فرح کامران

یوم پیدائش 31 اگست 

اس اعتماد سے رکھا ہے آسماں پہ قدم

کہ اب گری تو میں گر کر سنبھل بھی سکتی ہوں

فرح کامران

 

مشتاق انجم

یوم پیدائش 31 اگست 1955

قہقہے کی موت ہے یا موت کی آواز ہے 

سسکیاں لیتا ہوا اب زندگی کا ساز ہے 

ایک سایہ لڑکھڑاتا آ رہا ہے اس طرف 

دیکھیے تو اک حقیقت سوچئے تو راز ہے 

ریت میں منہ ڈال کر سانسوں کا اس کا روکنا 

چند سکوں کے لئے بچہ بڑا جانباز ہے

سوچ کی منزل کہیں ہے اور آنکھیں ہیں کہیں 

جانتا ہوں کس میں کتنی قوت پرواز ہے 

کس طرح ہوگا بیاں حال دل بیمار اب 

آسماں برہم ہے اور خاموش چارہ ساز ہے 

دور آیا ہے عجب انجمؔ یہاں ہشیار باش 

زاغ ہے مخدوم اور خادم یہاں شہباز ہے 

مشتاق انجم

 

عزیز احسن

یوم پیدائش 31 اگست 1947

شہرِ طیبہ کا ہے دیوانہ نہ جانے کب سے

دل کہ ڈھونڈے ، وہیں جانے کے بہانے کب سے

کوئی دیدار کی صورت نکل آئے آقاؐ 

موت بھی تاک میں بیٹھی ہے سرہانے کب سے

وہ جو بھولے تھے ترا نقشِ کفِ پا آقاؐ

ہو چکے نقش بہ دیوار نہ جانے کب سے

ہم نے دیکھا ہی نہیں عہدِ درخشاں آقاؐ

ہم تو اِدبار کے سنتے ہیں فسانے کب سے

استغاثہ یہ مری سمت سے اس قوم کا ہے

جس کی مظلومی پہ روتے ہیں زمانے کب سے

اب عزیز احسنِ مضطر کا مُداوا کچھ ہو !

غل مچا رکھا ہے اس نوحہ سرا نے کب سے

عزیز احسن

 

امرتا پریتم

یوم پیدائش 31 اگست 1919

نظم سیاست 

سنا ہے سیاست ایک کلاسک فلم ہے

ہیرو ۔۔۔۔۔۔۔۔۔۔۔۔مالک صد صفات

اپنا نام روز بدلتا ہے

ہیروئن ۔۔۔۔۔۔۔۔۔ کرسی اقتدار

وہی رہتی ہے

ایکٹر۔۔۔ راج سبھا اور لوک سبھا کے ممبران

فنانسر۔۔۔۔۔دیہاڑی کے مزدور کمی کسان

(سرمایا لگاتے ہیں , لگوا دیا جاتا ہے)

پارلیمنٹ ۔۔۔۔۔۔۔انڈور شوٹنگ کا مقابلہ

اخبار ۔۔۔۔آوٹ ڈور شوٹنگ کا زریعہ

یہ فلم میں نے دیکھی نہیں

صرف سنا ہے

کیونکہ سنسر کہنا ہے

بالغوں کے لئے نہیں 

امرتا پریتم

 

شیلندر

یوم پیدائش 30 اگست 1923

کچھ اور زمانہ کہتا ہے کچھ اور ہے ضد میرے دل کی

میں بات زمانہ کی مانوں یا بات سنوں اپنے دل کی

دنیا نے ہمیں بے رحمی سے ٹھکرا جو دیا اچھا ہی کیا

ناداں ہیں سمجھے بیٹھے تھے نبھتی ہے یہاں دل سے دل کی

انصاف محبت سچائی وہ رحم و کرم کے دکھلاوے

کچھ کہتے زباں شرماتی ہے پوچھو نہ جلن میرے دل کی

جو بستی ہے انسانوں کی انسان مگر ڈھونڈھے نہ ملا

پتھر کے بتوں سے کیا کیجے فریاد بھلا ٹوٹے دل کی

شیلندر

 

عین الدین عازم

یوم پیدائش 30 اگست 1963

کیا کروں ظرف شناسائی کو 

میں ترس جاتا ہوں تنہائی کو 

خامشی زور بیاں ہوتی ہے 

راستہ دیجئے گویائی کو 

تیرے جلووں کی فراوانی ہے 

اور کیا چاہئے بینائی کو 

ان کی ہر بات بہت میٹھی ہے 

منہ لگاتے نہیں سچائی کو 

اے سمندر میں قتیل غم ہوں

جانتا ہوں تری گہرائی کو 

بیٹھا رہتا ہوں اکیلا یوں ہی

یاد کر کے تری یکتائی کو

کھینچ لے جاتے ہیں کچھ دیوانے

اپنی جانب ترے سودائی کو

اف تماشہ گہ دنیا عازمؔ

کتنی فرصت ہے تماشائی کو

عین الدین عازم

بشریٰ رحمٰن

یوم پیدائش 29 اگست 1944

تیرے ہاتھوں میں پگھل جانے کو جی چاہتا ہے

آتش ِ شوق میں جل جانے کو جی چاہتا ہے

تجھ سے اک راز کی سر گوشی بھی کرنا چاہوں

پھر وہی راز نگل جانے کو جی چاہتا ہے

دل یہ چاہے کہ تِرے دل میں رہوں دل بن کے

پھر اسی دل سے نکل جانے کو جی چاہتا ہے

وحشت آباد مکانوں میں نہیں جی لگتا

شہر سے دور نکل جانے کو چاہتا ہے

ہم سے یہ رسم کی زنجیر بھی کب ٹوٹ سکی

دل کی ضد پر بھی مچل جانے کو جی چاہتا ہے

بشریٰ رحمٰن

اختر خیرآبادی

یوم پیدائش 28 اگست 1949

تجھے دیکھنے کی حسرت ، تجھے چاہنے کا ارماں

مری زندگی کا حاصل مری زندگی کا ساماں

ہے بڑا عجیب ارماں، ہے بڑی عجیب حسرت

کہاں اپنی کم نگاہی کہاں دیدِ روئے جاناں

اختر خیرآبادی

 

 

