پر

کیدار ناتھ کیدار

 

حیدر صفت

یوم پیدائش 12 فروری 1949

کچھ تو وہ سست کچھ زمانہ تیز

اور سفر بھی تو حسبِ حال نہ تھا

حیدر صفت

 

یوسف جمال

یوم پیدائش 11 فروری 1947

کورے کاغذ کی طرح بے نور بابوں میں رہا 

تیرگی کا حاشیہ بن کر کتابوں میں رہا 

میں اذیت ناک لمحوں کے عتابوں میں رہا 

درد کا قیدی بنا خانہ خرابوں میں رہا 

جس قدر دی جسم کو مقروض سانسوں کی زکوٰۃ 

کیا بتاؤں جسم اتنا ہی عذابوں میں رہا 

بے صفت صحرا ہوں کیوں صحرا نوردوں نے کہا 

ہر قدم پر جب کہ میں اندھے سرابوں میں رہا 

وقت کی محرومیوں نے چھین لی میری زبان 

ورنہ اک مدت تلک میں لا جوابوں میں رہا 

ڈھونڈتے ہو کیوں جلی تحریر کے اسباق میں 

میں تو کہرے کی طرح دھندلے نصابوں میں رہا

یوسف جمال

عبد الغفور نساخ

یوم پیدائش 11فروری 1834

ظاہراً موت ہے قضا ہے عشق

پر حقیقت میں جاں فزا ہے عشق

دیتا ہے لاکھ طرح سے تسکین

مرض ہجر میں دوا ہے عشق

تا دم مرگ ساتھ دیتا ہے

ایک محبوب با وفا ہے عشق

دیکھ نساخؔ گر نہ ہوتا کفر 

کہتے بے شبہ ہم خدا ہے عشق

عبد الغفور نساخ 

 