حسیب علی

یوم پیدائش 28 اگست 1992

تری گلیوں سے چل کر جا رہے ہیں

جبھی تو ہم سنبھل کر جا رہے ہیں

"ہمارا کوئی مستقبل نہیں ہے"

ترے دل سے نکل کر جا رہے ہیں

ستاروں سے تو بہتر ہی ہوئے ہم 

تری قسمت بدل کر جا رہے ہیں

خدا روشن رکھے تا عمر اُن کو

جو ہم سے آج جل کر جا رہے ہیں

وہ واپس ہی نہ آ جائیں کسی دن

کہ مشکل سے بہل کر جا رہے ہیں

بہاریں مانگتے ہیں باغ سے پھر

جو کلیوں کو مسل کر جا رہے ہیں

حسیب علی

سالک ادیب بونتی

یوم پیدائش 28 اگست 1994

رستہ سنبھل سنبھل کے چلو تم نشے میں ہو

اور ہوسکے تو چپ بھی رہو تم نشے میں ہو

مل جائے گی کسی نہ کسی کو کوئی دلیل

دانشوروں سے آج بچو تم نشے میں ہو

ممکن ہے کام آئے گا میرا یہ مشورہ

پانی دیے کے پاس رکھوتم نشےمیں ہو

ہر شخص اعتبار کے قابل نہیں یہاں

یوں حال دل نہ سب سےکہوتم نشےمیں ہو

آئے ہیں میکدے میں بہت سے شریف لوگ

بوتل ذرا پکڑ کے رکھو تم نشےمیں ہو

ہونٹوں پہ کوئی نغمہ سجا کر چلو مگر

یوں زور زور سے نہ ہنسوتم نشے میں ہو

ایسا نہ ہو کہ کوئی تماشا بنا ہی دے  

سالک ادیبؔ حد میں رہو تم نشے میں ہو

سالک ادیب بونتی

صفدر آہ

یوم پیدائش 28 اگست 1903

تنہائی

آگاہ ہوا کذبِ دل آرائی سے

ہوش آیا فریب کھا کے رعنائی سے

میں محفل صد رنگ جہاں بھول گیا

جب ربط بڑھا شاہد تنہائی سے

سطحی ہے زمانے کی رفاقت کا مزہ

جھوٹا ہے یہ احباب کی صحبت کا مزہ

جلوے جلوت کے ہیج ہو جاتے ہیں

پاجائے اگر دل کہیں خلوت کا مزہ

اک ساز سکوں ہے لطف پیمائی ہے

عرلت کی بہار مجھکو راس آئی ہے

دنیا کی محفلوں میں تنہا تھا میں

تنہائی میں کیا انجمن آرائی ہے

زیب و زینت ہے حسن و رعنائی ہے

افکار کی تخلیق میں گہرائی ہے

اک بزم خیالات ہے شاعر کے ساتھ

مت سمجھو میرے گرد تنہائی ہے 

صفدر آہ

سعد اللہ شاہ

یوم پیدائش 28 اگست 1958

یہ جمال کیا یہ جلال کیا یہ عروج کیا یہ زوال کیا 

وہ جو پیڑ جڑ سے اکھڑ گیا اسے موسموں کا ملال کیا 

وہ جو لمحہ لمحہ بکھر گیا وہ جو اپنی حد سے گزر گیا 

اسے فکر شام و سحر ہو کیا اسے رنجش مہ و سال کیا 

وہ جو بے نیاز سا ہو گیا وہ جو ایک راز سا ہو گیا 

جسے کچھ غرض ہی نہیں رہی اسے دست حرف سوال کیا 

ہوا ریزہ ریزہ جو دل ترا اسے جوڑ جوڑ کے مت دکھا 

وہ جو اپنے حسن میں مست ہے اسے آئنے کا خیال کیا 

وہی ہجر رات کی بات ہے وہی چاند تاروں کا ساتھ ہے 

جو فراق سے ہوا آشنا اسے آرزوئے وصال کیا 

کسی اور سے کریں کیوں گلہ ہمیں اپنے آپ سے دکھ ملا 

وہ جو درد دل سے ہو آشنا اسے دنیا بھر کا وبال کیا 

وہی گرد گرد غبار ہے وہی چاروں اور فشار ہے 

وہ جو خود کو بھی نہیں جانتا وہ ہو میرا واقف حال کیا 

اسے سعدؔ کیسا بتائیں ہم اسے کس سے جا کے ملائیں ہم 

وہ تو خود سراپا مثال ہے یہ گلاب کیا یہ غزال کیا 

سعد اللہ شاہ

 

صفدر امام قادری

یوم پیدائش 28 اگست 1965

ہمارے مشترک احساس کا منظر بھلاوا ہے 

یزیدی گردنوں پر خاک اور خنجر بھلاوا ہے 

پرندے گھونسلوں سے دور اب آکاش میں جائیں 

زمیں کی مامتا کیا ہے مقدر گر بھلاوا ہے 

ہم اب کے خشک سالی پر قناعت کر نہیں سکتے 

لہو کی فصل سے دھرتی ہوئی بنجر بھلاوا ہے 

ہماری آنکھ میں ہر روز اک امید لہرائے 

ہماری مٹھیوں میں خواب ہو بہتر بھلاوا ہے 

سڑک کے حادثے میں ہم بھی اک دن ڈھیر ہو جائیں 

یہ غزلیں شعر اور دفتر میاں صفدرؔ بھلاوا ہے 

صفدر امام قادری

امداد حُسينی

یوم وفات 27 اگست 2022

انا اللہ وانا الیہ راجعون

(نظم) کبھی یوں تھا

کبھی یوں تھا ہمارے تھے زمانے

گگن پر چاند سورج اور تارے تھے ہمارے

زمیں پر لہلہاتے کھیت سارے تھے ہمارے

تبسم خیر نظارے تھے اپنے

ترنم ریز جھرنے تھے ہمارے

مچلتی کھلکھلاتی نوجوانی تھی ہماری

ندی میں جو روانی تھی روانی تھی ہماری

دھڑکتی سانس لیتی مسکراتی گیت گاتی

زندگانی تھی ہماری

مگر اب 

کچھ نہیں ایسا

نا ہونا تھا

جسے

سب ہوگیا ویسا

امداد حُسينی

سید خالد معراج

یوم پیدائش 27 اگست 1976

میں موت سے لڑا ہوں، بدن چور چور ہے

آرام سے چلو کہ کفن چور چور ہے

اک قہقہے لگا کہ غم دل کہیں رکے

مدت سے سسکیوں کی چبھن، چور چور ہے

یہ عشق میرے صبر کے ٹکڑوں پہ ہے پلا

اب روح کا سلگتا چمن، چور چور ہے

دل میں اتر رہی ہے یوں معراج کی غزل

اردو زباں سے رنگ سخن ، چور چور ہے

سید خالد معراج

حبیب ہاشمی

یوم وفات 27 اگست 2022

انا اللہ وانا الیہ راجعون 

ایسا کہاں کہ شہر کے منظر بدل گئے 

منظر وہی ہیں صرف ستم گر بدل گئے 

چھوڑو تم انقلاب زمانہ کا تذکرہ 

وہ اور تھے جو حرف مقدر بدل گئے 

حبیب ہاشمی 

کوثر پروین کوثر

یوم پیدائش 27 اگست 1957

تجھ سے ہم عرض کریں اے دلِ شیدا کیا کیا

رنج سہتا ہے تجھے پالنے والا کیا کیا

تجھ کو دیکھا تو کئے میری نظر نے سجدے

یوں تو آنکھوں میں بسے تھے رُخِ زیبا کیاکیا

سرمئی شام سیہ رات گھنیرے بادل

ہم نے پایا ہے تری زلف کا صدقہ کیا کیا

کس کو معلوم تھا آغازِ محبت میں یہ راز

قہر ڈھائے گا محبت کا نتیجہ کیا کیا

کبھی محفل کبھی خلوت کبھی بستی کبھی دشت

خاک چھنواتا ہے وحشت کا تقاضا کیا کیا

کبھی آنکھوں سے لہو ٹپکا کبھی تلوؤں سے

گل کھلاتی رہی پھولوں کی تمنا کیا گیا

پیاس کو تیری سخاوت کا بھرم رکھنا تھا

ورنہ آنکھوں میں چھپے تھے مری دریا کیا کیا

ہوش آیا تو یہ معلوم ہوا اے کوثر

عشق انساں کو بناتا ہے تماشا کیا کیا

کوثر پروین کوثر

سید آصف دسنوی

یوم پیدائش 27 اگست 1966

عجب تضاد ہے سچائیوں سے آگے بھی 

مرا وجود ہے پرچھائیوں سے آگے بھی 

کسی کا حسن فریب‌ نشاط دیتا ہے 

نگار وقت کی انگڑائیوں سے آگے بھی 

چلا ہے تلخ حقائق کا کارواں جیسے 

مرے یقین کی بینائیوں سے آگے بھی 

جہاں وجود بھی خود کو سمیٹ لیتا ہے 

وہ اک مقام ہے تنہائیوں سے آگے بھی 

نہ جانے کیوں مجھے احساس یہ ستاتا ہے 

کہ کوئی اور ہے پرچھائیوں سے آگے بھی 

کوئی سفر میں ہے آصفؔ مرے علاوہ بھی 

مرے وجود کی سچائیوں سے آگے بھی 

سید آصف دسنوی

۔

طالب جوہری

یوم پیدائش 27 اگست 1929

جیسے ہی زینہ بولا تہہ خانے کا 

کنڈلی مار کے بیٹھا سانپ خزانے کا 

ہم بھی زخم طلب تھے اپنی فطرت میں 

وہ بھی کچھ سچا تھا اپنے نشانے کا 

راہب اپنی ذات میں شہر آباد کریں 

دیر کے باہر پہرہ ہے ویرانے کا 

بات کہی اور کہہ کر خود ہی کاٹ بھی دی 

یہ بھی اک پیرایہ تھا سمجھانے کا 

صبح سویرے شبنم چاٹنے والے پھول 

دیکھ لیا خمیازہ پیاس بجھانے کا 

بنجر مٹی پر بھی برس اے ابر کرم 

خاک کا ہر ذرہ مقروض ہے دانے کا 

طالبؔ اس کو پانا تو دشوار نہ تھا 

اندیشہ تھا خود اپنے کھو جانے کا 

طالب جوہری

اظہر ہاشمی

یوم پیدائش 26 اگست 1990

جفاؤں کی نمائش ہے کسی سے کچھ نہیں بولیں 

ستم گر کی ستائش ہے کسی سے کچھ نہیں بولیں 

مجھے تنہائی پڑھنی ہے مگر خاموش لہجے میں 

یہی محفل کی خواہش ہے کسی سے کچھ نہیں بولیں 

مرے افکار پہ بولے بڑی تہذیب سے زاہد 

مقدر آزمائش ہے کسی سے کچھ نہیں بولیں 

یہ جو بے حال سا منظر یہ جو بیمار سے ہم تم 

سیاست کی نوازش ہے کسی سے کچھ نہیں بولیں 

ادھر ہے جام ہاتھوں میں لبوں پہ مسکراہٹ ہے 

ادھر جب خوں کی بارش ہے کسی سے کچھ نہیں بولیں 

ملازم بننا تھا کس کو ملازم بن گیا کوئی 

ہنر زیر سفارش ہے کسی سے کچھ نہیں بولیں 

زباں آزاد ہے جو بھی وہی تو زندہ ہے لیکن 

زباں پہ کیسی بندش ہے کسی سے کچھ نہیں بولیں 

عداوت کی یہاں اظہرؔ جو اک چنگاری اٹھی تھی 

وہ بنتی جاتی آتش ہے کسی سے کچھ نہیں بولیں

اظہر ہاشمی

 

کامل اختر

یوم پیدائش 26 اگست 1946

گرچہ میں بن کے ہوا تیز بہت تیز اڑا 

وہ بگولا تھا مگر میرے تعاقب میں رہا 

مجھ سے کتنوں کو اسی دن کی شکایت ہوگی 

ایک میں ہی نہیں جس پر یہ کڑا وقت پڑا 

اور تاریک مری راہ گزر کو کر دے 

تو مگر اپنی تمنا کے ستارے نہ بجھا 

اب تو ہر وقت وہی اتنا رلاتا ہے مجھے 

جس کو جاتے ہوئے میں دیکھ کے رو بھی نہ سکا 

تم سے چاہا تھا بہت ترک تعلق کر لوں 

جانے کیوں مجھ سے مری جاں کبھی ایسا نہ ہوا 

عمر بھر یاد رہا اپنی وفاؤں کی طرح 

ایک وہ عہد جسے آپ نے پورا نہ کیا 

کوئی سورج تو ملے کوئی سہارا تو بنے 

چاند کا ہاتھ مرے ہاتھ سے پھر چھوٹ گیا

کامل اختر

 