کمار وشواس

یوم پیدائش 10 فروری 1970

دل تو کرتا ہے خیر کرتا ہے 

آپ کا ذکر غیر کرتا ہے 

کیوں نہ میں دل سے دوں دعا اس کو 

جبکہ وہ مجھ سے بیر کرتا ہے 

آپ تو ہو بہ ہو وہی ہیں جو 

میرے سپنوں میں سیر کرتا ہے 

عشق کیوں آپ سے یہ دل میرا 

مجھ سے پوچھے بغیر کرتا ہے 

ایک ذرہ دعائیں ماں کی لے 

آسمانوں کی سیر کرتا ہے

کمار وشواس

امجد اسلام امجد

یوم وفات 10 فروری 2023

یہ اور بات ہے تجھ سے گلا نہیں کرتے 

جو زخم تو نے دیے ہیں بھرا نہیں کرتے 

ہزار جال لیے گھومتی پھرے دنیا 

ترے اسیر کسی کے ہوا نہیں کرتے 

یہ آئنوں کی طرح دیکھ بھال چاہتے ہیں 

کہ دل بھی ٹوٹیں تو پھر سے جڑا نہیں کرتے 

وفا کی آنچ سخن کا تپاک دو ان کو 

دلوں کے چاک رفو سے سلا نہیں کرتے 

جہاں ہو پیار غلط فہمیاں بھی ہوتی ہیں 

سو بات بات پہ یوں دل برا نہیں کرتے 

ہمیں ہماری انائیں تباہ کر دیں گی 

مکالمے کا اگر سلسلہ نہیں کرتے 

جو ہم پہ گزری ہے جاناں وہ تم پہ بھی گزرے 

جو دل بھی چاہے تو ایسی دعا نہیں کرتے 

ہر اک دعا کے مقدر میں کب حضوری ہے 

تمام غنچے تو امجدؔ کھلا نہیں کرتے

امجد اسلام امجد

خواجہ دل محمد

یوم پیدائش 09 فروری 1887

نظم علم

سعادت ، سیادت ، عبادت ہے علم

حکومت ہے دولت ہے، طاقت ہے علم

یہ پوچھو کسی مرد مختار سے

قلم تیز چلتا ہے تلوار سے

پسر علم و فن سے اگر دور ہے

پدر کی وہ اک چشم بے نور ہے

جو لاڈوں سے بگڑا ہوا پوت ہو

کبھی اولیا ہو کبھی بھوت ہو

نہ پھولوں کی سیجوں پہ آتا ہے علم

نہ ورثے میں انسان پاتا ہے علم

دلوں میں بھرو علم کا مال و زر

نہ قاروں کا خطرہ نہ چوروں کا ڈر

بڑھے علم انساں کا تعلیم سے

کہ دولت یہ دگنی ہو تقسیم سے

اگر پوچھنے میں کرو گے حجاب

تو پڑھتے رہو گے جہالت کا باب 

جہالت سے انساں مصیبت اٹھائے

اندھیرے میں جو جائے ٹھوکر ہی کھائے

ہدایت کی مشعل ہیں علم و ہنر

جہالت ہے خطرہ جہالت ہے ڈر

اگر خاک پر پھونک مارے جہول

تو جھونکے گا اپنی ہی آنکھوں میں دھول

نظر ہو تو جوہر کے جوہر کہے

ہے اندھا جو ہیرے کو کنکر کہے

ہے جاہل کو نیکی بدی بات ایک

بھلا مرد جاہل کا ایمان کیا

کہ اندھے کو رنگوں کی پہچان کیا

گدھے کو اڑا دیں جو مخمل کی جھول

دلتی چلانا جائے گا بھول

بہت لوگ باتوں میں لقمان ہیں

کمل میں جو دیکھو تو نادان ہیں

علاج جراحت کو خاذق وہ چن

اس طبع میں جس کے یہ چار گن

طر بازار کی سر افلاطون کا

ہو بدر کی طرح حاصل کمال

اوروں کو ظلمت سے باہر نکال

جو سیکھو کسی کو سکھاتے چلو

دئے سے دئے کو جلاتے چلو

خواجہ دل محمد 

 

صلاح الدین پرویز

یوم پیدائش 09 فروری 1952

نظم موم بتی 

اور جب 

اس کے قد پر

اٹیچی کا سامان رکھا گیا 

موم بتی ہنسی 

موم بتی کا ہنسنا بجا ہے 

مجھے کوستی ہے 

مرے گھر میں پچھلے کئی سال سے 

ایک آواز 

جس کے کئی راستے 

دھند کے سرد لہجے میں 

الجھے ہوئے ہیں 

مرے گھر کو 

اک موم بتی کی خواہش 

کہیں جنگلوں کا نہ رستہ دکھا دے 

سفر 

جب نیا کتھئی سوٹ پہنے 

نئی ریل گاڑی میں بیٹھا 

تو اس کو مسافر سمجھ کر 

کئی لوگ ہنسنے لگے 

اور جب ان کے پیالوں میں رکھی ہوئی 

چائے جمنے لگی 

تب انہیں یاد آیا 

بزرگوں نے مرتے سمے 

اپنی آنکھیں زباں سے چکھی تھیں 

مگر موم بتی کی لمبی زباں 

ریل گاڑی میں بیٹھی سفر کر رہی تھی 

اور تبھی اک سفر 

ان کی آنکھیں چرا کر کہیں لے گیا تھا 

مرے ہاتھ میں اک اٹیچی ہے لیکن 

اسے کھولنا میرے بس میں نہیں ہے 

اور اب 

موم بتی بھی ہنسنے لگی ہے 

 صلاح الدین پرویز

 

خطاب عالم شاذ

یوم پیدائش 08 فروری 1982

مِری ترقی کے ضامن مِرے رقیب ہوئے

ملا جو مجھ کو یہاں اُن کو کیا؟ نصیب ہوئے

ہنسی اڑاتے رہے جو ،وہی خموش ہوئے

جو دور دور رہے برسوں اب قریب ہوئے

مخالفت جو سدا دشمنی میں کرتے رہے

زمین اور زماں بدلا کیا! حبیب ہوئے

ہمارے چاہنے والوں کی چاہ کو چاہو

اگرملے وہی چاہت زہے نصیب ہوئے

گلاب دل میں جو ہر دم کھِلائے رکھتے ہیں

وہی سبھی کے دلوں میںبھی عندلیب ہوئے

ملاپسند کا مضمون جس کی چاہت تھی

حیاتیات سے رغبت ہوئی طبیب ہوئے

جنھیں شغف تھا قلم اور کتاب سے دن بھر

وہی زما ں میں معلم وہی ادیب ہوئے

خطاب عالم شاذ

 