شفا گوالیاری

یوم پیدائش 26 اگست 1912

توڑ کر ہم بے خودی کی حد خودی تک آ گئے 

موت سے کرکے بغاوت زندگی تک آ گئے 

اپنی منزل آپ ہی خود آ رہے ہیں اب نظر 

ہو نہ ہو ہم آج اپنی روشنی تک آ گئے 

اے غم عالم تری اس دل نوازی کے نثار 

تیرے نزدیک آ کے جیسے ہر خوشی تک آ گئے 

کیوں فضاؤں میں نظر آتے ہیں جلوؤں کے غبار 

کیا مہ و خورشید گرد آدمی تک آ گئے 

بجھ رہی ہیں جن کی خاطر عشرتیں کونین کی 

ایسے غم بھی کچھ ہماری زندگی تک آ گئے 

اب محبت کا ہر اک رخ آئنہ بن جائے گا 

آج ہم ان کی نگاہ بے رخی تک آ گئے 

فطرتاً اب ہو چلا انسان فطرت آشنا 

خود گماں سارے یقیں کی روشنی تک آ گئے 

شاعری کی راہ میں کرتے ہوئے روشن چراغ 

اے شفاؔ ہم بھی مقام زندگی تک آ گئے

شفا گوالیاری

کون آ گیا یہ حشر کا ساماں لئے ہوئے

دامن میں اپنے میرا گریباں لئے ہوئے

ہر ایک غم ہے عیش کا عنواں لئے ہوئے

شام خزاں ہے صبح بہاراں لئے ہوئے

سجدہ ہے میرا ذوق فراواں لئے ہوئے

اٹھے گا اب تو سر در جاناں لئے ہوئے

بعد رہائی بھی نہ میں زنداں سے جاؤں گا

بیٹھا رہوں گا عزت زنداں لئے ہوئے

اب بھی نہ خندہ لب ہوں مرے زخم ہائے دل

وہ مسکرا رہے ہیں نمکداں لئے ہوئے

اے چارہ ساز بیٹھ یہ چارہ گری بھی دیکھ

اٹھے گا میرا درد ہی درماں لئے ہوئے

رنگینیٔ تبسم پیہم نہ پوچھئے

جیسے وہ آ رہے ہوں گلستاں لئے ہوئے

ایسا بھی کاش آئے محبت میں انقلاب

وہ آئیں میری دید کا ارماں لئے ہوئے

کیسی بہار آئی ہے اب کے بہ رنگ نو

ہر ایک گل ہے خون شہیداں لئے ہوئے

امکان سہو ہم سے بھی ممکن ہے اے شفاؔ

انسانیت کا ہم بھی ہیں امکاں لئے ہوئے

شفا گوالیاری

ساغر صدیقی

فضائے نیم شبی کہہ رہی ہے سب اچھا

ہماری بادہ کشی کہہ رہی ہے سب اچھا

نہ اعتبارِ محبت، نہ اختیارِ وفا

جُنوں کی تیز روی کہہ رہی ہے سب اچھا

دیارِ ماہ میں تعمیر مَے کدے ہوں گے

کہ دامنوں کی تہی کہہ رہی ہے سب اچھا

قفس میں یوُں بھی تسلّی بہار نے دی ہے

چٹک کے جیسے کلی کہہ رہی ہے سب اچھا

وہ آشنائے حقیقت نہیں تو کیا غم ہے

حدیثِ نامہ بَری کہہ رہی ہے سب اچھا

تڑپ تڑپ کے شبِ ہجر کاٹنے والو

نئی سحر کی گھڑی کہہ رہی ہے سب اچھا

حیات و موت کی تفریق کیا کریں ساغر

ہماری شانِ خود کہہ رہی ہے سب اچھا

ساغر صدیقی

 

آتش اندوری

یوم پیدائش 08 اگست 1977

کاش میں تجھ سا بے وفا ہوتا 

پھر مجھے تجھ سے کیا گلہ ہوتا 

عشق ہوتا ہے کیا پتا ہوتا 

گر پرندوں سے واسطہ ہوتا

بول کے مجھ سے گر جدا ہوتا 

ملنے جلنے کا سلسلہ ہوتا 

بے وفائی کا سرخ رنگ بھی ہے 

عشق میں ورنہ کیا مزہ ہوتا 

خود پہ گر اختیار ہوتا تو 

دور میں تجھ سے جا چکا ہوتا 

حصے میں آتا صرف امیروں کے 

عشق پیسوں میں گر بکا ہوتا

آتش اندوری

علی ارمان

یوم پیدائش 25 اگست 1973

ترے خیال کا نشہ اترتا جاتا ہے 

ٹھہر ٹھہر کے کوئی پل گزرتا جاتا ہے 

بکھرتی ہے مرے چہرے پہ جتنی پیلاہٹ 

اے زندگی ترا چہرہ نکھرتا جاتا ہے 

زمیں کو بھوک لگی پھر کسی تمدن کی 

یہ کون زینۂ عبرت اترتا جاتا ہے 

بتا رہی ہے تھکن تیرے زرد لہجے کی 

ترے لہو میں کوئی خواب مرتا جاتا ہے 

جسے سجانا تھا ارمان اس کی زلفوں میں 

وہ پھول اس کی طلب میں بکھرتا جاتا ہے

علی ارمان

نینا سحر

یوم پیدائش 25 آگست 1966

کیا کرشمہ تھا خدایا دیر تک 

خود کو کھو کر خود کو پایا دیر تک 

چھو کے لوٹا جب تجھے میرا خیال 

ہوش میں واپس نہ آیا دیر تک 

کل کوئی جھونکا ہوا کا چھو گیا 

اور پھر تو یاد آیا دیر تک 

ہم تری آغوش میں تھے رات بھر 

''ماہ کامل مسکرایا دیر تک'' 

کل ترے احساس کی بارش تلے 

میرا سونا پن نہایا دیر تک 

سن کے بھیگی رات کی سرگوشیاں 

اک کنوارا پن لجایا دیر تک

نینا سحر

شبیر احمد قرار

یوم پیدائش 25 اگست 1941

سب سے ہنس کر ہاتھ ملانا سیکھ لیا 

جینا کیا سیکھا مر جانا سیکھ لیا 

دیواروں پر بستی کی اوقات کھلی 

بچوں نے تصویر بنانا سیکھ لیا 

کالی پیلی تفسیروں کی زد پر ہوں 

خاموشی نے شور مچانا سیکھ لیا 

سورج طعنے مارے چندا شرمائے 

راتوں نے کاجل پھیلانا سیکھ لیا 

آہ سفر دم ماں کے آنسو کل کی بات 

اب تو گھر نے ہاتھ ملانا سیکھ لیا 

جانے بوجھے لوگ بھی کل کو روتے ہیں 

وقت نے شاید لوٹ کے آنا سیکھ لیا 

لکڑی کی تلوار کہاں میدان کہاں 

شہزادے نے جان چرانا سیکھ لیا 

شبیر احمد قرار

کالی داس گپتا رضا

یوم پیدائش 25 اگست 1925

جب فکروں پر بادل سے منڈلاتے ہوں گے 

انساں گھٹ کر سائے سے رہ جاتے ہوں گے 

دو دن کو گلشن پہ بہار آنے کو ہوگی 

پنچھی دل میں راگ سدا کے گاتے ہوں گے 

دنیا تو سیدھی ہے لیکن دنیا والے 

جھوٹی سچی کہہ کے اسے بہکاتے ہوں گے 

یاد آ جاتا ہوگا کوئی جب راہی کو 

چلتے چلتے پاؤں وہیں رک جاتے ہوں گے 

کلی کلی برہن کی چتا بن جاتی ہوگی 

کالے بادل گھر کر آگ لگاتے ہوں گے 

دکھ میں کیا کرتے ہوں گے دولت کے پجاری 

روپ کھلونا توڑ کے من بہلاتے ہوں گے

کالی داس گپتا رضا

 

غنی حیدر گنجوی

یوم پیدائش 24 اگست 1924

ہیں کفر کے فتوے تو اوروں کے لیے لیکن

میزانِ شریعت پہ کیا خود کو بھی تولا ہے

غنی حیدر گنجوی

مجیب ظفر انوار حمیدی

یوم پیدائش 24 اگست 1960

حق میری محبت کا ادا کیوں نہیں کرتے

تم درد تو دیتے ہو دوا کیوں نہیں کرتے

کیوں بیٹھے ہو خاموش سرہانے میرے آ کر

یارو مرے جینے کی دعا کیوں نہیں کرتے

پھولوں کی طرح جسم ہے پتھر کی طرح دل

جانے یہ حسیں لوگ وفا کیوں نہیں کرتے

ہر بات پرندوں کی طرح اڑتی ہوئی سی

جو بات بھی کرتے ہو سدا کیوں نہیں کرتے

لو دیکھو حمیدیؔ لب دریا پہ ہے دریا

پر پیاس ہے کب کی یہ پتا کیوں نہیں کرتے

مجیب ظفر انوار حمیدی

 