انیس عظیم آبادی

یوم پیدائش 08 فروری 1943

پوشیدہ درد و غم میں معراجِ زندگی ہے

تاریکیوں میں پنہاں دھندلی سی روشنی ہے

دن رات کشمکش میں کیوں میری زندگی ہے

تم سے چھپی نہیں ہے جو میری بے بسی ہے

مہتاب بن کے چمکو تاروں کی انجمن میں

تم خوش رہو ہمیشہ میری یہی خوشی ہے

قربان تم یہ کردوں قلب و جگر میں اپنا

کہہ دو زباں سے اپنی ، خاطر میں جو کمی ہے

کیوں سرد پڑ گئی ہے جام و سبو کی محفل

کیا بات ہوگئی ہے ، ہر سمت خامشی ہے

وہ ہم نوا ہمارے ، ہم خود بھی جب نہیں ہیں

کیوں پوچھتی ہے دنیا ، یہ کون اجنبی ہے

انیس عظیم آبادی

 

حیرت فرخ آبادی

یوم پیدائش 08 فروری 1930

دل دکھانا تمہاری فطرت ہے 

چوٹ کھانا ہماری عادت ہے 

مجھ کو یوں ہی خراب ہونا تھا 

بے سبب تم کو کیوں ندامت ہے 

جھانک کر ایک بار آنکھوں میں 

خود ہی پڑھ لو جو دل کی حالت ہے

 

راہ الفت میں جان دے دینا 

اس سے بڑھ کر کوئی شہادت ہے 

تیری فرقت ہو یا تری قربت 

ایک دوزخ ہے ایک جنت ہے 

تم نے دیکھا ہے ایسے جلووں کو 

کس لیے مجھ سے پھر شکایت ہے 

اس بھروسے گناہ کرتا ہوں 

بخش دینا تمہاری فطرت ہے 

سوئے مے خانہ اٹھ چلے ہیں قدم 

جیسے یہ بھی کوئی عبادت ہے 

زندگی کو سنبھال کر رکھنا 

ایک بے درد کی امانت ہے 

درد ہی درد جس کے شعروں میں 

اور ہے کون صرف حیرتؔ ہے 

حیرت فرخ آبادی 

 

گووند گلشن

یوم پیدائش 07 فروری 1957

منتظر آنکھیں ہیں میری شام سے 

شمع روشن ہے تمہارے نام سے 

چھین لیتا ہے سکوں شہرت کا شوق 

اس لیے ہم رہ گئے گمنام سے 

سچ کی خاطر جان جاتی ہے تو جائے 

ہم نہیں ڈرتے کسی انجام سے 

اپنے من کی بات اب کس سے کہوں 

آئنہ ناراض ہے کل شام سے 

کیا عجب دنیا ہے یہ دنیا یہاں 

لوگ ملتے ہیں مگر بس کام سے 

ایسا کچھ ہو جائے دل ٹوٹے نہیں 

سوچیے گا آپ بھی آرام سے 

مجھ سے پوچھو آنسوؤں کی برکتیں 

مطمئن ہوں رنج و غم آلام سے

گووند گلشن

 

ایوب صابر

یوم وفات 07 فروری 1989

متاع فکر و نظر رہا ہوں 

مثال خوشبو بکھر رہا ہوں 

میں زندگانی کے معرکے میں 

ہمیشہ زیر و زبر رہا ہوں 

شفق ہوں سورج ہوں روشنی ہوں 

صلیب غم پر ابھر رہا ہوں 

سجاؤ رستے بچھاؤ کانٹے 

کہ پا برہنہ گزر رہا ہوں 

نہ زندگی ہے نہ موت ہے یہ 

نہ جی رہا ہوں نہ مر رہا ہوں 

جو میرے اندر چھپا ہوا ہے 

اس آدمی سے بھی ڈر رہا ہوں 

وہ میرے اپنے ہی غم تھے صابرؔ 

کہ جن سے میں بے خبر رہا ہوں

ایوب صابر

زین الدین عادل

یوم پیدائش 06 فروری 1973

مہر و اخلاص سے انسان کا دل ہے خالی

رہ گیا صرف یہاں ہاتھ ملانے کا چلن

زین الدین عادل 

افتخار احمد

یوم پیدائش 05 فروری 1971

مکیں رویا مکاں رویا زمیں روئی زماں رویا

ہوا یوسف جو گم تو کارواں کا کارواں رویا

ندامت کا ہراک قطرہ کرم کااستعارہ ہے

گھٹا رحمت کی ہے برسی وہاں ، عاصی جہاں رویا

ستم ایجاد گلچیں نے یوں طرحِ نو سے گل کترا

ہیں پھیلے برگِ گل پر قطرۂ نم ، آسماں رویا

عجب سفاک حاکم تھا وہ سکھ پاتا تھا دکھ دے کر

وہ گزراجب جہاں سے تو خوشی سے نا تواں رویا

عمر چل کر فلسطینِ مقدس جس گھڑی پہنچے

تھی شاہی پا پیادہ شہ نشیں ، تھا , شتر باں رویا

کہیں سوکھا کہیں طوفاں کہیں بارش کہیں سر سر

کرم کردے خدایا اب جہاں کا ہے جہاں رویا

یہ دنیا ہے ، یہاں ہر شے کو نسبت بس غرض سے ہے

نشاطِ حرص میں آکر ہے عیارِ جہاں رویا

ہوس کاروں کی ہے فطرت کہ رو رو کر بنائیں کام

کبھی ان کی زباں روئی ، کبھی ان کا دہاں رویا

معلم ہوں ، جگا دوں پیاس دانش کی ذرا سا بس

اسی خاطر دعا میں افتخارِ بے نشاں رویا

افتخار احمد

 

فہیم احمد صدیقی

یوم پیدائش 05 فروری 1948

دن كو چھوڑا ہاتھ تھاما رات کا

ہم کو ہے ادراک ترجیحات کا

ہم نے بس خوشبو کو ہرجائی کہا

لگ گیا ان کو برا اس بات کا

آپ ہو تے ساتھ تو کچھ بات تھی

ہے گراں اب سلسلہ برسات کا

توڑ کر تارے ابھی لا تا ہو ں میں

کام ہے یہ میرے بائیں ہاتھ کا

ان کا رخ تم کو اگر ہے موڑنا

جائزہ تو لیجے گا حالات كا

پختہ تر میرے عزائم ہیں فہیم

مجھ کو اندیشہ نہیں ہے مات کا

فہیم احمد صدیقی

اشفاقؔ حیدر

یوم پیدائش 05 فروری 2005

لوگ سارے مر رہے ہیں بھوک سے

چوریاں بھی کر رہے ہیں بھوک سے

مفلسوں کے بچے اپنے گھر نہیں

پل کسی رہ پر رہے ہیں بھوک سے

ہم سبھی غربت کی چکی میں پسے

کام سارے کر رہے ہیں بھوک سے

بادشہ دولت سے جیبیں اور ہم

پیٹ اپنا بھر رہے ہیں بھوک سے

حکمراں اشفاقؔ سب ہیں عیش میں

ہم گزارا کر رہے ہیں بھوک سے

 اشفاقؔ حیدر

 

محمد جمال اجمل

یوم پیدائش 05 فروری 1985

روٹھو گے ماں سے کھاؤ گے ٹھوکر الگ الگ

پھر بولیاں سنائیں گے گھر بھر الگ الگ

کھارا کے ساتھ ساتھ ہی میٹھا بنا دیا

بہتے ہیں ایک ساتھ سمندر الگ الگ

باد خزاں کے درمیاں تنہا میں پھول ہوں 

آتے ہیں میرے پاس ستمگر الگ الگ

ہیں اہل حق ہی سب کے نشانے پہ دوستو

،،خیمے الگ الگ سہی لشکر الگ الگ ،،

بس نام ہی تو بدلے ہیں وہ واردات کے 

چلتے فقط ہمیں پہ ہیں خنجر الگ الگ

احساس ہونے لگتا ہے خطرہ کہیں پہ ہے 

جب میڈیا دکھاتا ہے منظر الگ الگ

اجمل ہماری قوم میں کیسے ہو اتحاد

ہم ہی بنا کے رکھے ہیں رہبر الگ الگ

محمد جمال اجمل