اشوک ساحل

یوم وفات 24 آگست 2020

اب اس سے پہلے کہ دنیا سے میں گزر جاؤں 

میں چاہتا ہوں کوئی نیک کام کر جاؤں 

خدا کرے مرے کردار کو نظر نہ لگے 

کسی سزا سے نہیں میں خطا سے ڈر جاؤں 

ضرورتیں میری غیرت پہ طنز کرتی ہیں 

مرے ضمیر تجھے مار دوں کہ مر جاؤں 

بہت غرور ہے بچوں کو میری ہمت پر 

میں سر جھکائے ہوئے کیسے آج گھر جاؤں 

مرے عزیز جہاں مجھ سے مل نہ سکتے ہوں 

تو کیوں نہ ایسی بلندی سے خود اتر جاؤں

اشوک ساحل

شاہد نور

یوم پیدائش 24 اگست 1980

مجھے آنکھوں نے جل تھل کردیا ہے

مری مٹی کو دلدل کردیا ہے

مرے خوابوں کو آنکھوں میں سجاکر

کسی لڑکی نے کاجل کردیا ہے

میں اپنی ذات میں اک گلستاں تھا

تری فرقت نے جنگل کردیا ہے

کئی دریائوں نے آپس میں مل کر

سمندر کو مکمل کردیا ہے

مری بچی کی ننھی سے ہنسی نے

مرے آنسو کو صندل کردیا ہے

وہ جب گمنام تھا اچھا بھلا تھا

اُسے شہرت نے پاگل کردیا ہے

فرائض کے تقاضوں نے ہی شاہد

مرے چھالوں کو مخمل کردیا ہے

شاہد نور

حیرت بدایونی

یوم پیدائش 24 اگست 1896

اگر ساقی تسلی بخش سمجھوتا نہیں ہوتا

تو پھر تشنہ لبوں کا جوش بھی ٹھنڈا نہیں ہوتا

جو خود مختارِ گلشن ہیں وہاں ایسا نہیں ہوتا

عَناِدل کی فغاں و آہ پر پہرا نہیں ہوتا

وفورِ عیش سے ہر چند مالا مال ہے لیکن

شعورِ عاشقی انسان میں پیدانہیں ہوتا

وفاداری کے دستورالعمل ہی کو بدل ڈالے

محبت میں کسی کم بخت سے اتنا نہیں ہوتا

جب آتا ہے تو پھر طوفان پر طوفان آتا ہے

نہیں ہوتا تو برسوں فتنہ بھی برپا نہیں ہوتا

غمِ دل سے گراں تر ہے غم ِدنیا ومافیہا

یہ غم پیدا کیا جاتا ہے خود پیدا نہیں ہوتا

تمہیں انصاف سے کہہ دو مسیحا ہو کہ قاتل ہو

کہ ہر بیمار ۔ مر جاتا تو ہے اچھا نہیں ہوتا

غموں کی کوئی حد بھی ہے کہاں تک سختیاں جھیلے

کسی کا دل ہو ۔ دل ہوتا ہے ، پتھر کا نہیں ہوتا

یہاں تفریقی شیخ و برہمن اچھی نہیں ساقی

یہاں کوئی کسی کے خون کا پیاسا نہیں ہوتا

وہ بھی اک پردہ تھاحیرت جسے تم جلوہ سمجھے ہو

جو آنکھوں کو نظر آجائے وہ جلوا نہیں ہوتا

حیرت بدایونی

جیلانی کامران

یوم پیدائش 24 اگست 1926

نظم قسمت کا پڑھنے وال

میرے ہاتھ پہ لکھا کیا ہے 

عمر کے اوپر برق کا گہرا سایہ کیا ہے 

کون خفا ہے 

راہ کا بوڑھا پیڑ جھکا ہے چڑیاں ہیں چپ چاپ 

آتی جاتی رت کے بدلے گرد کی گہری چھاپ 

گرد کے پیچھے آنے والے دور کی دھیمی تھاپ 

رستہ کیا ہے منزل کیا ہے 

میرے ساتھ سفر پر آتے جاتے لوگو محشر کیا ہے 

ماضی حال کا بدلا بدلا منظر کیا ہے 

میں اور تو کیا چیز ہیں تنکے پتے ایک نشان 

عکس کے اندر ٹکڑے ٹکڑے ظاہر میں انسان 

کب کے ڈھونڈ رہے ہیں ہم سب اپنا نخلستان 

ناقہ کیا ہے محمل کیا ہے 

شہر سے آتے جاتے لوگو دیکھو راہ سے کون گیا ہے 

جلتے کاغذ کی خوشبو میں غرق فضا ہے 

چاروں سمت سے لوگ بڑھے ہیں اونچے شہر کے پاس 

آج اندھیری رات میں اپنا کون ہے راہ شناس 

خواب کی ہر تعبیر میں گم ہے اچھی شے کی آس 

دن کیا شے ہے سایہ کیا ہے

گھٹتے بڑھتے چاند کے اندر دنیا کیا ہے 

فرش پہ گر کر دل کا شیشہ ٹوٹ گیا ہے 

جیلانی کامران

 

سعید الزماں عباسی

یوم پیدائش 23 اگست 1923

یہاں درخت تھے سایہ تھا کچھ دنوں پہلے 

عجیب خواب سا دیکھا تھا کچھ دنوں پہلے 

یہ کیا ہوا کہ اب اپنا بھی اعتبار نہیں 

ہمیں تو سب کا بھروسا تھا کچھ دنوں پہلے 

ہمارے خون رگ جاں کی لالہ کاری سے 

جو آج باغ ہے صحرا تھا کچھ دنوں پہلے 

اسی افق سے نیا آفتاب ابھرے گا 

جہاں چراغ جلایا تھا کچھ دنوں پہلے 

ابھی قریب سے گزرا ہے اجنبی کی طرح 

وہ ایک شخص جو اپنا تھا کچھ دنوں پہلے 

جنہیں دریدہ دہن کہہ کے ہونٹ سیتے ہو 

انہیں سخن کا سلیقہ تھا کچھ دنوں پہلے

سعید الزماں عباسی

اکرام کاوش

یوم وفات 23 اگست 2020

نظم قحط پڑا ہے انسان کا 

صدیاں صدیاں بہت گئیں تو بھید کھلا

قحط پڑا ہے انسان کا 

ریت رواج کہاں تک یکساں چلتے

وہ تو بدلتے رہتے ہیں

ان کو گلے کا ہار بنانا ٹھیک نہیں

لحن سحر آگیں میں جب تک گیت سنانے والوں نے

رس گھولا تھا کانوں میں

تب تک روح بھی بالیدہ تھی

دل بھی تھا مسرور بہت

اب یہ حال چوراہے پر شور ہے غل غپاڑہ ہے

آدمیوں کا سمندر ٹھاٹھیں مار رہا ہے

پھر بھی مجھے لگتا ہے 

قحط پڑا ہے انسان کا 

اکرام کاوش

عزیز بانو داراب وفا

یوم پیدائش 23 اگست 1926

پھونک دیں گے مرے اندر کے اجالے مجھ کو

کاش دشمن مرا قندیل بنا لے مجھ کو

ایک سایہ ہوں میں حالات کی دیوار میں قید

کوئی سورج کی کرن آ کے نکالے مجھ کو

اپنی ہستی کا کچھ احساس تو ہو جائے مجھے

اور نہیں کچھ تو کوئی مار ہی ڈالے مجھ کو

میں سمندر ہوں کہیں ڈوب نہ جاؤں خود میں

اب کوئی موج کنارے پہ اچھالے مجھ کو

تشنگی میری مسلم ہے مگر جانے کیوں

لوگ دے دیتے ہیں ٹوٹے ہوئے پیالے مجھ کو

عزیز بانو داراب وفا

زاہد امر

یوم پیدائش 22 اگست 1960

اک بار تو ہو جلوۂ طور آشنا نظر

کعبے کی پھر نہ چاہے زیارت ہو بعد میں

زاہد امر

محمد وسیم مخلص

یوم پیدائش 22 اگست 1989

فنا کے بعد میری باقیاتِ جاں ڈھونڈیں

پسِ حیات مجھے اہلِ دوجہاں ڈھونڈیں

بھلا دیا ہو خود اپنی ضرورتوں نے جنھیں

تو اے امید! بتا وہ تجھے کہاں ڈھونڈیں

کہاں وہ لوگ جو اب داد دیں شجاعت کی

کہ چڑھ کے دار پہ اک اور امتحاں ڈھونڈیں

الٰہی خیر تیرے ناشناس بندوں کی

ترے حضور پہنچ کر بھی یہ اماں ڈھونڈیں

نظر نے حشر سی وہ بے قراریاں دیکھیں

مکیں زمین کے سارے ہی آسماں ڈھونڈیں

دلوں کا زہر فضاؤں میں گھل گیا مخلصؔ

چلو! کہ چل کے خیابانِ لامکاں ڈھونڈیں

محمد وسیم مخلص

 

کویتا کرن

یوم پیدائش 21 اگست 1963

آتے جاتے لوگ ہمیں کیوں دوست پرانے لگتے ہیں 

چاہت کی اس حد پر یارب ہم تو دوانے لگتے ہیں 

پھر سے بہاریں لے کر آئی مہکی ہوئی سی یادوں کو 

آ بھی جاؤ اب ملنے کے اچھے بہانے لگتے ہیں 

دل کرتا ہے پھر سے دیکھوں کھوئے ہوئے اس منظر کو 

پیاسی آنکھوں کو وہ نظارے کتنے سہانے لگتے ہیں 

خوشبو وہی ہے رنگ وہی ہے آج وفا کے پھولوں کا 

آپ کیا آئے پھر سے چمن میں دن وہ پرانے لگتے ہیں 

ٹوٹی ہوئی سی ایک کرنؔ ہے کافی اندھیرے والوں کو 

گھر میں اجالا ڈھونڈھنے والے گھر کو سجانے لگتے ہیں

کویتا کرن

سرفراز زاہِد

یوم پیدائش 21 اگست 1987

نَعتِ رَسُولِ صلی اللہ علیہ وسلم

فریاد رَس ہُوں نَعتیہ اَشعار کے لئے

سِیرت پڑھوں میں آپ کے اَفکار کے لئے

دِل مُضطرب ہے روزِ اَزل سے مِرا حُضُور

جَنَّت مِثال کُوچہ و بازار کے لئے

قَلب و نَظر کا نُور ہے طیبہ کی خاکِ پاک

ذَرّے ہیں اِس کے دِیدہ ء بیدار کے لئے

دِل میرا صِدقِ عِشقِ مُحمّد کا ہے گواہ

میری زُباں ہے آپ کے اِقرار کے لئے

سب کُچھ ہے اُن کے واسِطے پیدا کیا گیا

ُ ُ ُ سب کُچھ ہے دو جہان کے سردار کے لئے ٗ ٗ

عِشقِ رَسُولِ پاک کا بازار سج گیا

کیا کُچھ یہاں نہیں ہے خرِیدار کے لئے 

زاہِد نَبی کی نَعت نگاری کے واسِطے

قُرآن پاک دیکھ لو مَعیار کے لئے

سرفراز زاہِد

ظہیر کاشمیری

یوم پیدائش 21 اگست 1919

لوح مزار دیکھ کے جی دنگ رہ گیا 

ہر ایک سر کے ساتھ فقط سنگ رہ گیا 

بدنام ہو کے عشق میں ہم سرخ رو ہوئے 

اچھا ہوا کہ نام گیا ننگ رہ گیا 

ہوتی نہ ہم کو سایۂ دیوار کی تلاش 

لیکن محیط زیست بہت تنگ رہ گیا 

سیرت نہ ہو تو عارض و رخسار سب غلط 

خوشبو اڑی تو پھول فقط رنگ رہ گیا 

اپنے گلے میں اپنی ہی بانہوں کو ڈالیے 

جینے کا اب تو ایک یہی ڈھنگ رہ گیا 

کتنے ہی انقلاب شکن در شکن ملے 

آج اپنی شکل دیکھ کے میں دنگ رہ گیا 

تخیل کی حدوں کا تعین نہ ہو سکا 

لیکن محیط زیست بہت تنگ رہ گیا 

کل کائنات‌ فکر سے آزاد ہو گئی 

انساں مثال‌ دست تہ سنگ رہ گیا 

ہم ان کی بزم ناز میں یوں چپ ہوئے ظہیرؔ 

جس طرح گھٹ کے ساز میں آہنگ رہ گیا

ظہیر کاشمیری

معین احسن جذبی

یوم پیدائش 21 اگست 1912

مرنے کی دعائیں کیوں مانگوں جینے کی تمنا کون کرے 

یہ دنیا ہو یا وہ دنیا اب خواہش دنیا کون کرے 

جب کشتی ثابت و سالم تھی ساحل کی تمنا کس کو تھی 

اب ایسی شکستہ کشتی پر ساحل کی تمنا کون کرے 

وعدے کی وفا تم سے نہ ہوئی گو جان پہ میرے بن ہی گئی

گر جھوٹا ہوں جھوٹا ہی سہیاب تم کو جھوٹا کون کرے

ہاں وادیءایمن بھی ہے وہی ہاں برق کا مسکن بھی ہے وہی

اور خوش کا خرمن بھی ہے وہی ،پر ان سے تقاضا کون کرے

جو آگ لگائی تھی تم نے اس کو تو بجھایا اشکوں نے 

جو اشکوں نے بھڑکائی ہے اس آگ کو ٹھنڈا کون کرے 

دنیا نے ہمیں چھوڑا جذبیؔ ہم چھوڑ نہ دیں کیوں دنیا کو 

دنیا کو سمجھ کر بیٹھے ہیں اب دنیا دنیا کون کرے

معین احسن جذبی

عبداللہ ندیم

یوم پیدائش 20 اگست 1969

چراغ جل بھی رہا ہے ہوا کا ڈر بھی ہے

مری دعاؤں پہ لیکن تری نظر بھی ہے

گھروں کو پھونکنے والے ذرا یہ دیکھ بھی لے

اسی گلی میں سنا ہے کہ تیرا گھر بھی ہے

میں گھر سے نکلوں تو بے خوف ہو نکلتا ہوں

کہ میری ماں کی دعا میری ہم سفر بھی ہے

ابھی سے فتنۂ دنیا سے ڈر گئے یارو

ابھی تو فتنۂ افلاک کی خبر بھی ہے

اسی کے پیار سے روشن ہے زندگی میری

اسی کے پیار سے لیکن بہت سا ڈر بھی ہے

ندیمؔ آس میں بیٹھے کہ پھر سے جی اٹھیں

کہ اس کے ہاتھ میں سنتے ہیں یہ ہنر بھی ہے

عبداللہ ندیم

فراز پیپل سانوی

یوم پیدائش 20 اگست 1975

کس درجہ انتشار ہمارے وطن میں ہے

ہر پھول اشک بار ہمارے وطن میں ہے

کیسی خزاں کی مار ہمارے وطن میں ہے

سہمی ہوئی بہار ہمارے وطن میں ہے

جتنا بھی چاہو لوٹ لو سرکاری مال ہے

لوگوں کا یہ وچار ہمارے وطن میں ہے

کر کے مدد غریب کی لیتا ہے سیلفی

ہر شخص غم گسار ہمارے وطن میں ہے

ہر سو تنا تنی ہے مذاہب کے نام پر

ماحول خوش گوار ہمارے وطن میں ہے

سلفا، شراب ، گانجا ، چرس اور افیم بھی

ہر چیز بے شمار ہمارے وطن میں ہے

اک بار چڑھ کے سر سے اترتا نہیں کبھی

سٹّے کا وہ خمار ہمارے وطن میں ہے

کچرے سے بھی نصیب ہیں لاکھوں کو روٹیاں

ہر سِمت روزگار ہمارے وطن میں ہے

سر پر ہو کوئی بھوت یا سایہ ہو جنّ کا

ہر چیز کا اتار ہمارے وطن میں ہے

کچھ ہو نہ ہو یہاں پہ مگر یار یہ تو ہے

نیتاؤں پر نکھار ہمارے وطن میں ہے

مشہور ہے جگاڑ یہاں کا جہان میں

ہر شخص ہوشیار ہمارے وطن میں ہے

چیونٹی بھی جنکی پھونک سےنہ اڑسکی کبھی

ان کا بھی اب مزار ہمارے وطن میں ہے

چھوتے ہیں پاؤں گولی چلانے سے پیشتر

کچھ ایسا ششٹاچار ہمارے وطن میں ہے

جو جھوٹ بولتا ہے ہر اک بات پر سدا

اس پر بھی اعتبار ہمارے وطن میں ہے

مِل جُل کے لوگ رہتے ہیں ایسے میں بھی فراز

آپس میں کتنا پیار ہمارے وطن میں ہے

فراز پیپل سانوی

 

عابد رشید

یوم پیدائش 20 اگست 

جہاں میں کھیل ہے جتنا سب اعتماد کاہے

یہ تیرا میرا تقابل تو اُس کے بعد کا ہے

بھُلا نہ پاتے جو کل کیسے دیکھتے کل کو

یہ وقت کا نہیں سارا کمال یاد کا ہے

زمین سے بھی میں اِک دن نکالا جاؤں گا

مری زُباں کو جو چسکا نئے سواد کا ہے

‎

تھمے جو داد کے جھکڑ تو ہم نے یہ جانا

سفیدا بالوں میں جتنا ہے گرد باد کا ہے

یہ دل میں آرزو یونہی جنم نہیں لیتی

قصور سارا تمہارے وعیدووعد کا ہے

جو تُو نہ ہو تو یونہی ڈولتا سا رہتا ہوں

‏‎ہمارا رشتہ عجب بادبان و باد کا ہے

‎

نہ جاگتے ہیں نہ سوتے ہیں میرے شہر کے لوگ

ہمیشہ دھڑکا سا دل میں نئے فساد کا ہے

میں بیج خوابوں کے بوؤں نہ کیوں وہاں عابد

وطن سے رشتہ ہی کچھ ایسا اعتماد کا ہے

عابد رشید

 

سید پاشاہ رہبر

یوم پیدائش 20 اگست 1964

عشق ناچار اور ہے مجبور 

اس لئے حسن ہو گیا مغرور 

رہ نہیں سکتا آپ سے میں دور 

مجھ کو بانہوں میں تم کرو محصور 

جانے کس بات کا نشہ ہے انہیں

اپنی دھن میں ہی رہتے ہیں مخمور 

تیری قربت کا ہی اثر ہے یہ

میرے رخ پر جو آ گیا ہے نور 

اس کی نظروں میں سب برابر ہیں 

کوئی مالک نہ کوئی ہے مزدور 

بخش دیں یا کہ عمر قید ملے

فیصلہ جو بھی ہو ہمیں منظور 

سب کو آزادی ہے برابر کی

کہہ رہا ہے یہ ہند کا دستور 

دن تمام اپنا خوں بہاتا ہے

دو نوالوں کے واسطے مزدور 

کیا کرشمہ ہے آج میڈیا کا

پل میں گمنام بھی ہوئے مشہور 

جان لیوا وہ درد دیتا ہے

زخم جب جب بھی بن گیا ناسور 

کیوں بچھڑ نے کے بعد بھی 'رہبر

غمزدہ ہم ہیں اور وہ مسرور 

سید پاشاہ رہبر

 

احمد صغیر صدیقی

یوم پیدائش 20 اگست 1938

اک خواب ہے یہ پیاس بھی دریا بھی خواب ہے 

ہے خواب تو بھی تیری تمنا بھی خواب ہے 

یہ التزام دیدۂ خوش خواب بھی ہے خواب 

رنگ بہار قامت زیبا بھی خواب ہے 

وہ منزلیں بھی خواب ہیں آنکھیں ہیں جن سے چور 

ہاں یہ سفر بھی خواب ہے رستہ بھی خواب ہے 

یہ رفعتیں بھی خواب ہیں یہ آسماں بھی خواب 

پرواز بھی ہے خواب پرندہ بھی خواب ہے 

ہیں اپنی وحشتیں بھی بس اک خواب کا طلسم 

یارو فسون وسعت صحرا بھی خواب ہے

احمد صغیر صدیقی

تابش صمدانی

یوم پیدائش 20 آگسٹ 1941

ہر اک جانب ہے جلوہ روشنی کا

وہ گہوارہ ہے طیبہ کی روشنی کا

فروغِ ذاتِ والا اللہ اللہ

دو عالم میں ہے چرچا روشنی کا

مرے مولا کا سایہ ڈھونڈتے ہو

کہیں ہوتا ہے سایہ روشنی کا

یہ اعجازِ نگاہِ لطفِ مولا

مرا دل ہے مدینہ روشنی کا

گزر ہو کیا اندھیروں کا وہاں پر

جہاں رہتا ہے پہرا روشنی کا

ظہورِ سیدِ والا سے پہلے

تصور ہی کہاں تھا روشنی کا

شہِ والا کا ہر نقش کفِ پا

زمیں پہ ہے ستارہ روشنی کا

نظر ہے آپ کی جس دل پہ تابش

وہ ہے آئینہ گویا روشنی کا

تابش صمدانی

کامران احمد

یوم وفات 19 اگست 2015

نظر تک آیا ہے پہچان تک نہیں آیا 

یہ واہمہ ابھی امکان تک نہیں آیا 

جراحت غم دوراں کی ابتدا کہیے 

دل جہاں زدہ پیکان تک نہیں آیا 

وہ اور بات کہ جاں کی امان مانگی تھی 

میں اس کی بیعت و پیمان تک نہیں آیا 

بس اس کے لمس کا الہام ہی اترتا ہے 

وہ میرے مصحف وجدان تک نہیں آیا 

یہ زندگی تو نفی میں گزار دی میں نے 

پر اس کے حلقۂ میزان تک نہیں آیا 

کتاب حسن کی تعبیر خیر کیا کرتا 

ندیمؔ آئنہ عنوان تک نہیں آیا

کامران احمد